美奈小館 越南料理
深圳喜薈城 25/7/2024 16:00
美奈雙人下午茶 54.9元
芒果魚柳米紙卷賣相實在太靚，米子卷包住好多新鮮蔬菜，仲有一件脆魚柳，沾上酸甜汁，非常清爽。香茅雞肉串有四大串，雞肉幾滑，香茅甜甜地，味道好香，好食。跟餐飲品係香檸甘蔗汁，甘蔗汁之上加咗青檸味道，個人嚟講覺得怪怪地。不過下午茶餐平日限定，非常抵食。
另外加咗一碗兒童餐牛肉湯河，只需9.9元。雖然細細碗，但係仲可以免費續麵。河粉非常誘惑，湯底清甜，牛肉都幾甜，呢個價錢實在太抵。
感覺幾正宗，價錢唔貴。
摩打食堂
深圳喜薈城 25/7/2024 11:30
今日係家姐正日生日，特登趁平日時間去喜薈城玩波波池。中午已經鎖定左呢間摩打食堂為小妹妹慶祝生日。
入咗後先來選茶包，揀咗香印提子味，真係有好香甜嘅提子味。
超級彩虹鋪天蓋地雪花火牛壽司 上頭蒜香味 39.9元： 係店內必食No.1。服務員推出一個鐵架，即場加上自選嘅上頭蒜香味鹽樽，再用火槍即場燒烤。最後放上壽司飯以及調味料，仲有一隻生雞蛋，就完成呢一件非常之浮誇嘅壽司。
獨家爆汁120天走地鮮炸雞 49.9元：店內必食No.2，擺盤都係非常浮誇，一個大盒插住走地雞嘅相片，裝住四大件炸雞，仲有三款沾醬。炸雞外皮脆脆的，雞肉非常淋滑，肉汁豐富。沾醬除咗有酸酸辣之外，蜜糖味都非常好味，另外一款就係微酸蛋黃醬，非常好味。
明太子烤土豆 39.9元：已鐵盤承載一大件土豆，上邊有厚厚嘅一層明太子，土豆非常之綿密，明太子味道香濃。
摩寶奇趣盒 39.9元：非常之豐富嘅一個兒童餐，主菜有兩大隻蜜燒雞翼，玉子小卷、青瓜小卷，仲有大大件吞拿魚壽司同海草壽司。仲有粟米沙律同燉蛋。最後仲有新鮮水果同埋飲品。兒童餐送上一套顏色筆畫具，小朋友最開心。
赤焰帝王蟹腳鞭炮拼盤 49.9元：一碟放上六件蟹腳壽司，即場用火槍火炙，令到蛋黃醬焦化。壽司大大件，蟹柳香甜，非常不錯。仲有一件厚燒玉子，甜甜的。
雙重炭燒鰻魚小卷 29.9元：超級迷你鰻魚小卷，又揼入口都食唔出有鰻魚。
蟹子爆炸頭軍艦 9.9元x2: 份量非常旁白，質量非常高的蟹籽軍艦。
餐後仲可以去自助打雪糕，牛奶味雪糕非常香濃，口感幼滑，出品不錯。
知道小妹妹生日，姐姐哥哥特登送上生日壽桃，仲載歌載舞唱生日歌。之後仲送多一首「愛你」炒熱氣氛，的確令人好開心。最後仲可以抽一個扭蛋禮物。
食物味道相當好，餐廳環境闊落，哥哥姐姐服務超級殷勤，都非常照顧小朋友，不時送小禮物，臨走仲送上金幣俾小朋友出去扭蛋。今日一餐好味又好玩，滿載而歸。
俄士廚房
深圳皇庭廣場 14/7/2024 11:00
喺深圳吃喝玩樂群組得知，好多人推介呢間俄士廚房。趁同小朋友慶祝生日，來試一試。
餐廳就係皇庭廣場外圍嘅位置，一直都唔知原來仲有呢啲咁大嘅空間。一入門口就見到非常俄羅斯娃娃，仲有非常特色嘅裝修佈置，環境實在太好。我哋一行五人坐係一張圓形卡位，非常舒適。服務員仲提供BB椅，兒童餐具等，非常細心。點評有好多唔同類型嘅優惠券，價錢唔貴。
必吃榜雙人套餐 238元
奶香蘑菇湯：味道非常濃郁，濃濃嘅蘑菇味，非常之忌廉味，好味。
黑咧包：一籃麵包大大個，本身麵包好鬆軟，仲有啲果仁，加上士多啤梨果醬，係一個非常好味嘅餐前小吃。
俄式伴香雞：估唔到係薯蓉沙律，口感非常綿密，材料豐富，味道不錯。
三色藜麥沙律：非常健康嘅一味，加上有子醬汁非常之清爽，估唔到咁好食。
