by admin | 1 月 1, 2016 | 中環, 尖沙咀, 拉麵, 日式料理
豚王
1/1/2016 13:30
1/1/2014 18:00
1/1/2013 18:001/1/2016 13:30
＠尖沙咀唔睇唔覺，原來1月1日食豚王已經成為年度事件。今次終於有機會坐喺Bar枱，見證煮麵過程，咁至夠風味。
豚王 ($85)
賣相依然咁豐富澎湃，香氣一流。原味豚王湯底選擇多醬料，普遍油，口味正合心意。奶白色湯底入口順滑，豬骨味鮮甜濃郁，膠質豐富。首次試下加入1辣度嘅秘製辣醬，辣醬少辣，以香味為主，撈入湯之中又有另一種香氣，值得追加! 拉麵要求嘅硬度亦做到，質地實在而且煙韌。選擇肩肉叉燒，兩大片薄肉片，肉質非常柔軟，味道仲好甜。唔少拉麵店嘅叉燒係凍嘅，原來豚王會先將叉燒浸入熱湯翻熱，個人更鍾意呢種又暖又腍嘅版本。椰菜分量勁足，熟成度剛好，入口清甜。唔洗講，全碗豚王清得一滴不留。
黑王 ($95)
另一款必選係黑王。墨魚汁湯底仍然鮮甜，加入黑色嘅調味球，撈入大量味噌同肉碎，味道更豐富。選擇普通油分，的確重口味得黎亦好易入口。另外追加一隻溏心蛋 ($17) 好似略為退步，蛋白醬油味偏淡，但今次流心度不錯，還算可以。
1/1/2014 18:00＠尖沙咀
2013年1月1日嘅晚上，選擇左去豚王「開年」。六點鐘左右到達，已經排緊隊，真係誇張。
店仔細細，開放式設計，食野嘅地方係街邊行人路位置，的確好有日本街頭風味。
落單選擇左一個豚王，一個黑王。
豚王 ($80)
論香氣已經贏晒，豬骨味勁香。湯底呈奶白色，入口鮮甜濃郁，豬骨味勁濃。湯底幼滑又厚重，膠質豐富，有黏口嘅感覺。熱辣辣冬天食實在太好，飲完都唔覺得口喝，果然真材實料。選擇左硬身幼麵，白雪雪嘅直身麵條非常幼滑，好適合「雪」入口。要求嘅硬度亦做到，質地實在而且煙韌。麵條掛湯力超強，每一啖都吸收晒豬骨嘅香味。叉燒係兩大片薄身肉片，主要係瘦肉為主，但入口唔覺鞋，肉質柔軟。原裝版跟嘅配料包括木耳，亦可選青蔥或椰菜。椰菜分量落得慷慨，正好清清油膩感。
黑王 ($90)
黑王係以豚王嘅湯底作基本，加上濃濃的墨魚汁同香蒜油而成。名副其實，黑得可怕，成碗墨汁嘅程度。湯底豬骨味仍然濃郁﹛再加上濃郁嘅蒜味，墨魚汁色就夠黑，但未發現墨魚味，不過湯頭更加濃厚鮮甜。黑色的湯底上，再加上黑色嘅調味球。調味球似乎係味噌加肉碎，味道微辣，混合湯底之後，味道更具層次，真正重口味!
