by admin | 3 月 30, 2024 | 2024 復活節六人行台北之旅, BB Friendly, 中菜, 台北, 台式, 旅遊, 素食
不葷主義@南京復興 30/3/2024 19:45
今晚晚餐完全未Plan過，印象中酒店附近都唔少野食，首選係呢間素食專門店，Google評分高達4.9分，係台中相當知名的素食餐廳，更被譽為「素食界鼎泰豐」。原來全場做訂位，但無辦法訂，只能取後補籌，職員話都要等大半小時。等左一陣，經理話有客訂左檯無黎，可以安排我地入座，有感覺經理見我地係遊客，有特別安排，實在太感恩。
座位係半圓型梳化卡位，六人坐都好舒服。餐廳環境清雅，係比較新潮嘅素食店。菜單全素食，估唔到菜色選擇都咁多。
絲瓜湯包 NT$130﹕不愧為有素食界鼎泰豐名譽，著名嘅湯包出品勁有保證。除左皮薄，估唔到素食都可以做到咁湯汁豐富，中間係絲瓜絲好香味。
松露炒飯 NT$350﹕香氣十足，炒飯乾身，蔬菜加上松露等材料，非常好味。
糖醋雞丁 NT$320﹕賣相吸引，醬汁酸酸甜甜，素雞煮得香口，入口真係非常似肉，有汁又好味。
桂花魚翅 NT$450﹕初頭唔知係什麼東西，原來係用煲上，大量蔬菜炒菇類加上素翅，仲有雞蛋炒碎，香氣十足，味道有層次。
客家煎豆腐 NT$320﹕豆腐有豆味，煎得香口入味，加上好多薑絲，香香辣辣。
淡淡的幸福 NT$350﹕原來係蛋主題嘅料理，職員仲好細心，幫我地將七味粉分開，唔怕辣親小朋友。原來係將蛋白同蛋黃分開烹，再加入菇菌配料同醬汁，杰杰地，充滿濃烈蛋味，非常飽足，唔到簡簡單單咁好味。
花生豆花 NT$80X2﹕台灣傳統甜品，豆花豆味濃，花生煮得腍晒，清爽不甜。
埋單連加一NT$2,431，唔算平，但味道的確不錯，亦相當有驚喜，估唔到素食都可以咁出神入化。而且服務超級好，職員親切友善，非常關心每枱的用膳情況，亦細心考慮小朋友的需要，實在非常周到。怪不得人氣咁勁。
by admin | 3 月 30, 2024 | 2024 復活節六人行台北之旅, BB Friendly, 台北, 港式, 飲品, 點心
點點心台北微風廣場 30/3/2024 10:00
微風廣場有幾邊電梯上落，等十點正開門，遇岩前面嘅電梯係最早開，最快上到上層，好快就搵到早餐無目點點心。
小心港式風情，點心選擇都幾多，熱辣辣，新鮮即製，賣相都可以。
蟹子燒賣皇 NT$138﹕蝦夠彈牙幾新鮮，豬肉同蝦比較不錯。
晶螢鮮蝦餃 NT$148﹕彈牙新鮮，調味幾好。
脆皮鮮蝦腸 NT$148﹕好似腸粉皮包住春卷，雜菜春卷脆卜卜。
黑椒刺蝟叉燒包 NT$118﹕可愛造型，原來中間係叉燒包，內餡非常熱，叉燒都幾多，調味甜中帶微辣，好惹味。
海苔酪梨咸小角 NT$128﹕賣相精美可愛，中間係咸小角，炸皮脆脆地煙煙韌韌，同平時食開嘅味道差不多。
豬仔流沙包 NT$138﹕最出名嘅可愛流鼻水豬仔，餐單仲教你點樣整出鼻水。包皮幾鬆軟香甜，中間的確好流心，奶黃勁熱，味道幾香蛋黃味。
多士脆鮮奶 NT$128﹕多士包住鮮奶拎去炸，外皮炸得好熱氣，鮮奶幾甜。
奶油焗白菜 NT$138﹕奶油味好香，奶味濃郁，菜煮得好腍，用上西式食法又加左勁多芝士，估唔到咁好味。
埋單連加一NT$1,192，飲茶黎講唔算特別平，味道算不錯，算特色。
泉發蜂蜜 30/3/2024 11:00
