伙食工業

by admin | 7 月 1, 2018 | 台式, 火炭

伙食工業＠火炭
1/7/2018 13:00

火炭一個偏偏地嘅地舖，原來係台式餐廳。好早排電視節目介紹過，但位國實在太吊腳，所以排到咁遲先黎。一個絕對唔適合推BB車黎嘅地方，入門口先爬上N級樓梯。裡面裝修非常有趣，完全工業風，幾有風味。

台式香酥雞排飯 $60
份量都幾多，雞排炸得香酥，落左辣粉幾惹味。肉質正常啦，配飯食都相當飽肚。

紅燒牛筋腩麵 $60
一大碗好澎湖，成碗面都係肉，牛筋夠腍都好入味，牛腩又夠肉。

魯肉飯配魯蛋 $25
廿幾蚊一碗都幾抵食，餸料夠多，醬汁撈飯正。

美祿恐龍 $20

摩卡冰沙 $42
打得幾滑，味道都夠濃，唔會飲到一半就淡而無味。

餐廳係特別嘅，味道都好，但位置確實就唔係幾方便，試過就算了。

環遊世界料理廣場

by admin | 1 月 15, 2016 | 台式, 日式料理, 美食廣場, 鑽石山, 韓國菜

大食代@鑽石山
15/1/2016 13:00
3/2/2014  12:30
29/1/2012 13:30
26/12/2012 20:30

15/1/2016 13:00

喺鑽石山睇完得啖笑嘅早場特別肚餓，要立即醫下肚，午飯時間見邊度都人山人海，轉戰Food Court，快快脆搞掂。

@九里香
29/1/2012 13:30

鹽酥雞扒、肉燥竹筒飯、蚵仔煎、中式湯 ($40)
午餐睇落都幾豐富，鹽酥雞扒用鐵板上菜，但其實用作不大，雞扒又無配任何醬汁，「咋」一聲欠奉，乾脆用碟上其實問題不大。鹽酥雞扒外皮炸得幾脆口，可惜肉唔夠嫰，又無乜肉汁，味道亦唔夠香，好一般。蚵仔煎更加可惡，蚵仔煎竟然一粒蚵仔都搵唔到，只係簡單嘅香蔥煎蛋餅，被呃了。肉燥竹筒飯個竹筒亦係無聊之作，飯唔見得係用竹筒蒸，飯面嘅肉燥只係芡汁為主，肉碎少得可憐。真係難忘早前食過青衣一間台式小店，肉燥足料又好味，多到撈飯都撈唔晒。美食廣場呢間台式店，盛裝賣相好台式，但味道完全唔到位，四十蚊俾多左。

@韓國屋
29/1/2012 13:30

韓式泡菜豬肉炒粉絲、紫菜肉片湯 ($35)
美食廣場內每個檔口前都擺滿左食物模型，呢間韓國屋嘅料理賣相算係最唔錯。套餐附送一碗紫菜肉片湯，飲一啖已覺得係胡椒味道濃，少辣嘅味精湯，有幾片昆布紫菜，仲有嚡嚡地嘅豬肉片，用黎濕下口都可以嘅。

韓式泡菜豬肉炒粉絲份量超多，但並唔係新鮮即整，落單之後，阿姐裝起預先炒好嘅粉絲，再舖上足量嘅泡菜同豬肉就搞掂，所以等餐時間只需一分鐘，還好粉絲入口仲係溫暖嘅。韓國粉絲比我地所認識嘅粉絲粗身好多，入口非常煙韌，仲有些少黏口。呢款粉絲只用蘿蔔絲同青蔥等伴炒，炒得夠乾身，唔太油膩，而且調味好足夠，係甜甜地嘅醬油味道，其實唔加其他材料淨食都可以接受，加左泡菜同豬肉，當然更加惹味。大大塊豬肉片肉質比較實，幸好泡菜味道好濃，醃得夠入味，少酸中甜多辣，份量又夠多，連埋泡菜汁已經可以撈晒成碟粉絲，辛辣惹味，非常飽肚，真係大件夾抵食。呢間小店嘅韓式料理都算係咁，菜式選擇多，價錢合理，味道都唔錯，算係可以Book mark嘅平價韓國快餐。