溏心蛋 ($15)
額外加配嘅溏心蛋，蛋黃略嫌過份凝固，不過蛋白滲透香甜嘅醬油味，而且軟滑度十足，算可以啦。
枱上仲有唔少配菜，加酸加辣自由處理，配麵亦唔錯。
八、九十蚊一碗麵，實在好貴。但八、九十一碗豚王，真係物有所值。份量十足，味道難以忘懷，已經值回票價。知道豚王人氣爆登，一直未有排隊嘅勇氣。今日終於一嘗，完全明白人氣鼎盛嘅原因。一試湯頭，已經完全被迷倒。食麵嘅時候充滿住矛盾嘅感覺，不自覺大啖狂食，但又擔心太快食完。完食後，豬骨嘅香味仍遺留於口腔之內，離開時候感受到無限滿足，又難離難捨，實在又愛又恨。
by admin | 12 月 27, 2015 | 拉麵, 日式料理, 銅鑼灣
つけめんTETSU@銅鑼灣
27/12/2015 14:00
新開呢個沾麵專門店被各大傳媒狂煲，特式係熱石加熱服務。其實呢樣服務亦唔覺得有幾新奇，記得旺角漁場台風已經玩過。不過就話係東京沾麵名店首間海外分店，亦係「熱石投湯沾麵」嘅始祖，就趁假期黎試一試。
小店係銅鑼灣，遠離拉麵激戰場，自成一角。不過位置大馬路街舖，排隊位置都相當窄。當日1點左右黎到，門口大約七八人排隊，等左半個鐘左右。
沾湯係豚骨魚介湯。令人非常失望係送上時沾汁唔夠熱，並無辣口感覺，已經估到呢個湯好快玩完。味道方面其實唔差，亦同三田製麵所好似。魚介豬骨湯非常厚身，杰度十足，亦唔油膩。味道係夠，但以重口味人士黎講亦未到超濃境界。
沾汁裡有幾件叉燒，個人覺得相當唔錯，雖然偏瘦但煮得好軟腍入味，口感有啲似午餐肉，印象相當深刻。
300g普通沾麵加蛋 $98
麵條有兩種可選，一種係普通麵，一種係傳聞類似烏冬嘅粗麵條。沾麵亦可選熱食或冷食，熱食的話，麵係會浸喺高湯之中，雖然能有效保持溫度，但一向都鍾意冷熱交融嘅感覺，亦備好硬麵，都係食番最傳統果種吧。麵條入口都幾煙韌彈牙，有小麥味，份量亦正常，肚餓的話300g都可餵飽男士。 半熟蛋入味算唔錯，但稍為過熟。
200g普通沾麵 $89
食到後半，沾汁真係凍得唔能夠忍受，就玩一玩傳說中嘅熱石投湯。宣傳講熱石可以將湯加熱到60、70度。講店員加石後，的確有一下「咋」嘅視覺享受，但入口就覺得幫補不太，湯只係略為回暖，相信係因為石頭嘅溫度未夠高，又失望了。
最後再試一試湯割，咖啡壺裝住高湯，俾客人自行加湯。由於沾汁唔算非常濃郁，只係略為加少少溝淡，入口都係微溫，飲完就算吧。值得一提，枱面有炸洋蔥碎，味道的確幾香。撈入沾汁內，係另一種風味。
總括黎講，呢間沾麵出品算不錯，但尚有非常多進步空間。又可能我地已經食過唔少高水準出品，要求進一步提高，呢一碗沾麵無甚特別。
by admin | 12 月 20, 2015 | 尖沙咀, 拉麵, 日式料理
富士山55@尖沙咀
13/9/2015 20:00
20/12/2015 14:00
兩年半前未對拉麵沾麵產生強烈興趣，對出品亦不甚講究。當時曾經黎過富士山55，只覺得都唔錯呀，但未有留低深刻印象。近年越食越要求高，亦睇到好多食評，先知道原來呢間55係超具人氣。決定今日再訪，證明當時真係有眼不識富士山。今日到來柯打左兩客沾麵。從未驚過重口味，必選一客特濃豚骨湯，再加一客櫻蝦湯。
特濃豚骨沾麵 ($78)
