by admin | 9 月 22, 2024 | Blog, 拉麵, 日式料理, 深圳
東門 22/9/2024 17:30
中咗點評兩個免費拉麵套餐。喺地鐵站行過嚟都要10分鐘，仲冒着雨。嚟到呢一個非常之舊式又荒蕪嘅大廈，就有一間神神秘秘嘅拉麵店。小店只有11個位，全部坐吧枱。落咗單之後睇住師傅即場製作，幾分鐘就有得食。
黑松露醬油拉麵 （原39元）：賣相非常吸引，份量唔少，薄薄嘅叉燒片鋪滿成個碗邊，仲有三大片脆卜卜嘅紫菜。先試一啖湯底，非常之清爽雞湯，主要調味係一啖黑松露醬，感覺比較薄弱。拉麵質地不錯，口感爽口彈牙。驚喜係糖心蛋，原來有比卡超圖案。叉燒看起來非常之粉嫩，浸一浸熱湯，入口非常之軟滑，食得出豬肉本身嘅甜味。
娘娘麵 39元 （原39元）：娘娘麵非常之色彩繽紛，完全係新派製作，非常獨特。上面鋪咗五色材料，酸酸甜甜嘅小蕃茄，煮得入味嘅肉燥，滋味芝士粉，仲有大量嘅青蔥同菜圃。面底係一片片，好似西式千層麵咁，口感非常煙靭。將所有材料撈勻，入口味道香濃，蒜味十足，帶微辣，真係非常之特別。
可爾必思：味道偏甜，飲落似益力多乳酸飲品，冰冰的，小朋友最鍾意。
點評打卡送味付海草，成份套餐非常抵食。價錢平到離晒譜，出品合乎性價比，但係要行咁遠先嚟到，應該唔會有下一次。
by admin | 9 月 21, 2024 | Blog, 日式料理, 荔枝角
金酒屋@荔枝角21/9/2024 12:30
今日同舊同事聚舊，黎到荔枝角食日式料理。餐廳就喺荔枝角地鐵站不遠處，裝修相當有日本居酒屋風味。
金丼 月見海膽三文魚籽拖羅蓉配稻庭烏冬 $198
金飯碗送上，三文魚籽真係太澎湃，完完整整蓋過白飯。上邊仲有一層拖羅蓉同海膽。拖羅同海膽都非常鮮甜，完全冇腥味。醬油漬三文魚籽金光閃閃，一咬即爆汁，非常鮮味，拌勻蛋黃味道再提升，拌入山葵加少少刺激感，所有嘅材料配搭得宜，相當好味。稻庭烏冬正正常常，丼飯實在太正，烏冬給比下去了。
戀丼 月見特厚燒牛舌三文魚籽 $238
呢款主角係厚燒牛舌，非常驚喜牛舌真係厚度十足，喺香港實屬少見。牛舌嘅熟成度剛剛好，口感煙韌爽口，簡單加上調味，食得出牛舌嘅原汁原味。
午市套餐質素都相當高，用料非常新鮮。套餐仲包括麵豉湯、沙律等。擺盤賣相非常豪華，絕對值得打卡。
by admin | 9 月 6, 2024 | BB Friendly, 兒童餐, 日式料理, 馬鞍山
馬鞍山廣場 6/9/2024 12:00
今日打風多一日假期，帶小朋友嚟丼丼屋。而家兒童餐$75進化咗賣相不錯。有炸蝦、香腸，蛋奄列、烏冬變得細細碗，仲有一個乳酪同埋飲品，整體味道不錯。
咖喱滑蛋同唐揚雞丼$65：炸雞大大件炸得香脆，咖喱本身甜甜的日式口味，撈飯不錯。
南蠻雞溫泉玉子丼 $48 ：呢個竟然有五大件炸雞，炸粉本身有味，炸雞啖啖肉好多肉汁，仲有一隻半熟蛋。加$12套餐包括麵豉湯小食同飲品，非常抵食。
by admin | 8 月 25, 2024 | 外賣, 日式料理, 水果, 深圳, 甜品
