2014大阪京都七天遊之第五日 [5.4 NHK, 博物館, 大阪城]

by admin | 4 月 12, 2014 | 2014大阪京都七天遊, 旅遊, 日本, 關西

食飽飽繼續下半日旅程，下一站。

先去NHK大阪放送局，地下同九樓會開放俾公眾參觀。地下係兒童樂園，有好多吉祥物公仔可以俾小朋友嘗試上鏡同卡通跳舞。搭電梯上九樓仲有啲角色扮演嘅玩具，亦睇到落下拍攝電視節目嘅真實情況。

 

離開NHK，再去隔離嘅大阪歷史博物館，原來NHK同博物館係雙連共構。先去售票處換票，又係周遊卡包括嘅景點，價值¥600。由最高嘅十樓開始行，介紹奈良時代嘅難波宮殿，九樓講解中世紀嘅水都模樣，八樓係考古研習，有好多少遊戲介紹考古原理，我地係呢度玩左勁耐。七樓就係近代大阪，有市場街景模型，影相熱點! 想了解一下大阪歷史的話，呢個博物館絕對值得黎，有模型、有聲、有畫，更有好多遊戲，一啲都唔悶。入場仲可以拎一本遊戲冊，係每層搵番問題嘅答案再及印，一邊玩一邊做功課。
 

到下午三點半繼續一個勁近嘅景點，就係行過一條馬路嘅大阪城。入城之前入去西之丸庭園(原¥200)，其實只係一個大公園，無乜特別，不過搵到一個靚位影過去大阪城，取景唔錯架。橫掂周遊卡又包嘅，入黎影張相無妨。

到達大阪城，憑周遊卡換票上天守閣 (原¥600)。天守閣共八層，排隊等升降機嘅人好多，所以選擇行樓梯。最頂層可以睇到大阪風景，始終位置唔太高，又有鐵絲網包實，觀景其實一般。以下幾層多數係古董文物，無乜特別，而且又好多遊客，麻麻地好行，不過話晒係大阪地標，點都要黎一次嘅。

NHK、大阪歷史博物館就係谷町四丁目站，旁邊就係大阪城，一個車站可以去足三個景點，玩盡周遊卡價值¥1400，抵!

參考

大阪歷史博物館 www.mus-his.city.osaka.jp
大阪城 www.osakacastle.net

2014大阪京都七天遊之第五日 [5.3 權太呂壽司]

by admin | 4 月 12, 2014 | 2014大阪京都七天遊, 旅遊, 日本, 關西

完成大阪造幣局櫻花之旅，已經一點鐘要搵飯食。離開造幣局向南森町方向，去番天神橋。天神橋係大阪嘅壽司激戰區，梗係要食壽司，決定去天六相當出名嘅權太呂。

舖仔細細，全店十零個位都係Bar位。全店以木製裝修，正宗日本風情。
 

揀左兩份是日午餐，上にぎり1人折 (¥712)，八件加麵豉湯。

另一份まんぷく1人折 (¥712)， 有十二件壽司。

落單後，師傅係面前即整，係正宗嘅手握壽司。成品同相片幾乎一樣，色彩鮮艷，閃令令，好吸引。壽司飯上已經放左Wasabi，只需沾上少許豉油。壽司飯相當結實痴口，加上壽司醋，味道甜味帶微酸。每件刺身都非常新鮮，魚肉濃而且勁鮮甜。

2014大阪京都七天遊之第五日 [5.2 期間限定的大阪櫻花]

by admin | 4 月 12, 2014 | 2014大阪京都七天遊, 旅遊, 日本, 關西

大阪有一年一度嘅櫻花盛事，剛好就係今次旅行嘅日子之內。大阪造幣局平時唔會對外開放，每年只會開放一個星期，俾遊人進入櫻花隧道賞櫻，今年限定開放日係4月11日至17日，當然要趁機構一去!

11:30到達天滿橋站，喺地鐵已經開始感受到熱鬧氣氛。一上月台簡直人頭湧湧，車站拉起好多指示牌引路，指示牌都唔洗睇，就跟住人流方向實無錯。

上到地面，正係百貨公司樓下，趁呢個星期嘅盛事特別開設攤位賣櫻花產品。離開百貨公司穿過一條橋，見到海岸兩旁嘅櫻花。
 

沿路越來越多小食攤檔、遊戲攤檔，就好似節慶祭典咁熱鬧。
 

終於黎到櫻花隧道嘅入口，櫻花開滿兩旁，櫻花分枝多到遮住陽光，形成一條隧道。陽光幾猛都好，但可以喺櫻花樹下遮蔭，實在係好奢侈，相信只有黎日本可以感受到。

造幣局可算係大阪首選賞櫻名所，以櫻花種類多，數量多見稱。剛好呢個期間係櫻花盛開期，櫻花澎湃到不得了，簡直歎為觀止。
 
 

