by admin | 6 月 17, 2018 | 2018東京家庭樂, 旅遊, 日本, 東京
比原訂時間早少少到達成田空港T2，經過大玻璃睇到停機坪。
去到海關，又可以行優先通道，呢段真係快左好多。過晒關分頭行事拎埋行李，幫紫凝換埋片，好快搞掂就出閘。感覺上成田機場比相像中細好多，出閘口超級細，而且樓底好矮。
兵分兩路，我去近A閘嘅京成巴士售票處買Subway 24hr 地鐵票，另一小隊就去拎wamazing 免費sim卡。集合後，再去B1F JR東日本旅行服務中心紅色窗口買票。雖然都幾多人排隊，但有工作人員先同你落單，去到櫃枱就好快處理得到，買左N’EX去回車票同埋Suica。
N’EX東京去回車票 ¥4000，可以由機場來往主要車站，連轉乘JR其他站都包埋。今程搭16:22 – 17:17，唔洗一個鐘就到東京，車款舒適又闊落。到達東京後就係同月台搭横須賀線，就可以轉JR去新橋。
新橋落車後，出閘就經過Wing地下商店街、穿過地鐵站去酒店。全程室內唔怕落雨係一大好處，但都經常上上落落，其中一程仲無升降機。第一次行實在唔太識路，為左搵升降機都繞左少少路，全程15分鐘。
黎到Hotel Villa Fontaine Shiodome酒店大堂前已經感受到氣派，樓底實在高太得離譜。位於商業區汐留，裝修都係時尚風。Counter Check In英文溝通正常，算快手，仲跟足要求安排兩間隔離房。走廊非常光猛闊落，仲有大玻璃直望樓下大堂。528、526 係wing尾大單邊，入房唔細，裝修非常新淨，好乾淨企理。
by admin | 6 月 17, 2018 | 2018東京家庭樂, 旅遊, 日本, 東京
07:00 到機場，去K段香港航空櫃位，優先隊打左唔少人尖。早前已經網上預辦登機，只欠我同紫凝，即場Check in後，好快就出埋幾張機票同埋寄行李。過安檢又係行特別通道，兩枝水過關無問題。過海關又唔算多人，整個過程都算好快搞掂。
出關後發現美食廣場大裝修，兜左個大圈先見到麥當奴原來照常營業，不過實在太多人，都等左一陣，咁岩wechat pay做$50減$10，又慳番少少。
8:30 到達208閘口登機，打卡是指定動作。BB車到達閘口先寄存，用到最後一刻。
因為班機都幾爆，電話訂BB票時已Mark左座位，機中2X行闊位後要隔好遠先有另外兩個位。咁惟有揀機中後嘅51行闊位，爸媽就坐49行，原來隔左道牆。
本次班機係HX608，09:15 – 14:55。飛定左好快就上BB餐。
紫凝算好乖，無乜扭計，食左果蓉、食少少麵包、飲果汁，之後訓左一個零鐘。我地就輪流食飯，公公婆婆又抱一陣。四個半鐘總算安然渡過，真係極限了。
今次係飛機早餐，一份點心拼炒麵，麻麻地一般般。另一份炒蛋香腸就唔錯。跟餐配士多啤梨乳酪、麵包。
by admin | 11 月 17, 2017 | 2017關西親子遊, 旅遊, 日本, 關西
今次選擇住喺難波，係為左方便來往機場。此行帶住紫凝BB就要更加考慮移動路線，同埋酒店嘅育嬰設施。問過幾間酒店唔係太多酒店提供BB床，所以最後揀左呢間Hotel Monterey Grasmere Osaka。
地點方便
酒店位於JR難波站旁，由車海電鐵站落車，可以沿地下街一路行去JR附近，其實話就話十分鐘，但拎住行李又推住車咁其實都幾遠，不過勝在全程只經過一條扶手電梯，而且一直都有蓋不見天，呢樣已經對我地黎講幫助好大。而且平日移動主要搭地鐵、京阪，由酒店行過去相對近少少，只係頭尾兩日辛苦少少，還算可以啦。最正係酒店樓下有一間大超市，日常所需補給真係超方便。
