距離Mega Box一條馬路嘅商業大廈樓下，原來隱藏左一間稻香集團旗下酒樓。聽聞此店嘅大廚仲參加過唔少電視廚藝比賽，來頭唔少。雖然晚餐仲未食過，但試過唔少次茶市，感覺良好。

咸水角拼香煎蘿蔔糕

咸水角炸得幾脆，中間嘅餡料都唔少，味道適中，夠香、夠惹味。而蘿蔔糕食落唔太粉，有粒粒嘅白蘿蔔，滲透住蝦米、臘腸嘅香味，非常足料。

柚子雲吞盞

雲吞炸得超級酥脆，中間有蝦仁等材料，略嫌內餡唔夠豐富。喺酥炸雲吞之上，加上柚子沙律。沙律係一般常見嘅鮮雜果，加上清爽嘅柚子果肉，可以中和炸物嘅熱氣感。

格子紅白腸

呢度嘅腸粉都算OK，幾滑身、有米味，腸粉附上豉油、甜醬同麻醬，歡迎隨便混醬。

脆網紅米腸

呢款腸粉係人氣創作菜式，腸粉染左紅色，佢話用左紅米，但味道同一般白腸粉分別不大。中間嘅餡就非常好味，係炸蝦卷。蝦卷外皮炸得超鬆脆，中間係非常新鮮彈牙嘅蝦肉。一軟一脆包埋一齊，幾似炸兩腸粉嘅豪華版。只需沾少許甜豉油，已經非常好味。

剁椒蒸魚雲

剁椒應該係辣椒，加上少許豆豉同蒜蓉，用黎蒸魚雲。魚雲蒸得相當入味，每啖魚都充滿住蒜同辣椒嘅香味，夠濃、夠香，一啲都唔腥。

貢苗海蝦餃 

餃皮係一般常見透明、煙韌嘅澄麵皮，包住大大隻鮮蝦同菜苗，新鮮熱辣、清甜好味。

白花玉子豆腐
玉子豆腐加上蝦膠，再配上蛋白芡，又滑又爽口。

晶瑩棗茸糕
一上枱已經棗香撲鼻，口感極為煙韌，紅棗味香濃，少甜版亦夠健康。

脆米西施泡飯 ($88)
呢款係家人極力推薦之選。係海鮮魚湯泡飯，再加上炸脆米。材料十足之餘，玩味亦十足。魚湯鮮甜到不得了，口感幼滑，好忌廉咪，再加上少許芫茜提味，好味得全碗清空，一滴不留。配料有蝦、帶子、魚肉、草菇等，每款海鮮都鮮味十足，爽口彈牙。最後自行灑上脆卜卜的炸飯粒，幼滑得黎，夾雜香脆，口感一流。

幾次四個人去飲茶，人均消費大約四十幾蚊，真係超抵食。正價點心$20至$50，其實唔平。但由於位處商業區，假期反而人流更少，所以星期六、日同公眾假期有超優惠價錢，所有點心七折，小點只不過$14.5，大點都係$21.5。假日仲有點心優惠組合，四款點心加埋只需$56，同一般點心專門店差唔多價錢。而且呢個集團嘅酒樓最興免茶芥、免加一，計落條數相當抵。呢度除左地點有啲唔方便之外，環境真係非常舒服、地方闊落，仲有開放式廚房，俾你睇晒廚房嘅一舉一動，感覺更加乾淨衛生。怕等位都唔緊要，可以預先電話訂枱，去到後通常等多三、兩張枱就可以安排到入座。所以呢度已經成為我地一家假期飲茶嘅頭號選擇。除左家人聚餐之外，近排都興約埋班老友飲茶聚舊，貪佢坐得舒服仲hea得耐，仲好過去Cafe。

東哥點心籠仔蒸飯專門店@荃灣
24/6/2012 14:00
 

食完雞蛋仔，先去食正餐，因為呢個團購只適用於下午兩點後。兩點黎到，原來呢間舖勁多人，門口堆滿等位嘅客人。咁多客，仲洗做團購? 團購餐$17包一款點心加一款腸粉，可以再加其他點心，兩個人食得飽飽。

