by admin | 11 月 19, 2023 | BB Friendly, Blog, 中菜, 旺角, 火鍋
旺角 19/11/2023 12:00
餐廳就係旺角一座唔顯眼嘅商業大廈，搵地點都用上一些時間。餐廳相當大，但中午人客稀少，真係唔知佢點做生意。
午市特惠商務套餐 (每位$198)
因為我地唔太好海鮮，揀左兩份輕宜嘅套餐。揀左蘋果雪梨湯底，雞湯底配上蘋果雪梨，相當滋潤。出面仲有自選醬料，遇上選擇困難症，款式實在太多。兩份火鍋材料送上實在太吸引，擺盆勁靚，值得打卡。材料都非常多，鮑魚、基圍蝦、青口、鮮魷幾分鐘食得，相當新鮮彈牙。魚俾左白膳更驚喜，非常肥美鮮甜。肉類有安格斯牛肉同豚肉，少少地幾片，但係肉質相當腍滑，肉味香濃。各式潮州丸就相當豐富，首推彈牙多汁手打牛丸真係非常好味。最後仲揀左出前一丁兩個，配上新鮮蔬菜，連小朋友都岩食。隨餐有自家製蘋果雪梨水，姐姐仲送我地每人一杯牛奶雪花冰。
另外加配牛胸爽 ($88)，白色一片片絕對唔似肉類，原來係牛肉筋膜，煙煙韌韌，牛膻味勁香，估唔到咁好食。
營養粟米餃 ($40)、鮮肉野菌餃 ($40)﹕雖然餃子得小小四粒，但係超大隻，皮唔算厚，內餡澎湃到滿漏，味道香甜，小朋友最愛。
我地平常唔太好海鮮，又唔會無啦啦食火鍋，試過呢餐覺得非常驚喜。所有材料都非常新鮮，配搭得宜。餐廳空間夠大坐得舒服，服務亦相當好，有BB椅，值得推介。
大眾點評抽到香港免費試，價值$600。埋單最後$620，補少少錢絕對值得。
by admin | 11 月 19, 2023 | BB Friendly, Blog, 尖沙咀, 星馬菜, 黃大仙
星怡@尖沙咀 19/11/2023 18:00
第二餐食星怡尖沙咀分店。分店坐落Isquare相當方便。
新加坡怡保雞絲河粉湯 $98﹕非常十分極之清淡嘅一味，材料有一隻蝦、魚片、一埋雞絲等，無特別。
新加坡農湯福建炒麵 $118﹕ 賣相麻麻地無乜色水，材麵有大蝦球，魚餅絲，豬肉片等，比較濕潤，但唔算惹味，明顯比上次茄汁炒麵遜色。
美祿煉奶沙糖多士 $48 ﹕份量唔算多，兩大件多士，中間夾左微冷嘅厚牛油，面層灑上美祿朱古力粉同煉奶，入口甜帶微咸，味道不錯有驚喜。
馬來千層糕 $42﹕班蘭椰味香，濕潤有實感嘅蛋糕。
黑糖寒天椰汁冰 $39﹕非常濃郁杰物嘅椰汁，加寒天啫喱條，飲幾啖覺得幾香，但多飲就覺得太甜唔解渴。
玫瑰花蜜茶 $33﹕玫瑰花味香，蜜糖夠多，味道香甜。
今次點評有$400，埋單補$13，價錢可接受，但明顯上次黃大仙食嘅比較好。
星怡@黃大仙現崇山 5/11/2023 18:00
呢間東南亞菜原來都有幾間分店，今次嚟到黃大仙現崇山店，從地鐵站行過去大約5分鐘一個住宅商場地下。店舖外邊有戶外空間，可以睇波，相當有情調今日一家大細揀咗室內嘅卡位。
海鮮釀油條 $88
賣相幾吸引，油條包住蝦膠、雜菜等，炸得非常鬆脆，一啲都唔油膩。加埋酸甜辣醬，多一份酸辣味更加開胃。
櫻花蝦炒飯 $98
賣相非常之吸引，除咗舖滿櫻花蝦之外，仲有大大飯蝦球。真係非常大隻，仲有五六隻咁多，都相當彈牙，但係一如正常蝦味就欠奉。飯炒得乾爽。
乾炒馬來蝦麵 $98
材料非常豐富嘅炒麵，一樣有大大隻蝦球，魚餅絲、蛋、番茄、芽菜等。油麵用蕃茄汁炒過，仲有少少鹹鮮味。旁邊有參巴醬，可以按需要自行添加，加咗之後更加多一陣香味。
鳳梨水果茶 $39
甜甜地微酸嘅菠蘿汁加上好多唔同類型嘅雜果。
美祿恐龍 $33原來
美祿飲品加上朱古力脆脆，飲品仲係暖笠笠，絕對講唔上係凍飲。
樣樣食物都新鮮熱辣，好笑嘅係點杯凍飲都係熱嘅。食物味道尚算可以，服務都係正常，但係衛生環境改善進步空間。
第一次抽到大众点评香港免費抽，有$400現金券。埋單連加一總數大約$390 ，唔需要補錢。
by admin | 11 月 8, 2023 | 外賣, 小食, 西餐, 馬鞍山
馬鞍山 8/11/2023 12:00
適逢屋企今日停食水就決定買外賣，見food panda都幾張優惠券就買呢間新開無耐嘅Chicken Factory。
