龍也拉麵@大坑
龍也拉麵@大坑
26/1/2014 12:00
$68團購餐，有拉麵、小食、飲品。睇漏眼不適用日期，但老闆照俾用，真係好人。
白龍拉麵
豬骨湯好清好淡，拉麵算係OK，叉燒原味偏肥，溏心蛋係最好食。
炸餃子、凍甜番茄、唐揚雞
黑龍拉麵
豬骨湯加上黑蒜油更香，但湯底都係好薄弱。
炸雞軟骨、中華沙律、雞薯餅
拉麵唔合格，反而小食仲有水準。的確，老闆好人係抵讚，可惜返轉頭無望。
麵屋武藏@沙田
麵屋武藏@沙田
31/12/2013 19:00
黑武骨豚角煮拉麵 ($72)
白武骨沾麵($75)
羅湖山小屋拉麵
山小屋拉麵
24/11/2013 18:00
香港食拉麵最少都要七、八十蚊碗，聽聞深圳有間正宗博多拉麵，係日本有名嘅連鎖拉麵名店，一於趁北上時試一試羅湖分店。
昭和拉麵 RMB35
賣相不錯，好吸引。豬骨湯奶白味，有豬骨味道，正正常常清淡口味。拉麵係直身幼麵，烹調時間控制得幾好，仍然煙煙韌韌，非常幼滑。兩薄片叉燒肥瘦適中，味道香甜，幾好。最值得一提溏心實在非常正，蛋白夠味，蛋黃溏心味道濃厚，認真不錯。
黑魔王豬頸肉拉麵 RMB39
另一款係加在黑蒜油嘅黑魔王湯底，味道更加濃郁，但略嫌油份多左少少。豬頸肉配拉麵都唔錯，味道香甜。
日式煎餃 RMB 13
另配日式煎餃，味道正常，但煎得不夠香脆。
整體來說，非常OK，得閒北上值得一試，勝在平過香港一大截。
味吉拉麵館@旺角
味吉拉麵館@旺角
6/10/2013 18:30
博多極濃豬骨湯底自家製叉燒拉麵 ($75)
湯底味道適中，食到有豬骨味，唔算特別太濃，但後來發覺口乾，味精幾重。
麵條幾爽口，唔算特別。
半肥瘦叉燒甜甜地，正常。
半肥瘦叉燒甜甜地，正常。
溏心蛋賣相得，糖心狀態，但食落無乜味。
黑豚墨汁厚切豚肉拉麵 ($78)
黑豚墨汁厚切豚肉拉麵 ($78)
湯底有墨魚海鮮味，夠漲幾驚喜。
厚切豚肉反而唔錯，三層有肥有瘦，入口即融。
烏骨雞拉麵．龍
烏骨雞拉麵 龍@尖沙咀
13/6/2013 19:30
又一間新開拉麵過江龍，團購$75有兩碗麵，平到咁絛理由唔試。
小店坐落柯士甸道，小店細細，只得十個位。半開放式廚房入面，有一間日藉主廚，功架唔錯。
小店坐落柯士甸道，小店細細，只得十個位。半開放式廚房入面，有一間日藉主廚，功架唔錯。
豬骨湯拉麵 ($78，團購價$38)
賣相不錯，團購無將貨就價，仍覺得豐盛。呷一口豬骨湯，不錯呀! 清甜帶有雞骨、豬骨香味，略有少許豬骨嘅膻味，油份超少，非常清爽。拉麵係直身幼麵，非常滑身又夠彈牙。有兩片薄切叉燒，味道鮮甜，肉質OK。溏心蛋熟成度不錯，可惜醬油味較啖。拉麵出品不錯，連配料都非常有心意，除左紫菜、筍乾同大量青蔥外，仲加入炸洋蔥，令清甜嘅拉麵更惹味香濃。
極上味噌湯拉麵 ($88，團購價$48)
從網上得知味噌湯深得好評，的確出口都唔錯。加入微辣嘅味噌，令湯更加香濃，味道都唔錯。
新開小店做團購宣傳，試過就覺得唔錯。團購份量仍然多，材料足，味道好，值得支持!
達磨日式拉麵@銅鑼灣
達磨日式拉麵@銅鑼灣
6/9/2013 19:00
拉麵風捲左咁耐，都仲未試過呢間廣受歡迎嘅達磨。竟然有一日佢做團購! $98有兩個麵，兩杯飲品，加一個小食。平到咁，點都要試下。
豚角煮豚骨拉麵
賣相係OK的，配料亦唔錯。第一啖湯係OK的，但第二啖湯已感覺到豚骨清淡，配不上特濃二字。作為人氣拉麵過江龍，湯底似乎略遜一籌。拉麵一般，質感可以接受。豚角煮即是五花腩，肉中間夾著脂肪，入口鬆化軟腍，相當唔錯。溏心蛋熟成度不錯，略帶甜醬油味，OK!
叉燒豚骨拉麵
可憐的叉燒拉麵叉燒得一片，味道甜甜，肉質可以，但無乜特別。
團購餐跟一份野菜薯餅，味道OK的。另柯打一份芝士年糕，原來沾煉奶係咁好味。
整體來說，拉麵好一般。銅鑼灣店夜晚七點人氣唔旺盛，難怪要做團購。看來當初所謂嘅人氣拉麵，風頭已被蓋過。