深圳燕南 19/5/2024 17:00
大眾點評筆記抽到免費試，羊蠍子火鍋睇個名好似好驚，原來係羊嘅脊椎骨部份，今次免費當然要試吓。
招牌羊蠍子 2斤：鍋底熱辣辣，羊肉都好多，仲有唔同嘅調味料。湯底非常濃郁，但係輕微麻辣味。羊蠍子係比較多骨，骨中間仲有骨髓，外面有一層筋骨，肉比較實淨，膻味唔重。鍋內有一個內蒙肚包肉，原來係蒙古知名小食。 用羊肚包住羊肉餡，羊肚口感爽脆，羊肉鮮嫩夠腍，非常特別。
食到一半仲可以加入凍豆腐，豆腐雪到成舊冰咁，慢煮20分鐘，蜂巢豆腐可以索晒啲湯汁。另外仲有油麥菜、鵝腸麵。麵條彎彎曲曲，比較粗身扁身，煮耐少少，入口非常幼滑。
配菜有韓式辣泡菜、東北翠花酸菜。
南瓜餅 20元：自行加配南瓜餅，炸到脆卜卜，略為有啲油，太熱氣，中間南瓜蓉都幾甜。
幾特別一個火鍋，一個不錯的嘗試。
深圳中航城君尚 21/4/2024 17:30
又抽中大眾點評零元探店。今次試呢一餐自己一定唔會俾錢食嘅湖江菜，只係貪佢幾高級，環境幾舒服，姑且試一次。
提子青檸汁：非常之大枝，提子味幾香，酸酸甜甜幾開胃。
蠶豆米拌鮮腐竹：作為一個餐前小食，冷盤，麻油味幾香，腐竹幾好味。
蕃茄絲瓜滑肉：非常多絲瓜，蕃茄，肉片幾滑，湯底係蕃茄湯帶好輕微辣味，撈飯也不錯。
沔陽蒸牛肉：就好似一個打碎咗嘅肉餅，仲有啲澱粉質，夾雜咗一絲絲牛腩，輕微辣味，味道可以，但有啲油。
蠶豆米燒蝦球：大量譚豆煮小龍蝦，醬汁非常辣，小龍蝦都好多，但個人興趣不大。
楚采櫻花糕：賣相非常靚，淺粉紅色嘅花形狀糕點。饅頭包住中間粉紅色醬汁，都食得出花香咪味道，非常特別。
呢一餐自己一定唔會俾錢食，每樣菜式對個人嚟講都非常獨特，試過一次就算。
美團外賣@深圳福田水圍 10/12/2023 18:00
喺福田水圍非常之出名嘅一間羊扒專門店，今日選擇咗外賣嘅形式品嚐。
烤蒙古羊排 65元：肥瘦適中，脂肪部份羊膻味非常重，肉汁豐富，孜然粉同少量嘅辣粉係蒙古風味主要來源。
烤法式羊排 75元 ：呢款係西式風味，比較自然嘅鹽同胡椒，仲有少少香草烤焗嘅味道，都係非常好食，可惜兩者味道分別唔太明顯。
西葫蘆雞蛋鍋貼 25元：外皮千的金黃鬆脆，內含包咗西萌蘆卡同雞蛋非常有趣，味道不錯。
特色羊肉蒸餃 25元：皮有厚度，內餡相當豐富，充滿着肉汁，薑汁味濃，好清爽。
所有菜色都好好味，鍾意食羊嘅我表示相當滿意。好食過香港好多西餐廳百幾二百嘅出品。
深圳領展中心城 14/5/2023 13:00
牛力骨：蒙古好大骨有幾款，揀咗牛力骨，有肉有骨有脆骨。
烤羊腿239元：上菜非常豪華，皮脆肉嫰，肉都好多，肥瘦適中，略嫌有少少乾柴，可以自行沾上孜然粉。呢個配菜有新鮮即炸粗身扭紋薯條，底下仲有好多洋蔥。仲配上大大個饅頭包，非常飽足。
五種蕃茄澆汁莜麵 59元：賣相吸引，其實係類似意粉淋上蕃茄醬汁，酸酸甜甜，中間仲有好多蕃茄肉。麵條本身比較煙靭。
蘑菇湯莜麵魚魚 55元：麵條細細條就好似魚仔咁，蘑菇湯幾甜，菇味濃郁，呢個比較好味。
蒙古奶酪餅39元：以為平平無奇嘅一塊薄餅，原來中間嘅芝士多到不得了，可以拉起長長拉絲，奶味非常濃郁。
西貝兒童餐29元：兒童餐非常可愛，揀咗迷你漢堡包細細件，仲有一碗小米粥，根本迷你炒飯、蔬菜，仲有三粒可愛嘅心型棉花糖。
人流非常之旺，等位都用咗一啲時間。等位期間送上零食茶水，小朋友仲有填色小遊戲， 正好打發時間。餐廳嘅裝修紅紅的，有專屬兒童餐牌、兒童餐具、圍巾等、兒童餐又夠可愛，真係一間非常之親切友善嘅餐廳。
