by admin | 6 月 18, 2018 | 2018東京家庭樂, 旅遊, 日本, 東京
四點零鐘終於到達押上站，地鐵出閘後行前少少已見到晴空塔入口。晴空塔基座商場ソラマチ原來都幾大，有兩座大樓連結成。
一入到去就有好多特別小店，有一間海鮮俱樂部實在好有趣，原來係將新鮮魷魚燒成薄脆，呢隻魷魚實在死得好可憐又得意。每塊¥378，一款軟身就似食魷魚絲，仲煙煙韌韌。另一款薄脆，直頭似食蝦片咁脆晒，各有各特色。
見時間尚早，五點幾增遊墨田すみだ水族館，入場費¥2050。場館有好多大魚缸，水母展係一大特別，原來BB水母好鬼得意。中場仲有企鵝缸，都有唔少企鵝游黎游去。場館的確係細細，都唔覺唔覺都行到一個鐘，悠悠閒閒可以一Hea。
行完水族館，係商場行下，四樓比較多特式小店，有Hello Kitty Japan、元祖食品サンプル屋。
by admin | 6 月 18, 2018 | 2018東京家庭樂, 旅遊, 日本, 東京
兩點零食飽飽後見雨細番少少，可以重返仲見世通行下。沿路都係小店舖賣零食果子、特色工藝品。
淺草寺後仲有一條西參道商店街，入口就有一間花月堂，賣巨型蜜瓜包。買左一個配雲尼拿雪糕(¥500)，其實係新鮮熱辣嘅菠蘿包配凍冰冰雲尼拿雪糕。菠蘿皮外脆好鬆脆，包包本身好軟熟，雪糕奶味香濃，不錯。
離開淺草西參道商店街，諗住去附近嘅地產店まるごとにっぽん，點知咁岩盤點休息。惟有提早完成淺草行，移步去晴空塔。淺草實在太多，原來有好四個淺草車站，一定要搞清楚方法先。原來行去淺草線都幾遠，仲要搵升降機上落都用左唔少時間。
by admin | 6 月 18, 2018 | 2018東京家庭樂, 旅遊, 日本, 東京
淺草最出名鰻魚飯、另一出名係天婦羅。今行決定去浅草うな鐵食鰻魚。淺草實在太大，有啲迷失，雨中行左一輪中午一點先搵到呢間店，原來就係浅草駅前不遠處。呢間Tabelog 3.54名店，裝修唔算好古舊，上層二樓仲有開揚遠景睇到河。
店方提供午市套餐，日本國產鰻魚不嬲都貴，午市有套餐感覺優惠少少。總共叫左三客套餐。
ダブル重セット ¥6,930
傳統蒲燒鰻魚飯，呢份係兩條鰻魚，份量好澎湃，鰻魚多到有部份重疊。鰻魚燒得好香，外皮仲有輕微脆脆，肉質好腍，油脂豐富。白飯都加左醬汁撈勻，非常好味。
一人桶（うなぎたっぷり）1尾 ¥4,530
桶裝鰻魚係蒸鰻魚飯，鰻魚無咁香口，入口更加腍。
一人桶（うなぎたっぷり）1尾 ¥4,670
呢款鹽燒係店方獨家研發，味道比較清爽，鰻魚都好腍身。除左就咁食之外，仲可以加茶漬撈勻，就有另一番風味。
連稅總共¥16130，非常矜貴，味道不錯的一餐。
by admin | 6 月 18, 2018 | 2018東京家庭樂, 旅遊, 日本, 東京
上野同淺草其實好近，大約12點就到達淺草。銀座線淺草站一出，行前幾步就見到雷門。去雷門前先去對面馬路嘅淺草文化観光センター補給一下，裡面有育嬰室，八樓仲有展望台，可以望到對面嘅雷門仲見世通同遠眺晴空塔。
補給完就直落雷門，呢度係旺區，人非常多，點知行到一半雨越落越大，決定折返先去食野。
by admin | 6 月 18, 2018 | 2018東京家庭樂, 旅遊, 日本, 東京
