2014大阪京都七天遊

2014大阪京都七天遊之手信篇

by admin | 4 月 14, 2014 | 2014大阪京都七天遊, 旅遊, 日本, 關西

雞仔筆 ¥200

金平糖 ¥216

大阪造幣局仙貝餅乾 ¥500

Royce 綠茶杏仁朱古力 ¥660

春之彩盒芝麻、櫻花味麻糬串 ¥756

櫻花紅豆蛋糕 ¥648

大阪香蕉蛋糕 ¥831

綠茶忌廉蛋糕 ¥699

2014大阪京都七天遊之第七日 [7.4 See You Osaka]

by admin | 4 月 14, 2014 | 2014大阪京都七天遊, 旅遊, 日本, 關西

搭16:10空港急行出發，45分鐘就到機，到埗後即時Check in寄行李換Boarding Pass。做過功課知道唔洗咁心急過關，呢邊嘅二、三樓有唔少商店。

町家小路有好多間餐廳，薘來係日本出名嘅中國料理，最出名食肉包同點心，柯打左少少作做下午茶。味道唔係差嘅，但當然不及正宗港式啦。豚肉包¥170，蝦燒賣¥200，餃子¥200。

再係附近嘅舖頭狂買手信，買左好多禮盒做手信。臨到最後一刻先過關，過關過程亦相當順利。出境後仲有幾間免稅店可逛，再買多幾款禮盒，最後滿載而歸地上機。拎住幾大袋手信上機，自覺都買得幾過份，幾驚太多Hand Carry唔俾上機。不過上到機先發現，原來勁過我地嘅仲大有人在。

飛機餐有日式魚柳飯，另一個係燒汁牛肉飯，普普通通食飽就算。

參考

551蓬莱オフィシャルサイト www.551horai.co.jp

2014大阪京都七天遊之第七日 [7.3 黑門掃街、心齋橋瘋狂大掃貨]

by admin | 4 月 14, 2014 | 2014大阪京都七天遊, 旅遊, 日本, 關西

離開池田，搭番阪急去難波，再轉地鐵去日本橋喺黑門市場食午餐。如果跟團的話，肯定導遊係唔會教你去，因為黑門市場嘅野出名平靚正，係度買夠又點會幫襯導遊呀。黎得大阪自由行，一定要安排時間黎呢度開飯。

一點鐘左右到達已經有唔少人食緊午餐。第一站係人氣高嘅黑門三平，有好多海產、刺身、壽司，樣樣都好新鮮。

最後揀左盒吞拿魚壽司，八件盛惠¥1200。吞拿魚應該有兩個唔同部位，四件係普通赤身，四件係中，吞拿魚色水好靚，油水多到好似閃閃發光。每塊吞拿魚都係厚切，超級鮮甜，超多汁，雖然壽司飯明顯比正宗壽司點遜色，但刺身的確係無得頂。此行絕對令我愛上吞拿魚，無諗過吞拿魚可以咁好食。

最後買埋一大包元貝做手信，¥3000，有86粒，抵食。

另一間必食名店係日進堂天婦羅，人氣名物係將全條鰻魚拎去做天婦羅¥500，鰻魚好厚肉，勁重魚味，炸粉唔厚，但保持香脆，認真不錯。另一件魷魚¥都相當唔錯。

黎日本想食和牛，唔去食高級燒肉，用一個慳家方法一樣食到靚和牛，就係黑門市場嘅丸善食肉店。呢間小店係台灣人介紹嘅，專賣佐賀產和牛。

揀左¥1200一塊嘅和牛，店方可以即席鐵板燒。牛排雪花都幾靚，煎得六成熟岩岩好。加些少鹽即食，牛味相當濃郁，雖然未至於入口即溶，但質地非常軟腍，完全無根。呢個價錢食和牛，絕對超值。

