by admin | 3 月 27, 2024 | 2024 復活節六人行台北之旅, BB Friendly, 台北, 台式, 旅遊, 麵食, 點心
朱記餡餅粥店 松山壹號店 27/3/2024 18:00
離開「饒河街夜市」步行五分鐘就到「松山Citylink壹號店」。呢個商場係松山火車站直結，非常方便。商場入面有好多食肆，揀左呢間人氣連鎖包餅餃子店。Google評分有4.1分相當唔錯。小店座位唔太多，我地六人只能與人共坐一張長檯，還好仲有BB椅。
黃金鍋貼NT$125﹕鍋貼大大隻，外皮煎得脆卜卜，皮唔算太薄，厚度適中，咬開外皮中間肉餡好多，仲有肉汁，味道不錯。
鮮肉小籠包NT$150﹕賣相唔錯，外皮幾薄，肉餡香甜，中間有肉汁，價錢唔貴味道交足功課。
菜肉餛飩麵NT$125﹕ 碗麵上面有買大粒菜肉餛飩，皮唔算太薄，菜肉好豐富。麵條幼滑，有米香味。
紅燒半筋半肉麵NT$230﹕牛腩煮得幾入味，牛筋夠腍身，但係刀削麵質地較厚，口感比較硬。
櫻花蝦炒飯NT$160﹕炒飯炒得乾身，材料豐富，好多櫻花蝦，飯充分同蛋混和做成黃金炒飯蛋味香。
鮮蝦餛飩炒手NT$130﹕有八大粒鮮蝦餛飩，內餡豐富，比菜肉多一份蝦味鮮甜。醬汁蒜味香少辣，非常下飯。
燙青菜NT$70﹕燙椰菜加上勁多蒜蓉。
全部埋單NT$990，圍番港幣$250，算係地道又平民嘅台式小籠包餐，味道還好。
by admin | 3 月 27, 2024 | 2024 復活節六人行台北之旅, 台北, 小食, 旅遊, 燒烤, 甜品, 飲品, 麵包
27/3/2024 16:00
終於都離開酒店開始我哋嘅旅程，先去寶雅百貨巡視一下，店舖相當大，絕對適合補給。朝頭早落酒店最近嘅「南京復興」捷運站。先係捷運站買行程所需嘅悠遊卡，開卡每張NT$100。另搵返兩張應該十幾年前嘅悠遊卡仲用得，實在太厲害。加值NT$1,000 ，應該夠晒呢個行程使用。
近近地第一站去「松山」，捷運只需要七分鐘。值得一提台灣實在太過親子友善，捷運第三至四卡係親子友善車箱，裝置比較可愛，非常適合帶BB車俾我哋。
16:30
饒河街夜市
福州世祖胡椒餅 NT$60
五點未到，「饒河街夜市」好多店舖仍在準備中。福州世祖胡椒餅已經開左，已排左幾個人，買兩個來試下。新鮮即整，熱到辣口，外面酥餅脆卜卜，中間肉好多腍而且勁有肉汁，好香胡椒味，調味夠濃郁又有辣味，認真不錯。晚飯後再經過，已見到打晒蛇餅排隊，排到出夜市牌坊外，人氣真係超勁。
優品娃娃親子遊樂園
台灣必玩抓娃娃機，呢間係Google得到4.9分好評，極高人氣嘅遊樂場。平日五點幾來到，人唔多，基本上可以任選機玩。第一次玩小試牛刀，小朋友都成功夾到零食，滿足感十足，越玩越上癮，繼續唱錢玩。玩過有標明新手機，爪力超強唔會鬆，只要對岩個位基本係必有收穫，成功出到幾次飲品。主要挑戰較易夾嘅薯片、零食類。最後玩左大約NT$800，半車仔戰利品，第一次玩算相當滿意。戰利品都唔差，即食士多啤梨雪條都好食。新貴派花生朱古力派超正。黎到台灣深深感受原來夾公仔真係會夾到野，有得玩有得食有得拎，大人細路都玩得開心!
