by admin | 9 月 25, 2011 | 紅磡, 麵食
蒙麵@紅磡
25/9/2011 13:30
多得頭條本搵食指南，知道紅磡咁多好野食，今次去食下平、靚、正嘅車仔麵。
豉汁鳳爪、泰式魚餅、五香牛根出前一丁配沙嗲汁 ($26)
豉汁鳳爪即係平時酒樓食到嘅鳳爪，都唔錯嘅，幾夠入味。而泰式魚餅都真係泰式風味，有好香嘅咖哩膏、香茅味。而牛根都燘得好腍、好入味，入口即溶。加四蚊配出前一丁，仲免費加埋個沙嗲汁，一個非常Match嘅配搭。
蕃茄薯仔湯鹵水大腸、柱侯牛腩米線 ($24)
好少車仔麵檔有豬大腸提供，可能因為處理需時、又麻煩，但呢間蒙麵嘅豬大腸係出晒名嘅。
薄薄一圈豬大腸無太多肥膏，非常香鹵水味而且爽口，認真唔錯。而牛腩就不過不失，應有嘅入味，應有嘅口感。最特別之處，莫過於獨家嘅湯底，只需加四蚊，就可以試到充滿住家風味、原汁原味、酸甜醒胃又濃郁嘅蕃茄薯仔湯。蕃茄薯仔湯送埋幾大舊薯仔，唔好以為係湯渣就唔食，薯仔又腍又粉、充滿蕃茄味，係絕對食得落口，變相多個配菜!
叉燒串 ($9)
叉燒串亦係小店馳名小食，必定即叫即燒，新鮮熱辣。聽聞選用梅頭豬肉，肥瘦適中，非常爽口。沾上濃甜叉燒醬同麥芽糖以炭火燒烤，極有BBQ風味。微微烤焦嘅外層，更突出炭燒嘅味道，非常好味嘅串燒。
一個兩餸麵只需$20，三餸都不過$22，價錢非常大眾化。編按﹕今次無團購啊~
而車仔麵呢個設計其實係非常無敵嘅，因為只要餸菜選擇多，食客可以隨心所欲，鍾意邊樣揀果樣，每款餸菜都必定係心頭好，合成一碗賣飛佛麵，一定好滿足。但咁耐以黎，好多車仔麵俾我嘅感覺係，餸頭菜尾求其是但俾啲你，雖然餸菜可以自由選擇，但結晶品未必一定好食。
今次黎到蒙麵，係一個新嘅車仔麵體會，感覺上材料並唔係一般嘅餸頭菜尾，每款材料都用心製作，而蕃茄薯仔湯底更加係俾足一百分心機，食客自然一百分滿足。
by admin | 7 月 3, 2011 | 上海菜, 中菜, 小食, 紅磡
上海飽餃店@紅磡
3/7/2011 17:00
全憑頭條日報出左本平民搵食手冊，認識左各區嘅優質平價食肆，紅磡真係有好多好野食。
豬肉生煎包、牛肉生煎包
微暖，相信出左爐一段時間，但包皮仍然係好鬆軟，底部有少許脆口，就幾粒仔芝麻味道都好搶，而整個包都有天然嘅甜味。唔會好似有啲包點，放耐左就硬過石頭，而且又冇黎味道。鮮肉餡好充實，大大舊，肉質軟滑。生煎包充滿肉汁，又未覺有汁流出黎咁誇張，可能部份汁被包皮吸收左，反而令包更有味道。 特別推介牛肉生煎包，肉餡色水更深色更吸引，醬汁味更濃郁，最後忍唔住叫多兩隻。
鎮店之寶嘅小籠包更加不得了。入座後即叫即蒸，上菜時熱氣騰騰，達到燙口嘅溫度。皮薄得黎，唔會一夾起就穿。肉餡鮮甜，肉汁豐富，肉汁直情多到流晒出黎，就好似係一個薄皮包袋住晒啲湯汁。皮薄餡靚肉汁多就係總結，拍得住高檔上海菜館嘅質素，只索價$13一籠四粒。咩事幹?
而豆漿夠凍夠清甜，亦有豆味，比出面勁溝水嘅好一百倍，七蚊一杯解渴一流。
細細間舖頭仔主打十多款飽餃點心，聽聞仲有幾款菜肉餃深得好評，下次一定會再黎試。見阿姐不停包不停賣，勝在turn over快，實有機會預到新鮮出爐。每款都係十零蚊，叫足四款兩個人分，都不過五十零蚊，做午餐或下午茶小食實係一級棒。
比起果啲淨係識得充大頭鬼嘅菜館，菜式質素不在話下，仲要扮高級，我更欣賞呢度嘅穩重沈實。死啦，我真係希望佢係選擇採取薄利多銷嘅營商政策，佢賣啲野咁平，會唔會圍唔到皮架? 你千祈唔好關門大吉呀!
