by admin | 3 月 29, 2024 | 2024 復活節六人行台北之旅, 台北, 台式, 外賣, 小食, 甜品
29/3/2024 16:30
完成八里之行，就乘搭渡船返淡水。剛剛日落時份，海上風景更架靚。
到達淡水老街，兩邊都好多店舖。其中一間餅店好多Hello Kitty主題產品。
麻吉奶奶鮮奶麻糬 29/3/20224 16:45
下午茶食少少甜品，揀左呢間非常出夠嘅麻糬專門店。剛好小店最入有一張四人枱，旁邊仲有位置可以放BB車。
花生鮮奶麻糬 NT$110、芝麻鮮奶麻糬 NT$110、椰子紅豆鮮奶麻糬 NT$120
三款都係一堆白雪雪鮮奶麻糬，下面有唔同款式嘅調味粉。麻糬本身不太甜，入口好腍好黏口，奶味都幾重。生花芝麻粉磨得好幼細，將麻糬切開撈勻一齊食味道不錯。柳絲加紅豆又係絕配，係一款好輕型的甜品。
紅豆浣水麻糬 NT$110﹕揀左一款係甜湯版，就好似淡糖水加麻糬，明顯給比下去。
巧味手工麥芽花生軟糖 NT$120
淡水排隊名物，全人手製作，黎到時剛好遇上新一輪製作，可以即場睇表演。係一個層層疊疊花生同糖嘅古味味軟糖，入口煙韌痴口，花生加糖完美融合，又唔太甜。即食口感夠腍，夜晚放耐左變乾左少少，影響口感。
繼光香香雞 M份 NT$90
黎到台灣點唔可唔試鹽酥雞。繼光雞炸得香，唔油膩，炸漿脆脆，雞肉味道香甜，揀左微辣更加惹味。
by admin | 3 月 29, 2024 | 2024 復活節六人行台北之旅, BB Friendly, 台北, 台式, 旅遊
張吳記什錦麵 29/3/2024 12:00
搜尋八里美食，就出現呢間「台灣第一碗」。未到12點，餐廳已經大半滿，人氣非常勁。似乎係家庭式經營，老闆娘好多時一腳踢。GOOGLE評分4.1分，有好多傳媒報導佢超大碗公麵，係非常出名嘅排隊名店。店內見到超大大碗模型，12人份量超大一碗。
什錦湯麵 NT$120﹕招牌菜，清清淡淡，湯頭幾甜，麵質煙韌，有大蝦、菜、豬肝等材料。
什錦炒米炒 NT$120﹕湯粉嘅走湯版，新竹米粉比較粗身有口感。
熱炒時蔬 NT$ 100
東北角小卷NT$260﹕份量勁多，小卷只係簡單白煮，再沾上咸甜醬油，按個人喜好仲可以加Wasabi，食法好新奇，食得出小卷好新鮮鮮生。
蒜泥鮮蚵NT$220﹕鮮蚵又係白煮，粒粒大大粒非常飽滿，入口好鮮甜，份量幾多，仲加左勁多蒜泥，好惹味。
香煎海鮮餅 NT$150﹕海鮮餅煎得香口，類似蝦膠加入好多蔬菜料，口感清爽，好味。
可樂NT$30、開喜烏龍茶NT$70
埋單NT$1,070。平價的一餐，雖然唔算特別好食，但滿滿台味，另有一番味道。小店人手不多，已見盡力做好招待，都請客人合作。離開時見外面排晒隊，可見人氣真係非常勁。
by admin | 3 月 29, 2024 | 2024 復活節六人行台北之旅, 台北, 台式, 小食, 旅遊, 飲品
洪記豆漿 29/3/2024 8:30
酒店附近就有一間豆漿店，仲24小時營業。小店細細都有少少座位，當日視察環境可有位足夠我地入座。自助形式點餐取餐流水作業，非常地道午庭風味。
豆漿 NT$30﹕豆味香濃，好幼滑無渣，叫左半糖微甜相當不錯。熱豆漿夠熱、凍豆漿夠凍。
咸豆漿 NT$40﹕與醋產生化學作用豆漿變得杰杰的，仲有一舊舊，類似豆腐咁。豆漿咸鮮味，加左輕微醋酸味，配料有蝦米，醬菜等，當飲湯品都幾有趣。
小籠湯包 NT$90﹕小店都有小籠包仲要品質相當不錯，皮薄適中，中間肉餡香甜充分肉汁，沾上醋味道不錯。
肉鬆蛋餅香 NT$45﹕餅皮煙煙韌韌，加上蛋多一份蛋香，包住好多肉鬆，甜甜地不錯。
燒餅加蔥蛋 NT$40﹕燒餅非常脆比較硬實，蔥蛋味道惹味。
全單埋單唔洗 NT$400，即港幣$100唔洗已經夠六人食到飽飽，食物出品不錯，豆漿尤其出色。黎到台灣一定要試下呢啲地道小店，快靚正。
by admin | 3 月 28, 2024 | 2024 復活節六人行台北之旅, BB Friendly, 台北, 台式, 旅遊, 飲品, 麵包
貓懶 28/3/2024 18:00
