拾鍋
深圳上塘AT Mall 11/8/2024 12:00
點評抽中，半放題燒肉。在上塘站地鐵站一出就到。雙人拼盤肉類非常多，豬肉五花、不同部位的牛肉，仲有墨魚腸。賣相就不錯，但係每款只係簡單調味，燒熟之後冇乜味，肉質都比較實。即場寫點評再送多兩碟，只係食飽，味道麻麻。
出邊可以自助放題，多款冷小食，甜品，自助冰粉。本身唔吸引，感覺唔太新鮮。小朋友最鍾意台灣滷肉飯，味道香濃，醬汁豐富，特別好食。飯後食個凍冰冰雪糕，最好係汽水任飲，非常涼快。
2024 珠海長隆飛船之旅 第一日 ［1.4 珊瑚自助餐］
30/6/2024 11:45
中午選擇嚟呢度食自助餐，點評優惠非常抵食，兩大一小只需要350元。餐廳係近飛船酒店，一入去已經見到落地大玻璃，有好多珊瑚同海洋生物。時間尚早，入座率唔高，可以坐喺一張六人大枱，對正大玻璃。
食物款式唔算多，最近嘅就有麵檔，點心部。全場最名貴嘅就係粉絲蒸扇貝。
場中間就係熟食區，比較特別嘅有潮式拼盤、燒味。味道到位。
日式區仲有炸物、幾款壽司、飯團。仲有一個區域係麵包、冷盤。旁邊仲有自助飲品區，各式汽水果汁咖啡茶都有。
最值得留意就係甜品區，款式都幾多。必試園區限定朱古力潛艇，朱古力味道濃，中間仲有流心果醬。奶凍非常幼滑。提拉米蘇素撻咖啡味朱古力味都夠濃。紅絨蛋糕細細件，奶油味幾香。小朋友就最鍾意棉花糖。
食物款式唔算多，冇太多名貴嘅菜式，刺身，雪糕都冇，只係簡簡單單各式各樣熱盤，感覺上一般餐廳貨色，甜品相當唔錯。以人均$100嘅價錢喺樂園食到無限任食已經非常抵，環境一流，餐廳提供BB椅，兒童餐具等，非常貼心，服務亦相當好。
牛魔
馬鞍山廣場 5/6/2024 12:00
2024 復活節六人行台北之旅 第五日［5.3 尬鍋］
尬鍋 31/3/2024 13:00
諗住星期日喺西門町附近難搵食，決定用Google 訂位，訂左呢間人氣勁高，評分高達4.9嘅台式火鍋店。離外鐵路道園區前行十約十分鐘就到。餐廳門面都幾大，裝修新潮，仲有好多潮語佈置。可惜座位不足，只能坐四人枱，還好枱面非常夠大，仲可以坐梳化，都幾人舒服。每位成人要一個鍋，小朋友不足120cm，可以只加NT$88與成人共鍋及享用自助吧。所以一枱四鍋都夠晒數。
每個套餐基本包括火鍋湯底、一碟肉、米飯同自助吧任食，限時90分鐘。
雪花牛肉+石頭火鍋 NT$378
板腱牛肉+酒香薑煸麻油雞湯火鍋 NT$518
去骨雞腿肉+金銀蒜頭蛤蜊雞湯火鍋 NT$398
帶皮豬五花+金銀蒜頭蛤蜊雞湯火鍋 NT$438
日灑油蔥麵線NT$25、王子麵 NT$15×4、尬鍋海鮮拼盤 NT$158
每個鍋底都有少許分別，最鍾意金銀蒜頭蛤蜊雞湯，湯底勁多蒜非常濃，仲好多蛤蜊，粒粒甜鮮，之後可以自由加湯都係有味雞湯，非常正。
每碟肉份量都超多，大大碟，賣相十分好。雪花牛肉雪花非常靚。板鍵最有牛味，雪花肥瘦適中，油香豐富。雞腿肉都幾滑。豬五花略為肥少少，滿滿油香。
自助吧先係最開心，蔬菜菇類超多，樣樣都好新鮮甜。火鍋配料有唔同類型魚蛋、香腸等，不得不提最好味係印左名店嘅魚腐，味道鮮甜爽口，果真招牌菜。旁邊仲有自助醬料，首推沙茶醬，味道濃郁。飲品有冬瓜茶，清涼解渴，仲有各式汽水。最開心係軟雪糕自助，豆乳味極濃，根本就係冰左嘅維他奶。少試芋頭味都好香甜。仲可以自由加配料，小餅乾、朱古力、黃豆粉、麻糬實在大愛，非常開心。
最後埋單連加一 NT$2,302，店員仲話今日什麼女王節仲有九折優惠，實價NT$2,050。味道一流，真係非常抵食。
牛太 和牛燒肉
馬鞍山 15/2/2024 12:00
午市限定套餐真係相當抵食，一個午餐有一碟肉，另外可以享用出邊嘅自助吧。自助吧相當豐富，有各式熱食，薯條、章魚小丸子、炸雞等，最好食就係日式咖喱牛肉，材料豐富。每款都係新鮮，熱辣辣。
仲有好多自選沙律菜，亦都可以選擇燒烤野菜。甜品、水果都有幾款選擇，最好就係軟雪糕自助任斟，仲有好多雪糕配料。
同朋友一齊食，叫咗四個套餐。除咗一點肉之外，仲包括麵豉湯，米飯。
牛舌御膳 $99：牛舌薄薄地，但係都有十幾塊，口感煙韌。
燒肉三品 $99: 包括豚腩肉、豬頸肉、雞腿肉。
澳洲上級板腱肉 $119: 肉味濃，口感不錯，調味不錯。
壽喜燒牛肋肉 $109： 肥瘦適中，調味偏甜，不錯。
肉類質素高，自助吧豐富，價錢合理，不錯。
Momo Cafe @沙田萬怡酒店
11/8/2023 12:00
自助餐有新鮮生蠔，雖然唔係好大隻，但勝在非常鮮甜。刺身選擇多，非常之新鮮。仲有日式冷麵可以自加醬汁。
每位客人都送上一隻忌廉芝士焗帶子。芝士味幾香，但只真係好大隻，都幾鮮甜。
熱盆選擇都好多，最角落頭嘅燒烤最吸引，烤肉同埋腸仔味道不錯。仲有即煮沙田雞粥同埋意粉。
甜品款式多，有豆腐花、各色奶凍、各色西餅蛋糕
麵包布甸、雞蛋仔夾餅等，好多都係香港傳統小食。當中最好味就係豆腐花，亂粒粒，非常滑，自行加上薑糖水同埋黃糖，連續食咗幾碗。
雪糕當年係Haagen daze 已經upgrade左做Movenpick。
生日仲送上小蛋糕，開心。
餐廳唔算好大，但係座位都算闊落。
