Italian Tomato@馬鞍山
17/8/2022 16:00
平時行過Italian Tomato，見到蛋糕都好吸引，不過價錢略貴，唔係太捨得食。剛見到近排做夏之感謝祭優惠，＄188可以揀五件＄45或以下嘅蛋糕， 又幾抵喎。
五件蛋糕一齊放，靚靚。
揀左兩件期間限定嘅茉香桃脆，蛋糕底係朱古力味仲有朱古力忌廉，帶少少焦糖脆脆，上面有白桃乳酪慕斯，仲有兩片白桃，非常之清甜。
藍莓芝士撻外型好吸引，撻底幾結實，加埋吉士忌廉、藍莓忌廉，仲有好多粒大大粒嘅蓋莓，粒粒都好甜。
皇牌士多啤梨糕外型好靚，忌廉打得好奶滑，蛋糕清甜，可惜士多啤梨略酸，一般啦。
最後係芒果慕絲蛋糕，慕絲中間仲加左芒果醬，酸酸甜甜不錯。
第一次試呢四款蛋糕，三十幾蚊一件係幾抵嘅，不過想食嘅款式都揀晒，試一次就算了。
17/8/2022 13:00
今日去烏溪沙搵朋友仔玩，玩完後食個好味午餐，朋友推介呢間台式餐廳。
揀左全日套餐有主食、小食加飲品，都抵食喎。
點左酥炸豬扒紅燒湯台灣麵配滷水牛肚，另外叫左杯奶蓋抹茶。
炸豬扒相當脆，炸皮好薄，啖啖肉，不錯。台灣麵湯底幾香濃，仲有少少辣味，不錯。
牛肚細細碟，味道都ok，幾夠入味。
奶蓋抹茶係跟餐加＄25，淡淡抹茶味，奶蓋都係薄薄的，呢杯飲品就一般啦。
朋友食鹽酥雞，試食左一舊，都好脆，仲好Juicy，下次可以再試。
韓台站＠馬鞍山
16/7/2022 13:00
15/5/2021 13:00
有時想食韓國野，就鍾意叫韓台站嘅外賣。
韓式拌粉絲
有好多粉絲同埋蔬菜，就無乜其他配料，勝在炒得幾香，麻油味十足。
叫左兩款紫菜飯卷，一款係午餐肉，一款係芝士。
紫菜都仲脆脆地，包住醃蘿蔔、魚片、午餐肉等材料，其實兩類相差唔太大。有芝士味道係特出一點。
牛肉什錦拌飯
牛肉都唔少，仲有一隻太陽蛋，最好就係拌上韓式辣椒醬，辣辣地幾好味。
蜜糖芥末炸雞塊
份量都唔少，大大舊，就普普通通嘅一件用炸粉包住嘅雞肉。個醬都ok嘅。
外賣份量都相當多。價錢平，係好抵食。馬鞍山少韓國野食，止痕之選。
－－－－－－－－－－－－－－－－－－－－－－
3/1/2021 13:00
韓式辣年糕，好夠辣。
海鮮煎餅，粉多，無乜特別。
鮮芋鮮 ＠馬鞍山
2/7/2022 14：00
附近開左間鮮芋鮮，咁耐以黎都坐低食過。間中會外賣飲品，個人最鍾意小芋圓奶茶，仲係熱嘅，冬天時飲暖笠笠，茶底幾夠奶香，要求小甜都絕對做到，仲有細細粒BB芋圓，煙煙韌韌，不錯。
今日額外多一日打風假，見唔係太多人，可以坐低食個下午茶。
芋圓3號 ＄45
冰芋圓有刨冰底，3號配料有紅豆、花生、珍珠，仲有一堆芋圓。冰底實在夠凍，紅雨同花生相當腍，甜甜地，芋圓都係煙煙韌韌，不錯。
抹茶布丁配小芋圓雪糕 ＄38
呢個布丁拼盤可以自由配搭，抹茶布丁有淡淡茶味，配紅豆不錯。最鍾意小芋圓細細粒，凍食比熱食更加QQ，可以撈埋雪糕一齊食。甜甜的下午茶。
Pepper Lunch＠馬鞍山
26/6/2022 12:00
早前疫情期間，試過Pepper Lunch外賣，雖然食品係一樣，但係堂食仲有鐵板可以Keep住熱辣辣，風味絕對唔同，始終都係堂食好。
美國薄切牛扒 ＄88
幾片牛扒跟薯蓉、菜，仲有大大碗白飯。牛扒都真係相當薄，煎得稍為過左火，所以韌韌地。
珍寶黑椒牛肉飯 ＄69
平常最愛都係呢個珍寶飯，今次仲加埋芝士。呢個牛肉太薄啲，再另外加上蒜蓉汁撈飯更加好味，感覺上仲好食過薄牛扒。當然要加錢跟套餐，有汽水同Haagen Dazs雪糕，雖然得兩款口味，但已非常豐富。
兒童餐 ＄49
原來Pepper Lunch都出左兒童餐。揀左煎蛋牛肉飯，一隻靚蒜蛋，一大堆粟米，幾片牛肉，白飯同成人版白飯都無乜分別，一樣咁大碗。兒童餐跟埋飲品可以揀利賓納，仲送小廚神貼紙。小朋友已相當滿足。
最鍾意呢度，有齊BB High Chair，仲有兒童餐。不過小朋友真係要小心鐵板，我地就另外用碗仔裝起俾小朋友，安全好多啦。
茶木＠馬鞍山
20/2/2022 19:00
茶木堂食就食得多，今日見好似要等位等好耐，索性轉行買外賣返屋企慢慢嘆。外賣優惠＄140可以揀兩份主菜連飲品。兩份仲送一客小食。
第一選擇係黑醋味醂豬軟骨配白飯
豬軟骨炆得好腍，有部份軟骨仲可以食埋，味道酸咪咪，幾開胃。
另一客係紅燒牛頰肉麵
外賣份量都俾得足，牛肉大大舊，入晒味。湯同麵分開，值得一讚。
飲品唔洗加錢已經有黑糖珍珠奶茶。仲送一份鹽酥雞。小食雖然份量少少地，但係炸粉唔太厚，都食到啖啖雞肉。
＄140加幾蚊外賣費，兩份豐富台式食品，都覺得幾抵食。