by admin | 3 月 30, 2024 | 2024 復活節六人行台北之旅, BB Friendly, 中菜, 台北, 台式, 旅遊, 素食
不葷主義@南京復興 30/3/2024 19:45
今晚晚餐完全未Plan過，印象中酒店附近都唔少野食，首選係呢間素食專門店，Google評分高達4.9分，係台中相當知名的素食餐廳，更被譽為「素食界鼎泰豐」。原來全場做訂位，但無辦法訂，只能取後補籌，職員話都要等大半小時。等左一陣，經理話有客訂左檯無黎，可以安排我地入座，有感覺經理見我地係遊客，有特別安排，實在太感恩。
座位係半圓型梳化卡位，六人坐都好舒服。餐廳環境清雅，係比較新潮嘅素食店。菜單全素食，估唔到菜色選擇都咁多。
絲瓜湯包 NT$130﹕不愧為有素食界鼎泰豐名譽，著名嘅湯包出品勁有保證。除左皮薄，估唔到素食都可以做到咁湯汁豐富，中間係絲瓜絲好香味。
松露炒飯 NT$350﹕香氣十足，炒飯乾身，蔬菜加上松露等材料，非常好味。
糖醋雞丁 NT$320﹕賣相吸引，醬汁酸酸甜甜，素雞煮得香口，入口真係非常似肉，有汁又好味。
桂花魚翅 NT$450﹕初頭唔知係什麼東西，原來係用煲上，大量蔬菜炒菇類加上素翅，仲有雞蛋炒碎，香氣十足，味道有層次。
客家煎豆腐 NT$320﹕豆腐有豆味，煎得香口入味，加上好多薑絲，香香辣辣。
淡淡的幸福 NT$350﹕原來係蛋主題嘅料理，職員仲好細心，幫我地將七味粉分開，唔怕辣親小朋友。原來係將蛋白同蛋黃分開烹，再加入菇菌配料同醬汁，杰杰地，充滿濃烈蛋味，非常飽足，唔到簡簡單單咁好味。
花生豆花 NT$80X2﹕台灣傳統甜品，豆花豆味濃，花生煮得腍晒，清爽不甜。
埋單連加一NT$2,431，唔算平，但味道的確不錯，亦相當有驚喜，估唔到素食都可以咁出神入化。而且服務超級好，職員親切友善，非常關心每枱的用膳情況，亦細心考慮小朋友的需要，實在非常周到。怪不得人氣咁勁。
by admin | 3 月 30, 2024 | 2024 復活節六人行台北之旅, 台北, 外賣, 小食, 甜品
30/3/2024 17:00
係置地廣場玩完兩個親子景點，沿途行下華泰名品城，黃昏時間著左燈飾都幾靚。下午明顯人流多左好多，相信都係遊人臨離開台灣係度食埋放晚飯先走，原本打算去Movenpick Cafe已經完全爆滿。還好唔算太肚餓，選擇直接返台北先食晚餐。臨走前係商場車仔舖買左浪花可頌鯛魚燒NT$75，熱辣辣，外皮係酥皮脆卜卜， 中間爆多餡料，日式紅豆大大粒好香甜，另一款係香草卡士達蛋香味十足。
回程行番去高鐵站，將原本夜晚嘅回程票去人工櫃台改票，費用全免，好快就出到票，實在太方便。
桃園18:27 > 車次1322 > 台北18:44
20分鐘唔洗就到台北，事前睇過攻略有教經高鐵B3地下連道層就只需要前行一百米就到捷運閘口，實在太方便! 再坐捷運去番南京復興站附近搵食。
by admin | 3 月 30, 2024 | 2024 復活節六人行台北之旅, 台北
30/3/2024 16:00
同一個商場內除左巧虎樂園，仲有Xpark都係人氣親子景點，假期黎係出晒名要排隊。係Klook買門票更優惠，除左巧虎連Xpark親子套票折實$344，另外每位成人門票$148。買好券可以憑QR code直接入場，非常方便。
全館有三層，基本上都可以用升降機上落，動線非常順路。每區有唔同主題，一入去二樓就係福爾摩沙大水糟，三樓珊瑚潛行、雨林探險佈置到成個熱帶雨林嘅環境好特別。仲有深海尋秘同虛實互動小遊戲。落番二樓就有企鵝同水母區，環境裝置好特別，值得打卡。落番一樓係戶外潮間戲灘仲有幾隻戶外住嘅水豚君同羊。園區有水上表演時間，可惜錯過左。最後仲有Cafe同精品店。
水族館雖然空間唔算好大，亦無超巨型水糟，但presentation幾特別，環境佈置亦有心思，動線行得舒服，幾多互動遊戲，的確係一個非常好嘅親子景點。