服務周到
職員英文流利，溝通無問題，而且一早準備好BB床，仲送一份兒童用品，不錯。Check In算快速，而Check Out更係極速，還左房卡就得，完全無安排同事檢查房間，真係一手交一手就搞掂。臨走前寄行李亦相當安全，登記後行李會放入房間，唔會就咁放大堂。
房間企理 配套充足
大集團經營，上到大堂已經感覺到氣派十足。房間大小正常，值得一提，酒店保安唔錯，每層要嘟房卡先可以進入走廊。走廊相當闊落光猛。房間正常大，雙人床正常大，都算舒適，好容易適應。床尾放左BB床，行李仲可以攤開放床尾，算唔錯了。房間提供免費Wifi，上網不錯，但電視台實在收得唔夠清。每日嘅打掃一齊都好整齊，補充物品絕唔慳。每日仲會送兩枝礦泉水。
洗手間
洗手間非常型格新潮，有齊沐浴露、洗頭水、牙刷等，真係乜都唔洗帶。而家都算幾闊落，幫紫凝沖涼都唔會太迫。
價錢
四晚Double Room不連早餐，用HSBC有九折，折實總數$4804，平均每晚$1330，提供埋BB床，帶埋紫凝出門住好少少，三個人還算可以。
by admin | 11 月 17, 2017 | 2017關西親子遊, 旅遊, 日本, 關西
すみれ
7-11限定，日本十大杯麵第三名。湯頭係非常濃厚嘅味增湯，仲有肉碎，麵質煙韌，不錯。
日清奢華勾芡魚翅湯口味
為了慶祝45周年，日清推出限定豪華版「奢華勾芡魚翅湯口味」。
湯頭濃厚鮮味，真係似中式魚翅湯勾芡。
忌廉蘑菇湯底，據聞係三重芝士馬臣芝士、車打芝士和埃文達芝士湯底，有濃厚忌廉味道、松茸風味，配料有西蘭花和菇片，不錯。
by admin | 11 月 17, 2017 | 2017關西親子遊, 旅遊, 日本, 關西
Manneken waffle 比利時鬆餅
盒裝七款口味，每款都唔同。口感幾特別，外層少少脆，中間粉粉腍腍，味道唔錯，甜度十足。有機會要回購。
Frantz 白朱古力草莓非常好味。免稅店買嘅抹茶草莓都好味，但草莓無咁大粒。
難得終於係機場買到把縮骨遮俾自己，仲有帶番紫凝嘅袋袋。仲有一堆Daiso平野。
by admin | 11 月 16, 2017 | 2017關西親子遊, 旅遊, 日本, 關西
兩點鐘到達南海電鐵車站，買到14:35車票，見仲有時間買埋Maneken做手信，七件新鮮雜錦口味¥1100。
14:35 南海電鐵，15:15到機場。但原來時間無多，太趕急唔夠時間食拉麵。
到櫃位Check In，空姐仲俾左兩張優先Pass，過關可以行優先通道。避過左長長嘅安檢人龍，輕輕鬆鬆過關，但日本嘅檢查比較嚴格，水會要求逐枝開俾職員睇同聞，檢查BB車都較為仔細，但一切順利。
入到關內免稅店最後衝刺，黎到行程最後一日發現無乜買過手信，呢度真係要買番夠本，但真係好多人，俾錢都等左一排。
坐無人電車去閘口等上機。16:45上機，Delay左少少，機上有BB籃提供，紫凝實在太眼訓，但籃太細其實佢訓得唔舒服，好扭計，最後抱住訓，訓足全程。
飛機餐正常，最好食都食冷麵。
八點半左右落機，過關一切順行，但等行李就係好快，因為都貼左Priority，但點知等極都等唔到BB車，搞到要搵職員幫手，遲左成半個鐘先出到黎。回程搭的士返到屋企。