深圳東門文和友 25/8/2024 11:00
抹茶草莓可麗餅 38元
深圳東門人氣打卡點文和友，門口就有一間人氣可麗餅專門店。店員製作非常認真，份量大，材料豐富。抹茶餅底煙煙韌靭，淡淡綠茶香味。布蕾奶香味濃，唔太甜，入口幼滑，頂層仲有濃郁嘅抹茶粉。大大啖咬，每啖都夾雜超多士多啤梨，斷面好吸引，味道酸酸甜甜，相當不錯。
by admin | 8 月 4, 2024 | Blog, 日式料理, 旺角
旺角 4/8/2024 17:30
齊柏林新開牛丼飯餐廳。
薑蔥牛魔王飯+公魚仔+飲品 $67 原來係漢堡扒，幾有肉汁，牛味幾香。
鹽醬汁豚肉飯+炸雞+飲品 $58 豚肉非常入味，份量好多，大大碗夠飽。炸雞有肉汁，味道不錯，飲品勝在大大杯。
落旺角市中心，坐2樓非常闊落，冷氣都好夠，喺今日嘅天氣上去抖涼食個下午茶也不錯。
by admin | 7 月 25, 2024 | BB Friendly, 兒童餐, 壽司, 日式料理, 深圳, 甜品
深圳喜薈城 25/7/2024 11:30
今日係家姐正日生日，特登趁平日時間去喜薈城玩波波池。中午已經鎖定左呢間摩打食堂為小妹妹慶祝生日。
入咗後先來選茶包，揀咗香印提子味，真係有好香甜嘅提子味。
超級彩虹鋪天蓋地雪花火牛壽司 上頭蒜香味 39.9元： 係店內必食No.1。服務員推出一個鐵架，即場加上自選嘅上頭蒜香味鹽樽，再用火槍即場燒烤。最後放上壽司飯以及調味料，仲有一隻生雞蛋，就完成呢一件非常之浮誇嘅壽司。
獨家爆汁120天走地鮮炸雞 49.9元：店內必食No.2，擺盤都係非常浮誇，一個大盒插住走地雞嘅相片，裝住四大件炸雞，仲有三款沾醬。炸雞外皮脆脆的，雞肉非常淋滑，肉汁豐富。沾醬除咗有酸酸辣之外，蜜糖味都非常好味，另外一款就係微酸蛋黃醬，非常好味。
明太子烤土豆 39.9元：已鐵盤承載一大件土豆，上邊有厚厚嘅一層明太子，土豆非常之綿密，明太子味道香濃。
摩寶奇趣盒 39.9元：非常之豐富嘅一個兒童餐，主菜有兩大隻蜜燒雞翼，玉子小卷、青瓜小卷，仲有大大件吞拿魚壽司同海草壽司。仲有粟米沙律同燉蛋。最後仲有新鮮水果同埋飲品。兒童餐送上一套顏色筆畫具，小朋友最開心。
赤焰帝王蟹腳鞭炮拼盤 49.9元：一碟放上六件蟹腳壽司，即場用火槍火炙，令到蛋黃醬焦化。壽司大大件，蟹柳香甜，非常不錯。仲有一件厚燒玉子，甜甜的。
雙重炭燒鰻魚小卷 29.9元：超級迷你鰻魚小卷，又揼入口都食唔出有鰻魚。
蟹子爆炸頭軍艦 9.9元x2: 份量非常旁白，質量非常高的蟹籽軍艦。
餐後仲可以去自助打雪糕，牛奶味雪糕非常香濃，口感幼滑，出品不錯。
知道小妹妹生日，姐姐哥哥特登送上生日壽桃，仲載歌載舞唱生日歌。之後仲送多一首「愛你」炒熱氣氛，的確令人好開心。最後仲可以抽一個扭蛋禮物。
食物味道相當好，餐廳環境闊落，哥哥姐姐服務超級殷勤，都非常照顧小朋友，不時送小禮物，臨走仲送上金幣俾小朋友出去扭蛋。今日一餐好味又好玩，滿載而歸。
