by admin | 9 月 29, 2024 | Blog, 小食, 深圳, 西餐, 飲品, 麵包
深圳新洲 29/9/2024 17:00
抽到大眾點評0元探店，開發一個新嘅站點，從來未嚟過呢個小區，沙尾站落咗車之後都仲要行10分鐘。小店就係一個籃球場小巷嘅後邊，一個神秘嘅後花園咁。餐廳內外裝修好有格調，好多打卡位，非常靚。正中間就有個大大嘅月球，不論光或暗都好，整個佈局都好靚。
今次送嘅套餐係一份自選貝果加芝士醬及飲品。另外再單點一個貝果三文治套餐（88元）。老闆娘見我哋有額外消費，自動幫我哋將普通咖啡升級做特飲。
入座就送上一份餐前小食，桂花蜜糖車厘茄。車厘茄非常新鮮，滿滿果汁再充滿着蜜糖嘅甜味，蜜糖還帶一點桂花香，估唔到呢個配搭咁好食。
葡萄肉桂貝果配巧克力黑芝麻奶酪醬：暖暖嘅貝果口感煙煙韌韌韌，帶肉桂香，仲有唔少提子乾，非常適合小朋友嘅口味。黑色醬料實在太濃郁，充分食得出朱古力、黑芝麻、芝士三者味道。貝果塗上醬料後，完全係另一道料理，滋味無窮。
萬物生長抹茶生椰拿鐵：上枱一刻完完全全展示出萬物生長嘅自然生態。飲品嘅味道都相當不錯，草系抹茶粉味道香濃，木系朱古力亦係濃郁口味。飲得出咖啡都係精選過，似乎係店方推薦嘅巴西之光咖啡，口感非常幼滑，味道香濃，有牛奶巧克力嘅味道，帶一點夏威夷果仁嘅香氣。呢杯仲加上椰香味同埋抹茶味。賣相好得之外，味道仲非常驚喜。
美式超級雙拼三文治：三文治嘅斷面非常吸引，呢個揀咗芝麻貝果，貝果面層芝麻非常多。漢堡扒大大片，肉汁豐富，加咗塊類似薯餅嘅東西喺中間，有香脆嘅口感，仲有好多新鮮蔬菜，菠蘿帶一點酸甜清爽，醬汁充足，貝果中間好濕潤，非常之豐富嘅三文治。另外仲有一小碗粟米粒，非常香甜。
貝果甜心熱可可：朱古力味相當濃郁，上邊仲有一層厚厚嘅鮮奶舖，仲加咗薄脆，非常好味。
by admin | 9 月 29, 2024 | 深圳, 飲品
深圳南頭古城 29/9/2024 14:00
鴨屎香檸檬茶 26元
超大杯！超正！
檸檬味夠濃，茶底又香，夠凍，又解渴。
by admin | 9 月 8, 2024 | 深圳, 甜品, 飲品
奈雪的茶@KKmall 主題店、東門1234
8/9/2024 11:00
深圳奈雪的茶，今次出嘅聯乘主題實在太給力，竟然係哈利波特系列。七月尾推出之後，過咗兩個星期先抽倒時間上嚟，發現部份產品已經售罄。今日特登嚟到KK Mall主題店打卡，下一站再去東門，終於儲齊大部份嘅產品。
四色主題飲品Get!
