吉姆大師傅
深圳喜薈城 25/7/2025 17:00
包裝精美，可愛嘅小雞卡通公仔。
芝士蛋糕 33元：長長一個，可以切好多件。蛋糕本身好鬆軟，中間一層加咗芝士，帶鹹甜味。放咗落雪櫃之後，口感更佳。
奧利奧樂樂捧 9.9元：係蛋糕基礎上面舖上厚厚奧利奧碎，蛋糕本身好鬆軟，加咗奧利奧碎多一份香味，口感非常特別。
千芋木舖
深圳筍崗寶能環球會匯 23/6/2024 16:00
麻糬芋圓燒 21元
抹茶麻糬鮮奶 19元：新產品，大大杯都只係$19。抹茶麻糬味道好濃，口感煙韌黏口，份量都非常多，相當有驚喜。加上鮮奶非常香濃，仲有粒粒煙煙韌韌小芋圓，口感非常豐富， 十分飽足。
深圳筍崗寶能環球會匯 21/1/2024 16:00
想食呢間芋圓主題甜品好耐，今日就叫咗三款唔同口味食個下午茶。擺盆賣相非常靚，每一碗芋圓都好豐富。每款配搭都差唔多，基本有好多芋圓、仙草、小丸子芒果、西瓜等等。芋圓口感煙韌，味道香濃，的確幾好食。各款水果都相當新鮮鮮甜。
鮮榨椰奶芋圓燒 23元：呢款加上一杯椰奶，椰香味重。
草莓金芒芋圓燒 26元：呢款就加料草莓同埋芒果。
麻糬芋圓燒 21元：呢款加咗米香味濃，非常黏口嘅米麻糬。
2024 復活節六人行台北之旅 第六日［6.4 旅程尾聲］
1/4/2024 13:30
午餐後仲有少少時間，飛快地去酒店後的百貨店買幾盒口罩。Hello Kitty 又平又靚。
14:00 返到酒店執好行李，安頓好就等司機。
14:30 司機先生準時到達，著晒成套西裝，好禮貌。好呢架車仲大，仲舒服。上車時多位酒店職員仲出嚟幫手拎行李，歡送我哋。
15:15 已經到機場，車費NT$1,300，真係抵俾，舒服到全世界都瞓晒覺。
去到櫃檯既行李，都要排一陣隊，完成之後喺機場周圍行吓。首先有長榮航空Hello Kitty Check in Counter打卡位。做過功課，南北兩邊有展望平台，仲有手信街。仲有一個Lego機場展區。
16:30 差不多時間過關，雖然無優先通道，但整個流程都好快。人工櫃位過關基本唔使等。
馬祖新村
1/4/2024 17:15
之後行到近候機室，有一個類似美食廣場，買馬祖新村車輪餅。機場限定只得兩款口味，排隊都排咗一陣，人氣甚高。
NT$ 330/ 6件 兩款口味各三件。新鮮即製，熱辣辣，蛋糕蛋味重，好鬆軟。中間內餡流心爆晒出嚟，一款是好事花生，非常濃郁。另一款係古早奶油，未到微甜，香氣十足。
候機室附近仲有Hello Kitty遊樂室，裝修非常之可愛，可以俾小朋友玩一陣。
夠鐘登記，只得一部勁細嘅升降機，呢個比較麻煩，但係登記流程都好快。最後準時起飛離開台北。
機上座位都係舒適的，小朋友亦有扭計骰禮物。今日嘅飛機餐係麻油雞飯，份量唔少，雞肉幾滑，汁夠多，啱晒撈飯，味道不錯。除餐仲有零食小吃，蘋果汁等等。
20:00 準時返到香港，完成六日非常好玩嘅旅程。
2024 復活節六人行台北之旅 第六日［6.1 台北老麥］
麥味登 1/4/2024 09:00
今日係行程嘅最後一日，先check out 酒店，寄存行李。幫我哋辦手續嘅係日籍職員，似乎係高層，普通話都非常純正。一切冇問題可退回NT$2000信用卡按金。
