by admin | 3 月 28, 2024 | 2024 復活節六人行台北之旅, BB Friendly, 台北, 台式, 旅遊, 飲品, 麵包
貓懶 28/3/2024 18:00
貓空有好多餐廳，都係自家經營，遍佈成個山頭。因為有大有細，擔心太夜山路漆黑，所以揀餐廳一定要近纜車站，最後就揀左呢間四爺品牌嘅貓懶。距離纜車站只係2至3分鐘腳程，一座大大嘅三樓村屋改裝成私房菜形式餐廳。先經過二樓就係四爺，宮廷式裝修太豪華，而三樓天台改裝半戶外位置就係貓懶。職員有提醒過今日天氣比較悶熱，但一上到黎個景觀已經值回票價。還好天氣唔算熱，間中有自然風，算幾舒服。
我地坐最外圍嘅一張八人大枱，靚景盡在眼前，可算一覽無遺。始終係戶外地方，枱椅都封塵係絕對理解，亦無投訴。餐廳提供台式料理，菜式選擇都好多，亦有好多茶飲。落單後好快就上菜。
鐵觀音鮮奶茶 NT$220﹕以一壺上配細杯細幾特別，份量都唔少，斟極都仲有。鐵觀音茶香味濃，奶味配合得宜，熱飲更有味道。
五彩小饅頭 NT$180﹕人氣必點一品，新鮮熱辣可愛小饅頭，有綠茶紅豆、南瓜、燕麥、芝麻、紅莓味，口感鬆軟，味道香，小朋友十分鍾意。
金字塔茶炒飯 NT$290﹕金字塔形做得好公整，炒飯炒得乾身有茶油，有蛋、蘿蔔等簡簡單單。
鐵板牛柳 NT$330﹕牛有牛味，帶好輕微辣，但口感比較韌，似乎熟左少少。
茶燻雞 NT$380﹕雞肉幾滑，有好香煙燻嘅味道，唔知呢種係咪就係茶燻。
蝦醬炒空心菜 NT$200﹕味道足夠。
茶人茶溪蝦 NT$300﹕ 原來係炸得好脆嘅蝦仔，真係非常香脆，個殼仲有少少硬，下面舖滿炸米粉，送飲品應該不錯。
全餐連加10%服務費，埋單NT$2,090。之前係Klook搵到優惠$98可以作NT$500消費金額，即差不多八折，最後一共買左四張。扣除現金券後補差價NT$90，實價即係港幣$98X4+$22.5 = $414.5。
全餐飯見證日落到天色變暗，最後全黑仲伸手不見五指。入夜後枱上只開左一盞小燈透出一絲絲光，好有情趣。黑到連餸都睇唔清楚，的確係幾難忘嘅體驗。餐廳環境一流，觀景一流，入夜後見到山下燈光。食物算可以，夜景無價，反正係香港絕無可能有呢個體驗。
by admin | 3 月 28, 2024 | 2024 復活節六人行台北之旅, 台北, 外賣, 甜品, 飲品
28/3/2024 13:00
午餐後繼續下午行程，先坐遊園車上車，可愛動物造型車，車費只需NT$5，Klook套票仲已經包括在內。
車程其實都唔短，可以慳番腳骨力上山。從山頂最高處慢慢遊落山，有企鵝館等，仲見到好多大型動物，大象、長頸鹿等。鳥園範圍都好大，雀鳥喺入園飛，隨時喺你頭頂飛過。最後係穿山甲熱帶雨林館，營造氣氛不錯。
怡客咖啡 28/3/2024 16:00
動物園內嘅超人氣打卡咖啡，每杯飲品都送上一粒水豚君棉花糖。
水豚君棉花糖抹茶歐蕾NT$120
麥芽摩卡咖啡NT$110: 咖啡味都幾香，朱古力味道更重，棉花糖非常可愛，質地比較實淨，安安穩穩咁浮起咖啡面。
最後玩到下午4:30離開。
天氣還尚算好，早上短暫陣雨好快過，下午開始出太陽就又熱又曬。而且動物園實在大到離晒譜，行足一日其實都跳過好多地方。整體嚟講，都好值得帶小朋友黎。
by admin | 3 月 28, 2024 | 2024 復活節六人行台北之旅, BB Friendly, 台北, 旅遊, 甜品, 西餐, 飲品
化石先生熊貓主題餐廳 28/3/2024 12:30
行完山下園場都12點，午餐就係最人氣嘅熊貓館二樓，新開嘅「化石先生 熊貓主題餐廳」。餐廳人氣相當高，評分4.6，係動物園裡最高質餐廳。黎到已經要排隊等一陣位。餐廳座位舒適，靠窗位置仲可以見到樓下嘅熊貓。餐單主打西式輕食，選擇都相當多。
焦糖拿鐵NT$150、鳳梨蘋果汁NT$180、奇異果汁NT$180、鳳梨冰茶NT$150﹕果汁類全部鮮即榨，味道有驚喜，水果新鮮酸酸甜甜，仲有果肉。咖啡味道香濃，不錯。
奶香蘑菇燻雞意麵 NT$300﹕意麵質地煙韌，奶油醬好香奶味，非常忌廉咪，材料都多，雞肉、蘑菇、西蘭花等。
青醬海鮮意麵NT$350﹕第一次試青醬，醬料有香草味，估唔到咁香濃咁惹味。海鮮料非常多，味道對板。
