八ッ橋茶屋 祇園店
到甜品時間，黎得京都，一定要試綠茶聖代。喺河原町見到好多間綠茶甜點，因為食物模型實在太靚，最後誤打誤撞去左呢間八ッ橋茶屋，不過錯有錯著，坐得幾舒服。柯打左一個綠茶聖代(¥1200)，成品造型實在太靚啦，同相片有99%相似。份量都幾多，材料亦好好豐富。最頂有綠茶味Marcoon、薄脆、小丸子，再加上金薄。綠茶雪糕味道勁濃郁，配上勁甜勁好味嘅紅豆，仲有綠茶味嘅啫喱。聖代中層以綠茶清蛋糕分隔，最底繼續係綠茶雪糕，真係一個好豪華、好好味嘅甜品。
茶寮都路里 祇園本店
離開小店無耐，先發現左超人氣名店茶寮都路里，見到排隊排到落樓下，註定同佢無緣。最後為左完成心願，買左一個期間限定櫻花味雪糕(¥370)當捧場。雪糕有淡淡櫻花香，上面灑上綠茶粉，質感好幼滑，不錯。
壹錢洋食
祗園、河原町可算係京都遊必經之路，的確呢度真係好多好野食。當中數最深刻嘅就係一間人氣名店壹錢洋食。淨係個門面已經殺左好多張相，非常特別。小店只賣一款食品，就係類似大阪燒餅嘅物體。因為店內都幾多人，所以選擇買一份外賣，去河邊坐喺岸上慢慢嘆，仲有風味。
就拎住外賣坐喺河邊，睇住流水，鴨仔游黎游去，呢個杜點的確唔錯。外賣包裝好特別，用舊報紙包住，好有Feel。
壹錢洋食燒餅(¥650)麵漿加左大量青蔥、包住半熟蛋、豬肉、竹輪、櫻花蝦、紅薑等等，材料好豐富，再加上勁濃味嘅燒汁，真係好好味，而且都好飽肚。
錦市場被稱為京都廚房，係京都午餐嘅不二之選。一點鐘黎到錦市場，市場商店街嘅標誌就係又紅又綠嘅彩色玻璃天幕。商店街左右兩旁都有唔同類型嘅店舖，慢慢行邊睇邊食。掃街掃一圈，食品類型幾多，食勻人氣食品其實都夠飽。
こんなもんじゃ
錦市場 こんなもんじゃ專買豆腐製品。細細粒一口大小嘅豆乳冬甩(¥250)新鮮即炸，甜甜地有微微豆腐味。豆乳雪糕(¥250)冰感十足，清甜有豆味，有啲似豆漿味嘅沙冰。
三木雞卵
超出名嘅三木雞卵，買左隻原味雞蛋卷(¥700)，價錢比預計中貴，雖然係凍食，但幾好食。外皮好實在，切開中間真真正正一層一層，味道好香，蛋味之外，仲有乾魚湯味，好甜好有味道，又有口感嘅厚燒玉子。
美々卯 京都伊勢丹店
京都嘅晚餐試試傳統日本料理美々卯。就係京都伊勢丹11樓，上面有好多間食肆似乎都幾吸引，但既然有心水就唔好心大心細。美々卯可算係烏冬名店，係烏龍壽喜鍋嘅始創店，賣相的確好吸引，但份量似乎太多，所以最後放棄，選擇兩客賣相非常吸引，而且乜都有大雜錦定食。
雜錦天婦羅雖然不及天婦羅名店咁厲害，但材料新鮮，香口唔油膩已經抵讚。時令甜品更因應櫻花季節改為櫻花餅，實在太好啦！櫻花餅其實係類似糯米丸裡面加上紅豆饀，糯米好似仲加入左櫻花嘅味道，非常好食。今餐埋單¥3850，非常值得！
此行有去京都嵐山，行完竹林再出最旺嘅商店街係必去之地。嵐山商店街有七十幾間商店，有野買，有野食，用黎做午餐中轉站就最岩，黎到嵐山有好幾樣美食藉得推介。
豆腐茶屋 嵯峨豆腐 三忠
超人氣嘅豆腐名店嵯峨豆腐三忠，店仔細細好似一個涼亭咁，店外有一排木椅可以坐住食。叫左兩樣必點京都名物，にしんそば鯡魚蕎麥麵（¥450），一個ごま豆腐（¥380）。鯡魚蕎麥麵係新鮮熱辣，份量比想像中多，鯡魚似煙燻醃製過嘅魚，味道好濃好甘甜，蕎麥麵麥味重，口感煙韌，湯係清淡嘅鰹魚高湯，加上少少青蔥，簡單味美嘅京都麵食！另一味的確係新奇，芝麻豆腐口感唔似豆腐，似麻糬咁腍得黎黏黏的，好香芝麻味，加上醬油同Wasabi，感覺好微妙，係好食嘅。
古都芋本舖
食完咸食，正好食下甜野，另一樣嵐山名物係古都芋，古都芋本舖就係三忠旁邊，Tabelog 3.55。古都芋一件¥150，叫左一白一黑試下。古都芋原來係類似蕃薯餅，薯蓉好幼滑，黑色嘅應該加左芝麻，但芝麻味淡淡的，兩者分別不大。
京豆庵
旁邊仲有一間舖頭人氣名店京豆庵(Tabelog 3.55)，最出名豆腐味雪糕，叫左一個混合口味(¥350) 試埋芝麻味先。雪糕質感好厚實，真係好Gelato，成杯反轉雪糕都唔跌落黎，豆腐味勁濃，芝麻味都不錯，值得推介。
京都嵐山サガパー 本店
此行仲有一間雪糕名店Saga Par一定要食，就係某某食評網絡票選甜點唔知第幾名，反正就係好受歡迎嘅金獎名店。一場黎到，必試京都抹茶口味（¥300）。雪糕滑滑，抹茶味勁濃，難怪得獎!
中村屋 総本店
嵐電車站外面，又發現另一間名店。嵐山有嵯峨野可樂餅出名，但日本最出名嘅就係中村屋，人龍已經證明呢一點。隨便買左一個牛肉可樂餅¥100，的確唔錯，更加香脆，牛肉味更濃郁。真佩服日本人整咁多炸來炸去，但食落全無油膩感，亦唔覺熱氣！
アリンコ 京都嵐山本店
Arinco係Tabelog 3.53甜品名店。買左一個宇治綠茶味Arinco Sand (¥308)，類似雪糕三文治，微甜嘅清雪芳蛋糕加上抹茶雪糕，綠茶味OK嘅。
