by admin | 10 月 27, 2024 | BB Friendly, 大埔, 拉麵, 日式料理, 鐵板燒
27/10/2024 12:30
科學園發現呢間非常抵食嘅食料理，出品仲相當不錯，小店採用自助形式，堂食座位都非常闊落。人流唔多，好適合過嚟午餐。
黑豚扒雞扒石板燒定食 $98
非常澎湃嘅午餐，大大件黑豚扒，大大件雞扒放喺鐵板上燒，兩塊扒煎到黃金香脆，外皮脆脆，雞扒仲啖啖肉。不斷扒非常嫩滑，味道幾甜，估唔到咁好食跟餐附上麻將沙律，半隻味蛋，仲有飲品，真係非常抵食。
豬軟骨味玉豚骨湯拉麵 $60
湯底甜甜，拉麵都幾順滑亦掛湯，豬軟骨份量唔少，相當入味，軟骨又夠晒腍。味玉賣相不錯，半熟溏心，醬油味香，非常不錯。有齊木耳、魚板的配料，仲免費配麵豉湯，相當抵食。
極品雪花肥牛味玉黑蒜油拉麵 $68
賣相不錯，湯底有黑蒜油香，入口有豬骨湯味甜甜的，黑蒜油味道淡淡。肥牛非常腍滑，肥瘦適中。配上熱白桃烏龍茶，幾香甜濃味。
by admin | 6 月 18, 2023 | BB Friendly, 親子餐廳, 觀塘, 鐵板燒, 韓國菜
炑八韓烤親子餐廳@觀塘
18/6/2023 12:00
慶祝父親節。
$158 每位兒童入場費包一份兒童餐，揀咗一款小兔蛋包飯，一份蝸牛紫菜包飯。每份兒童午餐賣相都非常之得意可愛，份量都足夠。蝸牛壽司造型實在太可愛。
韓國公主裙蛋包飯城堡賣相都相當及正，立體感十足，但播放味道都不錯。
每位成人最低消費$150 ，揀咗幾款燒烤同埋幾款熱食。
芝士無骨炸雞$158、蜂蜜牛油味$118，炸雞炸得香脆，啖啖肉，唔油膩，調味都落得足夠。
燒烤揀咗牛舌$138、韓牛前胸肉$158、厚切五花腩$138、烤豬五花$118。有爐邊雞蛋無限任加，仲有各式韓式小食、生菜都可以添加。
王牌士多啤梨乳酸梳打$48
消費都唔平，勝在有兒童遊樂區有波波池，有得食有得玩，消磨半日都算可以。
5/5/2019 13:00
新開親子餐廳賣廣告賣得咁行，搞到我都心思思趁下墟。
餐廳位於觀塘，地點實在太唔就腳，出左地鐵站仲要行近十五分鐘，唔係有什麼特別係絕對唔會行過黎。約左5月5日一點場，提早少少到已見一家大細排隊等入場。
一入場就見到兒童遊樂區，靚係的確幾靚，但地方唔算大，波波池、廚房玩具等，總算應有盡有。入場第一件事就係幫小朋友租韓服，兩歲碼嘅碼岩岩好。韓服仍好新淨，影相幾靚。
睇睇餐牌，之前廣告所賣嘅套餐已經瘋狂加價，睇落唔太抵食，最後決定散叫幾種過下口癮。另外，隨餐奉送前菜尤其泡菜係不錯的。
甕配韓牛五花肉 $168
只係叫左一款燒烤食品，兩大條五花肉，調味不錯的。燒烤來講，反而最突出係爐邊泡菜蛋同芝士粟米，無限任添，而且味道非常好味，絕對係MVP之選。
蜂蜜牛油炸雞半隻 $88
炸得幾香口，仍有肉汁，味道還好，薯條都非常新鮮熱辣。
韓式炒粉絲 $78
配料夠多，味道不錯，幾有鑊氣，又夠大碟，抵食。