飲完茶買杯飲品拎上高鐵飲，大大杯蜂蜜檸檬綠茶只係NT$70，非常抵飲。檸檬底非常夠味，夠新鮮，夠酸，蜂蜜都好濃甜，配合得宜。
by admin | 3 月 29, 2024 | 2024 復活節六人行台北之旅, BB Friendly, 兒童餐, 台北, 台式, 旅遊, 日式料理
魔法咖哩 29/3/2024 18:00
淡車站旁就係都會廣場，樓上有好多餐廳，揀左呢間台灣品牌魔法咖哩，因為有兒童餐，仲有靚海景窗口位。
起司可樂餅兒童奶油飯、奶酪、花果冰茶 NT$190﹕兒童餐非常豐富，奶油飯奶味香濃，甜甜地好好味。可樂餅脆脆中間係蔬菜忌廉。隨餐跟奶酪，酸酸甜甜夠清爽。
焗烤雞肉奶油飯 NT$290﹕焗飯熱辣辣，雞肉都幾滑，啖啖肉，奶油香再加上厚厚芝士焗，味道更香更入味。
歐姆蛋牛肉咖啡飯 NT$280﹕咖哩香料味重，好有層次，味道幾特別，牛肉都幾有牛味。蛋都幾滑。
三色咖哩豬肉烏龍麵 NT$340﹕除左香料味重嘅黃咖哩，仲有咸香味微辣墨魚汁，而白咖哩味道比較軟和。咖哩配上炸豚肉，炸菇估唔到咁好食。烏龍麵本身無乜味，自行用咖哩汁撈住食就可以。
升級套餐珍菇雞肉湯，舒肥雞胸沙拉、紅豆抹茶凍、泰式奶茶 NT$120﹕湯有菇味，好清爽。抹茶凍幾幼滑，有茶味。
水煮綜合蔬菜配黃咖哩 NT$140﹕蔬菜賣相幾靚，幾新鮮，又係白煮所以要自行加汁。
咖哩味道幾濃，唔太岩個人口味，感覺上奶油飯更好食。
埋單NT$1496，價錢唔貴。
by admin | 3 月 29, 2024 | 2024 復活節六人行台北之旅, BB Friendly, 主題樂園, 台北, 旅遊, 甜品
29/3/2024 13:00
食飽飽時間尚早，天氣又曬又熱，知道海濱長廊有間觀海7-11，坐低食個小甜品先。7-11有兩層，樓上係全海景座位，冷氣又夠，可以當係中途休息站。買左幾個甜品試下，非常抵食。統一布丁三盒裝只係 NT$30，蛋味夠濃，又滑，最緊要夠凍，咁抵食無投訴。另外仲買左黑糖豆花、杏仁豆腐。士多啤梨甜品杯有層次，有慕絲、蛋糕、士多啤梨等，材料好多。
卡滋爆米花觀光工廠 29/3/2024 14:00
台灣有好多觀光工廠，今次八里就有一間非常之有趣嘅爆米花主題工廠。
Klook買左家庭套票，門票每張$61，包張門票再送一枝公仔造型筆，扣除平台優惠每張門票$58左右。另外即場散買一張票係NT$250，幼兒免票。每張門票已經包含NT$50消費金額，有得玩有得食有得買，真係非常抵。每票仲送一小包爆谷試食裝。
已預約當日2pm場次，由小六哥哥導賞，哥哥介紹好風趣生鬼，又成日派禮物。平日來基本上無乜人，一開始只得我哋六人包場，開始左冇幾耐後先有兩家庭加入。
都想介紹爆米花製作過程之外，仲可以即場試食多款口味爆米花，真係非常新鮮，而且無乜硬殼位，調味夠濃味道足，質量真係不錯。抹茶蘋果特別好味。
DIY 環節，材料乾淨企理，工作人員教整爆米花造型手飾，仲有創作甜品杯。做法非常簡單，又好玩。
最後使用門票尾足足NT$250消費金額係廠入買左限定口味。抹茶蘋果，可可口味，每包NT$100。尾數再買枝公仔筆NT$38。
以六十幾蚊一個人有得食有得玩，玩足個半鐘，有得拎打包又有禮物，呢度真係好好嘅親子景點。
by admin | 3 月 29, 2024 | 2024 復活節六人行台北之旅, BB Friendly, 台北, 台式, 旅遊
