深圳卓越Intown 29/9/2024 18:00
點評抽到零元探店，麵屋豬一份拉麵套餐。一碗拉麵加可爾必思，另外再買一個一人套餐，一碗拉麵加中華海草 48元。
主打豚骨湯拉麵有四款湯底，揀咗豚骨王，墨王拉麵。
豚骨王係豬骨濃湯，白白嘅湯底，入口非常之順滑，豬骨味香濃。拉麵揀咗偏硬，口感煙靭，叉燒薄薄的，幾香甜。溏心蛋印咗可愛嘅公仔，蛋黃做得不錯，可惜蛋白略嫌不夠醬油味道。拉麵配料都係應有盡有，而呢個價錢嚟講相當抵食，仲有啲豚王嘅影子。
另一款係黑色拉麵，似乎加咗墨魚汁同芝麻，味道更加鹹鮮，蒜蓉味更加香，係一款更加重口味嘅湯底。
每位奉送一粒日式大福，作為餐後甜品。隨餐嘅中華海草都非常清涼，可爾必思非常解膩。
呢間分店環境明顯較闊落，仲有四人枱可以坐。
深圳新洲 29/9/2024 17:00
抽到大眾點評0元探店，開發一個新嘅站點，從來未嚟過呢個小區，沙尾站落咗車之後都仲要行10分鐘。小店就係一個籃球場小巷嘅後邊，一個神秘嘅後花園咁。餐廳內外裝修好有格調，好多打卡位，非常靚。正中間就有個大大嘅月球，不論光或暗都好，整個佈局都好靚。
今次送嘅套餐係一份自選貝果加芝士醬及飲品。另外再單點一個貝果三文治套餐（88元）。老闆娘見我哋有額外消費，自動幫我哋將普通咖啡升級做特飲。
入座就送上一份餐前小食，桂花蜜糖車厘茄。車厘茄非常新鮮，滿滿果汁再充滿着蜜糖嘅甜味，蜜糖還帶一點桂花香，估唔到呢個配搭咁好食。
葡萄肉桂貝果配巧克力黑芝麻奶酪醬：暖暖嘅貝果口感煙煙韌韌韌，帶肉桂香，仲有唔少提子乾，非常適合小朋友嘅口味。黑色醬料實在太濃郁，充分食得出朱古力、黑芝麻、芝士三者味道。貝果塗上醬料後，完全係另一道料理，滋味無窮。
萬物生長抹茶生椰拿鐵：上枱一刻完完全全展示出萬物生長嘅自然生態。飲品嘅味道都相當不錯，草系抹茶粉味道香濃，木系朱古力亦係濃郁口味。飲得出咖啡都係精選過，似乎係店方推薦嘅巴西之光咖啡，口感非常幼滑，味道香濃，有牛奶巧克力嘅味道，帶一點夏威夷果仁嘅香氣。呢杯仲加上椰香味同埋抹茶味。賣相好得之外，味道仲非常驚喜。
美式超級雙拼三文治：三文治嘅斷面非常吸引，呢個揀咗芝麻貝果，貝果面層芝麻非常多。漢堡扒大大片，肉汁豐富，加咗塊類似薯餅嘅東西喺中間，有香脆嘅口感，仲有好多新鮮蔬菜，菠蘿帶一點酸甜清爽，醬汁充足，貝果中間好濕潤，非常之豐富嘅三文治。另外仲有一小碗粟米粒，非常香甜。
貝果甜心熱可可：朱古力味相當濃郁，上邊仲有一層厚厚嘅鮮奶舖，仲加咗薄脆，非常好味。
深圳南頭古城 29/9/2024 14:00
鴨屎香檸檬茶 26元
超大杯！超正！
檸檬味夠濃，茶底又香，夠凍，又解渴。
南頭古城 29/9/2024 11:30
大眾點評套餐 178元
前菜有薯泥沙律非常綿密，味道不錯。麻醬豆腐，豆腐質地實淨，中間又滑，麻醬清爽。足足食咗三碟。
章魚小丸子同奶油可樂餅似乎係預制品，不過勝在熱辣辣，醬汁配料都俾得足夠。煎餃子外皮香脆，中間係菜肉餡。
有兩款壽司味道非常好，鰻魚壽司同埋火炙蟹柳壽司每款兩件，一啖一粒，火炙蟹柳味道對板，加咗蛋黃醬火炙燒過。
主菜壽喜燒鍋賣相不錯，估唔到肥牛都有咁多塊，下面仲有好多豆腐青菜，再加埋爽滑烏冬。壽喜燒汁係偏甜醬油口味，調味都適中。
開心果冰奶24元：飲得出淡淡開心果嘅果仁味。
點評lv6 專享福利，送一份唐揚炸雞，炸粉薄薄地，啖啖肉。加埋蜜糖芥茉醬，酸酸甜甜。
環境非常有日式風格，港式口味嚟講味道算不錯。小店收埋喺古城小巷之內，要細心查找。
深圳南頭古城 29/9/2024 11:00
黎到南頭古城，一個非常值得打卡部嘅甜品，知道下午係排晒隊，所以唔介意早啲嚟食。就試齊兩款招牌產品。
人魚瑪奇朵（草莓味）38元
實物同相片100% match，美人魚曲奇餅唔單止靚靚，入口脆卜卜蛋香味濃。士多啤梨味雪糕亦相當不錯，奶香，酸甜味道平衡，口感奶滑。
雲朵冰淇淋 （希臘酸奶味）28元
賣相靚，真係做到雲朵嘅感覺。非常濃郁嘅酸奶味，奶香味濃，酸甜適中，非常清爽，口感幼滑。
價錢一啲都唔平，但係賣相同埋味道都係相當好，當係旅遊區嘅一個必買甜品。
唐記包點@馬鞍山 28/9/2024 12:00
今次唐記包點出嘅Hello Kitty聯乘主題靚到不得了。
紅棗木瓜雪耳糖水 $22: 今日買埋Hello Kitty唐記的木瓜雪耳糖水，相當滋潤，不太甜，味道不錯。
Hello Kitty蓮蓉包 $20: 精美嘅包裝， Hello Kitty麵包都係非常完整。蓮蓉內餡味道不錯。
Hello Kitty蝦餃盒 $25: 另一款係粉紅色嘅蝦餃，非常吸睛。被略為厚身，但係蝦餃餡味道不錯。
紙盒同埋膠袋都好值得收藏。最後買埋一套主題餐具$48 大滿足。
