by admin 5 月 5, 2024 | BB Friendly , 九龍灣 , 甜品 , 西餐
九龍灣Megabox 5/4/2024 12:30
預祝母親節，搵左呢一間非常之Fancy嘅餐廳，餐廳環境非常之靚，餐牌亦非常之吸引。
綠野仙蹤意大利飯 $102﹕綠色底飯似係加左西蘭花，飯黏黏的，甜道香甜，仲有三粒帶子。
漆黑中的海鮮意大利飯 $115﹕黑底飯係墨魚汁飯，咸鮮味，仲有好多海鮮料。
粉紅吞拿魚貓耳朵粉 $128﹕賣相非常靚，意粉質地不錯，告拿魚厚切肉質實淨。
傳統卡邦尼意粉 $108﹕芝士味勁濃，咸香味十足。
甜蜜芋泥獨角獸梳乎厘 $168﹕一上枱實在太吸睛。梳乎厘好鬆軟，空白感十足，蛋味幾香。淋上厚厚嘅芋泥，粉紫色實在大愛，用彩虹棉花糖砌成獨角獸，好夢幻。
Lotus海鹽焦糖法式吐司 $88﹕吐司脆卜卜，勁香甜，加上海鹽焦糖，帶輕微咸香，不錯。
綿綿獨角獸沙冰 $68﹕非常可愛嘅飲品，飲品本身有漸層，係芋泥味沙冰，上面有一層鮮忌廉，再用左棉花糖砌成獨角獸。
環境靚到不得了，食物賣相靚，值得打卡，味道都算不錯。可惜就係其實餐廳一啲都唔Baby Friendly，話有BB high hair原來全店只有一張，其他係縛椅式比較適合大B的。兒童餐具欠奉，請自行準備。雖然驚喜係即日都可以訂位，但最後明明一行5大4小，居然只俾一張四人檯。眼見同場仲未坐滿，普遍都係3人坐四人檯闊落，當然唔期望可以坐8-10人枱，但我地就迫埋一張四人枱，舒適度係大大扣分，相當失望。
by admin 4 月 28, 2024 | BB Friendly , Blog , 中菜 , 深圳 , 甜品
深圳領展中心城 28/4/2024 11:30
今次大众点评抽中一個非常正嘅二人餐，近近地就喺領展中心城嘅吳莊。中式門面，入邊裝修到好有風味，一個個卡位好似小包箱咁。
入座送上熱茶之外，仲有每人一碗雞蛋布丁，非常幼滑，有蛋味。
二人餐看似得幾樣餸，但係其實份量相當多，足夠四個人有餘。
酸梅汁 28元：估唔到一樽裝估計真係比1公升裝，四個人飲都非常足夠。味道夠濃，不錯。
石鍋豆腐19元：店員貼身建議可以做不辣版本，連小朋友都岩食。豆腐真係滑到不得了，醬汁香濃，放喺熱鍋上，熱到不停冒泡。
砂煲扁豆絲 34元：非常之夠鑊氣，扁豆切得好幼，好新鮮而且冇根。醬汁有肉碎等，好味咸鮮味，好惹味。
酸菜魚 78元：終於有機會試國內嘅正宗酸菜魚。非常大嘅一盤酸菜魚，份量澎湃。魚片非常多，每件都好滑，無骨。酸菜湯底，花椒味重帶微辣，伴菜仲有好多金菇，不錯。
麵包誘惑 33元：賣相非常之吸引，高高嘅麵包塔，原來高塔中空用雪糕堆滿，奶味香濃。麵包焗得香脆，好味。
環境，服務甚佳，食物味道非常高質素，係一個好高質素嘅霸王餐。正價都唔算貴，唔怪得咁多人排隊食。
by admin 4 月 21, 2024 | BB Friendly , Blog , 中菜 , 深圳 , 西北菜
深圳中航城君尚 21/4/2024 17:30
又抽中大眾點評零元探店。今次試呢一餐自己一定唔會俾錢食嘅湖江菜，只係貪佢幾高級，環境幾舒服，姑且試一次。
提子青檸汁：非常之大枝，提子味幾香，酸酸甜甜幾開胃。
蠶豆米拌鮮腐竹：作為一個餐前小食，冷盤，麻油味幾香，腐竹幾好味。
蕃茄絲瓜滑肉：非常多絲瓜，蕃茄，肉片幾滑，湯底係蕃茄湯帶好輕微辣味，撈飯也不錯。
沔陽蒸牛肉：就好似一個打碎咗嘅肉餅，仲有啲澱粉質，夾雜咗一絲絲牛腩，輕微辣味，味道可以，但有啲油。
蠶豆米燒蝦球：大量譚豆煮小龍蝦，醬汁非常辣，小龍蝦都好多，但個人興趣不大。
楚采櫻花糕：賣相非常靚，淺粉紅色嘅花形狀糕點。饅頭包住中間粉紅色醬汁，都食得出花香咪味道，非常特別。
呢一餐自己一定唔會俾錢食，每樣菜式對個人嚟講都非常獨特，試過一次就算。
by admin 4 月 21, 2024 | BB Friendly , 兒童餐 , 深圳 , 甜品 , 西餐 , 麵包
深圳萬象天地 21/4/2024 12:00
今日落大雨，打斷咗原定嘅計劃，轉場去萬象天地試吓呢一間人氣高嘅西餐廳。位置就係平台半戶外位置，選擇坐喺開機長枱，環境相當闊落，寫意。
