by admin | 10 月 9, 2011 | 深水埗, 甜品
坤記糕品專家@深水埗
9/10/2011 14:00
團購已經做到爛晒，團購優惠越來越唔吸引，可以全個星期一個團購都買唔落手，所以選擇遊走深水埗區搵平食。食完蝦子麵食埋個甜品，去左一間歷史悠久嘅中式糕點專門店買糕點。
芝麻糕 ($7)
高身又黑麻麻嘅芝麻糕一層一層堆砌，質地柔軟，可能因為預先包裝，邊邊位置有少許溶化，變得一pat野。質感係可以話入口即溶，無粒粒好幼滑，但好腍好粉，並非期望食到嘅煙韌感。芝麻味，有嘅，但唔濃郁，亦唔夠香，未至於人地所講嘅流動芝麻糊咁誇張。其實好普通料，七蚊一舊仔，不如俾多幾蚊食芝麻糊好過。
白糖糕 ($5)
白雪雪嘅白糖糕，係此店最出名嘅名物。最鍾意佢一絲絲嘅條紋，食落夠鬆軟，亦夠煙韌彈牙。一入口係一陣好清甜嘅白糖味，味道唔錯。但趙多幾啖，開始食到微微嘅酒味，繼而係酸味，相信係因為發酵時間過長，所以味道變酸。細細一件賣$5，其實真係貴。
名氣超大嘅一間舖，有無數個報紙、雜誌、電視節目介紹過，無數個名人黎採訪過。好多由細食到大嘅街坊，都慨嘆報導靠害。報導令出名的更出名，人氣越勁，賣得越多，越難保持固有水準。好多街坊都話，糕點無以前咁好，退步左好多。
算啦，對我黎講， 叫做試過所謂嘅名店，食過所謂嘅名物就算。
by admin | 10 月 9, 2011 | 深水埗, 麵食
劉森記@深水埗
25/4/2011 15:00
9/10/2011 13:30
@褔榮街
25/4/2011 15:00
聞說劉森記係香港少有嘅竹昇麵老店，又得到蔡生推介，係佢唔知幾多間常去食肆之一。開飯網友熱捧老店二百幾個好評，值得一試。
雖然網友熱點蝦子撈麵配雲吞同黑牛柏葉，但好想好想食炸醬，所以點左炸醬蝦子撈麵同牛筋腩蝦子撈麵。等餐途中，見隔離叔叔auntie密密食枱上嘅醃蘿蔔， 本來對呢啲咸濕野冇乜興趣，都貪得意夾兩粒食。嗯~爽爽脆脆，酸酸辣辣，正好當做開胃前菜，原來係呢間小店嘅獨特供應。
蝦子牛根腩撈麵 ($30)
蝦子撈麵一上枱，「啲蝦子唔洗錢架?」三十蚊一大碟，睇見都滿足。
牛筋腩煮得夠軟腍，腩汁香濃，夠入味。蝦子真係有蝦味，配上乾身幼麵，簡直係perfect match!
炸醬蝦子撈麵 ($30)
正係久違了炸醬嘅味道，香濃肉絲帶啲啲微辣，配麵剛好。但炸醬嘅濃味，稍稍掩蓋左蝦子嘅香味，炸醬同蝦子似乎唔夠朋友。另外，不得不提配麵嘅清湯。湯底極之鮮甜，一啲都唔油膩，係撈麵嘅良伴。
劉森記係一間值得encore嘅小店，比得上澳門嘅蝦子麵名店。
下次食好野唔洗走去澳門lu~遲啲要去隔離街正牌老店，食番網友熱捧嘅兩樣先，聽講老店比新店仲好!
後記
@桂林街
9/10/2011 13:30
2011年4月到訪過新店，今日終於的起心肝排下老店。今次去老店，特登點番最人氣嘅兩味。
蝦子雲吞撈麵 ($33)
竹昇麵仍然保持水準，都係十級彈牙，勁級煙韌。蝦子一大堆，灑滿麵上。細細粒非常脆口嘅蝦子，咸咸地用黎撈麵，將蝦嘅鮮味帶落麵條上。三粒雲吞選擇跟湯另上，鮮蝦同鮮肉比例剛好，味道唔錯，雲吞皮亦夠滑溜。出奇地，連條芥蘭都非常清甜好味。
蝦子薑蔥黑柏葉撈麵 ($33)
近排突然變黑嘅黑柏葉，因為未經過加工，好似健康啲，所以開始受歡迎。黑柏葉非常爽口，但好似白煮無乜味道，惟有自加辣椒豉油，或者撈埋薑蔥一齊食。除左口感之外，好似無乜特別。
半年時間，蝦子麵已經由$30加至$33，加價足足有一成，可見通脹幾咁強勁，只好期望加左價，唔會影響食物質素。老店環境始終唔及新店咁舒適，地方淺窄比較迫。感覺上，竹昇麵都係出自同一個師傅之手，蝦子都係同用一種製法的話，新店同老店嘅製成品，應該都係一樣嘅，咁下次不如去番新店，坐得舒服啲吧啦。
by admin | 6 月 26, 2011 | 小食, 深水埗
台灣人碳烤雞排@深水埗
26/6/2011 17:00
今次係第二次食呢塊雞扒。半價$12咋喎，做咩唔食?
