嘉樂冰室澎湃早餐
嘉樂冰室@荃灣
27/3/2016 10:30
火腿小奄列 $29
真係好澎湃，蛋、火腿粗切份量勁多。
雞絲湯米 $29雞絲醃過幾入味，米粉量多得驚人，二人分享都夠飽肚。
炸鮮蝦雲吞 $34非常足料，隻隻脹Bok Bok，蝦好大隻，仲好好新鮮勁彈牙，非常好味。
紅豆冰 $20
紅豆好大粒、好甜，不錯
有型師傅的台風拉麵
拉麵台風@荃灣
14/2/2013 18:00
17/5/2013 13:00
1/12/2013 18:30
22/3/2015 12:00
14/2/2013 18:00
荃灣冒出一間極好評嘅街坊拉麵，大碗抵食又好味，終於編到入行程走一趟！
魚介豬骨湯拉麵 ($78)
配料有兩大片叉燒、半隻溏心蛋筍、白蔥、紫菜盛住精製魚介粉。台風拉麵嘅湯底以豬骨同雞骨做基本，質地超杰身，勁厚重，入口係黏口忌廉咪嘅質感，足見真材實料，膠質極奇豐富。味道亦夠香甜濃郁，店方指湯底用上豬骨、豬頭、豬油、雞骨、豬手、雞腳等，經過二十小時以上烹煮而成，啖啖都係精華所在，實在美味。將小店精製嘅魚介粉混和，再多一種海鮮甜味，味道更具層次感，非常討喜，值得一飲而盡。拉麵選用粗身曲麵，選擇嘅偏硬程度亦做到，麵質煙韌，有咬口，粗麵更有效掛湯，每一條麵條吸盡湯汁，一流嘅配搭。知道此麵係店方其中一大堅持，用上日本產小麥，據說係八間日本製麵廠中精選出黎。兩大片叉燒亦非常討好，睇見師傅小心將叉燒切開，特地分一片邊位加上一片中間位，讓食客食到兩種口感。的確，一片叉燒係肉感較重，一片係半肥瘦，各具特色，肉味亦夠香，個人較喜歡半肥瘦較為腍滑。至於溏心蛋亦係用心之作，蛋白腍滑，充滿醬油香味，黃蛋半熟非常黏口香濃，不錯！
伊台風 ($88)
此款伊台風係創作拉麵，以豬骨湯做基本，加上蕃茄蓉、新鮮蕃茄、生菜同芝士，再喺客人面前用火槍燒融，淨係呈現手法已經好吸引。豬骨湯加上蕃茄蓉，味道香濃，豬骨味並無被蓋過，加一點酸甜，更為清爽。配上微焦嘅芝士味，實在回味無窮。
價錢正常，不收加一。兩款拉麵份量其實頗多，比其他名店來得大方慷慨。味道係絕對好評！絕對值得一試！
不得不提此店嘅服務亦係超好，由拉麵師傅至樓面員工個個都態度一流，熱情細心有誠意，每一句歡迎光臨及多謝都係雄厚精神的，加上九十度鞠躬，絕對係日本式優質服務。幾位拉麵師傅都係日本人，睇住師傅煮麵，見證師傅嘅技術與細心，所以先做到一碗好拉麵。真心滿意呢碗拉麵，所以全碗清光，湯亦飲得一滴不留。臨走時同師傅講左一句「おいしい!」師傅立即以一個殺死人嘅笑容回應一句「ありがとうございます！」加一個深鞠躬。從佢嘅回應，感覺到師傅嘅滿足自豪，呢個表情真係好有型。
17/5/2013 13:00
第二次食台風，一樣咁好味，真係超級好味，少有值得無限encore之選。
魚介豬骨湯拉麵 ($78)
濃郁嘅湯底，配上煙韌彈牙嘅拉麵。除左叉燒片外，仲有叉燒碎，溏心蛋又正。
豬軟骨骨膠原撈麵 ($78)
湯汁濃縮左味道更強勁。
1/12/2013 18:30
魚介豬骨湯拉麵 ($78)
難忘濃郁嘅湯底，骨膠原超勁，拉麵煙韌彈牙。叉燒香甜腍滑，溏心蛋又甜又濃。超正!
豬軟骨骨膠原撈麵 ($78)
湯汁濃縮左，醬油味道更強勁，叉燒更係大大舊，非常豪邁。
22/3/2015 12:00
今次初試沾麵，湯底都算唔錯，比拉麵湯底加濃多少少。
出品算非常唔錯，但始終都唔夠沾麵專門店咁好。
認真講，台風拉麵真係無得輸，原因係水準保持度非常高，去咁多次都係咁好味，而且價錢唔貴，飽足度十足。
丸龜烏冬不錯
丸龜製麵@荃灣 / 尖沙咀
26/12/2013 19:00
20/9/2013 19:00
27/10/2013 14:00
26/12/2013 19:00
20/9/2013 19:00
自助形式烏冬專門店
醬油烏冬、竹輪天婦羅、魷魚天婦羅
冷鳥冬、雜菜天婦羅、雞柳天婦羅
烏冬不錯，非常彈牙、冷烏冬更勁。
天婦羅都唔錯，唔油膩、粉漿份量正常，餡料充足大大件。
價錢合理，烏冬麵底大約$35，自選天婦羅每件$13，兩個人$160左右已經食到好飽。
27/10/2013 14:00
期間限定蓄茄牛肉烏冬，湯底唔錯幾濃味。牛肉就比較老身麻麻地。
魷魚粒天婦羅、雞柳天婦羅
溫泉蛋拌烏冬、雜菜天婦羅
頂級爆汁生煎包
祥興記上海生煎包@荃灣
20/9/2013 13:00
咖哩牛肉粉絲湯 ($18)
上海雙檔 ($18)
招牌生煎包 ($23)
皮薄、底脆、爆多汁、湯仲好鮮甜、肉餡味道亦唔錯。
全香港最好食嘅生煎包，推介!
松記糖水
松記糖水@荃灣
9/12/2012 17:00
三色涼粉
芝麻糊加花生湯圓
石燒日本料理
石燒日本料理@荃灣
9/12/2012 12:30
蒲燒鰻魚石燒定食 ($58)
賣相吸引。有兩大塊鰻魚算OK，味道亦夠濃。珍珠米有咬口，仲有飯焦。
蒜片牛肉石鍋炒飯定食 ($52)