by admin | 7 月 1, 2024 | 2024 珠海長隆飛船樂園, 主題樂園, 珠海
1/7/2024 14:00
午餐之後繼續encore唔同嘅機動遊戲，睇埋未睇嘅嘢，及到足夠嘅印仔就可以換到紀念品。收獲都幾豐富。
15:00左右離場，去返飛船酒店打的士，第一站係大約10分鐘車程嘅橫琴碼頭。趁着空檔買咗三杯蜜雪冰城，合共只需要18元。
唔想迫港珠澳大橋，又適逢深中通道啱啱開，擔心陸路車程比較混亂，所以決定行水路。之前上網買咗兩張成人優惠票（100元），現場再喺碼頭補兩張小童票 （75元/幼兒免費）。訂咗16：00由橫琴碼頭開往蛇口碼頭嘅船。準時開船，座位都幾舒適闊落，仲有服務員，全程一個半鐘到蛇口，體驗不錯，蛇口碼頭仲好靚。
即興諗住最快嘅速度過關，選擇打的去深圳灣口岸，點知途中塞車，行咗成40分鐘先到。大約18:20先到關口，還好過關非常順暢，但係離開關口嘅交通實在太多人，最後決定搭的士去屯門西鐵，19:15到屯門，再轉馬鐵20:30到家。交通足足5小時，實在太累。
後記
飛船樂園係新開嘅樂園，面積都幾大，玩兩日一夜就差唔多。不過成個場只有單向行走，動線非常之唔方便，出入口亦都奇奇怪怪，搞到成個行程規劃好亂。
今次買到酒店套票的確好平，如果不計價錢，一定住返飛船酒店最好。不過相信下次再去都要十年八年之後。
由香港去珠海，最方便真係坐車去港珠澳大橋。但因為回程旺季擔心塞車，選擇左水路有好又有唔好，路程都行遠左，但勝在夠安全。經過今次都可以肯定，深圳灣口岸並不適合我們。下次再去的話，一定要諗吓交通安排。
by admin | 7 月 1, 2024 | 2024 珠海長隆飛船樂園, 主題樂園, 珠海
1/7/2024 08:00
8:00左右就出發，掉張卡入去快速退房箱就走得。天氣很好，決定行去樂園，順便去入口處打卡。
08:45 就到船尾入口，今日係平日人流明顯比較少，入場快好多，趕得上睇到開幕歡迎式，仲同吉祥物影相。用最快速度去客戶服務中心攞一本蓋印小冊子，今日嘅目標就係完成蓋印。
酒店客人可以提早9:00入場，呢個感覺實在太優越。趁冇乜人，先玩咗最熱門嘅機動，必定係海洋單軌車，見過呢個單軌車要排上70分鐘，真係超人氣。今日即刻入嚟排幾架車就上到，坐喺鯨魚單軌車，可以睇到樂園全景，人流非常稀少，太正。之後再坐潛艇，極速飛魚等其他機動。
因為細佬唔夠高，所以分開玩，可以同家姐玩百慕達歷險，幸好入場就排到呢場，但都差不多等咗15分鐘先入得。全球體螢幕實在好壯觀，座椅會有搖晃，吹風，噴水嘅效果，相當不錯。
幼兒專享遊樂活動有波波池，坐車車。
沿途遊覽，印象最深刻係水底嘅角度睇鯨魚。
by admin | 6 月 30, 2024 | 2024 珠海長隆飛船樂園, 中菜, 外賣, 小食, 日式料理, 珠海, 甜品, 韓國菜, 飲品, 麵包
30/6/2024 18:30
返酒店補給之後，就搭十分鐘的士去市區中央匯。原來所謂嘅商圈都係地舖為主，並非商場，舖頭唔多，仲有好多都執咗。
古春堂@中央匯 30/6/2024 19:30
冇乜嘢食，唯有搵甜品食下又可以坐下。呢間古春堂食係老字號非遺涼茶。
琥珀桃膠椰奶15元：桃膠都相當多，椰奶微甜，好滋潤。
糯糯芋泥大滿貫 19元：污泥味道幾香，應該仲有豆腐花，椰汁西米等，幾粒芋圓煙煙韌韌，口感不錯。
嫰仙草大滿貫 18元：非常豐富，有好多芒果、紅豆，一粒粒小丸子，下邊仲有好多仙草。
十幾蚊一碗糖水，平靚正。
由於呢個地方唔太適合坐低堂食，最後決定買幾樣外賣返酒店食。
漢江里炸雞
蒜香醬油、雪花奶酪雙拼 45.88元、煙燻威士忌脆脆雞 12.88元、韓式年糕2.1元