by admin | 3 月 30, 2024 | 2024 復活節六人行台北之旅, 台北, 外賣, 甜品
30/3/2024 12:00
巧虎夢想樂園係台灣一大親子景點。係Klook搵到優惠入場券。買左連Xpark親子套票折實$344，因為細佬唔需要Xpark門票，所以另買一套巧虎親子套票$187(原價兒童NT$650)。再即場加購成人陪同票每位NT$200。 平均一大一小唔洗$200就可以玩三個鐘，夠晒皮。
假日揀左下午1至4點場次，時間尚早周圍打下卡。樂園唔算太大，但係元素比香港的特別。一入門口有唔同主題嘅廚房、小食店主題，道具非常迫真。中場一個大型攀爬滑梯，下方就係藍白主題波波池。旁邊有幼沙池、砌積木區、電腦遊戲、攀石牆等。正值復活節仲有尋蛋遊戲，只要係場內搵到復活蛋圖片就換到小禮物。
樂園環境割淨，工作人員多又非常友善，星期六黎到人流都唔算多，都算值得一來，但比較適合小B，應該一次就算了。
馬祖新村 30/3/2024 15:00
玩左咁耐都有啲肚餓，行左出去商場見到呢間出名嘅車輪餅店。
黑糖波霸奶油車輪餅 NT$45﹕新辣即製熱辣辣，外皮脆脆的，中間好軟熟，咬開仲爆晒醬，好豐富奶香味嘅奶油，仲有粒粒黑糖波霸，味道濃郁，估唔到咁好味。
復刻塩味奶油 NT$45﹕奶油加左天然海鹽，味道咸咸甜甜，幾得意。
黑糖波霸厚鮮奶 NT$80﹕黑糖、鮮奶、牛奶三個味道都齊全，口感幼滑，不錯。
車輪餅新鮮熱辣又好食，真係後悔買得太少。
by admin | 3 月 30, 2024 | 2024 復活節六人行台北之旅, 台北
30/3/2024 12:00
落番大堂用人工閘口驗票入閘，晨早落到月台，估唔到個月台咁細咁窄，同一般捷運車站月台差唔多，未無感覺特別高級。月台指示清晰，要按車票指定地點等候上指家車卡。
台北11:46 > 車次633 > 桃園12:08
車程只係兩個站，時間20分鐘左右，單程車費NT$160，兒童NT$80。座位都算舒適，行程速度其實唔係特別快，但距離唔遠〝好快就到桃園。桃園車站明顯比較大比較靚。幸好之前做左功課，知道經地下通道可以用最快速度去到桃園機捷站，再轉去華泰名品城。
華泰名品城可算係桃園最大嘅Outlet，係呢度可以玩上一日。今日係星期六，人流都唔少，相信遊客會當呢度係出入機場嘅中轉站。
by admin | 3 月 30, 2024 | 2024 復活節六人行台北之旅, BB Friendly, 台北, 港式, 飲品, 點心
點點心台北微風廣場 30/3/2024 10:00
微風廣場有幾邊電梯上落，等十點正開門，遇岩前面嘅電梯係最早開，最快上到上層，好快就搵到早餐無目點點心。
小心港式風情，點心選擇都幾多，熱辣辣，新鮮即製，賣相都可以。
蟹子燒賣皇 NT$138﹕蝦夠彈牙幾新鮮，豬肉同蝦比較不錯。
晶螢鮮蝦餃 NT$148﹕彈牙新鮮，調味幾好。
脆皮鮮蝦腸 NT$148﹕好似腸粉皮包住春卷，雜菜春卷脆卜卜。
黑椒刺蝟叉燒包 NT$118﹕可愛造型，原來中間係叉燒包，內餡非常熱，叉燒都幾多，調味甜中帶微辣，好惹味。
海苔酪梨咸小角 NT$128﹕賣相精美可愛，中間係咸小角，炸皮脆脆地煙煙韌韌，同平時食開嘅味道差不多。
豬仔流沙包 NT$138﹕最出名嘅可愛流鼻水豬仔，餐單仲教你點樣整出鼻水。包皮幾鬆軟香甜，中間的確好流心，奶黃勁熱，味道幾香蛋黃味。
多士脆鮮奶 NT$128﹕多士包住鮮奶拎去炸，外皮炸得好熱氣，鮮奶幾甜。
奶油焗白菜 NT$138﹕奶油味好香，奶味濃郁，菜煮得好腍，用上西式食法又加左勁多芝士，估唔到咁好味。
埋單連加一NT$1,192，飲茶黎講唔算特別平，味道算不錯，算特色。
泉發蜂蜜 30/3/2024 11:00
飲完茶買杯飲品拎上高鐵飲，大大杯蜂蜜檸檬綠茶只係NT$70，非常抵飲。檸檬底非常夠味，夠新鮮，夠酸，蜂蜜都好濃甜，配合得宜。
