品尚橫濱拉麵
品尚橫濱拉麵@佐敦
18/5/2015 12:00
完全唔明白開飯網點解會有咁多好評，純粹得個平字。講完。
三田製麵所
三田製麵所@銅鑼灣
15/2/2015 13:00
3/5/2015
3/5/2015
15/2/2015 13:00
剛開業幾日，而家仍係試業階段。
十二點到達，已見十幾人嘅人龍，等左約不多一個鐘，先可入座。
選擇左一中一大沾麵。均一價$78
拉麵賣相不錯，香味亦不錯。
沾汁係魚介風味，湯之上有一片紫菜，仲有魚介粉。不客氣將粉撈勻試一口，豬骨湯加上魚介，魚介海味幾突出，豬骨明顯給比下去。湯汁質地非常厚，好容易掛麵，但問題就係食大麵嘅時候，沾汁會一滴不留。湯汁黎講味道係夠既，以拉麵湯底黎講算唔錯，但以沾麵湯黎，略為唔夠重口味。最大問題係湯汁溫度唔夠，入口無燙熱感覺，相信好快會被拉麵感染。
至於麵，賣相不俗，但入口唔夠煙韌，略嫌有糊口感覺。標準出品係冷麵，溫度適中，飛水夠乾，還好無再淡化沾汁，麵的確非常掛湯，不過冷麵令室溫湯更冷，食到一半，真係以為自己食緊冷麵。
完食後，請店員係僅餘嘅沾汁加上清湯，可怕清湯溫度嚴重不足，一心諗住將湯加熱會有另一番風味，竟換來一次無得救。可惜。
配料方面，沾湯入面有叉燒粒，呢個係全場最好食，肉質鬆軟，肥瘦適中，吸收晒沾湯味道，非常好味。跟麵有一片厚切叉燒，味道正常，略帶一點乾，只好將叉燒放落湯浸死，情況稍有改善。溏心蛋溏心度OK，味道略為淡口微甜。
整體黎講，如果無任何日本夠店嘅光環，呢碗沾麵可算係唔錯。但以沾麵名店呢個名號出場，出品似乎欠缺風範，實在失望。可能營運上未純熟，食物溫度唔夠，出菜時間亦較為慢，難怪排隊要等咁耐。是次排隊一個鐘，換來一次失望，加一張$25現金券。就因為呢張現金券，決定俾多一次機會佢，期待下次有進步。
3/5/2015
第二次，再試下佢嘅沾麵。
沾汁味道仍然濃，杰到好似糊咁係特色，可惜沾汁唔熱呢個問題有改變，但仍未解決。以一碗平$25價錢，其實算值，但仍然有失金柒招牌名氣。
有型師傅的台風拉麵
拉麵台風@荃灣
14/2/2013 18:00
17/5/2013 13:00
1/12/2013 18:30
22/3/2015 12:00
14/2/2013 18:00
荃灣冒出一間極好評嘅街坊拉麵，大碗抵食又好味，終於編到入行程走一趟！
魚介豬骨湯拉麵 ($78)
配料有兩大片叉燒、半隻溏心蛋筍、白蔥、紫菜盛住精製魚介粉。台風拉麵嘅湯底以豬骨同雞骨做基本，質地超杰身，勁厚重，入口係黏口忌廉咪嘅質感，足見真材實料，膠質極奇豐富。味道亦夠香甜濃郁，店方指湯底用上豬骨、豬頭、豬油、雞骨、豬手、雞腳等，經過二十小時以上烹煮而成，啖啖都係精華所在，實在美味。將小店精製嘅魚介粉混和，再多一種海鮮甜味，味道更具層次感，非常討喜，值得一飲而盡。拉麵選用粗身曲麵，選擇嘅偏硬程度亦做到，麵質煙韌，有咬口，粗麵更有效掛湯，每一條麵條吸盡湯汁，一流嘅配搭。知道此麵係店方其中一大堅持，用上日本產小麥，據說係八間日本製麵廠中精選出黎。兩大片叉燒亦非常討好，睇見師傅小心將叉燒切開，特地分一片邊位加上一片中間位，讓食客食到兩種口感。的確，一片叉燒係肉感較重，一片係半肥瘦，各具特色，肉味亦夠香，個人較喜歡半肥瘦較為腍滑。至於溏心蛋亦係用心之作，蛋白腍滑，充滿醬油香味，黃蛋半熟非常黏口香濃，不錯！
