丼丼屋食堂
8/11/2015 18:30
18/10/2015 13:30

28/9/2015 19:00
12/2/2013 20:00
16/9/2012 19:00

鐵板野菌露筍牛油燒 $35
牛油、黑椒味好香，令所有菇都好份味，估唔到咁好食!

十勝帶廣名物豚丼並盛 $88
豬肉都鬆軟，燒得微焦，加左山椒、甜醬油提味，不錯。

滑蛋吉列廣島蠔丼 $88

滑蛋豬扒丼 $85

鐵板黑椒腸餅拉薯條 $38

天婦羅餅配冷烏冬 $70
烏冬非常煙韌，味道幾甜。天婦羅餅好足料，有埋三文魚、蝦、菇等。不錯。

滑蛋豬扒丼 $85
豬排炸得酥脆，炸粉唔算厚。今次呢塊豬排非常好味，半肥瘦好鬆化，肉味好甜。配上滑蛋認真不錯。

埋單總數$212.3，之前中左問卷調查送$50，$162.3，再用Cash Dollar俾錢。埋單時仲中多個問卷，下次又有$50洗，超開心。

28/9/2015 19:00 @鑽石山

芝士玉子卷 $43
原來無左原味玉子卷，揀左個芝士味，但好似縮左水，蛋卷冇咁漲bok bok，但芝士多到流出黎，賣相都算吸引。入口蛋味仍然香甜，加埋芝士味都唔錯，但個人較鍾情原味版本。

親子丼 $58
再試神級親子丼，半生半熟嘅蛋液仍然最吸晴之處，撈飯絕對一流。

和風醬汁吉列豚丼 $68
新出品期間限定，足足有三大塊吉列豬扒，相當澎湃，加上酸酸甜甜嘅和風醬，賣相非常吸引。吉列炸得酥脆，即使加左汁仍然香口。醬汁係大阪串炸嘅沾汁，入口帶酸，非常開胃。唔錯。

數數手指，原來已經係第三次黎丼丼屋。不過一向酷愛日本料理，相信一日食三餐都無有怕。何況仲有大把恆生Cash Dollar，仲有Quota可以食多幾餐。此行目的，係試試另一款元祖級丼飯「勝丼」，以及好評如潮嘅玉子燒。

燒玉子卷 ($28)

一向認為蛋呢家野，只係平價貨，唔應覺浪費金錢出街食，所以食壽司從來唔願叫玉子壽司。不過呢味小食風評不錯，一試無妨。一客四件雞蛋仔排得整整齊齊，同櫥窗嘅食物模型有九成九相似。玉子燒係將蛋液燒好，一層一層捲成，所以從橫切面可見蛋皮嘅紋路一圈圈的。煎蛋卷有一定技術要求，每層蛋液厚度要平均，而且切開之後唔可以鬆散，丼丼屋嘅出品，算相當精緻。 特別鍾意玉子燒味道甜甜的，蛋香濃郁帶清甜香味，的確誘人。口感鬆軟、具層次感，中層蛋皮仍保留幼滑質感，仍有微量蛋汁。配上微甜嘅醬汁，再加上蘿蔔蓉，正係日本最家常嘅清新小點。

滑蛋炸豬排飯 ($68)

勝丼可算與親子丼旗鼓相當嘅丼飯一哥。記得早年沉迷日本綜藝節目《料理東西軍》，勝丼對親子丼嘅賽事出現過好幾次。呢款丼飯等候時間稍長，因為要經過酥炸豬排嘅工序，再加上滑蛋汁先完成。豬排炸得酥脆，炸粉唔算厚。可惜肉質一般，只有半肥瘦部份比較鬆化，其他地方略嫌乾身。不過重點仍在於滑蛋，滑蛋同樣滑，可以中和一下炸豬排嘅熱氣。整體黎講，只屬一般質素，始終豬排嘅威力不及滑蛋，驚喜欠奉。

事實證明，丼丼屋嘅蛋料理至係靈魂所在，炸物嘅技術仍有改善空間。個人黎講，此店仍有吸引力，尤其係期間限定嘅神級丼飯，應該要把握機會試試，上次嘅盛豚丼的確唔錯。

1/1/2014 14:00

5/11/2013 19:30

此行目標係試新野同使用恆生cash dollar。

味千推出人氣之選「特選醬油拌麵」，特選醬油拌麵包括多款配料，其中有叉燒、溫泉蛋、昆布、紅薑絲、木耳、炸麵條及蒜蓉等，而黑醬油由日本直接運送，醬油含有微微的鮮魚味，更能帶出麵及其他材料的味道。