搭捷運嚟到忠孝新生站，車站附近就有一間台灣老麥味登。店面唔太大，還好都仲有位坐。
原塊嫰雞起司蛋滿分堡+豆漿紅茶+菜脯蛋 NT$130
原塊燒雞真係勁大塊，仲有芝士雞蛋，非常豐富。配上菜脯蛋，係一個好台式嘅快餐。
黑胡椒豬里肌強滿分堡+可可牛奶+雞塊NT$130
豬肉里肌加咗黑胡椒，更加香口。可可牛奶味道濃郁，炸雞快香脆好味。
超厚牛肉起司蛋可頌+拿鐵+黃金脆薯NT$180
牛肉漢堡真係非常厚身，有肉汁，可頌麵包牛油味香，非常鬆軟，加上芝士蛋，仲有酸酸甜甜嘅醬汁，非常好味。
卡滋雞腿蛋丹麥+豆漿紅茶+菜脯蛋 NT$135
雞腿扒煎得香脆嫰滑，肉汁豐富，丹麥麵包牛油味香，非常不錯。蛋是重點，絕對值得加。
台西合壁，新鮮熱辣，味道好好，埋單共NT$575，抵食！
2024 復活節六人行台北之旅 第五日［5.6 宵夜］
返到酒店再嗌Uber Eat宵夜。
原火乍初@UberEat 31/3/2024 22:00
無骨鹽酥雞 NT$85: 口感比較實淨，味道濃郁
鮮炸魷魚 NT$85: 煙煙韌韌，味道幾香，呢個更好食。
雞米 NT$58
所有嘢炒埋一碟，賣相就一般，魷魚鮮甜煙韌算幾好。另外兩款較為實，一般。
冰霖古早味豆花@UberEat
黑糖刨冰 NT$108
材料非常多，芋圓、湯圓、仙草、花豆、布丁，夠晒冰凍，味道不錯。
2024 復活節六人行台北之旅 第五日［5.5 鼎泰豐 ］
31/3/2024 16:00
原訂今日下午去郵政博物館，出到捷運站突然落大雨行雷，大風大雨到完全行唔到，最後只係附近便利店抖一抖，決定取消呢個行程，改去行商場。見有時間，返酒店有放低啲手信先。
轉場去忠孝復興商圈，途中發生小插曲，原來細佬跌左隻鞋仔，問左SOGO客服搵左一輪，原來跌左係捷運站月台，唔覺意留有歷史記錄。
今日咁多蝦碌，就食餐好。呢度最出名就係鼎泰豐。去到取票，職員已話預計等兩小時。平時食飯一聽到呢個時間係從來唔會有興趣繼續等。幸好中午餐火鍋好夠頂肚，決定照排。
中間時間周圍行，去商場行下Daiso掃貨，樓上兒童部仲有得坐車車，有位座，可以休息一陣。
鼎泰豐 31/3/2024 20:00
行左個半鐘左右，大約8點就去番附近，點知去到票號去得好快，坐多一陣已經到號。係店門外先放BB車。安排坐係長梳化位，六個人坐都好闊落。揀咗幾款必吃菜式。
小籠包 NT$150 : 賣相好靚，粒粒都白白滑滑，咬落真係多汁，皮薄，肉餡甜甜的。
雞肉小籠包 NT$150: 比較原味的話呢個較淡口。
蝦肉煎餃 NT$230: 外皮煎得好脆 ，加左薄薄粉漿，餃子中間蝦肉好爽口，香甜。
菜肉餛飩湯 NT$170: 皮較為厚，清淡口味
油豆腐細粉 NT$160: 清淡，細粉幾滑。
菠菜腐竹 NT$310
紅燒半筋半肉麵 NT280: 湯底幾香，帶微辣，牛展肉味幾濃，麵條粗身有咬口。
排骨蛋炒飯 NT$280: 飯炒得乾爽，蛋味香，排骨肉比較實，味道濃。
蝦肉紅油抄手 NT$210: 醬甜辣最惹味，蝦肉抄手皮薄肉甜，不錯。
連加一 NT$2134
服務非常好，有專屬服務員照顧，跟進上菜速度，見我地食得慢，主動幫忙要求減慢。味道的確不錯，價錢實惠。但如果都要等位真係要等成兩個鐘，除非已經安排空檔好活動，否則好難吸引要再來。