東哥蝦餃皇 ($19)

蜜汁叉燒腸 ($15)
腸粉比較黏身，唔算薄，但餡料幾多，叉燒配埋芫茜，味道幾香，豉油都幾香甜。

蟹籽燒賣皇 ($15)

米網炸兩腸 ($18)
白腸粉皮包住火網炸蝦春卷，幾脆口，而且啲蝦都幾爽口，唔錯。

蒜蓉蒸蝦飯 ($35)
終於黎到全餐嘅重點，大籠蒸飯，原來$35真係好大籠。一打開籠蓋，一陣蔥蒜味撲鼻，真係好香。飯面舖左七、八隻大蝦，蝦吸收晒蒜香味，可惜蝦唔新鮮，蝦肉比較霉。飯蒸得乾身，粒粒分明，除左蔥蒜，再加埋甜甜地嘅豉油，同埋蝦嘅甜味，呢個飯認真唔錯。

香煎蘿蔔糕 ($10)
又粉，又碎，又無料，講完。

百醬蒸鳳爪 ($14)

沙茶蒸牛肚 ($16)
醬料幾夠濃味，幾香，OK。

此餐用左兩張優惠券，另加一個飯，三個點心，團購優惠仲免茶芥，最後補番$75，全餐總數$109。點心一般，價錢一般抵。溫馨提示，如果唔食蒸飯，唔洗特登黎。如果特登黎的話，記得去隔離英皇廣場嘟一嘟發達通，搭地鐵平兩蚊。

廣州點心皇@佐敦
20/5/2012 19:30

對上一次黎佐敦食點心係一年前嘅事，仲記得係團購廿幾蚊食三個點心做下午茶。一年後又做團購，今次$75食八款點心。晚餐黎食，除左八款點心之外，仲自費叫多三樣野，食個飽飽。

蘿蔔絲春卷
兩條春卷炸得非常香脆，一咬開，脆皮就爆裂，可見春卷皮又薄又脆。中間內餡澎湃，不過係清一式白蘿蔔絲，味道都幾好嘅，但略嫌悶場，而且好似有陣油味，惟有狂加喼汁浸死佢。

炸雲吞

雲吞夠大隻，外皮一樣炸得脆。皮同內餡嘅比例唔過份，起碼中間真係有蝦肉餡。唔似得有啲地方，雲吞就大大隻，炸皮超大塊，咬極都未食到啲餡。呢隻雲吞係鮮蝦雲吞，中間嘅蝦仁非常爽脆，配埋甜甜酸酸嘅醬汁正好。

蜜汁叉燒腸
腸粉係傳統式厚實版本，粉皮超厚，仲係粉粉地。煙韌尚可，但勁痴牙，質感較為糊口。中間嘅叉燒似乎香味不足，非常結實，認真麻麻。

鳳爪排骨飯
呢度嘅蒸飯係原盅裝飯，再放入籠仔之中。鳳爪有半隻腳，排骨就幾多件，味道都唔錯。飯蒸得夠乾爽，粒粒分明，可惜餸菜嘅味道未能滲入飯中，似係飯熟左後，就咁放材料上去。不過呢度嘅豉油的確好味，相信係小店特製，味道甜香，撈飯一流。
 

淡水鮮蝦餃皇

上次都試過呢款蝦餃皇，其實都係OK的，皮略為厚身，相當煙韌黏口。蝦夠多，啖啖蝦肉，而且非常新鮮爽口。不過就無常見嘅筍尖，味道唔夠豐富。

蟹皇蒸燒賣 ($18)

