by admin | 3 月 29, 2024 | 2024 復活節六人行台北之旅, BB Friendly, 台北, 台式, 旅遊
張吳記什錦麵 29/3/2024 12:00
搜尋八里美食，就出現呢間「台灣第一碗」。未到12點，餐廳已經大半滿，人氣非常勁。似乎係家庭式經營，老闆娘好多時一腳踢。GOOGLE評分4.1分，有好多傳媒報導佢超大碗公麵，係非常出名嘅排隊名店。店內見到超大大碗模型，12人份量超大一碗。
什錦湯麵 NT$120﹕招牌菜，清清淡淡，湯頭幾甜，麵質煙韌，有大蝦、菜、豬肝等材料。
什錦炒米炒 NT$120﹕湯粉嘅走湯版，新竹米粉比較粗身有口感。
熱炒時蔬 NT$ 100
東北角小卷NT$260﹕份量勁多，小卷只係簡單白煮，再沾上咸甜醬油，按個人喜好仲可以加Wasabi，食法好新奇，食得出小卷好新鮮鮮生。
蒜泥鮮蚵NT$220﹕鮮蚵又係白煮，粒粒大大粒非常飽滿，入口好鮮甜，份量幾多，仲加左勁多蒜泥，好惹味。
香煎海鮮餅 NT$150﹕海鮮餅煎得香口，類似蝦膠加入好多蔬菜料，口感清爽，好味。
可樂NT$30、開喜烏龍茶NT$70
埋單NT$1,070。平價的一餐，雖然唔算特別好食，但滿滿台味，另有一番味道。小店人手不多，已見盡力做好招待，都請客人合作。離開時見外面排晒隊，可見人氣真係非常勁。
by admin | 3 月 29, 2024 | 2024 復活節六人行台北之旅, 台北, 旅遊
29/3/2024 10:00
食完豆漿早餐，開始第二日行程。今日係去淡水八里一日遊。
南京復興 > 松山新店線 > 淡水信義線 > 淡水
搭淡水信義線時，係士林站附近見到Hello kitty彩繪車擦身而過，非常驚喜。車程大約45分鐘終於都到達淡水。淡水車站係一座紅色磚砌建築物，向海邊行出少少就有一遍大草地。今日竟然無雨，太陽仲好猛，係草地吹住海風都好舒服，長廊仲有幾個打卡位。
淡水碼頭可以坐船去對面八里，船票來回NT$80，兒童半價，幼兒免費。碼頭只不過係條長斜路，非常簡單。早上唔係太多乘客，船程10分鐘非常舒服。
29/3/2024 11:00
十一點幾到達八里，無乜人，好清靜。碼頭旁邊海濱長廊裝修得好靚，踩上木板好舒服。行無幾耐就到左兩個打卡位。BALI字母係必影，仲有彩虹橋影相都好靚。平日黎實在太好，基本上可以獨霸呢個無敵大海景。
by admin | 3 月 29, 2024 | 2024 復活節六人行台北之旅, 台北, 台式, 小食, 旅遊, 飲品
洪記豆漿 29/3/2024 8:30
酒店附近就有一間豆漿店，仲24小時營業。小店細細都有少少座位，當日視察環境可有位足夠我地入座。自助形式點餐取餐流水作業，非常地道午庭風味。
豆漿 NT$30﹕豆味香濃，好幼滑無渣，叫左半糖微甜相當不錯。熱豆漿夠熱、凍豆漿夠凍。
咸豆漿 NT$40﹕與醋產生化學作用豆漿變得杰杰的，仲有一舊舊，類似豆腐咁。豆漿咸鮮味，加左輕微醋酸味，配料有蝦米，醬菜等，當飲湯品都幾有趣。
小籠湯包 NT$90﹕小店都有小籠包仲要品質相當不錯，皮薄適中，中間肉餡香甜充分肉汁，沾上醋味道不錯。
肉鬆蛋餅香 NT$45﹕餅皮煙煙韌韌，加上蛋多一份蛋香，包住好多肉鬆，甜甜地不錯。
燒餅加蔥蛋 NT$40﹕燒餅非常脆比較硬實，蔥蛋味道惹味。
全單埋單唔洗 NT$400，即港幣$100唔洗已經夠六人食到飽飽，食物出品不錯，豆漿尤其出色。黎到台灣一定要試下呢啲地道小店，快靚正。
by admin | 3 月 28, 2024 | 2024 復活節六人行台北之旅, 台北, 外賣, 小食, 旅遊, 飲品
28/3/2024 19:30
係貓空逗留至晚飯後離開大約晚上7點半，天已經黑齊，坐纜車落山，沿途都係漆一片，只見山下市內燈光閃閃，呢個夜景都幾吸引。落番動物園站車站裝置都亮燈。是日由黃昏上山，到夜晚落山，景色全收，的確值得來一次。
28/3/2024 21:00
回程番南京復興差不多九點，先去一間主題7-11打卡順便補給，買定麵包做早餐。