個人就訓得麻麻地，五點左右已經醒左，磨到七點起身，梳洗好就出發。酒樓包埋自助早餐，就係大堂後方，8:30原來都幾多人，要等左一陣位。L型櫃枱加中間仲有張長枱選擇都唔少。早餐以西式為主，四、五款新鮮麵包酥餅，炒飯、炒蛋、香腸、煙肉。前方仲有兩款濃湯、鮮奶粟米片、仲有水果沙律吧。每日都有樣本參考，一盤裝晒想食嘅野。整體黎講，早餐比想像中好味，推薦炒蛋、香腸、磨菇忌廉湯味道勁濃，不錯吃。
09:15 出發，出發先同Pepper合照一張
今日地鐵一日遊。喺機場買左外國人專用Tokyo Subway Ticket 24hr (¥800)，可以24hr任搭東京Metro地鐵同都營地鐵全線。第一程由汐留坐大江戶線去上野御徒町。
呢幾日天氣都唔穩定，今日就多雲，降雨機率10-20%，點知發現唔記得帶車檔，中途真係落起雨黎，還好唔算太大。十點多黎到上野，先買一間百年老字號 上野兔屋うさぎや，係東京三大銅鑼燒之一，每個¥210，仲新鮮熱辣入口暖笠笠，軟綿綿，爆多紅豆，甜品雖然偏甜，但係紅豆自然嘅甜味，唔覺得膩。
十點半黎到上野阿美橫，呢條街全街都係藥房、小店，最好買零食、水果。就一間二木菓子，已經買到好多平靚正嘅零食做手信，一大袋都係¥1887。沿街一路直行，經過唔少水果店，仲有切開一條條嘅即食水果條，橙肉哈蜜瓜一條¥200，都幾鮮甜多汁。
行到11:45才離開，阿美橫嘅盡頭就到上野車站，atreアトレ行個圈就搵Metro銀座線去淺草。
by admin | 6 月 17, 2018 | 2018東京家庭樂, 旅遊, 日本, 東京
執好簡便行裝即刻出發，由於得番下半日，首日任務係認識社區，搵下超市、便利店做番補給。由酒店落樓，好快就到カレッタ汐留，見到汐留之龜。再沿行人通道行前少少就到汐留シティセンター。
今晚晚餐有兩個選擇，一個係和式蕎麥麵，一個係仙台牛舌，大家都舉手揀牛舌。六點九黎到杜の都 太助 汐留店，未到放工時間無人客人，坐左六人長枱，幾舒服。
柯打一個單品加四個餐。清湯燉牛舌¥1180，有兩大塊牛舌，只係簡單用清湯燉煮，入口非常腍，而且牛味極濃。非常不錯。
鹽燒牛舌一人前套餐¥1600，另一款味噌燒牛舌一人前套餐 ¥1700。套餐包括六切牛舌、牛肉清湯、醬菜同麥飯。牛舌都算厚切，鹽味燒得香口表皮脆脆地，中間都幾腍爽口，牛味香濃。味噌味醬料味較濃，反而食唔出牛味。清湯仲有牛肉相當腍身。
套餐貴多少少，可以跟埋燉牛肉，鹽燒套餐¥2500，味噌套餐¥2600。燉牛肉有類似番茄醬煮，味道勁濃厚帶微酸，所以反而食唔出牛肉鮮味。都係湯燉牛舌最食到原味。埋單連稅¥10346，價錢略貴，但味道不錯。但感覺上大阪食過嘅利久好似更加好味。
飯後喺附近行街，都有好多食肆，商業區夜晚實在唔太旺。最值得去嘅就係カレッタ汐留，46F Sky View免費展望台。雖然景觀窗唔算大，但層數夠高，都睇到好遠嘅夜景。
趕得切八點去宮崎駿大鐘睇時鐘表演，原來大鐘真係非常之大，表演短短幾分鐘主要係音樂，仲有公仔會出來轉來轉去。
酒店附近沿路就有兩間Family Mart，日常飲品、宵夜都夠玩。買左酒店前枱知道行5至10分鐘有間24小時超市，沿路行過去都比較靜，但好彩都多野買，尿片只係
¥1280，仲狂搆左好多飲品、水果、雪糕，埋單
¥5775，大袋細袋滿載而歸。
大師期間限定Double Cheese (¥198) 非常濃。雲尼拿曲奇紅桑子(¥198)酸酸甜甜更加好味。