伊台風 ($88)
此款伊台風係創作拉麵，以豬骨湯做基本，加上蕃茄蓉、新鮮蕃茄、生菜同芝士，再喺客人面前用火槍燒融，淨係呈現手法已經好吸引。豬骨湯加上蕃茄蓉，味道香濃，豬骨味並無被蓋過，加一點酸甜，更為清爽。配上微焦嘅芝士味，實在回味無窮。
價錢正常，不收加一。兩款拉麵份量其實頗多，比其他名店來得大方慷慨。味道係絕對好評！絕對值得一試！
不得不提此店嘅服務亦係超好，由拉麵師傅至樓面員工個個都態度一流，熱情細心有誠意，每一句歡迎光臨及多謝都係雄厚精神的，加上九十度鞠躬，絕對係日本式優質服務。幾位拉麵師傅都係日本人，睇住師傅煮麵，見證師傅嘅技術與細心，所以先做到一碗好拉麵。真心滿意呢碗拉麵，所以全碗清光，湯亦飲得一滴不留。臨走時同師傅講左一句「おいしい!」師傅立即以一個殺死人嘅笑容回應一句「ありがとうございます！」加一個深鞠躬。從佢嘅回應，感覺到師傅嘅滿足自豪，呢個表情真係好有型。
17/5/2013 13:00
第二次食台風，一樣咁好味，真係超級好味，少有值得無限encore之選。
魚介豬骨湯拉麵 ($78)
濃郁嘅湯底，配上煙韌彈牙嘅拉麵。除左叉燒片外，仲有叉燒碎，溏心蛋又正。
豬軟骨骨膠原撈麵 ($78)
湯汁濃縮左味道更強勁。
1/12/2013 18:30
魚介豬骨湯拉麵 ($78)
難忘濃郁嘅湯底，骨膠原超勁，拉麵煙韌彈牙。叉燒香甜腍滑，溏心蛋又甜又濃。超正!
豬軟骨骨膠原撈麵 ($78)
湯汁濃縮左，醬油味道更強勁，叉燒更係大大舊，非常豪邁。
22/3/2015 12:00
今次初試沾麵，湯底都算唔錯，比拉麵湯底加濃多少少。
出品算非常唔錯，但始終都唔夠沾麵專門店咁好。
認真講，台風拉麵真係無得輸，原因係水準保持度非常高，去咁多次都係咁好味，而且價錢唔貴，飽足度十足。
沾麵真中
沾麵真中@紅磡
8/3/2015 13:00
湯底係魚介湯，味道算濃，魚干醬油味夠，油份正常，醋酸味略比周月薄弱，講唔上重口味，唔算突出。湯底內有叉燒粒，肥瘦適中，相當入味，算唔錯。自家製粗麵保持水準，夠煙韌，可惜飛水略為不足，濕度幾高。溏心蛋中上貨色。另加嘅叉燒，厚切肥瘦相間，可惜入口略為乾柴。埋單$205，雖然真中係周月姐妹店，質素始終唔及正店。
將軍拉麵
將軍拉麵@旺角
25/1/2015 13:00
噌將軍 $80
湯底味算正常，加入大量洋蔥，太多渣，唔係太鍾意。
蛋完全是水煮蛋，無味。絕對失敗! 叉燒有炭燒味，但肉偏肥，肥油膩，肉偏乾。
蒜將軍 $80
湯底算幾忌廉味，蒜味係濃，但蒜多得太緊要，鍾意蒜都怕怕。
完全新派拉麵，感覺唔似日本拉麵。
雷拉麵@旺角
雷拉麵@旺角
1/1/2015 13:00
1月1日第一餐要食好野，選擇久違了的拉麵作個好開始。剛好試到不錯吃的拉麵。今日竟然有午後大割引，比正價抵好多!
博多豉油湯拉麵 ($48)
加蛋加叉燒 ($20)
九州麵豉湯拉麵 ($48)
湯厚得黎會起衣。味道勁濃，有甜甜嘅味噌味。
拉麵正常、但有少許鹼水味。蛋都唔錯，味道適中。
豬軟骨就一般。
平平地食一餐都唔錯。