艋舺雞排台北寧夏店@Uber Eat 28/3/2024 22:00
知道艋舺雞排非常出名，今次宵夜就咁決定。
大吉大利獨享餐 NT$228
天王雞排非常香脆，炸皮脆卜卜甜甜的，但一啲都唔油膩。雞肉好腍身，肉味甜甜，仲有油汁，相當唔錯。
副餐選左甜不辣，即類似炸魚肉的，炸皮好薄，煙煙韌韌，調味濃郁，好惹味。
飲品選擇蜜桃金萱冷泡茶，有蜜桃甜味，茶味香濃。
by admin | 3 月 28, 2024 | 2024 復活節六人行台北之旅, BB Friendly, 台北, 台式, 旅遊, 飲品, 麵包
貓懶 28/3/2024 18:00
貓空有好多餐廳，都係自家經營，遍佈成個山頭。因為有大有細，擔心太夜山路漆黑，所以揀餐廳一定要近纜車站，最後就揀左呢間四爺品牌嘅貓懶。距離纜車站只係2至3分鐘腳程，一座大大嘅三樓村屋改裝成私房菜形式餐廳。先經過二樓就係四爺，宮廷式裝修太豪華，而三樓天台改裝半戶外位置就係貓懶。職員有提醒過今日天氣比較悶熱，但一上到黎個景觀已經值回票價。還好天氣唔算熱，間中有自然風，算幾舒服。
我地坐最外圍嘅一張八人大枱，靚景盡在眼前，可算一覽無遺。始終係戶外地方，枱椅都封塵係絕對理解，亦無投訴。餐廳提供台式料理，菜式選擇都好多，亦有好多茶飲。落單後好快就上菜。
鐵觀音鮮奶茶 NT$220﹕以一壺上配細杯細幾特別，份量都唔少，斟極都仲有。鐵觀音茶香味濃，奶味配合得宜，熱飲更有味道。
五彩小饅頭 NT$180﹕人氣必點一品，新鮮熱辣可愛小饅頭，有綠茶紅豆、南瓜、燕麥、芝麻、紅莓味，口感鬆軟，味道香，小朋友十分鍾意。
金字塔茶炒飯 NT$290﹕金字塔形做得好公整，炒飯炒得乾身有茶油，有蛋、蘿蔔等簡簡單單。
鐵板牛柳 NT$330﹕牛有牛味，帶好輕微辣，但口感比較韌，似乎熟左少少。
茶燻雞 NT$380﹕雞肉幾滑，有好香煙燻嘅味道，唔知呢種係咪就係茶燻。
蝦醬炒空心菜 NT$200﹕味道足夠。
茶人茶溪蝦 NT$300﹕ 原來係炸得好脆嘅蝦仔，真係非常香脆，個殼仲有少少硬，下面舖滿炸米粉，送飲品應該不錯。
全餐連加10%服務費，埋單NT$2,090。之前係Klook搵到優惠$98可以作NT$500消費金額，即差不多八折，最後一共買左四張。扣除現金券後補差價NT$90，實價即係港幣$98X4+$22.5 = $414.5。
全餐飯見證日落到天色變暗，最後全黑仲伸手不見五指。入夜後枱上只開左一盞小燈透出一絲絲光，好有情趣。黑到連餸都睇唔清楚，的確係幾難忘嘅體驗。餐廳環境一流，觀景一流，入夜後見到山下燈光。食物算可以，夜景無價，反正係香港絕無可能有呢個體驗。
by admin | 3 月 28, 2024 | 2024 復活節六人行台北之旅, 台北, 旅遊, 甜品
28/3/2024 17:00
離開動物園行步行大約5分鐘就到貓空纜車站。之前係Klook買左優惠套票，動物園門票加配來回纜車票只需每套$65。纜車價格按距離計算，總站到總站原價NT$120，來回NT$240，已經要$60。呢個套票真在太抵。小朋友用悠遊卡就可以得兒童優惠價。
到月台都見到有不少遊客，但佢地都揀水晶車箱，普通車排隊好快就上到。每卡纜車都有唔同顏色，仲以唔同動物做主題幾得意。纜車一卡可以坐8人，連BB車推上都可以直接推上去，非常闊落。
天氣預報呢幾日會落雨，所以將戶外行程動物園及貓空調前。今早係動物園落左幾場小雨，慶幸下午天氣十分好，坐上纜車都可以睇到台北市內景色，山上梯田等。全程近30分鐘，終於到達貓空山頂，相當熱鬧有人氣。
貓空茶屋 28/3/2024 17:30
貓空主打茶料理，下午茶選擇對住貓空站嘅Cafe茶屋，係一間新派茶料理餐廳，專用茶做飲品甜品，最出名係雪糕，打卡一流。Cafe有位可以坐下慢慢Hea。
鐵觀音霸淇淋 NT$90
大大杯，賣相勁靚，雪糕上面放左一塊可愛嘅小貓曲奇。雪糕先係重點，茶香味勁濃，入口已食到茶味，奶香味平衡，相當不錯。
紅豆包種聖代 NT$100
係茶雪糕再加上紅豆更加豪華，雖然唔清楚包種茶係咩茶，但都食得出輕輕茶香味。如果兩款比較，鐵觀音味雪糕完勝。