朱古力蛋糕冰沫 $68
賣相討好，非常澎湃，材料都好多。牛奶味冰沬好幼細，加朱古力配搭一流。再加埋極邪惡嘅朱古力醬。
星期日玩2.5小時，兒童入場費多謝$130，包一份所謂的兒童小食係幾塊餅乾仔。加埋自己落單嘅野食，埋單$630，一家三口連玩連食係可以接受嘅。野食係正確質素，但礙於位置實在太唔方便，而且遊樂區唔算十分大，真係玩一次就夠。
by admin | 4 月 12, 2023 | BB Friendly, 沙田, 自助餐放題, 鐵板燒, 韓國菜
沙田石門 12/4/2023 11:30
呢間韓國燒烤自助相當抵食，午市時間連埋加一成人大約$200一位，仲要冇限時，有本事可以食足三、四個鐘。
燒烤肉類款式非常之多，牛、豬、雞、羊，每一款都有唔同嘅調味，仲有啲香腸、魷魚等嘅小食，仲有少量可以燒烤嘅菇菜。燒烤嘅肉類其實味道都差唔多，印象中比較特別嘅牛扒，肉質腍滑，個人最鍾意仲有豬大腸。
自助餐枱仲有好多款韓式前菜小食，主要係啲醃製過嘅餐前小食。仲有幾款蔬菜同埋沙律配料。
預先煮好嘅熟食都唔少款，各式煎炸熱氣嘢，飽肚嘅仲有炒粉麵等，款式多到拍得住一般自助餐。
食飽飽之後仲可以揀唔同嘅甜品，奶凍、啫喱糖相當不錯。新鮮豆腐花非常之滑，仲可以自助任家糖水黃糖。雀巢雪糕雖然普通啲，但勝在款式多。最緊要所有罐裝包裝飲品都係自助任飲。
環境闊落，帶小朋友都坐得舒服，職員都會經常幫你換鐵板，服務相當不錯。
by admin | 9 月 16, 2019 | Blog, 尖沙咀, 鐵板燒, 韓國菜
韓珍＠尖沙咀
15/9/2019 18:30
太耐無食韓燒，老友建議呢間尖沙咀人氣非常高企嘅韓燒。
餐廳幾大，見到唔少店員都係韓國人，好正宗！
落單後先送上一大堆前菜，個人幾鍾意呢度嘅泡菜同洋蔥。
原來仲有一客焗蛋，脹卜卜幾得意。蛋裡面有多樣材料。
主菜黎啦，叫左一個招牌菜「八色珍味拼盤」$538，分別用上八種調味：人蔘、黑椒、日式燒汁、大醬、辣椒醬、香草、咖哩和蒜蓉，醃製出八款不同顏色烤肉。賣相真係好吸引，急不及待立即燒啦。先由最淺色，相信味道較清淡的燒起。
每件肉都好大件，燒好一邊之後反面，再剪成小塊慢慢燒。肉質相當不錯，非常入味，仲好Juicy。個人最鍾意大醬味，非常韓式，加配生菜包起來食，正好解膩。
另外，叫左一份醬油雞肉 $110，非常入味，又好嫰滑。
另外，仲叫左一份水冷麵 $68，食完熱辣辣嘅燒肉，再食一啖冷麵真係正斗。
好滿足的一餐，店員又會樂意幫你燒埋一份，感受非常正宗的美味韓燒。
by admin | 12 月 27, 2015 | 日式料理, 西餐, 鐵板燒, 馬鞍山
27/12/2015 20:30
馬鞍山終於開番啲人食嘅餐廳! 新開張無耐，等位是常識。店舖唔細，但今次都等左大半個鐘。呢間係餐廳形式運作，相對Food Court食物選擇會多啲，價錢貴少少亦係理所當然。
日式咖哩牛肉拉漢堡扒飯 $73