單睇賣相已經不錯。此處特色係沾麵用鐵碗裝著，正方便用迷你電磁爐加熱，保持沾湯溫度。特濃豚骨湯真係濃得不錯，再加上魚介粉，魚介香比豚骨味更為突出，非常香甜。個人幾欣賞佢嘅麵條，粗身麵非常煙韌，飛水亦唔錯，微凍正好。配料方面有兩片薄叉燒，略為燒過，叉燒雖然薄但味道相當香甜，肥瘦相間，不錯。而溏心蛋顏色淺白，應該無特過滷過，但入口相當甜，溏心程度亦算唔錯。最後加入鰹魚湯，將湯一飲而盡。
櫻蝦沾湯係豚骨湯基礎上加多滿滿一層櫻花蝦，豚骨湯濃度略減，更加提升到櫻蝦嘅香甜味，此款會配上細麵。
最後，將櫻花湯改造成芝士飯，蝦香味配上芝士香，非常好味。
今日再訪的確令我重新愛上，全靠一個小小嘅電磁爐，令沾湯可以長期保持高溫，正係食沾麵一大加分之處。
by admin | 12 月 6, 2015 | 拉麵, 日式料理, 灣仔
神虎拉麵@灣仔
6/12/2015 12:30
咁岩黎灣仔聽講座，咁耐冇食拉麵梗係要搵間好味嘅。呢間神虎係大阪過江龍，開飯網排名都相當高。
等左一陣就入座，坐喺吧枱位。枱面有極冰凍嘅檸檬水、醬菜同辣芽菜。
是日叫左兩款拉麵同一客煎餃子。
餃子 ($38) 係網友推介菜，話有驚喜。餃子真係即煎，上枱時熱辣辣，隻隻脹bok bok，外皮微焦，賣相不錯。餃子外皮非常薄，菜肉餡好鮮味多汁，非常唔錯。
神虎 ($85)
整碗非常夠熱，湯底相當唔錯。質地好忌廉味，非常幼滑。豬味味好濃郁，再左豬背油提香，唔算油膩，相當鮮甜。加上蔥花湯頭更香，辣醬都幾夠辣，稍為撈湯又另一番口味。拉麵係幼麵，硬度不錯。蛋都係唔錯，醬油味夠，流心度一流。仲有兩塊叉燒，肉質還好，味道幾甜。
白虎 ($75)
其實湯底係一樣，只係神虎多左隻蛋。自選自虎配料全走，無伴青蔥果真差咁D。
總算收貨，但因為地置太遠，較難吸引回頭。一紙記錄就算吧。
by admin | 10 月 11, 2015 | 拉麵, 日本, 關西美食合輯
大阪手信係日本一風堂自家製麵。是次得到一盒白丸、一盒赤丸。
湯包配料俾得好足。
白丸有一個拉麵、液體湯包、醬菜、蒜蓉、芝麻。
湯底好重豬骨味，拉麵好幼滑，自家紫菜、豬頸肉片，非常好味。
赤丸有一侠拉麵、液體湯包、赤丸調味醬、黑蒜油、醬菜、芝麻。
赤丸湯底多一份辣味噌，少少辣夠開胃。
by admin | 6 月 14, 2015 | 拉麵, 日式料理, 旺角
漁場台風@旺角
14/6/2015 12:00
荃灣台風係我最喜愛的拉麵店。旺角開左一間姐妹店，一定要支持。「漁場台風」同「台風」有唔同，漁場日間只賣沾麵，晚間只賣湯麵。漁場店面比荃灣店大，裝修好有特色，有好多日本明星、動漫公仔擺設，感覺更加輕鬆自在。
店方提供得意嘅宣傳版，教你如何正宗地食沾麵。漁場日間提供幾款沾麵。是次選擇魚介豬骨沾麵、芝麻沾麵。
魚介豬骨沾麵 ($83)
一碗係沾麵、溏心蛋、紫菜同檸檬。另有沾汁有叉燒、蔥、冬筍等配料。沾汁魚介味香，豬骨中有魚介香味，濃杰度一般，以拉麵湯黎講係超水準，但以沾汁黎講，濃度可略增會更好。拉麵方面，硬度適當，柔韌有彈力，略嫌溫度可以再降低。台風嘅溏心蛋一值都係不錯，水準保持。叉燒切為方型，肉質正常。值得推介係，食到一大半時，店員主動提供熱岩石加熱，即刻為變冷嘅沾汁重新注入熱力，溫度提升唔少，值得一讚。最後加上熱辣辣嘅清湯，提升沾汁嘅清香，都算唔錯。
芝麻沾麵($85)
沾汁再加上焙煎黑芝麻，但味道少有少提香，但未到好濃香程度。
總括來說，台風做拉麵係好出色，出乎意料嘅好，而沾麵都叫有水準，仍未算突出，但熱石誠意可加分。
