壽司郎
馬鞍山 27/10/2024 18:00
大切炙燒醬漬長鰭吞拿魚 $12: 微辣醬油味濃，不錯。
大切麻油鹽漬黃鰭吞拿魚 $12: 麻油味香。
純白炸雞塊$28: 較為健康，啖啖肉之選。
北海道南瓜焦糖燉蛋蛋糕 $17: 香濃燉蛋滲透淡淡南瓜味，芝士蛋糕嘅口感，非常好吃。
馬鞍山 1/10/2024 20:00
馬鞍山 18/9/2024 19:30
馬鞍山 10/3/2024 12:00
三木屋
27/10/2024 12:30
科學園發現呢間非常抵食嘅食料理，出品仲相當不錯，小店採用自助形式，堂食座位都非常闊落。人流唔多，好適合過嚟午餐。
黑豚扒雞扒石板燒定食 $98
非常澎湃嘅午餐，大大件黑豚扒，大大件雞扒放喺鐵板上燒，兩塊扒煎到黃金香脆，外皮脆脆，雞扒仲啖啖肉。不斷扒非常嫩滑，味道幾甜，估唔到咁好食跟餐附上麻將沙律，半隻味蛋，仲有飲品，真係非常抵食。
豬軟骨味玉豚骨湯拉麵 $60
湯底甜甜，拉麵都幾順滑亦掛湯，豬軟骨份量唔少，相當入味，軟骨又夠晒腍。味玉賣相不錯，半熟溏心，醬油味香，非常不錯。有齊木耳、魚板的配料，仲免費配麵豉湯，相當抵食。
極品雪花肥牛味玉黑蒜油拉麵 $68
賣相不錯，湯底有黑蒜油香，入口有豬骨湯味甜甜的，黑蒜油味道淡淡。肥牛非常腍滑，肥瘦適中。配上熱白桃烏龍茶，幾香甜濃味。
溏心甜铺
深圳中航城君尚 13/10/2024 18:00
大眾點評0元探店系列。
白玉抹茶椰冰、白玉抹茶大福：賣相不錯。兩個甜品其實非常相似，都有抹茶奶凍，但對抹茶控嚟講抹茶味不夠濃。白玉小丸子煙煙韌韌還算不錯。椰冰山反而不錯，食得出椰子味，加上一個雪糕球，另外加上椰奶味道幾香。
木治關東煮
深圳中航城君尚 13/10/2024 17:00
上次食過幾好食，今次買夠10串，平均每吋都係$3左右。
深圳中航城君尚 22/9/2024 16:00
16.8 元/5串
魚豆腐 4元、鱈魚蔬菜棒 5元、魷魚卷 4卷食得出油粒粒魷魚，幾香、蟹肉竹輪卷 5元、黃金脆骨棒 4元 有少少咖喱味嘅雞軟骨。
清湯幾香甜，每支其實都差唔多味，但係魚味幾香，口感幾彈牙。
麵屋豬一
深圳卓越Intown 29/9/2024 18:00
點評抽到零元探店，麵屋豬一份拉麵套餐。一碗拉麵加可爾必思，另外再買一個一人套餐，一碗拉麵加中華海草 48元。
主打豚骨湯拉麵有四款湯底，揀咗豚骨王，墨王拉麵。
豚骨王係豬骨濃湯，白白嘅湯底，入口非常之順滑，豬骨味香濃。拉麵揀咗偏硬，口感煙靭，叉燒薄薄的，幾香甜。溏心蛋印咗可愛嘅公仔，蛋黃做得不錯，可惜蛋白略嫌不夠醬油味道。拉麵配料都係應有盡有，而呢個價錢嚟講相當抵食，仲有啲豚王嘅影子。
另一款係黑色拉麵，似乎加咗墨魚汁同芝麻，味道更加鹹鮮，蒜蓉味更加香，係一款更加重口味嘅湯底。
每位奉送一粒日式大福，作為餐後甜品。隨餐嘅中華海草都非常清涼，可爾必思非常解膩。
呢間分店環境明顯較闊落，仲有四人枱可以坐。
Bageland 貝果嶼
深圳新洲 29/9/2024 17:00
抽到大眾點評0元探店，開發一個新嘅站點，從來未嚟過呢個小區，沙尾站落咗車之後都仲要行10分鐘。小店就係一個籃球場小巷嘅後邊，一個神秘嘅後花園咁。餐廳內外裝修好有格調，好多打卡位，非常靚。正中間就有個大大嘅月球，不論光或暗都好，整個佈局都好靚。
今次送嘅套餐係一份自選貝果加芝士醬及飲品。另外再單點一個貝果三文治套餐（88元）。老闆娘見我哋有額外消費，自動幫我哋將普通咖啡升級做特飲。
入座就送上一份餐前小食，桂花蜜糖車厘茄。車厘茄非常新鮮，滿滿果汁再充滿着蜜糖嘅甜味，蜜糖還帶一點桂花香，估唔到呢個配搭咁好食。
葡萄肉桂貝果配巧克力黑芝麻奶酪醬：暖暖嘅貝果口感煙煙韌韌韌，帶肉桂香，仲有唔少提子乾，非常適合小朋友嘅口味。黑色醬料實在太濃郁，充分食得出朱古力、黑芝麻、芝士三者味道。貝果塗上醬料後，完全係另一道料理，滋味無窮。
萬物生長抹茶生椰拿鐵：上枱一刻完完全全展示出萬物生長嘅自然生態。飲品嘅味道都相當不錯，草系抹茶粉味道香濃，木系朱古力亦係濃郁口味。飲得出咖啡都係精選過，似乎係店方推薦嘅巴西之光咖啡，口感非常幼滑，味道香濃，有牛奶巧克力嘅味道，帶一點夏威夷果仁嘅香氣。呢杯仲加上椰香味同埋抹茶味。賣相好得之外，味道仲非常驚喜。
美式超級雙拼三文治：三文治嘅斷面非常吸引，呢個揀咗芝麻貝果，貝果面層芝麻非常多。漢堡扒大大片，肉汁豐富，加咗塊類似薯餅嘅東西喺中間，有香脆嘅口感，仲有好多新鮮蔬菜，菠蘿帶一點酸甜清爽，醬汁充足，貝果中間好濕潤，非常之豐富嘅三文治。另外仲有一小碗粟米粒，非常香甜。
貝果甜心熱可可：朱古力味相當濃郁，上邊仲有一層厚厚嘅鮮奶舖，仲加咗薄脆，非常好味。