炸雞份量唔少，外皮脆脆的，蒜香醬油味甜甜的，另外一款係雪花奶酪芝，上面鋪滿芝士粉，芝味濃郁，甜甜的。煙燻威士忌唔係太食到咩味道。年糕煙煙韌韌，口感不錯，加配價實在太抵。連埋包裝運送費70元，都幾抵食。
太阪町
章魚小丸子11元：小丸子賣相不錯，味道對板，餡料豐富，醬汁同埋鰹魚片都夠多，估唔到平平哋出品唔錯。
超值三件套 23元：有六粒小丸子、一個經典滷蛋飯團、一杯珍珠奶茶，相當抵食。飯團材料都好豐富，滷蛋特別好食，小朋友都好鍾意。
瑞可爺爺
起司酪酪 6.2元：其實係一塊多士，上邊放咗唔同嘅芝士烤焗，未到鹹鹹甜甜，估唔到相當不錯。
車打芝士蛋糕 24元：蛋糕上面有老爺爺的圖案，大大個可以切做好多塊。蛋糕本身鬆軟，除咗打咪仲有微微芝士香，中間再夾左兩層車打芝士，多一份咸香味，估唔到咁好食。
by admin | 6 月 30, 2024 | 2024 珠海長隆飛船樂園, 主題樂園, 珠海
30/6/2024 13:00
一點左右離開，繼續行園區一樓，各區嘅佈置都唔同，有主題，又可以睇到海洋生物。人流唔多，行得相當舒服。
14:30 參加免費珊瑚學堂，教小朋友認識生活，再度黏土等物料做珊瑚海底世界手工。
準備行去虎鯨劇場途中，見到真假美人魚表演，好靚。
必看項目虎鯨劇場，五頭虎鯨表達好睇，澎湃。
睇完虎鯨表演，有時間可以上二樓繼續玩。因為有高度限制，細佬只能夠玩90cm的機動遊戲，如玩水晶宮轉馬、歡樂碰碰碰。呢個迷你碰碰車好玩又得意。潛艇尋寶一家大細都可以玩，好似坐最前唔聽咁睇魚，不過視野比較窄，無想像中咁好玩。反而勇者戰船就好似咖啡杯咁，轉得好開心。
18:00 關門要離開，喺二樓嘅時候職員唔俾我哋行返去船頭，所以要喺船尾飛船酒店離開。由船尾行返去船頭大約需要10分鐘，就會見到一條天橋，可以去返馬戲酒店，全程都行到15至20分鐘，全露天都幾麻煩。
by admin | 6 月 30, 2024 | 2024 珠海長隆飛船樂園, 主題樂園, 珠海, 自助餐放題, 酒店
30/6/2024 11:45
中午選擇嚟呢度食自助餐，點評優惠非常抵食，兩大一小只需要350元。餐廳係近飛船酒店，一入去已經見到落地大玻璃，有好多珊瑚同海洋生物。時間尚早，入座率唔高，可以坐喺一張六人大枱，對正大玻璃。
食物款式唔算多，最近嘅就有麵檔，點心部。全場最名貴嘅就係粉絲蒸扇貝。
場中間就係熟食區，比較特別嘅有潮式拼盤、燒味。味道到位。
日式區仲有炸物、幾款壽司、飯團。仲有一個區域係麵包、冷盤。旁邊仲有自助飲品區，各式汽水果汁咖啡茶都有。
最值得留意就係甜品區，款式都幾多。必試園區限定朱古力潛艇，朱古力味道濃，中間仲有流心果醬。奶凍非常幼滑。提拉米蘇素撻咖啡味朱古力味都夠濃。紅絨蛋糕細細件，奶油味幾香。小朋友就最鍾意棉花糖。
食物款式唔算多，冇太多名貴嘅菜式，刺身，雪糕都冇，只係簡簡單單各式各樣熱盤，感覺上一般餐廳貨色，甜品相當唔錯。以人均$100嘅價錢喺樂園食到無限任食已經非常抵，環境一流，餐廳提供BB椅，兒童餐具等，非常貼心，服務亦相當好。
by admin | 6 月 30, 2024 | 2024 珠海長隆飛船樂園, 主題樂園, 珠海, 酒店
30/6/2024 10:30
早點check-in會即刻送埋兩日樂園入場券。搭酒店穿梭巴士到達飛船酒店，大堂有好多打卡位。
酒店大堂落一層就有一個好細嘅入閘位，安檢排隊都排咗一段時間，再出到一個戶外嘅中庭，就係樂園嘅入口。
今日會食自助餐，趁而家仲有少少時間，先行下層嘅一部份。下層村冷氣相當舒服，空間感十足，裝置都非常新淨。
遇岩時間睇到珊瑚長老動雕秀，20分鐘，光影音效不錯，有互動有教育意義。