肉醬麵NT$280﹕肉醬相當豐審，正正常常。
章魚燒比薩NT350﹕賣相吸引，薄脆餅皮新鮮熱辣脆卜卜，醬料多，甜甜的，芝士多，海鮮料亦多，好有日式風味。
炸物拼盆NT300﹕款式多，香脆可口，洋蔥圈最好味，仲有魚柳、炸雞肉質都OK。
提拉米蘇NT100、彩虹蛋糕NT190﹕蛋糕賣相都好靚，彩虹蛋糕非常吸睛。蛋糕鬆軟味道略甜，但個人幾鍾意。仲有一款小熊貓蛋都相當出名，可惜賣晒。
埋單NT2,530，唔算太平但又唔算貴，坐得舒適，味道都不錯，主題景點餐廳算可以吧。
by admin | 3 月 27, 2024 | 2024 復活節六人行台北之旅, 台北, 台式, 外賣, 甜品, 飲品
徐杯杯粉圓仙草@Uber Eat 27/3/2024 22:00
返到酒店梳洗好之後，發現時間尚早，加入咗Uber試用一個月，可以無限運費，即刻試吓order甜品。好快就收到貨，效率非常高。
牛奶芋圓嫩仙草 NT$75: 材料非常多，面層鋪滿仙草，味道好香，非常滑。仲有好多珍珠，芋圓爽粒，煙煙韌韌，味道香濃，本身牛奶底唔算太甜，夠晒凍，不錯。
珍珠鮮奶茶 NT$75: 奶茶味道不錯，茶底都幾香，珍珠煙煙韌韌。
黑糖仙草凍飲 NT$55: 黑糖味比較濃嘅奶茶配仙草。
估唔到隨便叫一個外賣質素都相當高。
by admin | 3 月 27, 2024 | 2024 復活節六人行台北之旅, 台北, 小食, 旅遊, 燒烤, 甜品, 飲品, 麵包
27/3/2024 16:00
終於都離開酒店開始我哋嘅旅程，先去寶雅百貨巡視一下，店舖相當大，絕對適合補給。朝頭早落酒店最近嘅「南京復興」捷運站。先係捷運站買行程所需嘅悠遊卡，開卡每張NT$100。另搵返兩張應該十幾年前嘅悠遊卡仲用得，實在太厲害。加值NT$1,000 ，應該夠晒呢個行程使用。
近近地第一站去「松山」，捷運只需要七分鐘。值得一提台灣實在太過親子友善，捷運第三至四卡係親子友善車箱，裝置比較可愛，非常適合帶BB車俾我哋。
16:30
饒河街夜市
福州世祖胡椒餅 NT$60
五點未到，「饒河街夜市」好多店舖仍在準備中。福州世祖胡椒餅已經開左，已排左幾個人，買兩個來試下。新鮮即整，熱到辣口，外面酥餅脆卜卜，中間肉好多腍而且勁有肉汁，好香胡椒味，調味夠濃郁又有辣味，認真不錯。晚飯後再經過，已見到打晒蛇餅排隊，排到出夜市牌坊外，人氣真係超勁。
優品娃娃親子遊樂園
台灣必玩抓娃娃機，呢間係Google得到4.9分好評，極高人氣嘅遊樂場。平日五點幾來到，人唔多，基本上可以任選機玩。第一次玩小試牛刀，小朋友都成功夾到零食，滿足感十足，越玩越上癮，繼續唱錢玩。玩過有標明新手機，爪力超強唔會鬆，只要對岩個位基本係必有收穫，成功出到幾次飲品。主要挑戰較易夾嘅薯片、零食類。最後玩左大約NT$800，半車仔戰利品，第一次玩算相當滿意。戰利品都唔差，即食士多啤梨雪條都好食。新貴派花生朱古力派超正。黎到台灣深深感受原來夾公仔真係會夾到野，有得玩有得食有得拎，大人細路都玩得開心!
赤焱厚子骰子牛中份 NT$300
場內有幾檔燒牛粒，呢檔係帥哥師傅，師傅即場燒烤，好似睇緊煙火Show咁，火光熊熊，非常浮誇。中份份量都唔少，牛扒切成少粒，牛味濃郁，熟成度適中，質素都算幾夠腍。基本有輕微咸味，一款加入玫瑰鹽帶甜香味，另一款加左檸檬椒鹽帶輕微酸味。
古早味香腸 NT$60
晚飯後再去，夜市係超多人，驚覺BB車係完全入唔到，幸好今日黃昏已來過。最後決定試埋台灣特色一口香腸，都要略為排一下隊。NT$60一份有六大粒香腸，即烤熱到爆，外皮脆皮，中間內餡唔乾，味道濃郁。
50嵐
50嵐都係台灣出名茶飲店品牌，揀左招牌No.1試一試。四季春珍波椰 NT$50﹕茶底清香，不太甜，配料相當多，爆珠波一咬爆汁，椰果香甜，仲有煙韌珍珠。
婆婆麻糬
係夜市路口見到婆婆手作芝麻花生麻糬，一盒NT$80，大大粒，外皮煙韌，中間內餡多到爆，花生味同芝麻味各有特色，非常香濃。
去台灣必行夜市，今行有老有嫰，只係黃昏入夜前來感受一下。入夜後真係非常熱鬧。
by admin | 3 月 3, 2024 | 外賣, 旺角, 飲品
旺角 3/3/2024 14:00
奶蓋奶味濃，微咸，不錯。果汁飲得出去係黑提味，冰粒略嫌打得唔夠細。