曾經有猶疑過，怕多人太浪費時間，所以選擇放棄呢個行程，但親身去過後就覺得不柱此行

人多，櫻花比想像中多而靚，仲可以一次過見到唔同品種嘅櫻花。人雖然多，但好有規矩，大家亦好禮讓，行程比想像中順利好多。

大約行左大半個鐘，去到櫻花隧道嘅終點，見到有特色手信，亦係期間限定兼且地點限定，最後買左兩盒錢幣餅乾做手信¥500，完成一個令人難忘嘅景點。

參考

2014大阪京都七天遊之第五日 [5.1 大阪宇宙最強早餐]

by admin | 4 月 12, 2014 | 2014大阪京都七天遊, 旅遊, 日本, 關西

9:45出發繼續大阪周遊第二日，出發前先去新梅田食道街食個靚早餐，Tabelog搵到一間立食蕎麥麵店，係好多大阪上班一族嘅早餐之選。一向都鍾意去旅行感受地道風味，所以呢間小店絕對係早餐之選。潮屋就係食街一條小巷內，門外有食物模型展出左早餐款式。全部都係傳統日本早餐，一個飯團加一個麵嘅配搭。落單叫左兩款早餐各一，俾錢後，先係收錢櫃前揀一款飯團，再去櫃檯拎麵食。小店細細靠牆有一排面壁位，中間就係立食區。因為我地唔需要趕住走，所以選擇左面壁位。
 

一份有蕎麥麵、自選腐皮壽司。另一份有蕎麥麵加豆皮，再自選飯團。先講蕎麥麵，湯底勁清甜，好有魚乾海味，加少些青蔥提味，麵條煙韌帶麥味。腐皮壽司好好味，豆皮勁重甜味，包住壽司飯，估唔到咁簡單都可以咁好食。飯團亦都唔錯，中間包住啲醬菜，都唔錯。呢個早餐真係唔錯，好有傳統日本風味。埋單總數¥650，好味又抵食。
 

10:15離開小店，打算買一個大阪必試嘅芝士蛋糕Pablo。今行幾次遇著排隊或者關門，知道有分店係梅田站，終於決定一大早去買，再搵地方食。呢間小店真係難搵，終於明白咩叫迷宮，係地下街穿插搵左成15分鐘，終於搵到呢間夢之店。
 

俾¥800換一個新鮮出爐半熟芝士蛋糕。一路諗下邊度有得坐，最後決定直接去下站大阪今昔館嘅天神橋商店街附近。10:45 到達天神橋，正好有戶外空位可以坐低，慢慢享用呢個Pablo。

蛋糕外皮係酥皮撻皮，面層係橙黃色果醬，中間包住忌廉芝士餡。酥皮勁脆，切開蛋糕，中間嘅芝士餡半流質，急不及待要試一口。
 

果醬味道微甜少酸，類似芒果味。軟芝士忌廉仍然微暖，入口即溶好流滑，蛋味、奶味、芝士味好重，令人一口接一口。就算咁奶都唔覺膩，正好被果醬酸味中和，配合埋鬆脆唔油膩嘅酥皮，成個配搭得宜，食極停唔到口。食過之後，就覺得頭先行左十五鐘冤枉路都係值得嘅，絕到值得翻轉頭。直情係全世界最好味嘅芝士蛋糕，好評到咁，實在罕見。

歎完個食過全世界最好食嘅芝士蛋糕，行番去大阪今昔館，先知道博物館原來要換展覽，所以臨時閉館，白行一趟。還好可以即時提早下個行程，增加大阪造幣局遊覽時間。

參考

潮屋 www.kk-shioya.co.jp/location_shioya_umeda.html
Pablo www.pablo3.com

2014大阪京都七天遊之第四日 [4.5 藍天拍拖勝地]

by admin | 4 月 11, 2014 | 2014大阪京都七天遊, 旅遊, 日本, 關西

第四日最後一站係玩盡梅田周遊於免費設施，由於法善寺喝鈍關門，所以改為去藍天大廈分店。由梅田地鐵站落車，再喺GFO背面穿過地下隧道，行十分鐘左右就到達藍天大廈。藍天大廈有條食街滝見小路，裡面又係古早佈置，有好幾間遊客鍾意嘅食肆，其中一間就係喝鈍。

小店細細，放左好多昭和時代嘅裝飾品玩具。店員安排我地坐喺Bar枱前，可以睇到大廚嘅手勢。柯打左一客滑蛋豬排飯 (¥650)、一客咖哩豬排飯 (¥700)。

 

滑蛋豬排以鐵鍋上，豬排浸喺醬汁上仍然保持脆口，豬排肉嫰一啲都唔韌。醬汁甜甜，配上蛋液認真唔錯。另一客咖哩豬排飯，咖哩汁多到好似唔洗錢咁，豬排無再煮過所以更加脆口，欣賞佢炸得脆但一啲油膩感都無。咖哩汁好香甜帶輕微辣味，味道極濃郁惹味，真係試過最好食嘅咖哩! 食飽飲淡凍冷嘅麥杯，完美的一餐。埋單¥1350，港紙$100，真係平靚正。
 