燒賣可算係我最鍾意嘅點心，呢個燒賣啖啖肉，非常結實爽口。肉同蝦都係超大件，真材實料，而且唔肥膩，唔錯。

潮州蒸粉粿 ($13)
潮州蒸粉粿出左名塊皮比一般點心厚，不過呢度嘅粉粿皮比一般嘅仲要厚身，簡直厚到離晒譜，相當煙韌黏口。好彩皮厚餡料亦唔少，有齊花生、蝦米、蘿蔔絲、粉葛、芫茜等，口感豐富，相當飽滿。不過似乎同街邊三蚊一粒分別唔大。
 

古法馬孻糕

呢個馬孻糕係細細個圓形整個上，唔係切件版。質地都算鬆軟，味道微甜，可惜唔夠香。

流沙奶皇包 ($18)

本來想叫菠蘿包，點知菜單應該更新左，好似唔多覺，最後叫左個奶皇包做甜品。一咬開鬆軟嘅包皮，奶皇餡就爆發出黎，流沙程度可觀。奶皇餡夠香，仲混合左鹹蛋黃嘅味道同沙沙嘅口感，唔錯。

凍紅豆糕、杞子桂花糕

套餐包括兩款凍糕點，紅豆糕椰汁味可以，不過啲紅豆勁硬，而且冇乜味道可言。杞子桂花糕就唔錯，非常香甜清爽，充份表現到杞子同桂花嘅香味。
 

團購套餐$75，加埋另叫嘅三款點心，總數$124。今次試多左幾款點心，發現都係傳統嘅籠蒸點心稍為好啲，其他就一般啦。不過最吸引就係，呢度每款點心嘅價錢唔貴，仲要免加一，都算抵食。不過，對比一年前嘅團購優惠，原來團購都通脹左一成七，你睇物價高脹得幾厲害，團購也加價。

 

土瓜灣嘅食街北帝街慢慢變得為人熟悉，所以連帶附近地區都越開越多食肆。今次就去新開三個月嘅點廚軒試菜，半價買到$100現金劵，食午餐夠晒數。

星州炒蘿蔔糕 ($28)

XO醬炒蘿蔔糕就試得多，今次可以試星州版。材料同星州炒米差唔多，有蛋絲、青椒、芽菜等，以少許咖哩提味，味道少辣。蘿蔔糕應該係炸過，外皮實實地，食落結實唔散，但同一般平價蘿蔔糕一樣，粉多，蘿蔔味不足。

芝心炸蝦丸 ($22)

呢款似乎係小店味自慢作品。三粒大大粒嘅炸蝦丸，外皮脆卜卜，炸粉唔厚，炸得夠乾身，唔油膩。一咬開蝦丸，芝士醬就唧出黎。芝士比較杰身，係微咸勁濃香嘅芝士味，好配合非常彈牙爽口嘅新鮮蝦膠，唔錯，值得推薦，但只係粒蝦丸，唔包括個醬。唔明點解佢會跟個柚子醬，味道有少少苦澀，同芝士蝦丸唔太夾，不沾也罷，淨食已足夠。

招牌流沙包 ($14)

話明係鎮店招牌美食，點都要俾面試下。雖然係新鮮即整熱辣辣，但包面好似唔多平滑，仲有爆口情況出現。食落包皮都算幾鬆軟，哎開包皮就有餡流出，仲好燙口。內餡甜度適中，味道濃郁，口感沙沙粉粉，似乎奶黃混合左咸蛋黃煮成流沙餡，所以色澤較鮮橙色，亦比一般嘅香濃。

點廚蝦餃皇 ($18)

一籠三大粒，粒粒都脹卜卜，外皮晶瑩剔透，睇到鮮蝦嘅橙紅色。皮略為厚少少，但入口非常煙韌黏口，內餡有三大隻蝦，味道非常鮮甜，口感好爽脆，屬高質素作品。

冬菇燒賣皇 ($18)

大大粒燒賣好飽滿，口感非常爽口結實，似乎用左唔少豬肉，仲有大蝦同冬菇粒，幾夠香味，調味亦唔錯。

豉汁蒸排骨 ($18)

