Pepper Lunch＠馬鞍山
26/6/2022 12:00
早前疫情期間，試過Pepper Lunch外賣，雖然食品係一樣，但係堂食仲有鐵板可以Keep住熱辣辣，風味絕對唔同，始終都係堂食好。
美國薄切牛扒 ＄88
幾片牛扒跟薯蓉、菜，仲有大大碗白飯。牛扒都真係相當薄，煎得稍為過左火，所以韌韌地。
珍寶黑椒牛肉飯 ＄69
平常最愛都係呢個珍寶飯，今次仲加埋芝士。呢個牛肉太薄啲，再另外加上蒜蓉汁撈飯更加好味，感覺上仲好食過薄牛扒。當然要加錢跟套餐，有汽水同Haagen Dazs雪糕，雖然得兩款口味，但已非常豐富。
兒童餐 ＄49
原來Pepper Lunch都出左兒童餐。揀左煎蛋牛肉飯，一隻靚蒜蛋，一大堆粟米，幾片牛肉，白飯同成人版白飯都無乜分別，一樣咁大碗。兒童餐跟埋飲品可以揀利賓納，仲送小廚神貼紙。小朋友已相當滿足。
最鍾意呢度，有齊BB High Chair，仲有兒童餐。不過小朋友真係要小心鐵板，我地就另外用碗仔裝起俾小朋友，安全好多啦。
尚品日式燒肉店@太子
8/1/2011 18:00
22/7/2012 20:00
8/1/2011 18:00
$99食日式燒烤，我第一個支持。記得早年去左同一地址食放題，呢間舖頭已經結業，改頭換面，變成左一間日式燒烤店，新開張無耐，用$99一人前半任食套餐吸客，咁抵，值得一試。一人前套餐其實都唔少野，有一客貴族拼盤，包括五款指定菜式，外加五個任食項目，實食得飽。
貴族拼盤 (美國安格斯牛肋骨、鹿兒島黑豚肉、鹽燒手羽先、薄切牛舌、澳洲藍尾蝦)
美國安格斯牛肋骨
日式燒烤最好食就係牛，輕輕用火慢烤，熟成程度隨意控制，想點食都得。佢話係安格斯牛肋骨，但其實無骨，係完完整整一塊肉。賣相幾靚，鮮紅嘅牛肉肥瘦相間，放上火爐每邊慢烤十幾秒，剛好達到七成熟，中間保持迷人嘅粉紅色。入口未至於入口即溶，但非常軟腍，肉汁豐富，調味似乎選用左清甜嘅果汁味，醬汁甜甜地，亦不掩牛肉嘅鮮味，幾粒仔芝麻亦起到提味作用，根本唔需要多沾其他醬汁，很不錯。
鹿兒島黑豚肉
係唔係鹿兒島黎嘅，我一律唔多理，但好似未正式試過叫做黑豚肉的物體，所以特別留意呢幾片野。黑豚肉睇落比較肥，加熱後，白白嘅脂肪慢慢溶化，光亮嘅油份湧出黎。豬肉類燒烤時間比較長，仲驚死佢唔熟，所以有幾片燒得過左火位，但出奇地感覺仍然唔錯。黑豚肉燒到外層脆脆地，入口唔韌，保持到爽口嘅質感。肉味好濃，好甜，只用鹽同胡椒調味已經好足夠。雖然睇落脂肪幾多，但經過燒烤後，油份流失左唔少，所以食落完全唔覺油膩，黑豚肉的確有吸引力。
鹽燒手羽先
一隻雞翼對切，每份有四個細件。燒熟左嘅雞翼，外皮脆脆地，雞肉幾嫰滑，肉汁都幾豐富，但味道略嫌過淡，應該只有鹽同胡椒，但味道唔夠。
薄切牛舌
牛舌微咸，有少許胡椒味，少許牛膻味。口感有牛舌應有嘅爽口，但因為只得薄薄一片，口感明顯比唔上厚切，燒烤都係食厚切版好啲。
澳洲藍尾蝦
蝦真係比較難燒，兩隻蝦都燒到個殼燶晒。蝦的確夠大隻，但蝦味麻麻，味道一般，亦唔算十分之彈牙爽口，好普通。
任食項目 (柚子胡椒豬頸肉、辛口豬頸肉、橘子雞腿肉、魷魚鬚、白飯)
柚子胡椒豬頸肉
豬頸肉從未試過柚子味道，估唔到竟然喺日式燒烤食到。豬頸肉非常爽口，柚子味好突出，有微酸嘅味道，亦有柚子輕微嘅澀味，反而胡椒就唔多覺，好新奇嘅味道。
辛口豬頸肉
相信肉質同上款一樣，都好爽口香甜，呢款轉用辛辣調味，味道麻麻辣辣，好刺激，比上一款更惹味。
橘子雞腿肉
