by admin | 11 月 12, 2017 | 2017關西親子遊, 旅遊, 日本, 關西
16:10左右終於都到達關西空港，紫凝BB第一次呼吸日本嘅空氣。降落後，喺閘口等一陣就有BB車送到。黎到關西要搭接駁車去番大樓，過關過關好少人，好快完成。出關後等埋行李，再行去報關循例望兩下就出到閘了。
第一件事係買Pass，無諗到KAA Counter排咁長龍，所以分頭行事，爸爸幫BB換片，媽媽就去排隊買票。今行要買3套票﹕大阪周遊卡、阪神電鐵一日券、京阪電車一日券。
17:00黎到南海電鐵站。早前喺EGL買左南海電鐵來回換票證，黎到車站就可以換實體票非常方便，來回票只係港幣$150。我地將會搭Rapid B (17:35-18:14)，車程一貫地快，車箱舒適，只係行李位實在太少，還好有位寄存到BB車同兩件行李。短短車程，紫凝都算合作無扭計。
到達南海難波後，向酒店方向進發，由難波站地下街、經Nanba Walk行去酒店大約15分鐘時間，沿途只係經過一條扶手電梯，大致上都叫無障礙。目標地A30出口，升降機上到地面，就見到酒店入口。
Hotel Monterey Grasmere Osaka
電梯上22樓先係酒店電梯大堂，歐陸式建設，幾有氣派，仲有教堂喺酒店入面。酒店職員英文唔錯，溝通無任何問題，好快就Check in 2415號房，仲話BB床已經準備好，另外仲有一份小禮物俾小朋友。
上到24樓要再用房卡入走廊，保安相當唔錯。轉幾個彎就到2415房間，房間係大床房，床尾放左BB床，時尚浴室，走廊仲可以放到BB車，兩個喼開出黎都仲有位，不大但夠用。
by admin | 11 月 12, 2017 | 2017關西親子遊, 旅遊, 日本, 關西
萬眾期待嘅親子遊終於都到啦!
前一日已經執定行李，此行加埋紫凝BB嘅野，要出動兩個喼加一架BB車。
帶B出門除左平時出街嘅用品，今次特別準備左4枝香港水、10包寶寶百味即食粥粉、4個即棄浴缸套等。還好執齊所有野，仲有四份一個喼可用。
七點起身，紫凝食少少野，就出發，今次兩大一B坐的士啦，08:10出門口去機場，09:00就到，折左齊頭$300。
第一次搭香港航空，係最右邊嘅櫃位，一黎到已經見到「優先櫃」，我地帶住BB就可以享用到呢個服務。因為帶B客唔能夠網上Check In，所以黎到機場先做，出好機票，寄好行李，BB車決定會推到閘口先寄上機。
過關啦，原來行前少少有優先通道，但普通閘唔洗點排隊算啦，不過優先通道肯定可以再快啲。今行帶左兩枝飲用水上機，過關時照直申報有水，關員只係問左句BB幾大，係咪所有水都係佢飲就放行。BB車獨立過，都再手摸車內外，咁好彩我抽中Random Check要企定定搜身，雖然搞左好多野，但全程都好快。
09:45黎到美食廣場，今次再食大力水手快餐。不過真係麻麻地，雞又乾身，最好食竟然係薯波。食完早餐想買本雜誌行遠少少，紫凝BB好似知道有旅行去，全程異常興奮，揮晒手咁。
今次要去212閘，即要搭兩個站無人駕駛車。11:15到達，先喺旁邊育嬰室換片，換片室都相當闊落，基本野齊啦。到閘口，指定動作。
上機前先收起BB車，地勤用大膠袋裝好，等入閘。喺閘口問地勤，就知道可以確定提供到BB籃。帶BB又可以優先入閘，但原來行到入隧道都係排同一條隊。
此行已優先Mark到窗口嘅闊位，空姐俾一條BB專用安全帶，扣喺成人安全帶上。大約12:00遲左少少起飛，大約20分鐘後，安全帶燈已經熄左，空姐裝起BB籃，紫凝就可以坐喺上邊玩。BB餐到，原來係罐頭果蓉、肉蓉、果汁等，但凍冰冰都唔知點食，無諗到可以叫空姐幫手加熱，不過味道都唔好，無乜興趣。