貓空有好多餐廳，都係自家經營，遍佈成個山頭。因為有大有細，擔心太夜山路漆黑，所以揀餐廳一定要近纜車站，最後就揀左呢間四爺品牌嘅貓懶。距離纜車站只係2至3分鐘腳程，一座大大嘅三樓村屋改裝成私房菜形式餐廳。先經過二樓就係四爺，宮廷式裝修太豪華，而三樓天台改裝半戶外位置就係貓懶。職員有提醒過今日天氣比較悶熱，但一上到黎個景觀已經值回票價。還好天氣唔算熱，間中有自然風，算幾舒服。
我地坐最外圍嘅一張八人大枱，靚景盡在眼前，可算一覽無遺。始終係戶外地方，枱椅都封塵係絕對理解，亦無投訴。餐廳提供台式料理，菜式選擇都好多，亦有好多茶飲。落單後好快就上菜。
鐵觀音鮮奶茶 NT$220﹕以一壺上配細杯細幾特別，份量都唔少，斟極都仲有。鐵觀音茶香味濃，奶味配合得宜，熱飲更有味道。
五彩小饅頭 NT$180﹕人氣必點一品，新鮮熱辣可愛小饅頭，有綠茶紅豆、南瓜、燕麥、芝麻、紅莓味，口感鬆軟，味道香，小朋友十分鍾意。
金字塔茶炒飯 NT$290﹕金字塔形做得好公整，炒飯炒得乾身有茶油，有蛋、蘿蔔等簡簡單單。
鐵板牛柳 NT$330﹕牛有牛味，帶好輕微辣，但口感比較韌，似乎熟左少少。
茶燻雞 NT$380﹕雞肉幾滑，有好香煙燻嘅味道，唔知呢種係咪就係茶燻。
蝦醬炒空心菜 NT$200﹕味道足夠。
茶人茶溪蝦 NT$300﹕ 原來係炸得好脆嘅蝦仔，真係非常香脆，個殼仲有少少硬，下面舖滿炸米粉，送飲品應該不錯。
全餐連加10%服務費，埋單NT$2,090。之前係Klook搵到優惠$98可以作NT$500消費金額，即差不多八折，最後一共買左四張。扣除現金券後補差價NT$90，實價即係港幣$98X4+$22.5 = $414.5。
全餐飯見證日落到天色變暗，最後全黑仲伸手不見五指。入夜後枱上只開左一盞小燈透出一絲絲光，好有情趣。黑到連餸都睇唔清楚，的確係幾難忘嘅體驗。餐廳環境一流，觀景一流，入夜後見到山下燈光。食物算可以，夜景無價，反正係香港絕無可能有呢個體驗。
by admin | 3 月 27, 2024 | 2024 復活節六人行台北之旅, 台北, 台式, 外賣, 甜品, 飲品
徐杯杯粉圓仙草@Uber Eat 27/3/2024 22:00
返到酒店梳洗好之後，發現時間尚早，加入咗Uber試用一個月，可以無限運費，即刻試吓order甜品。好快就收到貨，效率非常高。
牛奶芋圓嫩仙草 NT$75: 材料非常多，面層鋪滿仙草，味道好香，非常滑。仲有好多珍珠，芋圓爽粒，煙煙韌韌，味道香濃，本身牛奶底唔算太甜，夠晒凍，不錯。
珍珠鮮奶茶 NT$75: 奶茶味道不錯，茶底都幾香，珍珠煙煙韌韌。
黑糖仙草凍飲 NT$55: 黑糖味比較濃嘅奶茶配仙草。
估唔到隨便叫一個外賣質素都相當高。
by admin | 3 月 27, 2024 | 2024 復活節六人行台北之旅, BB Friendly, 台北, 台式, 旅遊, 麵食, 點心
朱記餡餅粥店 松山壹號店 27/3/2024 18:00
離開「饒河街夜市」步行五分鐘就到「松山Citylink壹號店」。呢個商場係松山火車站直結，非常方便。商場入面有好多食肆，揀左呢間人氣連鎖包餅餃子店。Google評分有4.1分相當唔錯。小店座位唔太多，我地六人只能與人共坐一張長檯，還好仲有BB椅。
黃金鍋貼NT$125﹕鍋貼大大隻，外皮煎得脆卜卜，皮唔算太薄，厚度適中，咬開外皮中間肉餡好多，仲有肉汁，味道不錯。
鮮肉小籠包NT$150﹕賣相唔錯，外皮幾薄，肉餡香甜，中間有肉汁，價錢唔貴味道交足功課。
菜肉餛飩麵NT$125﹕ 碗麵上面有買大粒菜肉餛飩，皮唔算太薄，菜肉好豐富。麵條幼滑，有米香味。
紅燒半筋半肉麵NT$230﹕牛腩煮得幾入味，牛筋夠腍身，但係刀削麵質地較厚，口感比較硬。
櫻花蝦炒飯NT$160﹕炒飯炒得乾身，材料豐富，好多櫻花蝦，飯充分同蛋混和做成黃金炒飯蛋味香。
鮮蝦餛飩炒手NT$130﹕有八大粒鮮蝦餛飩，內餡豐富，比菜肉多一份蝦味鮮甜。醬汁蒜味香少辣，非常下飯。
燙青菜NT$70﹕燙椰菜加上勁多蒜蓉。
全部埋單NT$990，圍番港幣$250，算係地道又平民嘅台式小籠包餐，味道還好。