咖哩汁偏甜微辣，但好淡口。反而漢堡扒做得唔錯，幾鬆軟，亦夠肉汁。
珍寶黑椒牛肉飯加芝士 $69
牛肉相當多，加芝士的確味道豐富好多，仲要自行加蒜蓉汁先係最佳配搭。
點餐可加$15轉套餐，包括一款小食同飲品。薯蓉雖然漏單，但入口幾綿密，醬汁味道亦唔錯。
by admin | 4 月 9, 2012 | 旅遊, 日式料理, 深圳, 自助餐放題, 鐵板燒
大漁鐵板燒@深圳福田
9/4/2012 18:30
6/5/2012 17:30
行完書城，去左福田口岸商場，諗住去食太和鐵板燒，點知全個商場嘅舖頭都執晒笠。只好轉軚去番福民站嘅大漁。呢間鐵板燒深受香港人歡迎，上次試過一次都可以，試多次都無壞。六點半時份，餐廳五成滿，相信大部份都係香港人。價錢比上次略為貴左少少，兩個鐘任飲任食，每位RMB$168。
由於時間尚早，位置都幾鬆動，可以坐喺向窗嘅鐵板枱，親眼睇住師傅表演。而且同枱只有一對夫婦，人少少，可以好快有得食。七點鐘後人流越來越多，獨佔師傅嘅時間越來越少，所以想食好野，真係要趁早。
1. 刺身有五、六款選擇。三文魚、帆立貝、八爪魚、吞拿魚新鮮程度可以接受，味道正常。
2. 呢款蒲燒鰻魚唔係該枱師傅主理，唔知係邊度遊左過黎，相信都係即場燒烤，味道十分之好，鰻魚夠厚身，燒汁好香甜，而且非常入味，一啲都唔腥，難怪係網友熱點菜色。
3. 串燒羔羊肉孜然粉味道好夠，羊肉夠膻香。
4. 法式羊扒係網友推介食品。師傅手藝高超，剛好燒得七成熟，外皮脆脆地，非常香口熱辣。肉質肥瘦適中，非常腍滑，肉味濃郁。配料都係勁蒜、勁蔥、勁牛油，正。
5. 牛舌夠厚身，入口爽脆。試過幾款唔同口味嘅牛舌，似乎紅酒燒牛吞比較惹味，但紅酒味可以再濃一點。清清地可以選擇鹽燒都唔錯。
6. 乾煎鱈魚只用胡椒調味，最後加左類似美極嘅醬汁。魚都係雪藏貨色，但味道都OK。
7. 多春魚最緊要煎得香脆，呢個要求已經達到。
8. 扇貝最緊要多蒜、多蔥、多牛油，所以做鐵板燒就最岩。扇貝肉都好新鮮，夠甜。
9. 胡椒鳳尾蝦係開邊煎熟，只用黑胡椒調味。不過蝦好似唔太新鮮，比較腍身，仲好痴殼。
10. 呢味魷魚鬚真係值得推介，魷魚非常煙韌彈牙，而且好夠鑊氣，非常入味。
11. 半生熟牛肉配酸咪咪嘅類似喼汁物體，但我唔識欣賞。
12. 鵝肝蟹子沙律，本人對鵝肝無興趣，但蟹子沙律就唔錯，沙律汁幾好味。
13. 美式帶骨牛小排其實就好似牛仔骨，味道都係咁，但勝在唔韌。
14. 估唔到松阪豬頸肉原來咁好味，肉味好甜，肉質爽口，用黑胡椒吊味已經好正。
15. 美式奧爾良烤雞翅味道少甜偏辣、肉比較實而且乾身，一般啦。
16. 金牌牛排都係呢度嘅招牌，份量超慷慨。一大塊牛排煎好後，再切成一口大小嘅牛肉粒，肉質OK，七成熟，唔鞋口，洋蔥加胡椒味道好夾。不過份量略為過多，兩人份同四人份一樣咁多，個人覺得任食的話，量多唔係好事。