雞肉配橙味，感覺唔太夾，橙味澀澀地，幸好雞肉質地唔錯，幾嫩滑，只不過雞皮幾厚，怕肥的話就自行去皮。
魷魚鬚
燒魷魚鬚真係樂趣無窮，睇住魷魚鬚嘅粒粒氣孔慢慢收縮，冒出水份，魷魚鬚變得乾爽，好有生命力。呢款相信係椒鹽調味，非常惹味，食落超級爽口，煙韌彈牙，好有質感，亦食得出海鮮嘅鮮味，唔錯。
滿足嘅日式燒烤，叫左唔知幾多份任食項目，食到飽飽先走，一個半鐘時間係岩岩好。
餐廳提供三款沾醬汁，有甜甜燒汁醬油，仲有檸檬汁同蒜汁，但三款味道都偏淡，真係可有可無。
團購價只需多俾十蚊雞加一服務費就可以閃人，實價總數每位多謝$109，呢個價錢絕對抵食。只係任食項目得四款，追加多幾碟就覺得較寡。但口寡之前已經食飽，所以唔係大問題。
餐廳嘅服務真係十個抵讚，任食竟然無任何意圖或企圖限速。每次追加，侍應都好客氣回應，新鮮嘅食材會喺不出五分鐘之內送到。而且每碟材料嘅份量都好平均，足料夠大份。唔會話因為時間流逝，而食物份量都按比例縮水。
更應讚一讚餐廳上下各員工嘅服務態度，任何時候，任何職位都以禮待客。由點餐、上菜、換網，甚至小事於添茶斟水，所有服務人員都殷勤有禮，絕對感覺唔到有一點唔情願。所有服務都係自動波，貴客無需舉手或開口，服務員自然主動上前提供協助，呢種殷勤體貼，令我倆食得好舒服。
餐廳地方唔算大，但即使用團購優惠，兩人仍被大方安排坐四人梳化卡座，相當舒適，可能都係優質服務嘅一種表現。
整體黎講，食物有中上級數，服務係超水準，百零蚊半任食的話，真係超級抵。正價的話，都係正路價錢，大約一百蚊一份午市套餐。餐廳附近仲不時有人派優惠券傳單，不妨去試試。
22/7/2012 20:00
又做團購，$88一個套餐，包幾款任點任食，加一多$35，埋單每位$123。
定食一份：蒲燒海鰻、日本太子貝、鹽燒牛舌、鹽燒鯖花魚、法式芥末子雞脾肉、秘製燒鴨胸
無特別可言，連條海鰻都唔吸引，死得。
無限追加項目：燒汁美國牛肉、鹽燒鹿兒島黑豚肉、鹽燒魷魚鬚、橘子雞、鹽燒手羽先、Super Hot豬頸肉
追加項目正常，只有燒汁美國牛肉最好味，不過越食越膩。
和光鐵板燒日本料理@銅鑼灣
30/10/2011 13:15
難得喺谷旁掃到平野，以 $68享受原價$138嘅和光1.5小時日本燒烤，包一份一人前嘅指定套餐，再可以無限量追加任食鹽燒黑豚肉同甜品，真係幾吸引。
套餐包括前菜、一盆雜錦燒肉、另加白飯、麵豉湯任裝，甜品任食。
套餐仲跟白飯任裝，基本上一碗已經好夠食，相信無人咁傻仔添飯掛。
最後，不得不讚下個沾醬，味道好香好濃，甜甜地，配燒肉認真唔錯。
偷瞄到晚市燒烤放題開價二百幾蚊，都係大路公價，呢個價錢，相信仲有更多更好嘅選擇。
日式燒烤最happy之處，莫過於自燒自食，要控制火喉，燒到合適嘅熟成度，真係幾考功夫。食材本身質素好係其一，醃得出色係其二，燒得恰到好處係其三。所以燒肉好唔好食嘅責任，並唔係只在於餐廳。名副其實係餐廳、食客通力合作嘅一件大Project。
盛八日式燒肉店@旺角
7/2/2011 11:00
點都要Off Topic一次，點都要豪一次。第一次嘆日式燒烤，點都要記低。
一路燒一路食，其實唔太知自己食緊乜，但係全部都好好味。牛有牛味，入口即溶，醬汁非常香濃入味，加以燒烤後，更突顯肉嘅香氣。豬有豬味，雞有雞味，海鮮有海鮮味…總之好味。鹽燒調味嘅可以令肉味更鮮，醬汁嘅味道更濃郁。特別點名推介﹕ 招牌盛八腸! 大腸質感好爽口，而且用甜甜少辣嘅醬汁醃得入味，經過燒烤後，味道更加突出。
午餐人均消費$90，大時大節豪一次都唔過份。真係好味。