by admin | 11 月 14, 2017 | 2017關西親子遊, 旅遊, 日本, 關西
八點零起身落樓下難波Walk買早餐，兩個麵包幾好味。今日會搭阪神電鐵往神戶，用阪神一日券，¥700任搭全線，淨係來回兩程已經有賺。搭到8:24快速急行，直通尼崎唔洗轉車，9:09就到神戶三宮，動物園未咁早開門，仲有少少時間，喺阪神站行去Port Liner，經過超市又買左少少野食補給。
黎到Port Liner服務中心買套票，¥1500包來回車票加動物王國入場券，叫做慳左個車費，都不無少補。
十點就黎到動物王國，從車站向外望，真係無諗過呢度收埋左個動物園。
動物國王分為內園同外園，呢度最出名就係有好多小動物走街行俾你任摸。剛開園人少少先去入門級同小兔玩下。初頭紫凝都驚驚地，慢慢捉住佢手摸下啲毛毛，就覺得好得意，之後仲周圍追住啲兔玩。
預著10:30有草泥馬Walk，又去摸下影張相。見到附近有咁多檯椅，坐低食埋個早餐。飯團幾多餡料，醬汁又多，唔錯。而家好Hit嘅透明奶茶就真係好睇唔好食，係好假好淡嘅奶茶味。
今日落雨，出Outside Park快行一個圈，幸好園提供遮可以借用，真係貼心到不得了。外園有企鵝、鹿、駱駝等，如果唔係落雨，都可以睇耐啲時間。
11:30霸位睇網友大推嘅Bird Show，真係唔錯。有好多唔同品種嘅雀仔，表演唔同技能，仲有意安排啲雀喺觀眾頭先飛過，氣氛好好。
睇完表演後俾BB食午餐，園內有好多檯枱俾人食野，身邊都係樹木都動物，呢個環境食野好得意。最後行番全場一個圈，園中間有個湖，有鴨仔周圍行。
園內仲有好多影相位，可以同啲動作零距離接觸，仲試過餵鱘魚。
by admin | 11 月 13, 2017 | 2017關西親子遊, 旅遊, 日本, 關西
好快食完就離開，搭到17:50京阪洛樂，呢架特快列車平日每日只有兩班，非常幸運。
唔洗一個鐘就去到淀屋橋，轉地鐵返難波。見時間尚早，七點半黎到難波City周圍行下，順便搵個位俾紫凝換片食飯。之後去影燈飾，今年係光之饗宴，非常唔錯。
臨走時經過Pablo，還好仲有蛋糕，買左一個Nude做宵夜，職員仲學講廣東話，非常親切。Pablo都係芝士味勁濃，非常幼滑，不過好似Basic版有埋酥皮餅邊好食啲。
by admin | 11 月 13, 2017 | 2017關西親子遊, 旅遊, 日本, 關西
三點黎到京都，先去高島屋補給，最緊要係搵育嬰室換片。呢度育嬰室非常正，四格換片位外，仲有冷熱水供應，出面仲有餐椅可以用。之後係商場閒逛，睇下玩具，換埋京阪旅客限定Hello Kitty文件夾仲有優惠卡。
四點左右行下錦市場，食番一枝上次食過好好味嘅芝士魚棒。但人真在太多，較難行，快快行過就走人。沿三条通閒遊，提早去食晚餐。
五點黎到呢間百年老店京極かねよ，就係京都必食老店之選，老舊嘅建築睇得出歷史悠久。進入地下層座位，幸好位置尚算闊落可以放得落BB車。惟一係開放吸煙，有少少煙味。
柯打左兩客きんし丼（上）¥2800。上面有一層厚燒玉子，下面就係日本一鰻魚。因為係中碗，碗夠大包全玉子，無細碗突晒出黎咁澎湖，不過蛋味不錯。鰻魚炭燒味濃，軟腍又有肉汁，不錯。有趣嘅係，醬汁係帶咸味嘅豉油，並唔係帶甜味嘅燒汁，呢個配合有新但又幾好味。
by admin | 11 月 13, 2017 | 2017關西親子遊, 旅遊, 日本, 關西
食飽飽後宇治散策，沿路經過民居，感覺幾似嵐山嘅清靜。黎到表參道開始多人，兩邊有小店，但餐飲為主，興趣不大。到達後買門票，每張¥600。
入院後就黎挑戰BB車嘅極限，全程沙石路，幸好仲捱得到出門口，更慶幸仲捱得到返香港。
文化遺產平等院出名在日圓錢幣都印有鳳凰堂呢座建築物，湖邊一座非常宏偉，影相好靚。
其實可以加錢入堂內，但以人龍黎睇，起碼排一個鐘。據說內裡係國寶佛像文物為主，興趣不大當然跳過。