無骨海南雞飯﹕賣相都唔錯，雞都幾滑，雞油飯味道幾香，套餐加配紫菜豆腐雞湯，清清地不錯。
惹味豚肉湯米線配可樂﹕適合小朋友食，正常發揮米線一碗。
重量級炸雞餐配咖哩汁﹕四分一隻焗雞加上咖哩汁實在好惹味，辣得好過癮。套餐揀左焗薯咸咸地、雞油飯，仲有可樂，實在太抵食。
扣除優惠券全單$113。估唔到質素相當唔錯，又抵食，可以Encore。
by admin | 11 月 5, 2023 | BB Friendly, 大埔, 日式料理
科學園 5/11/2023 13:00
滑蛋豬扒飯定食
味噌牛肉飯定食﹕牛肉幾軟，醬汁多送飯一流。
汁煮豬軟骨讚岐烏冬﹕豬軟骨煮得非常軟腍，亦好夠味道，烏冬煙煙韌韌，不錯。
定食包括麵豉湯、日式蒸蛋。蒸蛋相當軟滑，不錯。
價錢唔算特別平，水準達標，比較港式常見嘅日本料理。其實應該係壽司刺身比較正宗，但可惜小朋友多無叫到，下次有機會吧。
by admin | 10 月 8, 2023 | BB Friendly, 壽司, 拉麵, 日式料理, 甜品, 馬鞍山
馬鞍山 8/10/2023 17:00
遇上颱風時間唔使排隊，就係食壽司郎嘅最好時機。$12一碟嘅壽司都好多選擇。性價比最高就係吞拿魚軍艦，吞拿魚肉非常之多。三文魚火炙類都相當抵食。廿幾蚊一碟嘅甜品都相當唔錯，特別推介期間限定白桃蛋糕，唔太甜，白桃非常之多。芝士蛋糕即係必食之選。
馬鞍山 1/9/2023 11:00
火炙三文魚的確抵食，$12兩大件。
日式茶碗蒸$19，熱辣辣，蒸蛋非常之幼滑，充滿電魚湯甜味，材料豐富。
估唔到你食壽司拉麵都唔錯，湯底甜味重，非常之忌廉咪，叉燒非常之滑，細細碗拉麵都好滿足。
唔出嚟食飽肚仲可以叫天婦羅烏冬，最好就係分開另上，本身炸得夠乾身，蝦細細隻，但勝在夠甜。
by admin | 9 月 17, 2023 | BB Friendly, Blog, 尖沙咀, 日式料理, 甜品
紅葉茶屋@尖沙咀
17/9/2023 11:30
今日一家大細出尖沙咀行街，帶埋BB出遊搵食都要諗過度過。就喺尖東帝國中心搵到一間新開嘅日式餐廳，估唔到非常適合帶小朋友，值得記錄一下。餐廳係日式裝橫，環境相當闊落，容許BB車直入，實在感恩。坐係近窗嘅卡位，仲有非常穩嘅BB椅同兒童餐具，非常適合帶B出街嘅家庭。餐單選擇相當多，各款日式定食，麵食同甜品等。睇相已經好吸引。
溫泉蛋卡邦尼烏冬 $92 賣相非常靚，擺盆有心思，選用器皿都好特別。卡邦尼烏冬奶香味非常濃郁，忌廉汁相當多，上面仲有唔少煙肉，一隻半熟蛋。估唔到西式醬汁加上烏冬配搭不錯。定食送上兩款小食，應該係牛蒡同醃蘿蔔。
牛肉壽喜燒定食 $138 大大碗牛肉壽喜燒跟飯，仲有麵鼓湯同餐前小食，相當豐富。牛肉相當多，肉質都幾腍滑，最鍾意甜甜嘅壽喜燒湯汁，最岩撈飯。
雪糕抹茶拿鐵 $25，叫定食隨餐加配飲品，$25大大杯絕對抵加。抹茶味相當濃，又有奶香，加上雲呢拿雪糕球，好味。
自選炸物盛合 $88 炸餃子 $38 自選炸物揀左炸生蠔鮮，鮮甜大大隻，不錯。豆腐魚餅有粟米蘿蔔魚肉等，好咪有營養，好適合小朋友。另外仲有兩件炸雞，脆皮薄薄的肉質都OK的。另外再加一客脆卜卜炸餃子。
紅葉甘之三味 $88 秋日期間限定，睇相已經好吸引，估唔到實物同圖片一樣都係好靚。一客甜品有三款，赤肉蜜瓜雪糕非常清甜，完全係水果天然嘅味道，非常驚喜。士多啤梨奶凍入口即溶好軟好腍，小朋友食唔停口。Tiramisu用木盒盛載，靚到不得了，紫色原來藍莓版本，甜中帶一點酸，幾特別。
抹茶蕨餅新地 $68 小朋友揀野食就係賣相行先，一睇就點中呢個靚靚嘅甜品。上菜時真係嘩一聲，大大一杯窩夫皮裝住巨量牛奶雪糕，雪糕應該加左焦糖醬，牛奶味帶點焦糖甜。仲有一個特濃抹茶雪糕。紅豆又係令人回憶日本風味，煮得軟爛仲甜度十足。最欣賞主角抹茶蕨餅，抹茶味重，帶一點甘苦味，口感煙韌。成個甜品就令我地回憶起當年宇治之旅。
幾鍾意呢間餐廳無論環境、食物，特別係甜品都充滿日本風情。雖然佢並唔係一間親子餐廳，但係異常地適合帶小朋友。係尖沙咀咁繁忙嘅地區中，一個非常適合一家大細食飯嘅好去處。