有別於豪大大齋炸、齋乾、齋熱氣。呢個台灣人選擇先炸、後落汁，再碳烤。睇黎係唔同鄉下嘅。
一塊同豪大大差唔多大嘅雞扒，先用大油鑊炸死佢後，放喺櫥窗前嘅碳烤架，一邊掃汁，一邊烤。烤完後，再視乎口味加上辣椒粉，最後切件上菜。完全係一場騷。
雞扒薄薄地得黎夠嫰，脆皮係小部份脆，大部份沾有醬汁。幾鍾意佢夠特別，明明炸到脆口，仲要加埋甜甜地嘅燒汁，而醬汁經過第二次加熱，真係融入晒雞扒裡面。辣椒粉係錦上添刺激，但碳烤又唔覺有碳味。成個設計係豪大大嘅加料麻煩版，係衝著豪大大而攪新意思，攪創意嘅安排。
記得上次食，係充滿美好嘅回憶，今日食似乎差左啲。 有人口痕叫左辣，變左完全勁辣，食唔到其他味。不僅如此，掃醬汁係就住就住，最後醬味唔夠，但令到個脆皮完全消失晒，可惜。第二次嘅錯誤，會令我卻步唔會再去。而家果度人流唔多，衰啲講句，估計未必做得幾耐，想試趁早。
by admin | 4 月 25, 2011 | 深水埗, 甜品
綠林甜品@深水埗
25/4/2011 16:00
深水埗 = 男人地帶。我覺得。
綠林甜品 = 扮書局嘅名 + 最傳統嘅甜品 + 平到喊嘅價錢 = 女士relax嘅小空間。
擂沙湯丸 ($12)
五大粒充滿芝麻味嘅湯丸，彈牙煙韌，非急凍冷藏貨色可以做到嘅口感。
特別之處係配粗粒花生、芝麻、糖，並非一般食到人氣咳嘅花生粉。
芝麻糊豆腐花 ($12)
芝麻糊香滑，凍版比較唔甜，但芝麻味香濃。
豆腐花一般，難同大埔阿婆豆腐花比，差十萬九千里。
但姚生好likey，可能佢夠凍掛。
豆腐布甸 ($15)
係可以好似拍廣告咁彈下彈下，左右震震，堅挺唔the皮嘅布甸。
凍品仍有香香嘅豆味，有啲似維他奶味。
無論係質地、外型、味道，都做足一百分。
仲送埋花奶伴碟，一次過享受唔同食法。
強烈推薦，男人們掃完電腦貨去抖下冷氣食碗糖水。
強烈推薦，女士們陪完男人掃貨去食碗糖水慰勞下自己。
by admin | 12 月 25, 2010 | 深水埗, 點心
添好運點心專門店@深水埗
25/12/2010 19:30
添好運呢個名唔記得幾時開始突然冒起，幾乎等於一盎兩件嘅代名詞。
實在未能的起心肝去正店排四個鐘，今次去住深水埗新店止住痕。
好彩要朝拜呢間一粒星新店只需45分鐘耐性。餐紙選擇不算特別多，都係一般正路都有嘅點心。
臘腸滑雞飯 ($17)、免治牛肉腸 ($15)、排骨 ($12)、燒賣 ($19)、牛肉 ($12)、粉果 ($10)。講真一般質素，雖然無特別驚喜，但肯定真材實料，新鮮熱辣。
值得一提佢嘅蝦餃 ($19)，真正表現到咩叫晶瑩剔透、皮薄餡靚。一級棒!
酥皮焗叉燒包 ($14) 係此店必點名物。一上枱已經聞到陣陣牛油香味，保證新鮮出爐，熱辣辣。外層墨西哥皮酥酥脆脆，內餡嘅叉燒醬內真係有叉燒粒，同酥皮襯到絕。普通一個叉燒包，加左墨西哥皮，竟然會結合出如此驚喜嘅效果。就好似食完味吉陽一既料理，會忍唔住大叫「好~美~味~呀~~」咁。難怪在座每枱都最少叫番一兩碟打底，真係食兩個都唔夠。
老老實實，點心又唔係十分、非常、特別、極之咁好味。但一個驚喜度爆登，令人眼bling bling嘅酥皮焗叉燒包，已經能夠塞住你把口，足以補償番你浪費左45分鐘喺佢門口齋等冇得食嘅弱小心靈。
最後心甘情願拎張紅衫魚(二人同行價)找數。好滿足嘅聖誕夜。
網上有唔少人話深水埗始終都只係拷貝，點都唔夠旺角正店好。
嗯~睇黎點都要搵日花幾個鐘去旺角店一轉啦~