附上的穀物醋更可隨意加入，它可提升鮮味及令味道層次更豐富。加左之後酸味提升，都唔錯，同紅薑絲好配。

元気寿司@尖沙咀
26/2/2012 18:15

香港人鍾意排隊，亦鍾意等位，喺元気門口就可以見證到。唔知點解任何時候都可以堆滿人朝，改名做人気寿司都不為過。

燒三文魚 ($16)
三文魚一塊薄片，差唔多覆蓋晒成舊飯面，賣相討好。燒三文魚原來係連皮三文魚，魚皮部份輕輕燒過，魚肉仍然保持原汁原味，造成半生熟效果。三文魚非常新鮮肥美，連皮食口感較一般煙韌，經過火炙後，仲帶點炭燒風味。而壽司飯都捏得唔錯，帶輕微甜醋味，造型平平整整，夠結實，起碼沾醬油嘅時候，唔會散晒，跌晒落水。

炙燒黑椒三文魚 ($13)
仲以為三文魚燒到焦焦黑黑，原來係蛋黃醬灑上黑椒粒，再經過炙燒，就係招牌菜三文魚三味嘅其中一味。三文魚經過火炙後，部份油脂溶化，相對油膩感較少，七成熟嘅三文魚更加腍滑，仲暖暖地，比凍食刺身壽司有另類感覺。配合埋微酸嘅蛋黃醬，味道更加豐富，炙燒嘅焦香味濃郁，可惜黑椒味道唔明顯。十三蚊兩件，抵到震。

煙三文魚 ($16)
三文魚三味嘅另一款，魚身一樣肥美，白橙相間，上面加左少許蛋黃醬同生洋蔥，睇落同一般三文魚壽司分別唔大。但一入口，就食到一陣濃烈嘅煙熏味，原來煙三文魚做成壽司，味道都唔錯。

三文魚皮手卷 ($13)
人人都話元気嘅手卷最抵食，大大件夠飽肚，就試一個三文魚皮手卷。手卷最緊要嘅紫菜認真唔錯，起碼夠新鮮，夠乾身。兩塊三文魚皮炸得乾身，但食落無乜味，只知道自己食緊炸物，脆脆地咁啦。聽講最好食嘅手卷係軟殼蟹手卷，可惜對蟹真係興趣不大。

花の戀 ($22×2)
睇見隔離枱件花之戀幾大件、幾靚，又跟風叫兩件黎試下。廿二蚊一件原來都唔少野，有三大塊新鮮肥美嘅三文魚，中間壽司飯面仲有黃蛋醬，而蟹子都落得相當重手。大大件，要分幾啖先食得晒。

辣味三文魚軍艦 ($13)
除左一般壽司之外，亦有唔少軍艦選擇。三文魚份量唔少，切成小粒舖滿整個飯面。辣味係加左辣椒，輕微嘅麻辣，非常惹味刺激。

芥辣八爪魚軍艦 ($13)
煙韌嘅八爪魚粒撈埋Washabi ，勁入味勁攻鼻，愛食芥辣的話，一定好鍾意。

蒲燒鰻魚 ($20)
饅魚長長一片，饅魚肉雪白，邊位微焦，掃上濃甜蒲燒汁，就係我的最愛。饅魚好腍身肥美，魚香味濃，好滿足。

炸蝦卷 ($18)

炸蝦卷亦係元気另一名物，一定係新鮮即製。炸蝦仲係熱嘅，軟腍嘅飯，包住脆卜卜嘅炸蝦，口感非常豐富，而蝦肉仍然保持爽口鮮甜，不錯吃。

日式炸芝士年糕 ($22)

餐牌相片影到圓轆轆，咁可愛嘅樣子，都想叫一客試下。實物同相片差唔幾，好滿意。年糕新鮮炸起熱辣辣，外皮金黃色非常討好。咬開皮脆，中間煙韌嘅年糕，芝士就從缺口湧出，澎湃之極。清甜嘅年糕，配上濃郁嘅芝士，絕對係驚喜之作。

有人鄉下仔出城，懷住緊張又興奮嘅心情，坐左喺迴轉枱座位，體驗佢嘅第一次幫襯。茶，係自斟的，請先打開盒綠茶粉，按照指示加入一、兩匙茶粉，將茶杯按住靠牆嘅熱水器按鈕，熱水自動流出，加水到八成滿就夠。注意﹕請小心熱水，真的很熱的呵。

食壽司前，請先欣賞下杯茶。據講茶粉係日本靜岡縣研磨嘅綠茶，所以帶有淡淡嘅海苔香，比一般茶包更加濃郁好味。

正場時間，可以選擇迴轉帶上嘅壽司，睇住唔同顏色，大大少少嘅壽司轉來轉去，觀感一流。可惜款式唔夠多，而且部份壽司似乎放得太耐，無黎生氣，所以柯打入單會係一個更好嘅方法。幾欣賞呢度出單清楚仔細，埋單時check清楚先去俾錢，絕對無漏單。

今次元気初體驗只需要$140，因為可以使用恆生信用卡嘅Cash Dollar，原本二百多蚊嘅價錢，都唔算貴，而家仲扣左Cash Dollar，$140兩個人，抵! Cash Dollar真係邪惡。