赤焱厚子骰子牛中份 NT$300
場內有幾檔燒牛粒，呢檔係帥哥師傅，師傅即場燒烤，好似睇緊煙火Show咁，火光熊熊，非常浮誇。中份份量都唔少，牛扒切成少粒，牛味濃郁，熟成度適中，質素都算幾夠腍。基本有輕微咸味，一款加入玫瑰鹽帶甜香味，另一款加左檸檬椒鹽帶輕微酸味。
古早味香腸 NT$60
晚飯後再去，夜市係超多人，驚覺BB車係完全入唔到，幸好今日黃昏已來過。最後決定試埋台灣特色一口香腸，都要略為排一下隊。NT$60一份有六大粒香腸，即烤熱到爆，外皮脆皮，中間內餡唔乾，味道濃郁。
50嵐
50嵐都係台灣出名茶飲店品牌，揀左招牌No.1試一試。四季春珍波椰 NT$50﹕茶底清香，不太甜，配料相當多，爆珠波一咬爆汁，椰果香甜，仲有煙韌珍珠。
婆婆麻糬
係夜市路口見到婆婆手作芝麻花生麻糬，一盒NT$80，大大粒，外皮煙韌，中間內餡多到爆，花生味同芝麻味各有特色，非常香濃。
去台灣必行夜市，今行有老有嫰，只係黃昏入夜前來感受一下。入夜後真係非常熱鬧。
by admin | 3 月 27, 2024 | 2024 復活節六人行台北之旅, 台北, 旅遊, 酒店
27/2/2024 13:00
台灣到著！落機等一陣就可以拎番BB車。因為台灣禁止豬肉入口，臨到入境大堂前，檢查多一次手提行李過X光。還好流程好快，直行直過。去到入境大廳好快就被招待行禮遇通道，唔洗排隊實在太好。成個流程都好快，去到等行李用左少少時間。
出咗閘之後第一件事就係「遊台灣金福氣」抽獎，可惜登記左六個名額都唔中，冇得升級做豪華團。
大約2PM正式離開，拎咗行李就聯絡「小傑車隊」司機，出去大樓外候車區，好快就等到司機，估唔到係年輕司機，仲幫手搬行李，非常有禮。車型係T6九座商務車，座位唔算太闊，但係我哋六個人足夠有餘。行車相當安全順暢，四十五分鐘已到達酒店。司機非常好，原收費NT$1,350，都俾齊頭NT$1,400。計返港幣大約三百幾蚊，一家大細坐一架車舒適又方便。
14:45
唔洗一個鐘頭車程就已經嚟到台北之旅嘅落腳點「JR東日本大飯店台北」。落車一刻即刻感受到五星級貴賓招待，最初兩位服務員幫我哋拎行李，不知不覺再來多三四位，招待我哋一家大細落車，行李完全唔洗自己取。酒
酒店算大，大堂有氣派，中庭向上望見到酒店全高，空間感十足，裝修好有日式風味。酒店係2021年夏季開幕，知道都係由前身舊酒店重裝加建，但整體感覺非常新，真係同住新酒店無誤。
Check In時服務員說明好清楚詳盡。由於時間尚早，其中一間房已完成可用，另一間在旁邊的房尚待最後檢查。最後決定先取一間房卡，轉頭再攞另一間。
房間位於六樓，房間比想像中大，裝修清雅，整齊清潔，係好典型日系酒店風格。落地玻璃無風景，見到出邊商業大廈。兩張單人床都算幾大，可以兩床合拼，變成一張超大床。原本遲左預留嘅床圍都順利得到，亦已經安裝好。旁邊仲有小椅，書枱等，仲有足夠空間可以撻開兩大件行李。周邊USB插蘇，牆身插蘇非常多，小酒吧每天送上六枝水，茶包、咖啡等。廁所更加大，智能日本座廁，除左企缸仲有大浴缸，洗面空間都係非常大。備品有沐浴露、洗頭水等都齊備。好細心地準備兩套小朋友牙刷同拖鞋，電視亦有兒童台。真係一間設備齊全，非常適合家庭旅客嘅酒店。
說時遲那時快，前台來電話已準備好另一房，服務員將特意上來送房卡。另一房佈置大致相同，面積略為細少少，但空間已算不錯。
酒店坐落捷運南京復興站旁，最近兩個出口都有升降機，大約步行一分鐘直達，附近有幾間便利店，再行五分鐘就有一間三層高嘅生活用品百貨，寶雅，除咗一般生活用品，仲有好多藥妝，零食飲品等等，非常適合補給。
by admin | 3 月 27, 2024 | 2024 復活節六人行台北之旅, 台北, 小食, 拉麵, 旅遊, 日式料理, 美食廣場
27/3/2023 07:30
等左四年終於可以出發旅行，今次仲多左個細佬仔，祖孫三代一行六人台北之旅出發!