Gryffindor 紅：霸氣莓莓桃 21元：草莓味蜜桃味，非常香濃清爽。
Hufflepuff 黃：霸氣楊枝甘露 19元：芒果蓉非常多，仲有西米椰汁，西柚，完完全全就係楊枝甘露。
Slytherin 綠：霸氣羽衣甘藍奇異果 21元：奇異果酸甜，果肉非常多。
Ravenclaw 藍：霸氣芝士葡萄 19元：青提子酸酸甜甜，加上芝士奶蓋。
奧巧布蕾小貝 15.8元：9 3/4月台、校徽圖案非常之清晰。甜品係朱古力蛋糕，加上Oreo忌廉，味道濃郁。
芋泥椰椰銅鑼燒 14.8元：銅鑼燒本身非常香甜，內餡係厚厚嘅芋泥，加上椰子蓉，估唔到呢個配搭相當不錯。
提拉米蘇銅鑼燒 14.8元：咖啡味香濃，忌廉幼滑，非常不錯。
一杯飲品加聯名方巾套餐 35元，方巾原來好大塊。
兩杯套餐送金探子磁貼，金屬感十足，非常有質感。
霍格華茲玻璃杯 58元，深圳已經全線存貨，要麻煩人幫我喺東莞帶落嚟。
by admin | 7 月 21, 2024 | 外賣, 深圳, 飲品
深圳保利文化廣場 21/7/2024 16:00
黑糖珍珠有機奶 13.8元
味道不錯，珍珠黑糖味濃。
by admin | 7 月 21, 2024 | 外賣, 深圳, 甜品, 飲品
深圳KKOne 21/7/2024 11:00
抹茶紅豆麻糬拿鐵
抹茶流沙拿鐵
兩杯點評價38.6元
抹茶底加鮮牛乳，茶底都幾濃，奶味香幼滑，抹茶奶來說味道不錯。其中一款加入大大粒紅豆，味道微甜，豆味幾香，麻糬非常杰身，口感煙韌，非常飽肚。
by admin | 6 月 30, 2024 | 2024 珠海長隆飛船樂園, 中菜, 外賣, 小食, 日式料理, 珠海, 甜品, 韓國菜, 飲品, 麵包
30/6/2024 18:30
返酒店補給之後，就搭十分鐘的士去市區中央匯。原來所謂嘅商圈都係地舖為主，並非商場，舖頭唔多，仲有好多都執咗。
古春堂@中央匯 30/6/2024 19:30
冇乜嘢食，唯有搵甜品食下又可以坐下。呢間古春堂食係老字號非遺涼茶。
琥珀桃膠椰奶15元：桃膠都相當多，椰奶微甜，好滋潤。
糯糯芋泥大滿貫 19元：污泥味道幾香，應該仲有豆腐花，椰汁西米等，幾粒芋圓煙煙韌韌，口感不錯。
嫰仙草大滿貫 18元：非常豐富，有好多芒果、紅豆，一粒粒小丸子，下邊仲有好多仙草。
十幾蚊一碗糖水，平靚正。
由於呢個地方唔太適合坐低堂食，最後決定買幾樣外賣返酒店食。
漢江里炸雞
蒜香醬油、雪花奶酪雙拼 45.88元、煙燻威士忌脆脆雞 12.88元、韓式年糕2.1元
炸雞份量唔少，外皮脆脆的，蒜香醬油味甜甜的，另外一款係雪花奶酪芝，上面鋪滿芝士粉，芝味濃郁，甜甜的。煙燻威士忌唔係太食到咩味道。年糕煙煙韌韌，口感不錯，加配價實在太抵。連埋包裝運送費70元，都幾抵食。
太阪町
章魚小丸子11元：小丸子賣相不錯，味道對板，餡料豐富，醬汁同埋鰹魚片都夠多，估唔到平平哋出品唔錯。
超值三件套 23元：有六粒小丸子、一個經典滷蛋飯團、一杯珍珠奶茶，相當抵食。飯團材料都好豐富，滷蛋特別好食，小朋友都好鍾意。
瑞可爺爺
起司酪酪 6.2元：其實係一塊多士，上邊放咗唔同嘅芝士烤焗，未到鹹鹹甜甜，估唔到相當不錯。
車打芝士蛋糕 24元：蛋糕上面有老爺爺的圖案，大大個可以切做好多塊。蛋糕本身鬆軟，除咗打咪仲有微微芝士香，中間再夾左兩層車打芝士，多一份咸香味，估唔到咁好食。