繞過湖畔，就到鳳翔館文化博物館，展示左唔少雕刻、繪畫和工藝國寶。推住BB車可以安排搭隱閉嘅升降機。離開鳳翔館，終於見到比較紅嘅紅葉。行左大約一個鐘就離開，院內少不免沙石同樓梯，幸好唔算太辛苦。
沿住宇治川，到達觀光中心。觀光中心有洗手間，又有熱水，稍為抖抖再出發。
沿路行對岸，經過喜撰橋、十三重石塔，係 日本最大的石塔、橘島、朝霧橋。紫凝憑自己努力行過對岸，對岸有另一文化遺產宇治上神社，但樓梯實在太多，唔上了。繼續漫步，前往京阪宇治，準備下站前往京都。
by admin | 11 月 13, 2017 | 2017關西親子遊, 旅遊, 日本, 關西
8:30 食左啲麵包就出發，今日行程去宇治，京都，買左京阪電車觀光一日券，¥700非常抵玩，來回兩程已有賺。由大阪出發去宇治，由難波坐地鐵去淀屋橋，轉京阪電車，仲遇上豪華雙層車卡。再經中書島轉去字治，10:00到達宇治。還好紫凝大半程車一直補眠，訓番兩個幾鐘。
落車後經過宇治河天橋一直向JR方向行，大約十分鐘就到午餐地點，中村藤吉。呢間餐廳出晒名，連香港都有分店，但咁耐以黎都未試過，今行黎宇治就係必食之選。宇治本店出左名要排隊，原本諗住排座隊等佢十一點開門，點知咁好彩店方提早開門，而店內仲有位，可以提早享用。
叫左兩個套餐，每個套餐都跟前菜、麵、飯，仲有一客細甜品。蕎麥麵(¥1400)有淡涼綠茶味，另一寢腐皮烏冬(¥1400)更加好味，腐皮非常香甜，烏冬綠茶更濃，仲非常煙韌。
跟餐甜品係綠茶啫喱，綠茶味幾濃，紅豆非常甜，仲有小丸子煙煙韌韌幾好味。但都唔夠喉，黎到本店一定要試埋本店限定嘅木筒甜品(¥900)，除左啫喱、紅豆、小丸子之外，仲有4-5球綠茶雪糕，茶味非常濃，又香滑，非常回味。
食飽飽，繼續宇治散策。
by admin | 11 月 12, 2017 | 2017關西親子遊, 旅遊, 日本, 關西
19:00換番輕便行裝，正式開始旅程。第一站係去本町Akachan，地鐵落左車後行一陣就到，Akachan係大型BB用品百貨，有兩個館，有賣BB車、餐椅等大型用品，另一邊就賣零食、餐具等，此行主要係賣尿片、水同零食。點知只得M碼買唔成，但零食買左一大堆，BB專用樽裝水2L一大枝，洗左¥1431 。
20:00回程返難波準備去晚餐，晚餐係千房大阪燒，但要等位，天氣都凍凍地，惟有係街頭整粥俾紫凝食。還好只等左唔洗半個鐘就有位，入到去即刻暖晒。行前幾條街就有Rikuro，諗住買個新鮮蛋糕俾紫凝食，點知超多人惟有作罷，幸好都可以俾新鮮熱辣嘅大阪燒佢試試味。
今餐叫左兩客燒餅。兩客燒餅新鮮即製，送到座位嘅鐵板上，份量十足，職員表演從高空唧蛋黃醬，另外可以自行加木魚、海苔等，非常吸引。道頓堀燒 (¥1550)材料好豐富，有豚肉、牛根、蝦、魷魚，麵糊底好香，仲加左大量芝士，配上燒汁蛋黃醬非常惹味。另一客廣島Mix (¥1480)有豚肉、蝦、魷魚、粉麵，相對呢個配料無咁多，粉麵亦較淡口，但都算不錯。紫凝又可以試食中間無醬嘅麵糊，都好鍾意呢。是次搵到Blogger優惠券，全單減5%，埋單¥2945。
食完呢餐都九點幾要返歸，沿路紫凝都周圍睇野，非常興奮。返到難波呢間酒店最好就係樓下就有一間大型超市，生活所需都齊。回程前仲買左彩虹奇異果、尿片只買到大碼拉拉褲。宵夜食Haagen Dazs新口味。士多啤梨脆皮好正，味道濃。另一款三文治就一般般。
22:00 返到酒店，就用即棄浴缸袋包住浴缸，BB坐係毛巾上沖涼，初頭都有少少驚可能未試過咁大個浴缸，但總之沖乾淨涼。每晚亦要不停煲水準備第二日嘅用量，新買呢個旅行水煲真係好，唔阻位，煲水速度亦算快，最緊要就係好放心俾BB飲。
夜晚紫凝訓BB床，可能日頭太興奮，半夜喊醒幾次，最後抱佢落大床一齊訓，總算訓到少少。
