by admin | 6 月 19, 2018 | 2018東京家庭樂, 旅遊, 日本, 東京
14:45 睇完巡遊已經近三點，下午場主要係周遊型hea遊，玩一啲搭乘設施。沿路經過城堡當然要留影。
第一站先去叢林巡航：勇闖野生世界。排十五分鐘都係不變定律。呢個係坐船仔遊歷森林之中，有好多動物，仲有突如其來嘅刺激，會出現恐龍等。全程有導賞講解，不過全程日文，旅客參與度唔太積極。聽得明嘅其實佢講嘅野幾好笑嘅。
15:30 就去隔離嘅西部沿河鐵路，搭完船又坐火車，都係等十五分鐘。火車就係繞行探險樂園、動物天地、西部樂園。途中仲見到豪華馬克吐溫號，觀景都唔錯。
16:15 落車時間岩岩好，準備睇七夕主題限定嘅七夕迎賓會。又霸到一個樹陰位。主角都以和服裝扮，都係成雙成對。巡遊好短，十零分鐘完場。
16:45 之後嘅時間係夢幻樂園小型設施，先去城堡旋轉木馬同愛麗絲的午茶派對，都係等10-15分鐘。紫凝真係大個左，唔再驚玩旋轉木馬。
17:30 小飛俠天空之旅都係非常熱門嘅設施，但無FP，次次都等超過半個鐘，我地等左差不多40分鐘，係全日等得最耐嘅設施，不過玩落的確值得等。只能二人一架空中飛船，由星空下望倫敦城市，閃閃星光，好夢幻，場景好靚，真係有飛行嘅感覺。
18:15 預岩時間就可以玩巴斯光年星際歷險，憑FP可以減少最少50分鐘等候時間，呢張FP真係絕對值得拎。坐車仔射擊遊戲，可以自行控制就係特色。
by admin | 6 月 19, 2018 | 2018東京家庭樂, 旅遊, 日本, 東京
是日午餐要快，就係明日樂園舞台餐廳食漢堡快餐。非常大嘅餐廳，自助快餐形式，座位超多，但人都好多，難得搵到一張圓枱。呢度出名就係米奇造型漢堡。每個套餐都跟薯條、飲品，主題樂園黎講係正常價。
チーズ＆ビーフパティサンド 芝士漢堡 ¥980
エッグ＆ビーフパティサンド 漢堡蛋 ¥980
麵包係米奇造型，新鮮熱辣幾軟熟。漢堡軟腍肉汁仲好豐富，成個包都唔會乾柴，醬汁夠多，酸酸甜甜好惹味。薯條新鮮即炸熱辣辣，整體黎講不錯。
by admin | 6 月 19, 2018 | 2018東京家庭樂, 旅遊, 日本, 東京
食飽飽，見餐廳人流越來越少，大家都準備霸位睇巡遊。就喺餐廳門外，已經有一堆人坐喺地下，呢個位又唔曬，又唔算多人，視野總算可以，就決定直接喺度等開場。開場前已經人頭湧湧，估唔到真係咁多人。音樂到，紫凝已經非常興奮，不停拍手un un下。
兩點正開始嘅巡遊，日間遊行「奇想騰飛！」。黎到明日世界已經係中後段，差不多10分鐘後先見到第一架車。
出場序﹕
米奇＆布魯托→高飛→愛麗絲→小木偶→米妮
→神仙教母＆長髮公主＆白雪公主＆灰姑娘＆睡美人
→奇奇蒂蒂→貝兒→維尼＆小豬→跳跳虎→唐老鴨＆黛西
→Baymax＆Hero→彼得潘＆溫蒂→阿拉丁＆茉莉
架架花車都非常靚，色彩繽紛，特別係大型花車更加出眾。四大美人嘅超豪華皇宮，同埋小飛俠空中飛人印象最深刻。的確，迪士尼巡遊係絕對值得逗留半個鐘時間去睇。
by admin | 6 月 19, 2018 | 2018東京家庭樂, 旅遊, 日本, 東京
適逢東京迪士尼樂園35周年，到處都有特別裝飾，連主角嘅服裝都係期間限定。咁岩旅遊嘅日子仲係七夕主題活動，仲有特備節目。
09:10 長長嘅人龍，終於都入到場，中央大街實在熱鬧，但我地唔會俾佢吸引到。第一站分頭行事，第一小隊去Monsters拎Fast Pass，第二小隊帶埋紫凝直衝小小世界。成績非常好，拎到Monsters FP 12:10-13:10。
09:20 小小世界係近期新裝修，從Apps呢排嘅觀察，小小世界一開場已經俾人搶晒FP，即是話係唔係都要排隊，不如就趁佢一開場人流最少嘅時候玩左先，果然無錯，15分鐘輪候時間非常值得。坐住大遊船，沿河睇到唔同國家嘅公仔，新裝修仲加插左好多迪士尼人物，更加吸引，全程聽住歌，目不暇給，新裝修果然唔同啲。
10:00 幽靈公館就係旁邊，都係人氣必玩設施，13分鐘輪候時間，好快就入到主場。經過兩次小館展示分流後，好快就要上車出發。呢個係小車輛，係公館上上落落，見到好多幽靈阿飄，整個行程都係黑暗，但一啲都唔恐怖，特效仲幾得意，確實必玩之選。