精選親子brunch 258元
兒童餐：卡邦尼意粉、炒蛋、薯條、橙汁。卡邦尼意粉奶香味濃味道不錯。
慢煮牛腹肉三文治：份量非常澎湃，三文治鬆軟，中間夾咗好多唔同嘅配料，牛肉、生菜，醬料等等配合得宜。薯條新鮮即炸，粗身啖啖肉。
奶油草莓鬆餅：賣相討好，鬆餅係比較實淨嘅熱香餅，厚度十足，蛋香味牛油味濃。士多啤梨非常多，仲有士多啤梨醬同埋奶油，整體配合得好好，非常飽肚。
海鹽奧利奧蛋糕：估唔到呢件蛋糕咁大件，鬆軟嘅朱古力蛋糕，中間加咗鹽味奧利奧醬，再灑上餅碎。
卡布奇諾：咖啡味道不錯。
冰搖桂花烏龍茶：冰涼，味道比較清淡。
環境舒服，套餐非常豐富，賣相又靚，味道不錯，估唔到咁飽肚，非常滿足。
by admin 4 月 1, 2024 | 2024 復活節六人行台北之旅 , BB Friendly , 兒童餐 , 台北 , 西餐
Movenpick Cafe@慶城街 1/4/2024 13:00
12:30 離場，決定返酒店附近食，時間掌握得好啲。點知棋差一著，無考慮時間已經12點幾。手頭寫左幾間有興趣的，天仁茗茶已入滿坐，行去慶城街春水堂都係滿座。無諗過訂位的重要性，無台灣電話號碼嘅旅客訂位亦比較麻煩，差啲冇飯食，下次醒目一定要叫酒店幫忙。
最後遇到MOVENPICK。本身餐廳都話無位，可能見到我地一家大細又旅遊，最後好好地安排左張六人枱俾我地，實在太感謝。
櫻桃鴨胸芥子義大利麵 NT$348: 鴨胸意大利麵，冇乜特別。
普羅旺斯燉菜雞肉焗飯 NT$318: 熱辣辣忌廉汁焗飯，材料都好豐富，充滿着芝士，雞肉都好多。
商業午餐附送番茄湯、香蒜包、蜂蜜檸檬汁，份量幾多，好抵食。
香蒜焗烤田螺 NT$170: 熱辣辣，蒜味足，芝士十分多。
松露焗蛋佐荷蘭醬 NT$220: 非常豐富嘅焗蛋，加上松露香味。
海陸總匯披薩 NT$330: 大大個Pizza充滿着海鮮配料，芝士味十足。
兒童餐揀左奶油蘑菇雞肉燉飯、湯、橙汁 NT$260: 賣相幾靚，非常豐富。
埋單連加一NT$1811, 份量多，正正常常的西餐。
by admin 3 月 31, 2024 | 2024 復活節六人行台北之旅 , BB Friendly , 台北 , 台式 , 麵食 , 點心
31/3/2024 16:00
原訂今日下午去郵政博物館，出到捷運站突然落大雨行雷，大風大雨到完全行唔到，最後只係附近便利店抖一抖，決定取消呢個行程，改去行商場。見有時間，返酒店有放低啲手信先。
轉場去忠孝復興商圈，途中發生小插曲，原來細佬跌左隻鞋仔，問左SOGO客服搵左一輪，原來跌左係捷運站月台，唔覺意留有歷史記錄。
今日咁多蝦碌，就食餐好。呢度最出名就係鼎泰豐。去到取票，職員已話預計等兩小時。平時食飯一聽到呢個時間係從來唔會有興趣繼續等。幸好中午餐火鍋好夠頂肚，決定照排。
中間時間周圍行，去商場行下Daiso掃貨，樓上兒童部仲有得坐車車，有位座，可以休息一陣。
鼎泰豐 31/3/2024 20:00
行左個半鐘左右，大約8點就去番附近，點知去到票號去得好快，坐多一陣已經到號。係店門外先放BB車。安排坐係長梳化位，六個人坐都好闊落。揀咗幾款必吃菜式。
小籠包 NT$150 : 賣相好靚，粒粒都白白滑滑，咬落真係多汁，皮薄，肉餡甜甜的。
雞肉小籠包 NT$150: 比較原味的話呢個較淡口。
蝦肉煎餃 NT$230: 外皮煎得好脆 ，加左薄薄粉漿，餃子中間蝦肉好爽口，香甜。
菜肉餛飩湯 NT$170: 皮較為厚，清淡口味
油豆腐細粉 NT$160: 清淡，細粉幾滑。
菠菜腐竹 NT$310
紅燒半筋半肉麵 NT280: 湯底幾香，帶微辣，牛展肉味幾濃，麵條粗身有咬口。
排骨蛋炒飯 NT$280: 飯炒得乾爽，蛋味香，排骨肉比較實，味道濃。
蝦肉紅油抄手 NT$210: 醬甜辣最惹味，蝦肉抄手皮薄肉甜，不錯。
連加一 NT$2134
服務非常好，有專屬服務員照顧，跟進上菜速度，見我地食得慢，主動幫忙要求減慢。味道的確不錯，價錢實惠。但如果都要等位真係要等成兩個鐘，除非已經安排空檔好活動，否則好難吸引要再來。