沙士雷可雞：擺盤實在太浮誇，就好似一把劍放喺你張枱咁，服務員再幫你取出雞肉。雞肉外皮脆脆的，肉質非常嫰滑，充滿肉汁，再沾上醬料，實在太好味。
黑椒朗姆牛扒排：以鐵板承上，切開牛扒粉粉紅紅，熟成度剛剛好，牛味濃郁，口感軟滑，質素十分高。
俄式罐燘飯：細細一罐，但係非常好味，飯底有豐富嘅材料，超濃郁蕃茄醬料撈勻，仲有兩件牛肉有肉有筋，係我最鍾意嘅口感。
兒童套餐 38元：賣相有驚喜，簡直係一個鹹味版嘅蛋糕，我哋就借來當生日蛋糕。下邊係蛋炒飯，上面有大大塊好味雞扒，再加上唔同嘅水果，卡通公仔山楂捧，又靚又好味。
因為小朋友生日，最後餐廳送上俄式蛋糕，第一個奶油味豐富嘅千層蛋糕。另外點評打卡中獲得一個非常好味嘅焦糖燉蛋及一個雪糕球。
餐廳環境靚，服務佳，食物超乎預期嘅好味，價錢唔貴，值得encore！
2024 珠海長隆飛船之旅 第二日 ［2.2 探險家餐廳］
探險家餐廳
1/7/2024 13:00
午餐揀咗呢一間喺餐廳，貪佢位置夠大，坐得幾舒服，而且冷氣都好夠。
探險家兒童餐 78元：兒童餐放喺一個自製嘅飛船模型上，非常給睛。主食有茄汁通粉，醬汁夠夠、薯條、炸蝦脆卜卜。仲有一件朱古力味濃嘅布朗尼蛋糕，以及大大杯橙汁。
意大利培根白菌披薩 98元：估唔到個Pizza咁大哥，都係啱啱出爐，材料豐富，賣相一流。餅底鬆化，芝士超級多，仲有大量嘅香腸同蘑菇，拍得住西餐廳出品。套餐仲包一杯飲品，相當抵食。
野趣牛筋肉湯麵拌餃子 68元：一碗普普通通，平平無奇嘅湯麵，餃子算不錯。
星球甜甜圈 38元：甜品非常美觀，大大件甜甜圈上邊有一個朱古力星球。
雲尼拿蘋果慕斯 28元：蘋果造型慕斯，中間係雲呢拿味，加上蘋果醬，好睇又好食，呢個仲更加抵食。
埋單310元，以內地消費黎講唔平，但以主題樂園嚟講算係好抵食。坐得舒服，值得俾。
樂凱撒披薩
深圳景田婦兒大廈 15/5/2024 11:00
景田婦兒大廈就好似一個小社區咁，裝修得幾得意，下面有唔少餐廳。時間尚早選擇食呢個Pizza。
酷兒兩件套餐 39.9元，包括烤奧爾良雞翼，大大隻，肉汁幾豐富，微辣幾惹味。美式土豆培根披薩6寸細細個，餅皮幾鬆軟，薯仔大大片，煙肉咸香，上面舖滿芝士，非常咸香。
爆汁流心雙腸仔 26.5﹕一款係肉腸，另一款係芝士腸，兩款外皮都脆脆，中間真係爆晒汁，味道香濃。
濃香咖哩雞拼芝士肉醬焗飯 27元﹕熱辣辣香味十足，一半係甜咖哩，仲有好多薯仔雞肉。另一半係香番茄肉醬，上面舖滿芝士，正好撈飯。
草原牛肉串 17元﹕估唔到肉質不錯，調味亦不錯。
食物不錯，環境不錯，適合親子。
Elephant Ground
深圳萬象天地 21/4/2024 12:00
今日落大雨，打斷咗原定嘅計劃，轉場去萬象天地試吓呢一間人氣高嘅西餐廳。位置就係平台半戶外位置，選擇坐喺開機長枱，環境相當闊落，寫意。
精選親子brunch 258元
兒童餐：卡邦尼意粉、炒蛋、薯條、橙汁。卡邦尼意粉奶香味濃味道不錯。
慢煮牛腹肉三文治：份量非常澎湃，三文治鬆軟，中間夾咗好多唔同嘅配料，牛肉、生菜，醬料等等配合得宜。薯條新鮮即炸，粗身啖啖肉。
奶油草莓鬆餅：賣相討好，鬆餅係比較實淨嘅熱香餅，厚度十足，蛋香味牛油味濃。士多啤梨非常多，仲有士多啤梨醬同埋奶油，整體配合得好好，非常飽肚。
海鹽奧利奧蛋糕：估唔到呢件蛋糕咁大件，鬆軟嘅朱古力蛋糕，中間加咗鹽味奧利奧醬，再灑上餅碎。
卡布奇諾：咖啡味道不錯。
冰搖桂花烏龍茶：冰涼，味道比較清淡。
環境舒服，套餐非常豐富，賣相又靚，味道不錯，估唔到咁飽肚，非常滿足。