今期呢個發泡千奴係莫卡咖啡加曲奇嘅配搭，呢個組合根本無得錯。頂頭嘅忌廉係朱古力忌廉，頂級幼滑係絕對無講錯，香濃程度都可以接受。冰底係莫卡咖啡，同前款一樣，偏淡口味，只有淡淡嘅朱古力咖啡味，中間有一粒粒嘅曲奇脆脆。曲奇味唔算突出，咖啡味又淡淡地，始終遠遠不及熱咖啡咁濃烈，呢個係貪涼爽必須要承受嘅後果。不過只需要撈埋頂頭嘅忌廉，口味變得更好。沙冰仍然幼滑帶少少粒，超清涼解渴。

但係，四十五大洋，真係好貴，好彩睇廣告換左張廿蚊Q-pon，如果唔係，一定唔捨得飲。

Yoppi Frozen Yogurt
24/11/2011 15:30
26/12/2011 20:00
20/1/2012 14:00
5/2/2012 18:30
11/3/2012 21:00
4/4/2012 15:30 

早前因為團購，認識左Yoppi。先後兩次去沙田店，都係十分驚喜嘅澎湃杯。所以見到團購做$15當$40現金使用，立即掃左六張，可以試埋唔同分店嘅水準。一試就知道每間分店，無論喺銷售方式上，質素上都有好大分別，跟據幾次嘅經驗，有以下嘅總結。

@荃灣
24/11/2011 15:30

烤布甸、朱古力乳酪 ($47，團購價$22)
烤布甸味道其實幾似焦糖布甸，味道幾濃郁，但只有甜，無香味，超級甜膩。朱古力味係特濃黑朱古力，都係比想像中甜，兩款口味都唔知係真乳酪定假乳酪。質地方面，唔知係唔係當日人較多，乳酪總係水水的，好易溶。唧乳酪嘅時候，已經係半溶狀態。食落質感當然唔會幼滑，就好似沙冰、雪芭咁粒粒粉粉。配料木糠同Oreo都係咁，但原味麻糬偏硬身，唔夠鬆軟煙韌。惟一吸引之處，就係剛好聖誕節推出左Hello Kitty杯同膠匙，對住Hello Kitty食得開心啲啲。

6. 溫馨提示﹕強烈建議避開繁忙時間

@鑽石山
26/12/2011 20:00

法國雲呢拿、原味乳酪 ($45，團購價$20)

法國雲呢拿竟然做成乳酪，雲呢拿味的確好香濃，但只得純甜味，一啲酸味都無，感覺似雲呢拿軟雪糕多過乳酪。而原味一樣夠酸，清新醒胃，乳酪都係酸酸地比較好。此店嘅乳酪都算結實，幼滑程度正常。配料加左一般常見嘅Oreo、脆米、彩針等等，簡簡單單。

@旺角
20/1/2012 14:00

櫻桃味乳酪 ($40，團購價$15)
今日只得櫻桃味揀，入口勁酸咪咪，食多幾啖之後，櫻桃味先慢慢滲出，但越食越酸，酸到有啲頂唔順。乳酪都算結實挺身，好明顯氣孔非常多，所以質感一啲都唔幼滑。幸好配料選擇左唔少朱古力調和一下，有朱古力脆脆，就好似迷你麥提莎，幾得意。有淡淡朱古力味嘅雲石朱古力碎片、棉花糖同唔知咩果汁味嘅爆爆珠。

1. 乳酪收費﹕分大中細杯劃一收費，大杯裝300g跟兩款配料$32，其後配料每款$4

2. 柯打方式﹕落單後，全程由店員負責
3. 乳酪﹕寫板話每日有兩款乳酪選擇，但問過三次，三次都只得其中一款，感覺有啲取巧。真係要食的話，只好將就下，有邊種味就食邊種。以劃一收費份量黎講，呢度算少，因為乳酪塔中間係全空心，只得一個巨窿，應該同沙田店嘅300g有好大距離

4. 配料﹕餐牌上本來有唔少選擇，柯打時又話呢樣無，果樣無，選擇勁局限。而配料都落得輕手，一啲都唔豐富

5. 其他﹕職員哥哥仔極度Hea底，而且無禮貌，問多兩句都嫌你煩，唔多想做生意

6. 溫馨提示﹕推薦指數勁低，去對面商場食吧啦

@沙田
5/2/2012 18:30

朱古力、原味乳酪 ($40，團購價$15)
指定嘅原味仍然夠酸咪咪，夠結實厚身，幼滑度還可以。而朱古力味道雖然濃，但唔夠滑，冰感強勁，好似沙冰粒粒粉粉。$40包四款配料，必選最愛嘅麻糬，但好似比較硬實，無之前咁好味。芒果爆爆珠都係口感豐富，芒味香濃。芒果肉係睇住佢即場切出黎，包保新鮮香甜，唔錯。另加朱古力針調下味。