17. 其實本來係想叫一隻連殼嘅蒸蛋，點知搵極都搵唔到圖畫落單。不過呢個茶碗蒸，蛋都蒸得好滑，又有蝦、冬菇、雞肉等食材，味道都OK。
18. 煎香蕉唔知當唔當佢做甜品好，因為香蕉煎得脆脆地，仲有少許焦糖嘅感覺，但食食下就有咸味出現。
19. 芥末汁鳳尾蝦比前一款蝦好，上面加左唔少蜜糖芥末，更加惹味，可惜蝦都係麻麻新鮮。
20. 之後仲叫過牛肉露筍卷，牛肉OK腍，餡都OK。
21. 炒生菜炒得夠腍，蒜味夠，不過又係一大碟，多到食唔晒。
22. 任飲項目，有多款果汁、茶啡、酒類等，橙汁就好正常唔錯，不過其他飲品就一般。
23. 甜品方面就比較少，紅豆雪糕幾好味，紅豆大大粒唔錯。
RMB$168一位兩小時任飲任食，唔洗再加一小費，計番港幣大約二百蚊埋單。鐵板燒其實食多會膩，因為來來去去都係牛油、蒜、蔥嘅調味。最在乎師傅控制火候嘅功力，蘇花呢位師傅係奧奇的，起碼絕少出現過熟情況。店員基本上都識廣東話，所以落單相當方便，漏單情況唔嚴重。不過落單都要講技巧，因為識落單同唔識落單係會有好明顯分別。
話說當日七點多鐘，有一行四個估計都係八十後嘅年輕人黎到，坐喺同枱最後果四個位。師傅一直不停手咁整緊好多食物，當中嘅一部份係我地嘅，另一部份係果對夫婦嘅，最後一部份可能係幫隔離枱整嘅。當我地享用緊美食嘅時候，新黎嘅四人組，有得睇，無得食。呢個情況重複左四、五次之後，佢地嘅目光開始變得銳利，充滿住殺氣咁仇視、怒啤我地，仲好明顯地講緊是是非非。
造成呢個咁明顯嘅落差，其實係有跡可尋，亦絕對可以避免。
1. 早黎早上岸
需知道客人叫到侍應落單後，廚房都需要拾碼，傳菜出黎俾該枱師傅，再由師傅逐一處理。由你落單到見到啲生肉，呢個時差大約十分鐘，仲未計你要睇埋師傅表演由生變熟嘅魔法。咁就可以解釋得到，點解頭二十分鐘，四位八十後朋友只係有得睇，無得食。因為擺喺佢地眼前嘅生肉，係其他人二十分鐘前已經落左嘅單。
2. 柯打要進取
餐廳Default客人所講嘅「呢樣」同「果樣」，份數係會乘以人頭數量。如果你一行兩人，叫「呢樣羊扒」，佢會俾你地每人一件，總數等於二。按呢個方式點菜，如果你每次叫一款、兩款的話，我相信食到聽朝都食唔飽。所以柯打要進取一點，反正落多、落少都係一樣價錢，只怕你食唔晒。我地多數一次過落五款食物，食得七七八八後，又再落新單，所以Keep住密密有得食。再者，人開始多，侍應們都太忙，把握得到侍應幫你落單的話，就要珍惜機會講多啲，以防有日，揮左十次手都無人理。
只見四位朋友，用「自己叫自己果份」嘅策略，每款食物嘅總份量由四變成一，就算我地唔在場，當然只得一個人有得食，其他三個齋睇。而且一般鐵板師傅都會將同類型食物一次過處理，以便控制同減少清潔鐵板次數。如果每樣只叫一件，師傅當然會集齊多一啲，等齊數先處理，等候時間就相對較長。
3. 把握時間