張吳記什錦麵 29/3/2024 12:00
搜尋八里美食，就出現呢間「台灣第一碗」。未到12點，餐廳已經大半滿，人氣非常勁。似乎係家庭式經營，老闆娘好多時一腳踢。GOOGLE評分4.1分，有好多傳媒報導佢超大碗公麵，係非常出名嘅排隊名店。店內見到超大大碗模型，12人份量超大一碗。
什錦湯麵 NT$120﹕招牌菜，清清淡淡，湯頭幾甜，麵質煙韌，有大蝦、菜、豬肝等材料。
什錦炒米炒 NT$120﹕湯粉嘅走湯版，新竹米粉比較粗身有口感。
熱炒時蔬 NT$ 100
東北角小卷NT$260﹕份量勁多，小卷只係簡單白煮，再沾上咸甜醬油，按個人喜好仲可以加Wasabi，食法好新奇，食得出小卷好新鮮鮮生。
蒜泥鮮蚵NT$220﹕鮮蚵又係白煮，粒粒大大粒非常飽滿，入口好鮮甜，份量幾多，仲加左勁多蒜泥，好惹味。
香煎海鮮餅 NT$150﹕海鮮餅煎得香口，類似蝦膠加入好多蔬菜料，口感清爽，好味。
可樂NT$30、開喜烏龍茶NT$70
埋單NT$1,070。平價的一餐，雖然唔算特別好食，但滿滿台味，另有一番味道。小店人手不多，已見盡力做好招待，都請客人合作。離開時見外面排晒隊，可見人氣真係非常勁。
by admin | 3 月 28, 2024 | 2024 復活節六人行台北之旅, BB Friendly, 台北, 台式, 旅遊, 飲品, 麵包
貓懶 28/3/2024 18:00
貓空有好多餐廳，都係自家經營，遍佈成個山頭。因為有大有細，擔心太夜山路漆黑，所以揀餐廳一定要近纜車站，最後就揀左呢間四爺品牌嘅貓懶。距離纜車站只係2至3分鐘腳程，一座大大嘅三樓村屋改裝成私房菜形式餐廳。先經過二樓就係四爺，宮廷式裝修太豪華，而三樓天台改裝半戶外位置就係貓懶。職員有提醒過今日天氣比較悶熱，但一上到黎個景觀已經值回票價。還好天氣唔算熱，間中有自然風，算幾舒服。
我地坐最外圍嘅一張八人大枱，靚景盡在眼前，可算一覽無遺。始終係戶外地方，枱椅都封塵係絕對理解，亦無投訴。餐廳提供台式料理，菜式選擇都好多，亦有好多茶飲。落單後好快就上菜。
鐵觀音鮮奶茶 NT$220﹕以一壺上配細杯細幾特別，份量都唔少，斟極都仲有。鐵觀音茶香味濃，奶味配合得宜，熱飲更有味道。
五彩小饅頭 NT$180﹕人氣必點一品，新鮮熱辣可愛小饅頭，有綠茶紅豆、南瓜、燕麥、芝麻、紅莓味，口感鬆軟，味道香，小朋友十分鍾意。
金字塔茶炒飯 NT$290﹕金字塔形做得好公整，炒飯炒得乾身有茶油，有蛋、蘿蔔等簡簡單單。
鐵板牛柳 NT$330﹕牛有牛味，帶好輕微辣，但口感比較韌，似乎熟左少少。
茶燻雞 NT$380﹕雞肉幾滑，有好香煙燻嘅味道，唔知呢種係咪就係茶燻。
蝦醬炒空心菜 NT$200﹕味道足夠。
茶人茶溪蝦 NT$300﹕ 原來係炸得好脆嘅蝦仔，真係非常香脆，個殼仲有少少硬，下面舖滿炸米粉，送飲品應該不錯。
全餐連加10%服務費，埋單NT$2,090。之前係Klook搵到優惠$98可以作NT$500消費金額，即差不多八折，最後一共買左四張。扣除現金券後補差價NT$90，實價即係港幣$98X4+$22.5 = $414.5。
全餐飯見證日落到天色變暗，最後全黑仲伸手不見五指。入夜後枱上只開左一盞小燈透出一絲絲光，好有情趣。黑到連餸都睇唔清楚，的確係幾難忘嘅體驗。餐廳環境一流，觀景一流，入夜後見到山下燈光。食物算可以，夜景無價，反正係香港絕無可能有呢個體驗。