至於大人餐出乎預期算唔錯，有前菜有冷麵，非常夠凍，汁又好夠味，不錯。餐包熱辣辣，主菜可選燒汁豬肉片飯、雞肉薯蓉，兩者都正常味道，甜品仲有百福百腐花。最後紫凝就飲左果汁、食左果蓉，食左啲白飯、麵包。食飽飽後好快就訓左，總計黎講叫做訓左兩個鐘，係中途想轉身唔夠位有輕微扭計，但全程機都唔算嘈，比預期中好好多。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
大阪南區搵食必去就係黑門市場。因為旅遊業發展得迅速，黑門市場都變成做旅客生意，再唔係傳統地道嘅市場。但既然黎開道頓堀、心齋橋的話，都不妨過黎呢度搵食，或者瘋狂買水果做手信。
黑門三平
安排喺行程最後一日，上機前一點鐘左右到達，順便在買士多啤梨做手信。中午時份已經有唔少旅客，第一站係人氣高嘅黑門三平，有好多海產、刺身、壽司，樣樣都好新鮮。選購左心水後，店內有位可以即場享用。
最後揀左盒吞拿魚壽司，八件盛惠¥1200。吞拿魚應該有兩個唔同部位，四件係普通赤身，四件係中，吞拿魚色水好靚，油水多到好似閃閃發光。每塊吞拿魚都係厚切，超級鮮甜，超多汁，雖然壽司飯明顯比正宗壽司店遜色，但刺身的確係無得頂。此行絕對令我愛上吞拿魚，無諗過吞拿魚可以咁好食。
最後買埋一大包元貝做手信，¥3000，有86粒，鮮味十足，非常抵食。
丸善食肉店
黎日本想食和牛，唔捨得食高級燒肉，用一個慳家方法一樣食到靚和牛，就係黑門市場嘅丸善食肉店。呢間小店係台灣人介紹嘅，專賣佐賀產和牛。雪櫃放左唔同品質價錢嘅和牛，可按自己嘅筆直選購，店方更可以即席鐵板燒，即場享用，不另收費。
揀左¥1200一塊嘅和牛，牛排雪花都幾靚，店主手勢好，煎得六成熟岩岩好。加些少鹽即食，牛味相當濃郁，雖然未至於入口即溶，但質地非常軟腍，完全無根。呢個價錢食和牛，絕對超值。
日進堂
另一間必食名店係日進堂天婦羅，人氣名物係將全條鰻魚拎去做天婦羅¥500，鰻魚好厚肉，勁重魚味，炸粉唔厚，但保持香脆，認真不錯。另一件魷魚¥120都相當唔錯。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
道頓堀、心齋橋可算係大阪遊必去，除左行藥房入貨外，呢度都有好多好野食。
夫婦善哉
今次亦試過道頓堀最出名嘅甜點幸福一下。左穿右插終於搵到法善寺橫町呢條小街，夫婦善哉就係牌坊後面。網友話食過夫婦善哉單身找到好姻緣，夫婦幸福到不行。
小店係清一式獨賣一款幸福紅豆湯丸，配合勁和式嘅裝修，真係風味十足。紅豆湯丸特別之處係一人前份量會分成兩小碗，有人話要一個人獨享兩碗先算圓滿，亦有說法係兩人分享先會團圓幸福。今次到訪，老闆娘婆婆為我地送上一客兩碗，其實二人分享咪更加好Feel。呢款簡單到不能再簡單嘅紅豆湯丸點解會出名到痴線? 小店有說明書介紹，全靠一部小說，小說拍成電影，令呢間小店出左名，好多名人都慕名而來，牆上嘅名人簽名就係人氣見證。
一人前份量(¥ 800)有兩細碗紅豆湯圓、一塊咸海苔。跟據食用說明，首先要食紅豆湯圓。每碗有紅豆沙同湯圓一大粒。日本嘅紅豆真係好好味，好甜好大粒。湯圓係一粒白色糯米粉團，煙煙韌韌幾好味，中間係無餡嘅。呢碗紅豆沙比正常再甜多一倍，食到最後真有點甜到漏嘅感覺，岩晒甜魔。第二步係處理咸海苔，細細一片海苔上面灑滿粒鹽，勁咸，但正好中和頭先嘅勁甜。最後係飲一啖麥茶清一清。非常神奇嘅一個勁甜、勁咸、勁清組合，配合巧妙嘅食用次序，突然每樣食材本身嘅味道。呢個甜品真係唔錯，食完好滿足。
くくる
帶住幸福滿足嘅感覺，繼續遊走道頓堀。下一站係大阪名物章魚燒，くくる係人氣名店之一，最出名係章魚腳大到飛晒出黎嘅重量級章魚燒，但為左留肚食晚飯，只選擇普通版。一客十粒¥550，唔係重量級都好夠大粒。外皮微脆，中間粉漿軟綿綿好有味道，章魚亦唔細舊! 加埋燒汁、沙律醬、海苔，正係好大阪嘅章魚燒!