長榮網可以早過48小時之前自動登機Check In，仲會自動編定座位，呢個服務當然唔放過啦。到登機48小時前，都可以再上官網睇睇自己嘅座位，見到系統已經編訂左坐附近嘅位置。咁岩見仲有窗口位，可惜趕唔切轉位，反正短短個幾鐘無乜所謂。
提早約定福特的士機場專線，準時7:45AM的士開車。車程好順，8:30AM未夠已經到機場。真係久違了，應該四年冇嚟呢度。
長榮櫃檯行李寄倉人唔算多，但可惜幼兒同行都冇任何優先通道，乖乖排隊吧。人唔算多，好快就幾好行李，取得登機證，而BB車就一如以往去到閘口先交艙邊托運。
大約9AM入閘，雖然Chok唔到禮遇通道，但出境過關都唔算多人，好快就完成出境，檢驗手提行李嘅手續。
09:30
喺禁區之內搵美食廣場食早午餐，呢度餐廳都算多，都預咗機場價錢偏貴，反而品質不錯嘅霸嗎拉麵只係$95，絕對可以接受。
霸嗎拉麵
豚骨叉燒味肉拉麵$95﹕賣相不好錯，湯底豬骨味濃，質地夠忌廉味，好幼滑，膠質亦重。拉麵硬度正常，叉燒大大件，肥瘦適中，最好味一定係味蛋，夠晒入味，蛋黃流心狀態，不錯。
鰭孝
豬軟骨烏冬$88﹕賣相不錯，豬軟骨幾腍，都夠入味，烏冬麵正正常常。
10:15
食飽到周圍行，見到新開奇妙巨蛋遊樂場，適合6歲或以上，但剛剛喺清潔時間，要係指定時間取籌，無緣。
時間好快過，登機時間係10:45AM，5號閘口。就喺附近驚喜發現長榮Hello Kitty 彩繪機。急不及待不停打卡。原來真係中咗呢架彩繪機！
香港 > BR852 11:15 – 13:00 > 桃園
坐到彩繪機實在太開心，感覺就好似被upgrade咁。但上到機，除咗頭等有一幅Hello Kitty相架之外，其實機內同一般機無分別，正宗得個殼，開心過算。幸好呢個機型嘅座位感覺上好闊落，前前後後空間都算大，相當舒適。每位小朋友送上一粒得意扭計骰。機上娛樂豐富，電影電視劇卡通齊全，可以消磨唔少時間。
一個半小時機程非常充實，上機無耐好快就飛機餐。肉燥飯套餐，小小一份應有盡有，肉燥本身味道幾濃，送飯一流，仲有一件魯水豆腐，魯蛋幾入味，份量細小又好味。隨餐配紅藜野菜小脆餅，薄脆帶少辣，味道不錯。仲有清涼麥仔茶，新鮮熱辣烏龍茶都可以自選。呢個飛機餐味道不錯，小朋友都可以食晒成個飯。
準時一點就到達桃園機場。估唔到小朋友全程機都好合作，完全無扭計。抵讚！
by admin | 3 月 26, 2024 | 2024 復活節六人行台北之旅, 台北, 旅遊
一個疫情打斷左幾個旅遊計劃，事隔幾年終於可以出國旅行。首選係日本，但櫻花季機票實在貴得太過份，見台北機票唔貴，先來個入門級之旅不失為一個好選擇。
台北之旅定案! 27/3/2024 – 1/4/2024
- 機票﹕長榮航空，成人$2,073、小童$1,814，價錢唔算貴，呢個價錢長假期旺季來說絕對值得入手。
- 酒店﹕對酒店一向要求高，地點方便近車站係首要條件，仲要房間要大，又要適合親子同遊，選擇真係唔係好多。綜觀價錢都唔平，不如住好啲。最後決定呢間日系品牌五星級酒店，位於南京復興站一分鐘即可到達，房間夠大，仲容許小童不加床可以免費同住。經Agoda訂「JR東日本大飯店台北」豪華兩床房2間房5晚 HKD$12,2xx。平均$1,200+/晚，五星級酒店可能唔算太貴了。
- 換外幣﹕朋友介紹，深水埗「發達鳥」，電話預約，即日取，匯率不錯，當日兌1:4，最後換左HK$18,000=NT$72,000。
- 通訊﹕除左一張旅遊用電話卡，係Aplex租左一隻Wifi蛋，可以一家人使用。4G不限速，台灣$28日，仲有8折，每日$22+。原來係用漫游超人軟件。機身夠輕，前後兩日係店鋪取還機，相當方便。
- 景點門票﹕係Klook訂部份景點門票，價錢平過俾即場台幣，憑QR即可入場好方便。咁岩遇到復活節仲有大優惠，訂單滿$1,200減$70，所以更加平。
- 天氣﹕一路mon住各大台灣天氣預佈，初頭見日日都落雨，日期越近越準確，喜見落雨機率降低。最後因應天氣定行程，將啲戶外景點提前，臨出發幾日先信心編定，好險。
- 機場交通﹕行程由桃園機場出入，一家大細有老有幼，決定選舉機場接送包車直達酒店。資料搜集一輪後決定預約口碑不錯的「小傑車隊」，事前都用Whatsapp預約，回覆快，不錯，值得期待。
