日本家庭式拉麵@上水
麺家山下@上水
5/5/2013 13:00
叉燒拉麵 黑蒜湯底加蛋 ($70)
DX拉麵 黑蒜湯底($70)、年糕芝士餅 ($20)
湯底清爽香甜有豬骨味，油份唔重，有輕微黑蒜味，湯底幼滑有膠質感，一飲而盡，亦唔覺口渴。拉麵幼滑，蛋勁流心，薄切叉燒香甜。出品並非濃郁到爆，但整個配搭得宜，好有日本家庭式風味，不錯。
由日本夫婦加BB女用心經營，落單請用簡單中文、英文，最好使用日文。
排隊三十分鐘，都算值得。
福音窩心甜品
彩虹甜品屋 @上水
12/2/2012 16:00
12/2/2012 16:00
上水區難得被受支持嘅甜品舖，連頭條搵食雜誌都有介紹過，佢話甜品夠誠意，兼夠溫情。
益力多綿綿冰 ($35)
自選綿綿冰，冰底有六款選擇，一於試下一般甜品舖少見，食客們首選冰底，益力多味，再貪得意揀埋啲唔拉家、平時少見嘅配料。碟上綿綿冰份量唔少，冰底打得算靚，一絲絲嘅薄片，結實唔易溶，已經好過好多甜品小店。入口一試，益力多味道勁超濃，根本就係成枝益力多雪成冰嘅原汁原味，似乎無加太多水，所以無過份冰感，入口即溶，抵讚。粉紅透明色嘅蒟蒻粒帶微甜，有好輕微酸味，唔知係唔係士多啤梨? 口感煙韌，幾得意。芒果得三片，略嫌太少家，好彩酸酸甜甜，芒果味夠濃。綿綿冰配椰汁糕真係第一次見，老實講，獨立食一粒味道唔錯嘅，夠滑身，但配綿綿冰真係有啲怪。
愛心甜品 ($33)
一入到舖頭，見每枱客人都有一、兩個椰皇，店內瀰漫住椰香，所有揀左一款凍椰皇試一試。所謂愛心甜品，係椰皇加荔枝雪米糍，仲浮游左一啲大、小西米同蒟蒻等，乜都有。椰皇汁味道好清甜，凍冰冰，非常解渴。配上紅色皮嘅荔枝雪米糍，原來唔錯。雪米糍中間係雲尼拿雪糕，外皮吸收晒椰皇汁，兩者已經融合一體，雪米糍除左有荔枝、雲尼拿味，仲有淡淡椰香，實在驚喜。蒟蒻刻意做成可愛嘅心形，入口煙韌微甜，加埋爽口嘅大、小西米，非常豐富。當然唔好忘記，要清埋椰皇裡面清甜新鮮嘅椰肉!
原個椰皇外殼畫上哈哈笑，配上色彩繽紛嘅餐紙巾，明白到此店受歡迎嘅原因。食甜品除左可以滿足甜胃之外，可愛又窩心嘅甜品，更會令人心情暢快，實在係女士們最愛。老實說，此店價位喺北區黎講算貴，但仍有大班支持者。相信除左有部份人係共同背景外，小店嘅親切同誠意，亦加分唔少。
北上尋青森
青森二丁目@上水
28/1/2011 12:30
平時出街玩，好多時都係去油尖旺，灣仔銅鑼灣等潮流地帶。上水，一個唔正常嘅出街目的地，冇幾何會去。上水搵食，唔計集團霸權嘅連鎖餐廳，多數都係細細間傳統冰室、茶記、粥粉麵飯檔。
難得一間企理嘅日式料理，可愛嘅店名，令人諗起香甜嘅青森蘋果。
叉燒拉麵 & 咖哩雞扒飯
一個set lunch用你三十零四十蚊，有飲品、前菜加Main dish，食太刻薄都唔只呢個價。
拉麵唔算特別好味，湯底唔係特別濃，但叉燒都幾日式，起碼夠軟腍。
咖哩雞扒飯嘅咖哩味道香濃，應該選用左偏甜嘅咖哩醬，係幾日式咖哩嘅甜味。而雞扒煎得幾香脆，大大件，配咖哩一流。
鰻魚發燒友食日本野必點鰻魚壽司，呢度提供原條海鰻 ($26)。
雖然都預左係現成買貨，但選材都算唔話得。肉厚，醬汁一流。
四十幾蚊埋單，呢個價位喺北區黎講唔算平，但手揸呢個Budget喺九龍區搵日式料理，我估有九成機會食到垃圾。