by admin | 7 月 3, 2011 | 紅磡, 麵食
郁香園牛丸麵@紅磡
3/7/2011 13:00
經金剛同小儀嘅《街坊廚神》介紹，今日去左紅磡區食街崇潔街，喺街尾發現呢間乾淨企理嘅舖頭仔。
黑椒牛丸麵 ($20)
上菜時唔洗打燈都整碗閃令令，湯底好清澈，配些少冬菜同青蔥，好清甜，飲完都唔覺口渴。麵都係好閃令令，有少許梘水味唔過份，非常幼身而且煙韌。手打黑椒牛丸細細粒，係爽滑彈牙，黑椒好香，少少味辣辣地，略嫌牛味唔夠濃厚。
牛筋丸河 ($20)
一樣清澈嘅湯底，配上滑滑比較厚身嘅河粉。牛筋丸冇牛丸咁滑，有應有嘅粗糙表面，更有彈牙，但請俾多兩分牙力。肉汁唔多，但內裡見到白白地嘅膠質，相信係真材實料嘅牛筋，但味道講不上濃郁。
兩碗粉都做到店舖標榜嘅口號「丸彈、麵爽、湯底靚」。麵係爽口嘅，算出色。湯底清得黎味道唔錯，而丸都係彈牙嘅，只論口感係無械可擊。但整體黎講，自慢嘅手打牛丸味道一般，做唔到應有嘅肉味、肉汁，亦未能帶黎深刻印象。我都係鍾意食果啲粗糙大粒、肉汁澎湃嘅牛丸啦。
by admin | 5 月 29, 2011 | 小食, 甜品, 紅磡
媽咪雞蛋仔@紅磡
29/5/2011 13:30
門口大大隻貼住「100個開飯好評」，真係要一試。
“What a Black Wonder” Hello Kitty presents 粒粒朱古力雞蛋仔 ($14)
未食其蛋仔，先以貌取蛋仔。
未如預料咁朱古力色，係普通雞蛋仔色加點點朱古力色。
皮脆! 但都不及衰左嘅太安樓雞蛋仔脆。
(按﹕太安樓雞蛋仔最好就係個皮夠脆，但最衰就係冇蛋味。)
餡鬆軟，而且有蛋味，仲有好香濃嘅朱古力味。
每粒蛋仔都有烤焗朱古力粒粒，有啲溶左，有啲未溶。
如果溫度再高啲，相信有潛力成為流動手提版心太軟雞蛋仔。
有別於坊間一般用朱古力開粉漿，但只見其色，未嚐其味。
呢個媽咪真係會放有朱古力味嘅粒粒朱古力，唔係呃你。
俾多四蚊買包朱古力粒粒都抵啦!
by admin | 3 月 20, 2011 | 甜品, 紅磡
糖蓮子@紅磡
20/3/2011 19:30
從開飯網團購得到半價$50現金券。老實講，呢間舖唔做泡毛，我真係唔識佢，亦都唔知點去。開飯網嘅相片好吸引，就去驗證一下。
碎朱古力梳乎里 ($30)
老闆未送到埋枱，已經聞到朱古力嘅香味。一個大杯，比想像中更大，梳乎里脹得高高，頂尖有少許焦焦，扭紋式旋轉，有層次感。表面灑左薄薄嘅糖霜同朱古力粉，整個構圖更靚。梳乎里即叫即造，熱辣辣，軟綿綿，好鬆軟，好似食雲咁。裡面比較濕潤，朱古力味稍為未夠。
濃情黑森林(朱古力芭菲) ($29)
一隻高杯，一層一層堆砌。果凍、特濃朱古力味雪糕、甜甜圈、水果、朱古力脆條、朱古力醬。色彩配搭運用得宜，美觀，吸引食欲。整體味道正常，因為完全係現成野，無調味技巧可言。
甜品嘅造型係非常美觀，呢間店嘅甜品係會令你影相影完一幅又一幅。
靚嘅甜品令人見到都開心，呢間店做到呢個效果，已經能夠俘虜一聚美少女嘅心。
優惠左埋單都係三十零蚊兩個甜品，好唔好食係其次，當佢藝術品咁欣賞，開心下都唔錯，就用對眼去品嚐啦。
by admin | 3 月 20, 2011 | 快餐, 紅磡, 麵包
時新快餐店@紅磡
20/3/2011 17:00
每次行過都唔為意嘅一間快餐店，估唔到係出名嘅人龍名店。賣漢堡包咋喎?!
係呀，自從港鐵賣廣告唔覺意泡毛埋漢堡包，人龍就越來越長，等就越來越耐。
親身感受人龍 = 門口企左不下三十人，落柯打後二十分鐘先有得食。
注意﹕ 店內廚師先生已經係摩打手出餐。
一個漢堡包即叫即製，邊等邊聽到吱吱喳喳嘅聲音，聞到肉扒嘅香味，空腹度一百巴仙。
雙層芝士漢堡配沙律汁 ($15) & 雙層芝士蛋漢堡配咖哩汁 ($17)
熱辣辣、香噴噴，肉汁流晒出黎，忍唔住一啖接一啖。
肉扒鮮甜鬆軟多汁，好香嘅洋蔥味，有啲似煎肉餅，港式!
蛋係煎荷包蛋，港式!
芝士其實係bonus，可有可冇，如有半溶版的話更佳。
總結，配沙律汁係好味啲嘅。
淨係即叫即製已經能為美味指數倍升。
時新係一間令我心思思成日掛住想再食嘅餐廳。
試下搵日唔支持集團連鎖霸權，改行揀港式小店，可能驚喜無限。