成碟排骨係絕對無任何配菜墊底，包保全碟都係真材實料。最鍾意排骨有肉又有骨，肥瘦適中，入口幾爽甜，亦有輕微辣味，可惜豆豉味唔夠。

除左點心之外，餐牌仲有唔少炒粉麵飯、小菜煲仔，並唔係正宗淨飲茶食包嘅點心專門店，但茶錢照收，$3一位，好彩全日免收加一，埋單總數$124，團購價$74，食得飽飽。此店嘅點心都算唔錯，有一般點心專門店水準，味道中上，價錢合理。可惜位置唔太方便，眼見多數做緊樓上樓下街坊生意，所以都有唔少熟客仔幫襯。咁岩行過的話，都不妨一試。

小店茶餐廳格局，茶餐廳式經營，所以仲有電視睇。更得意嘅係，電視係播緊J2台，仲咁岩中午時間係日本節目。食緊蝦餃嘅時候，睇住日本音樂節目，聽住日本歌，感覺好神奇。不過算啦，邊有咁岩，原來下一個節目係月之戀人。木村~~~!!

添好運點心專門店@中環
25/12/2011 18:30

同添好運嘅緣份似乎情訂喺每年嘅十二月二十五日聖誕夜。無心插柳，2010年同2011年嘅聖誕節都喺添好運食中式點心過節。今次仲有團購支援，$60可以當$120現金使用，去試一試中環站嘅新分店。

酥皮焗叉燒包 ($18)

選擇得添好運，唔點招牌叉燒包的話，咁不如唔好黎。新鮮熱辣、圓轆轆嘅叉燒包有墨西哥酥皮，呢個酥皮鬆化到不得了，甜甜地，正好配合叉燒包。叉燒餡好濃郁，甜甜蜜蜜，仲有唔少叉燒粒，唔會用叉燒醬黎欺騙食客。而且餡料絕對唔少，叉燒餡基乎要湧出黎，真係回味無窮。

美味鮑汁鳳爪 ($25)
一般點心舖多數提供豉汁鳳爪，呢度竟然搞新意思，用鮑汁處理。鮑汁味道係好，甜甜地，鳳瓜都夠入味，但最大問題係煮得唔夠腍，皮黏骨，唔太咬得開，麻麻咋喎。

沙律蝦春卷 ($18)

聽聞此店會經常轉換春卷款式，今次食到沙律蝦春卷。春卷外皮勁脆，脆得黎唔油膩，內餡都好豐富，有明蝦，仲有唔少雜果沙律，味道唔錯。

蜜味叉燒腸 (20)
腸粉睇落夠晶瑩剔透，但食落個皮就好一般，感覺粉粉地，比較鬆散，亦唔夠滑，餡料亦唔太多，好普通，都係大埔好食啲。

晶瑩鮮蝦餃 ($22)
呢度嘅蝦餃係一口大小，細細粒。個皮一般，食落有少少黏牙，蝦算爽口，鮮味都ok，都係一般啦。

鮮蝦燒賣皇 ($22)

賣相麻麻地，無乜色水，同宣傳照片相差十萬九千里遠。材料正常，有蝦同豬肉，仲有冬菇等材料，食落都算爽口，調味適中。唔算出色，同其他地方差唔多。

埋單計埋茶錢，總數$131，用團購券找數，實價$71。七十零蚊嘅價錢，我完全收貨。但正價的話，除左招牌叉燒包之外，其他點心嘅吸引力似乎稍遜。香港站係第三間分店，從裝修、格局黎睇，似乎偏向走快餐路徑，感覺唔點心。速食點心上菜速度勁快，我對「即叫即蒸」呢個服務抱有懷疑。唔知係唔係速食原故，除左招牌叉燒包之外，每款點心都好一般。而且價錢明顯比九龍兩店貴，可能港島掛。

惟一可取之處係，等位時間一定比九龍店短。黃昏六點幾時份，根本唔洗等位，只係七點鐘開始出現人龍。而且提供嘅點心有少許唔同，可以試新野。此店亦提供外賣服務，如果想外賣新鮮叉燒包的話，都值得嘅。

前篇參考
25/12/2011
朝拜點心名店，嗒一口「好~美~味~呀~~」驚喜叉燒包

一盅兩件不再限於酒樓同點心專門店，年青人大膽創業，喺深水埗開設點心快餐店，先用團購提高人氣，三十蚊一位，可以任點任食多款點心同蒸飯，仲包一杯飲品，一個字抵!