10:40 不遠處就係小木偶奇遇記，只需排10分鐘，排隊已見到架車，真係非常快。好快上到車，好快開車，好快玩完，真係好快，已經非常Chok，又係遊覽車講故事，但Chok到完全睇唔切，得個笑字。
11:00 上半日中場休息，去卡通城嘅嬰兒中心補給換片。換片室有成十幾格非常闊落，隔離仲有開餐區，有齊熱水、BB餐椅等，非常周到。
11:15 FP 2小時時限解封，係時候再拎FP。當然要拎一啲排隊排到阿媽都唔認得嘅熱門遊戲，小熊維尼就係最佳選擇。果然FP已拎到19:05-20:05。
11:30 唔覺唔覺，紫凝原來訓著左，諗住去玩加勒比海盜，但職員唔比入場，惟有公公係出面陪去，我地三個入去玩。只需要等5分鐘，唔玩對唔住自己啦。其實直行直過幾乎唔洗等，好快就上船出發。開船無耐就殺你一個措手不及，直衝一層樓。沿河都係魔盜王場景，內容豐富，而且仲非常巨大真實，連Jack都做得勁似，不錯。
12:00 見紫凝訓得咁淋又未夠鐘玩Monsters，見星際旅行：冒險續航只需要排20分鐘，決定分兩輪各自玩，分頭睇住阿B。入場後小排隊，拎左3D眼鏡後入機艙。係4D影院，一邊睇住螢幕太空飛行，整個機艙都會郁，少刺激都幾好玩。
12:50 分兩輪玩完Space Tour，叫醒左紫凝一齊玩怪獸電力公司「迷藏巡遊車」，FP真係超優惠，明明要排50分鐘，可以喺另一個門口直行直入，差不多去到上車點，真係慳好多時間。2-3人一車，一人一個手電筒，沿路搵M字，好似照田雞咁，場景幾得意，幾好玩，難怪長期排隊近60分鐘。
13:15 一個上午已經玩左咁多個設施，快快脆脆食個Lunch準備兩點巡遊，食飯前先去明日樂園拎巴斯光年FP，仲抽到17:45-18:45，一日抽到三項FP成績真係非常好!
by admin | 6 月 19, 2018 | 2018東京家庭樂, 旅遊, 日本, 東京
總於黎到此行重頭戲，東京迪士尼。由計劃行程開始一路都留意迪士尼嘅動向， 尤其係天氣變化。到6月11日先決定買Klook迪士尼電子票。
Klook買嘅係開放票，限期前都可以自選遊園日期。每張票價$530，扣埋信用卡優惠$513，仲平過香港迪士尼。
臨出發前仲Download左不同App，睇實每個設備嘅等候時間同FP派發時間，對於整日嘅規劃有晒目標。
買得票到迪士尼當然希望風和日麗，又唔多人，所以決定避開星期一學校文化祭休，首選星期二去，日日期望天清氣朗。如我們所願，前後都落雨，只係星期二係天晴到不得了，實在太幸運!
今行轉車比較多，所以選用Suica更加方便慳時間，喺機場時已出定卡先入儲值¥3000。
今早提早食早餐，七點零開餐，八點左右出發，仲可以善用尋日嘅24hr Subway，慳番一程地鐵錢。汐留去迪士尼車程唔長，但轉車較多，地鐵大江戶線去到月島，再轉有樂町線去新木場。8:30到新木場就轉JR京葉線，六分鐘到舞濱。
南口一出就見到迪士尼樂園嘅大拱門，步行8分鐘就到排隊入場處。
8:45黎到，已經人頭湧湧，原來真係有咁多人會提早等佢開門，真係非常熱鬧。9:00準時開門入場!
by admin | 6 月 18, 2018 | 2018東京家庭樂, 旅遊, 日本, 東京
八點鐘係時間食晚餐，ソラマチ其實有好多食肆，黎到東京必試文字燒，選擇呢間だるま文字燒。店舖唔大，食飯時間要少等位。
安排坐四人卡位，位置比較窄，帶紫凝實在唔太方便。快快脆脆食完就走。叫左兩客，一個文字燒¥1530，一個大阪燒¥1460。店員即場幫你料理。文字燒就係將一堆料理撈埋粉漿，攤開黎煎煮。味道比較薄弱，材料唔算豐富。
大阪燒整嘅時間耐啲，材料豐富，味道更加惹味香口。埋單¥2990，味道唔突出，總算一試，不失為一個體驗。
臨走前去二樓手信街買手信，呢度有東京車站人氣No.1必試焦糖奶油夾心 Press Butter Sand，雖然無新鮮版，但總算可以一試，10件裝¥1700。仲有鯛魚燒，吉士忌廉脆脆(¥210)，外皮有糖粒脆脆的，中間吉士味道香甜，不錯。另一款係晴空塔限定抹茶(¥180)，外皮就有微微綠茶味，中間流心綠茶餡，味道不錯，但都係吉士更加好味。
九點前回成行程，由押上搭地鐵返新橋只需十五分鐘。黎到新橋去超市行下，點知間超市細細間無乜睇頭，惟有去便利店買甜品。