 

食過豐富好味嘅一餐，行番去對面展望台大樓，搭升降機直上空中平台。黎到藍天大廈最頂層就係大阪第一拍拖勝地空中庭園。庭園地板舖滿彩色小燈，黑夜之中閃閃發光，靠住欄邊睇到大阪市夜景，真係好靚。
 

夜晚天氣真啲凍，逗留左好短時間就走。落番下層有室內場地，可以買杯飲品慢慢嘆，或者喺心心展板影張靚相留念。
 

行到大約九點半要去下一站，落番梅田地下街買小小甜品食下，買左人氣Krispy Doughnut，一個Original (¥160)，一個Caramel Double Nuts (¥210)。冬甩加左糖醬變得脆脆地，味道不錯，但唔算好特別。仲有行過見到好多人支持嘅八天堂，買左個Custard Cream Bun (¥210)，好似甜餐包加左吉士醬，凍食微甜，幾得意。
 

今日最後一站係Hep Five摩天輪，雖然商場已經關門，但觀覽車營業到22:45。全紅色嘅摩天輪係Hep Five地標，圓周唔算大，大約十五分鐘時間行完一圈，睇下大阪車站附近風景。橫掂周遊卡包嘅 (原¥500)，一去無妨。完成一日大阪周遊行，返酒店訓個靚覺。
 

參考

2014大阪京都七天遊之第四日 [4.4 尋找道頓堀的幸福]

by admin | 4 月 11, 2014 | 2014大阪京都七天遊, 旅遊, 日本, 關西

搭番勁方便嘅大阪地鐵，下午五點到達難波千日前道具屋筋商店街。一條短短嘅商店街，大部份都係買餐飲工具、食物模型。有唔少店舖仲用唔洗¥100價錢賣Made In Japan嘅筷子，好受歡迎，因為唔想同人迫所以無買。
 

繼續係大阪南遊走，行得累累地，不如食個甜品，就試道頓堀最出名嘅名點幸福一下。左穿右插終於搵到法善寺橫町呢條小街，夫婦善哉就係牌坊後面。網友話食過夫婦善哉單身找到好姻緣，夫婦幸福到不行。
  

小店係清一式獨賣一款幸福紅豆湯丸，配合勁和式嘅裝修，真係風味十足。紅豆湯丸特別之處係一人前份量會分成兩小碗，有人話要一個人獨享兩碗先算圓滿，亦有說法係兩人分享先會團圓幸福。今次到訪，老闆娘婆婆只為我地送上一客兩碗，二人分享咪更加好Feel。呢款簡單到不能再簡單嘅紅豆湯丸點解會出名到痴線? 小店有說明書介紹，全靠一部小說所賜，小說拍成電影，令呢間小店出左名，好多名人都慕名而來。
 

一人前份量(¥ 800)有兩細碗紅豆湯圓、一塊咸海苔。跟據食用說明，首先再食紅豆湯圓。日本嘅紅豆真係好好味，好甜好大粒。湯圓係一粒白色糯米粉團，煙煙韌韌幾好味。呢碗紅豆沙比正常再甜多一倍，食到最後真有點甜到漏嘅感覺，諗晒甜魔。第二步係處理咸海苔，細細一片海苔上面灑滿粒鹽，勁咸，但正好中和頭先嘅勁甜。最後係飲一啖麥茶清一清。非常神奇嘅一個勁甜、勁咸、勁清組合，配合巧妙嘅食用次序，呢個甜品真係唔錯，食完有好滿足嘅感覺。

帶住幸福滿足嘅感覺，繼續遊走道頓堀。下一站係大阪名物章魚燒。上次黎大阪試過赤鬼同第一，今次要試另一間くくる。くくる都係人氣名店之一，最出名係章魚腳大到飛晒出黎嘅重量級章魚燒，但為左留肚食晚飯，只選擇普通版。一客十粒¥550，唔係重量級都好夠大粒。外皮微脆，中間粉漿軟綿綿好有味道，章魚亦唔細舊! 加埋燒汁、沙律醬、海苔，正係好大阪嘅章魚燒!
 

臨近黃昏時分，決定繼續玩盡周遊卡，坐道頓堀水上觀光船 (¥700)。上船位置就係唐吉訶德對出，先去櫃檯換船票，搭上18:30呢班船。觀光船由唐吉訶德出發，喺道頓堀河行走，會經過九條橋，穿過橋底嘅感覺好得意。船上有服務員用日、英、韓語講解、搞氣氛，輕輕鬆鬆渡過二十分鐘船程。
 

揀黃昏時間上船實在太好，回程時天色漸暗，河岸兩邊嘅大廣告版開始亮燈，變得好熱鬧，正好感受大阪繁華一面。

19:00落船搵飯食，原本打算去法善寺橫町試喝鈍豬排，點知去到店長話今日要關門。好彩事前做足功課，決定即時轉軚提早去梅田藍天大廈，因為果度另有分店!

參考