有十四款細籠仔點心同四款蒸飯選擇，無限量任叫，當然唔客氣第一輪已經全部試一次。

1. 鵪鶉蛋燒賣﹕ 一盅一件嘅鵪鶉蛋燒賣，外型唔錯呀，一大件份量唔細，但蒸得比較乾身，鵪鶉蛋都收乾水，而燒賣略嫌太實，但調味還可以。

2. 山竹牛肉球﹕ 圓圓一大粒牛肉就好一般，好粉口，無乜牛味。

3. 南瓜牛骨髓﹕ 非常少見嘅一道點心，唔多覺有南瓜味，反而蒜味道較濃，牛骨髓夠腍，但我唔多鍾意食。

4. 蟹子伴燒賣﹕ 一盅兩件嘅燒賣，唔好睇佢平平地以為無餡，用魚肉燒賣黎呃人，原來入面真係足料，而蝦都爽口大隻，燒賣亦有肉味，唔錯，拍得住一般酒樓水準。

5. 四寶滑雞扎﹕ 足料，有火腿、雞、芋頭等，雞夠嫩滑，可以接受。

6. 蠔油鮮竹卷﹕ 完全唔知邊度有蠔油，但勝在夠足料，有齊木耳、蘿蔔、西芹、肉碎等，大大條味道都幾好。

7. 豉椒蒸排骨﹕ 全場最好食嘅一味，encore左多次。排骨有骨有肉，半肥瘦，而且有肉味，用少許豆豉蒸煮都夠好味。份量又唔少，雖然係細籠，但件頭不比酒樓嘅少，超水準完成。

8. 清蒸鮮蝦餃﹕ 夾起蝦餃時已發覺餃皮穿左，食落皮太厚粉，而且只得細細隻蝦仁，竹筍比較多。

9. 豉汁蒸鳳爪﹕ 一盅有三隻，調味味道剛好，鳳爪夠入味，又夠腍。

10. 香菇棉花雞﹕ 正常水準，棉花夠爽滑，幾大塊厚身，而雞都算滑，好足料。

11. 香茜白肉餃﹕ 似蔬菜餃多啲，個皮好粉，連個餡中間亦係粉嘅，唔得。

12. 柱候牛孖根﹕ 牛根超入味，又腍，又黏口，柱候味夠濃，分分鐘好味過啲粉麵檔。

13. 奶皇水晶包﹕ 唔知係唔係放耐左吹凍晒，個水晶皮好似塑膠咁硬，中間得少少奶皇。

14. 叉燒包﹕ 同一般叉燒包味道唔同，唔知有乜材料。

兩個人總共叫左四十籠點心，除左個別兩、三款唔掂之外，大部份點心都係正常水準。三十蚊任食當然舉腳俾笑臉。參考正價的話，可愛嘅細籠點心一盅一件大約五蚊雞，正常版就大路價錢約十幾蚊一籠。小店亦有套餐提供，三十幾蚊一個餐，可以選擇一碗盅頭飯、三款點心，仲包一杯飲品，的的確確係快餐價。

平時飲茶多數都係去酒樓或者新興嘅點心專門店，年青老闆們將飲茶文化結合快餐，提供左另類選擇。而家都唔知道呢條係財路定死路，但幾欣賞佢各款點心都係新鮮製作，快餐的話應該唔會係即叫即蒸，但每籠點心都係熱辣辣出晒煙，而味道亦保持應有水準。

小店創新嘅諗頭，值得欣賞。飲茶食點心唔再指定只可以揀水仙、香片定普洱茶，你想飲奶茶、咖啡，定係可樂、雪碧?