四季良晨
17/8/2022 13:00
今日去烏溪沙搵朋友仔玩，玩完後食個好味午餐，朋友推介呢間台式餐廳。
揀左全日套餐有主食、小食加飲品，都抵食喎。
點左酥炸豬扒紅燒湯台灣麵配滷水牛肚，另外叫左杯奶蓋抹茶。
炸豬扒相當脆，炸皮好薄，啖啖肉，不錯。台灣麵湯底幾香濃，仲有少少辣味，不錯。
牛肚細細碟，味道都ok，幾夠入味。
奶蓋抹茶係跟餐加＄25，淡淡抹茶味，奶蓋都係薄薄的，呢杯飲品就一般啦。
朋友食鹽酥雞，試食左一舊，都好脆，仲好Juicy，下次可以再試。
炊豕店巨型炸豬扒大阪燒
炊豕店＠銅鑼灣
21/7/2022 12:00
難得今日黎銅鑼灣做野，先同同事一齊食個久違了的Happy Lunch。
揀左呢間係加路連山道，勁多好評嘅小店。12點未夠就黎到，岩岩好唔洗等位直接入座。
小店專做豬扒料理，就試一款日式風味嘅大阪燒豬扒撈粗麵，加多杯飲品，埋單＄74。
一上菜，嘩一聲，乜豬扒可以巨型到咁，金黃色仲相當厚實，炸得好透。上面唧左大阪燒汁、蛋黃醬，仲舖滿左木魚碎，真係大阪燒黎架。
豬扒炸到脆卜卜，炸皮唔算太厚，咬開豬扒仲好腍，充滿肉汁。原味已經好食，再加上大阪燒醬汁，多一點日式風味，仲無咁膩。
粗麵底幾爽口，加左少少甜豉油。實在好熱氣，但令人不禁一口接一口，食晒碗太飽足，之後飲啖茶吧。
茶入饌
春水堂＠沙田
8/5/2022 12：00
春水堂飲品就試得多，今次第一次黎堂食台式料理。假日黎到非常多人，要等一陣位。
紅燒牛肉麵（半筋半肉）＄88
牛肉份量都幾多，台灣麵條軟硬適中，湯汁帶少少辣味，牛肉炆得夠林，最鍾意食牛筋夠晒腍，入口即溶。
豬手魯肉便當 ＄92
便當本身有一碗肉丸湯，清清地無乜特別。配料有些清菜魯蛋，幾舊豬手同肉燥飯。豬手夠腍，幾入味。
酥炸豬排配他他醬便當 ＄82
炸豬扒有兩大件，幾香口，炸皮夠薄。
滷香大腸 ＄48
細細碟，勝在大腸滷得好入味，都夠腍。
黑糖琥珀珍珠拿鐵 ＄39
黑糖珍珠幾彈牙，黑糖味夠香，拿鐵夠奶香。
朱古力珍珠奶茶 ＄38
貪得意有兩隻蝴蝶仔，朱古力都夠濃。
甜品要左呢個珍珠鐵觀音雪糕吐司 ＄58
賣相同圖片都有啲分別。呢個有啲平凡。還好雪糕茶香味幾足，味道都唔錯。吐司熱熱地，口感不錯。
味道唔錯嘅，但價錢的確略貴。大時大節一次無妨，或平時買杯飲品外賣算吧。
茶木外賣
茶木＠馬鞍山
20/2/2022 19:00
茶木堂食就食得多，今日見好似要等位等好耐，索性轉行買外賣返屋企慢慢嘆。外賣優惠＄140可以揀兩份主菜連飲品。兩份仲送一客小食。
第一選擇係黑醋味醂豬軟骨配白飯
豬軟骨炆得好腍，有部份軟骨仲可以食埋，味道酸咪咪，幾開胃。
另一客係紅燒牛頰肉麵
外賣份量都俾得足，牛肉大大舊，入晒味。湯同麵分開，值得一讚。
飲品唔洗加錢已經有黑糖珍珠奶茶。仲送一份鹽酥雞。小食雖然份量少少地，但係炸粉唔太厚，都食到啖啖雞肉。
＄140加幾蚊外賣費，兩份豐富台式食品，都覺得幾抵食。
普通三星台菜
三星台菜食堂＠馬鞍山
5/12/2021 12:00
間店都開左一排，咁耐都未食過。見到台式料理都有兒童餐，就試一次。
台式炸豬扒魯肉飯 炸豬扒都幾脆、幾鬆化。魯肉大大舊，仲有大大片冬菇，都係正正常常。溏心蛋係不錯。
紅燒三星麵 賣相麻麻地，有啲求其。可選擇湯底，揀左紅燒味，湯底有微辣。有齊三款餸料，牛腱、牛筋、牛肚，牛腱同牛筋都煮得好腍，可惜牛筋未達到入口即化。
小公主餐
女孩子可選小公主餐，賣相最靚係呢個兒童餐。粉紅色車車上有黃金蝦卷、粟米、炸地瓜條、魯肉麵，仲有乳酸飲品，相當豐富。
普普通通正正常常的一餐。
台北日記
11/4/2021 19:00