人人都知道，任飲任食得兩個鐘。鐵板燒係需要時間處理，其實可以把握空檔時間，點一啲唔需要鐵板都處理得到嘅食品，例如刺身、沙律、甜品等。即使鐵板未輪到你，都可以一邊嘆住刺身，一邊等，起碼唔會覺得苦悶或難過。你估我地真係無冷場咩? 我答你一樣有，只不過一到冷場時間，我地就會叫刺身慢慢食，充實番啲時間。與其有時間去怒啤人或者講是非，不如揮多幾次手叫侍應幫你跟跟單。
4. 注意禮儀
作為餐廳，相信都係用最公平、先到先得嘅原則去招呼客人，真正跟單做野。如果朋友們唔識遊戲規則，不單只埋怨齋睇無得食，更認為師傅偏心我地嘅，都無說話好講。OK，如果真係的話，咁又要諗下，點解師傅無論係真心，定係不自覺地又好，做出佢地所謂「偏心」的行為。
人始終係有感情嘅動物，師傅作為服務提供者，客人一句唔該，一句稱讚，一面真心覺得好味、欣賞嘅表情，其實佢地一定睇到。客人嘅欣賞都係佢地工作嘅推動力，佢開心，自然更樂意去服務你。客人應有嘅禮貌，可以換取應有嘅服務，都係互相尊重嘅表現。如果客人多是多非，投訴的投訴，師傅們睬你都唔係真心架啦。
先自聲明，我地(相信旁邊對夫婦都係)無俾任何貼士，師傅亦都無義務只係招呼我地，更何況個人覺得佢並無偏心成份。惟一有可能嘅，就係我地都好期待師傅嘅每一樣作品，亦會好用心慢慢品嚐。又可能，我影左唔少相，個師傅以為我係記者囉。咁你地都可以影架!
大約八點半鐘，食飽飽起身走人。就喺起身嘅一秒間，雙方各自笑一笑。我地感受到，四位朋友邪惡嘅笑容之下，潛台詞應該離不開「你地早走是著啦，我地終於都可以慢慢嘆」。咁在下都惟有恭喜幾位守得雲開，終於都可以獨霸師傅啦。參考過去一小時四位嘅進度，估計在坐嘅幾位男士，飽腹程度未夠一成。但最神奇嘅係，我地停手投降後，師傅係得閒到可以行開鐵板枱同人傾計，相信四位朋友真係仲未捨得正式落單。大家都係八十後嘅朋友，其實我地嘅笑容背後，隱藏住一個由心而發嘅忠告，希望佢地知道「時間剩餘最後四十五分鐘!」
後記
6/5/2012 17:30
上次食過翻尋味，諗住再食多次，點知福民店裝修裝到七月，最後轉戰會展中心分店，不過好明顯呢間分店差十萬倍。
1. 環境雖然較高檔，但一入到餐廳一陣異味，最後迫住坐喺近門口張枱，冷氣極不足。
2. 每枱人數十位，比福民店嘅八位多，所以師傅更加忙。
3. 職員明顯比較懶散，落左單十五分鐘，師傅仲未現身。職員得閒到四圍遊傾計，最積極就係收起你本Menu，等你無得叫野。
4. 食物、飲品、甜品質素較差，無上次咁新鮮，刺身每份都係細細件，色水麻麻。
5. 師傅烹調技術一般，多次出現燒燶、過份熟、過份唔熟、調味過份重手、調味過份輕手等問題，水準極唔穩定。
無可否認，呢間店都有可取之處
1. 每位多送兩款醬料，一款黑椒汁，另一款芝麻醬，味道都ok。
2. 漏單情況唔嚴重，出菜速度可以接受。
3. 劃一用餐時段，第一場17:30至20:00，下場20:00至22:30，保證夠時間。但其實到咁上下，佢都會催你交枱，絕對食唔到兩個半鐘。
最後，就算無得揀，都唔會再去會展中心分店，寧願唔食，係咁多。