黑門市場都好出名買水果，睇中左一間想買士多啤梨返香港做手信。款式品種好多，最後選擇買中檔次嘅。

貪得意買左串炸吞拿魚¥80，但比較乾身麻麻地。

再試元貝¥500，麻麻地無乜特別。

臨走前終於見到出名嘅豆漿¥70，質地杰到好似漿糊咁，豆味勁濃，無糖，真係好似飲緊流質豆腐咁。

食飽飽，仲有個零鐘時間買手信，決定喺心齋橋狂買。格過價後，決定都係搵番呢間藥房，一次過買齊藥品，樓上仲有好多好抵嘅零食。經過一輪瘋狂大掃貨，拎住幾大袋回歸，返酒店拎行李向關空進發。

參考

黑門市場 www.kuromon.com

2014大阪京都七天遊之第七日 [7.2 我們的杯麵]

by admin | 4 月 14, 2014 | 2014大阪京都七天遊, 旅遊, 日本, 關西

10:45 今日無任何交通券，所有交通都要即時買票。先搭阪急由梅田去池田¥270，到池田已經有好多指示牌指引你去日清館，可見佢的確係個旅遊熱點。

大約行十分鐘就到達日清即食麵發明紀念館，見到好多公公婆婆拎住個杯麵出黎，相信係本地旅行團。好彩佢地玩完走晒，館內無乜人唔洗排隊。呢個博物館免費入場，館內有講解日清杯麵嘅歷史，為左更有效製造杯麵，仲發明左多項創新嘅技術。有互動小遊戲，仲有電影介紹，幾得意。

睇完歷史就係最令人期待嘅自製杯麵環節。喺場外有兩部自動販賣機，入¥300出一個杯麵杯，職員再詳細講解製作流程。搵個靚位坐低，用博物館提供嘅水彩筆喺杯上畫公仔。再交去製作台開始整杯麵。

職員用噴槍清潔一下杯內外，放喺運輸帶上，倒轉及住一個麵餅，轉動軚盤將麵餅倒入杯中。

館方提供多款湯底味道同配料，好多配料都係呢度僅有，好似有小雞圖案嘅魚板。
一份揀左咖哩味湯、小雞魚板、叉燒、蛋、芝士。
另一份揀左海鮮湯、小雞魚板、蟹柳、蝦、炸蒜蓉。

將杯麵加蓋，舖上保鮮紙，再用熱溶壓縮做真空包裝，一個屬於自己嘅杯麵就出世啦。
臨走時仲可以將杯麵放入膠袋，吹漲佢拎走。玩到12:15先捨得離開。

呢個館真係好好玩，好得意。雖然遠離市區，但絕對值得一黎。

參考

インスタントラーメン発明記念館 www.instantramen-museum.jp

2014大阪京都七天遊之第七日 [7.1 一蘭拉麵早餐]

by admin | 4 月 14, 2014 | 2014大阪京都七天遊, 旅遊, 日本, 關西

黎到京阪遊最後一日，拾好晒利李，十點鐘就Check Out。將行李寄存喺酒店大堂，再去食個靚早餐。

黎到大阪，仲有一間拉麵未去朝拜，就係一蘭拉麵。由於實在太多野想食，終於決定安排喺早餐時段食一蘭拉麵，就學日本人拉麵當早餐。最近酒店嘅分店就係阪急東中央商店街，不過由酒店行過去都需時十五分鐘，係有啲遠，不過要食好野當然唔怕行啦。

買左拉麵券¥790，搵個靚位坐低。早晨時段人唔多，自閉位任揀。先落單圈出自己心水配搭，交俾服務員，好快就送上拉麵。

拉麵香氣十足，賣相不錯。呷一啖湯，湯底好清爽，但豬骨味好強勁，質感好幼滑，真正濃而不膩。選擇勁硬嘅直幼拉麵，比較鍾意拉麵煙韌彈牙，好有咬勁。一大片叉燒半肥瘦，食落幾有肉嘅鮮甜味。調味醬原來係辣醬，落少少的確有助提味，成個湯底更香濃，的確係一碗好麵。另加一雙半熟蛋¥120，只用鹽提味，雖然無乜特別但本身蛋香味十足，不錯。