北極星
* 原先享用嘅係天王寺分店，由於已閉店，所以改為放喺此地區一拼介紹。
黎日本食蛋包飯的話，一定首選大阪嘅北極星。北極星本店係心齋橋，傳承超過三代，據講係蛋包飯創始店。本店嘅特色就係古老，可以試下喺傳統日本建築下，坐住榻榻米進餐。但因為排唔到期，所以決定去天王寺分店。天王寺分店雖然無道頓堀本店咁古色古香，係典型洋風裝修。
叫左一個人氣No.1最基本嘅雞肉蛋包飯¥720，另一個係No.2牛仔排蛋包飯¥980。
賣相非常討好，色彩鮮艷好吸引。蛋皮完完整整包住飯，蛋皮睇落好薄，切開黎睇原來唔係咁簡單，薄得黎仍然有層次，中間仲係流心程度，非常嫰滑，蛋味又夠濃，睇得出每一份都用上唔少隻雞蛋。中間嘅飯亦相當唔錯，橙紅色嘅炒飯本身番茄味好夠，飯炒得粒粒均勻，仲有唔少配料，單食個飯已經好正。再按喜好沾少許蕃茄醬，的確好好味。名店當之無愧。
另一個係牛仔排蛋包飯，基本上同上款差唔多，只係醬汁有變，醬汁番茄味減少，多分牛味，無咁酸，係另一種風味。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
PABLO 梅田店
大阪仲有一個芝士蛋糕係必食嘅，但佢實在太出名，心齋橋店排隊排到傻。知道梅田站有分店，決定一大早十點等佢開門，希望唔洗排隊。呢間小店真係難搵，終於明白咩叫迷宮，係梅田地下街穿插搵左成15分鐘，終於搵到呢間夢之店。
還好人唔多，等一陣就有，俾¥800換一個新鮮出爐半熟芝士蛋糕，隨便搵個位坐低嘆。
蛋糕外皮係酥皮撻皮，面層係橙黃色果醬，中間包住忌廉芝士餡。酥皮勁脆，切開蛋糕，中間嘅芝士餡半流質，急不及待要試一口。果醬味道微甜少酸，類似芒果味。軟芝士忌廉仍然微暖，入口即溶好滑溜，蛋味、奶味、芝士味好重，令人一口接一口。就算咁奶都唔覺膩，正好被果醬酸味中和，配合埋鬆脆唔油膩嘅酥皮，成個配搭得宜，食極停唔到口。食過之後，就覺得頭先行左十五鐘冤枉路都係值得嘅，絕到值得翻轉頭。對小妹黎講，直情係全世界最好味嘅芝士蛋糕，非常難忘。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
きじ 本店梅田真係好多野食，就係新梅田食道街已經大把選擇。黎到大阪一定要試試地道嘅大阪燒同炒麵，揀左一間參加過電視冠軍王嘅人氣名店きじ，1969年創店嘅きじ可算係老字號。一般遊客因為旅遊書介紹，多數會去藍天大廈滝見小路店，但梅田食道街店呢間本店更有老大阪風味。
小店細細，木製裝潢配上淡淡暗暗嘅燈光，將焦點全部放係大廚嘅鐵板上。我地坐喺鐵板枱前，睇住鐵板上嘅美食真係食欲大增，全部新鮮即製呀。
食客多數係落班嘅西裝友，正真體驗到大阪人五點半嘅生活。店員知道我地係遊客，提供左中文菜單，仲安排左識國語嘅職員幫我地落單。點左一份炒麵，加一份大阪燒豚玉。先送上炒麵，好香口，有鑊氣，麵條夠煙韌，材料有椰菜豬肉等，味道較為清爽，如果醬油可以再多啲應該會更好食!
另一味大阪燒整得好靚，表面塗滿醬汁，仲有蛋黃醬同海苔。用迷你小鏟切開，外皮係脆脆的，中間嘅餡多到不得了，粉漿軟腍，加上又甜又爽脆嘅椰菜，仲有肉碎，配合得好好。不愧為大阪燒人氣名店! 埋單總數大約¥1370，物有所值。
喝鈍 滝見小路店
睇過網友推介，呢間小店一直係必食之選。點知到第四日晚，去到法善寺橫町，口已經賣晒關門，所以改為去藍天大廈分店。由梅田地鐵站落車，再喺GFO背面穿過地下隧道，行十分鐘左右就到達藍天大廈。藍天大廈有條食街滝見小路，裡面又係古早佈置，有好幾間遊客鍾意嘅食肆，其中一間就係喝鈍。
好彩呢間仍然營業，小店細細放左好多昭和時代嘅裝飾品玩具。店員安排我地坐喺Bar枱前，可以睇到大廚嘅手勢。柯打左一客滑蛋豬排飯 (¥650)、一客咖哩豬排飯 (¥700)。
滑蛋豬排以鐵鍋上，豬排浸喺醬汁上仍然保持脆口，豬排肉嫰一啲都唔韌。醬汁甜甜，配上蛋液認真唔錯。
另一客咖哩豬排飯，咖哩汁多到好似唔洗錢咁，豬排無再煮過所以更加脆口，欣賞佢炸得脆但一啲油膩感都無。咖哩汁好香甜帶輕微辣味，味道極濃郁惹味，真係試過最好食嘅咖哩! 食飽飲淡凍冷嘅麥杯，完美的一餐。夾埋晒兩樣野埋單只係¥1350，真係平靚正。