一個美食廣場，有十幾個檔口，但並唔係個個檔口都賣美食。不過勝在喺同一個地方，收納左多個國家嘅料理，一行四個人已經可以叫到四款唔同口味嘅美食。情願又好，唔情願也罷，都可以互相分享，岩晒貪心人士。

@Pepper Lunch
26/11/2012 20:30

芝士黑椒牛肉飯 ($42)
牛肉香，芝士濃，香噴噴熱辣辣，的確好味。

@Pepper Lunch
3/2/2014  12:30

前篇參考
6/11/2011 韓國屋@旺角
食韓國飯要識撈

悠閒生活

by admin | 8 月 20, 2015 | 台式, 日式料理, 甜品, 馬鞍山

今日七夕，老公放早，可以拍下拖仔。呢間野近排好鬼hit，上晒飲食雜誌，開飯網亦爆多好評。之前試過中午行開呢頭，見到排晒長龍，洗唔洗咁勁，即管趁今晚試一試。六點半黎到，蟻都唔多隻，自由揀位任坐。

入到黎環境的確唔錯，超高樓底，好舒服，近窗位置仲係榻榻米，幾特別呀。裝修都得意，好多家居工藝製品。
 

 

七味雞唐揚定食 ($79)，定食配有前菜、味噌湯、自選一款茶品，我揀左抹綠奶茶。

 

七味雞唐揚原來係日式炸雞扒，加上燒汁同七味粉，伴幾條菜同沙律醬。雞扒剛剛炸好，外皮仍然保持脆口，肉質軟腍多汁，加上微甜嘅醬汁，認真唔錯。惟一可惜嘅係，主調「七味」只輪為配角，簡單叫佢日式雞唐揚就好吧。

明太子釜玉冷烏冬 ($85) 係單品。烏冬冷上，烏冬汁幾清甜，幾欣賞烏冬夠彈牙，天熱食感覺良好。烏冬配上一粒溫泉蛋、明太子、蛋絲、蟹柳、青瓜、紫菜、昆布，味道還好。可惜單品價值八十幾蚊，份量非常少，三爬兩撥搞掂，真係唔夠喉。

小倉抹茶窩夫 ($45) 為晚餐畫上完美句號。賣相已經殺晒，淡忌廉為窩夫打扮成太陽狀。窩夫係圓型冬甩，新鮮熱辣外皮微脆，中間鬆軟，帶淡淡蛋香。熱熱嘅窩夫頂上一個抹茶雪糕，真正呈現出冰口境界。抹茶味道的確未夠喉，但個質地幾得別，黏黏地幾有Gelato質感。至於旁邊嘅紅豆真的只作伴碟角色。

試一次就知道屋子賣嘅係一份悠閒。環境舒適，氣氛良好。食物賣相討好，不妨多角度欣賞下廚師擺盆嘅心思，繼而餵飽相機先。味道亦算交足功課，惟一係份量相當精緻，作為簡便午餐或者悠閒下午茶的確唔錯。可能我揀唔岩時機，作為晚餐真係唔夠飽，故以性價比黎講，價錢係偏貴，埋單$230。呢種悠閒只適用於陽光下吧。

101肉燥飯專門店

by admin | 5 月 17, 2015 | 台式, 尖沙咀

101肉燥飯專門店@尖沙咀
17/5/2015 13:30

星期日Lunch過黎食。價錢唔貴，套餐大約$40-50。港式台灣野，味道OK，過下口癮都可以。
假日都幾旺場，要稍為等一陣位。

台式豬軟骨肉燥飯 $45
都幾多餸，豬軟骨夠腍，幾入味。肉燥都OK，係隻魯蛋麻麻地。

燒汁雞扒拼玉子豆腐肉燥新竹米粉 $39
玉子豆腐炸得好脆，另上加分! 雞扒米粉都唔錯。 

鹽酥雞 $12
另加小食鹽酥雞，OK啦!

跟餐飲品加$3
套餐跟餐飲品，加錢換其他台式特飲。 

讚好@紅磡

by admin | 1 月 5, 2014 | 台式, 紅磡

 肉燥鹽酥雞熱拌麵、珍珠奶茶 ($41)

肉燥香酥排骨熱拌麵 ($41)