深圳龍華壹方天地 14/4/2024 12:00
抽中0元探店試食牛雜煲，位置比較遠。餐廳裝修環境有趣，好多霓虹燈，店面大，但生意似乎較淡靜。
人氣必點牛雜煲雙人套餐 (原148元)
金獎牛雜煲﹕真材實料，蘿蔔算少，湯底濃杰，有唔少牛雜、牛腩片、支竹、潮汕牛丸等。各式牛雜煮到好入味，最正係牛腸，脂肪厚啖啖油香。牛腩就尚可，牛丸彈牙多汁。食到中途職員仲協助加湯繼續打邊爐。
鮮切吊龍﹕肉味濃，但放入清湯食原味似乎比較合襯。
潮汕魚皮餃：煮煮雨變得好大粒，爽口肉香
華豐面：正好吸晒湯汁精華
響鈴卷：快煮5秒，又脆又軟。
時蔬：各款菜都算新鮮。
份量唔少，估唔到咁飽肚。
不葷主義@南京復興 30/3/2024 19:45
今晚晚餐完全未Plan過，印象中酒店附近都唔少野食，首選係呢間素食專門店，Google評分高達4.9分，係台中相當知名的素食餐廳，更被譽為「素食界鼎泰豐」。原來全場做訂位，但無辦法訂，只能取後補籌，職員話都要等大半小時。等左一陣，經理話有客訂左檯無黎，可以安排我地入座，有感覺經理見我地係遊客，有特別安排，實在太感恩。
座位係半圓型梳化卡位，六人坐都好舒服。餐廳環境清雅，係比較新潮嘅素食店。菜單全素食，估唔到菜色選擇都咁多。
絲瓜湯包 NT$130﹕不愧為有素食界鼎泰豐名譽，著名嘅湯包出品勁有保證。除左皮薄，估唔到素食都可以做到咁湯汁豐富，中間係絲瓜絲好香味。
松露炒飯 NT$350﹕香氣十足，炒飯乾身，蔬菜加上松露等材料，非常好味。
糖醋雞丁 NT$320﹕賣相吸引，醬汁酸酸甜甜，素雞煮得香口，入口真係非常似肉，有汁又好味。
桂花魚翅 NT$450﹕初頭唔知係什麼東西，原來係用煲上，大量蔬菜炒菇類加上素翅，仲有雞蛋炒碎，香氣十足，味道有層次。
客家煎豆腐 NT$320﹕豆腐有豆味，煎得香口入味，加上好多薑絲，香香辣辣。
淡淡的幸福 NT$350﹕原來係蛋主題嘅料理，職員仲好細心，幫我地將七味粉分開，唔怕辣親小朋友。原來係將蛋白同蛋黃分開烹，再加入菇菌配料同醬汁，杰杰地，充滿濃烈蛋味，非常飽足，唔到簡簡單單咁好味。
花生豆花 NT$80X2﹕台灣傳統甜品，豆花豆味濃，花生煮得腍晒，清爽不甜。
埋單連加一NT$2,431，唔算平，但味道的確不錯，亦相當有驚喜，估唔到素食都可以咁出神入化。而且服務超級好，職員親切友善，非常關心每枱的用膳情況，亦細心考慮小朋友的需要，實在非常周到。怪不得人氣咁勁。
深圳中洲灣 24/3/2024 15:30
今次又抽中大眾點評免費試，雖然餐單只價值50元，但近近地嚟到中洲灣食都可以當下午茶，原來係潮式茶店。
阿嫲手作甜湯 25元
材料非常豐富嘅甜湯，有兩大粒湯圓，花生味同芝麻味，皮夠薄，醬料較多，咬開之後爆曬出嚟，味道唔錯。仲有好多粒煙煙韌韌嘅芋圓、桃膠，紅豆等。仲有啲類似淮山嘅材料。本身個甜湯未到未添，相當飽肚。
阿嫲炸物三併 25元
三款炸物包括肉腸、外皮脆脆的，中間幾個爽口，都有肉汁。炸蝦餅炸得香脆，蝦肉大大隻，非常爽口。最後一款應該係類似炸芋頭餅，仲有好多蝦米，都幾香脆，炸物略嫌炸得太乾身。
坐落商場地庫嘅一角，人流唔多，食嘅嘢比較特別，出邊唔常見，可惜味道唔太突出，試完就算，冇乜吸引力。
沙田 18/2/2024 11:30
沙田乳鴿 $42
沙薑豬手 $89
小小熊仔 $59
紅寶石粉果$59﹕黑松露素鮮菌菇
三文魚蘋果酥 $69
龍躉魚雲吞 $89
子薑咸雞煲仔飯 $89
冰梅欖角骨 $119
大肚婆炒飯 $109﹕薑米、蟹肉、蝦、脆豆、粟米
今日一家人嚟到沙田巿一間新派中菜，叫咗唔同點心。最出名係乳鸽 ，新鮮熱辣，都有肉汁。 巧克力流心包 小小熊仔造型。 冰梅欖角骨酸微微幾好味。 大肚婆炒飯材料豐富，薑味香，有蟹肉、蝦、脆豆、粟米等。點心相當精緻，新鮮熱辣，口味比較獨特新穎，同一般酒樓點心唔同。味道係唔錯。價錢的確有啲貴。
寶安壹方城 13/2/2024 11:00
想試呢間熊貓湯火鍋好耐，但見分店比較細間，座位一般，最後嚟到壹方城呢一間大啲面，一家人可以坐完枱，相當闊落。門口有可愛嘅大熊貓公仔同小朋友影相，仲有遊戲機可以解悶。職員送上兩隻小熊貓髮夾，小朋友開心到不得了。
不同角落都佈滿着大大小小嘅熊貓，連餐具都係熊貓擺設，實在太可愛。
元氣大滿足和牛三人餐 389元
經典三味熊貓鍋湯底有清雞湯味道相當鮮甜，另有味道微酸似有加上蕃茄湯底，仲有四川麻辣湯底。
招牌9M雪花和牛、6M雪花和牛：估唔到兩款肥牛質素相當高，油花分布靚，入口非常之嫩滑，牛味濃郁。
毛肚、鴨血、冰封鮮鴨腸：用冰封住實在浮誇，鴨腸煮完之後好爽口。
香菜鮮肉滑：調味不錯，爽口彈牙。
仲有多款蔬菜，包括黃金針菇、貢菜、黃豆香千張、娃娃菜、冬瓜。
手工扯面職員姐姐將麵條拉薄，再幫你放入火鍋，麵條米味幾香。另外單點一份扯面加3.9元。
自助醬料有現榨芝麻油同現磨芝麻醬，芝麻味幾香，好幼滑，配牛肉一流。另外特別鍾意沙茶醬，甜甜地，花生味香。
免費自助銀耳雪梨湯，清甜潤喉，無限任加。
浪漫雲頂草莓乾果冰粉杯 9.9元、熊貓爆爆草莓冰粉杯 9.9元。賣相實在太可愛，每隻杯都有可愛的熊貓。草莓冰粉唔太甜，相當之滑溜，一杯加上忌廉，好幼滑。另一杯加咗爆爆珠。
餐廳環境吸引，職員都想當親切熱情，食物新鮮質素高，雖然價錢在深圳消費實在唔平，但係都相當值得。
美團外賣 28/1/2024 18:00
濕炒牛河 19.8元
濕炒牛麵 19.8元配沙茶醬
加打包費及配送費5元
平到離晒譜，但係味道唔錯。
