30/6/2024 11:45
中午選擇嚟呢度食自助餐，點評優惠非常抵食，兩大一小只需要350元。餐廳係近飛船酒店，一入去已經見到落地大玻璃，有好多珊瑚同海洋生物。時間尚早，入座率唔高，可以坐喺一張六人大枱，對正大玻璃。
食物款式唔算多，最近嘅就有麵檔，點心部。全場最名貴嘅就係粉絲蒸扇貝。
場中間就係熟食區，比較特別嘅有潮式拼盤、燒味。味道到位。
日式區仲有炸物、幾款壽司、飯團。仲有一個區域係麵包、冷盤。旁邊仲有自助飲品區，各式汽水果汁咖啡茶都有。
最值得留意就係甜品區，款式都幾多。必試園區限定朱古力潛艇，朱古力味道濃，中間仲有流心果醬。奶凍非常幼滑。提拉米蘇素撻咖啡味朱古力味都夠濃。紅絨蛋糕細細件，奶油味幾香。小朋友就最鍾意棉花糖。
食物款式唔算多，冇太多名貴嘅菜式，刺身，雪糕都冇，只係簡簡單單各式各樣熱盤，感覺上一般餐廳貨色，甜品相當唔錯。以人均$100嘅價錢喺樂園食到無限任食已經非常抵，環境一流，餐廳提供BB椅，兒童餐具等，非常貼心，服務亦相當好。
30/6/2024 10:30
早點check-in會即刻送埋兩日樂園入場券。搭酒店穿梭巴士到達飛船酒店，大堂有好多打卡位。
酒店大堂落一層就有一個好細嘅入閘位，安檢排隊都排咗一段時間，再出到一個戶外嘅中庭，就係樂園嘅入口。
今日會食自助餐，趁而家仲有少少時間，先行下層嘅一部份。下層村冷氣相當舒服，空間感十足，裝置都非常新淨。
遇岩時間睇到珊瑚長老動雕秀，20分鐘，光影音效不錯，有互動有教育意義。
30/6/2024 10:00
10點未夠就到酒店check in，人都幾多。上次都係住呢間酒店，感覺平靚正。今次再黎大堂多左一個兒童遊樂場，簡單滑梯同波泳池，足夠俾小朋友等緊check-in嘅時候玩。大堂外露天地方仲多左幾隻動物。
今次係中旅社買套票，包一晚酒店，飛船樂園門票兩大兩小共$1095，呢個價錢實在抵到爛。
大約6點回程返酒店時攞房，原來派咗去歡樂區驚一樓，升降機都唔使搭，鑽入走廊第二間就係，方便到不得了。酒店房幾闊落，兩張單人床，拼埋一齊都足夠一家四口，基本送咗三枝蒸餾水，仲有兩大兩小嘅梳洗用品，洗頭水沐浴露等，算應有盡有。前台仲幫忙安排咗加床欄，小朋友更加安全。
酒店有穿梭巴士去園區各處，十分方便。
27/2/2024 13:00
台灣到著！落機等一陣就可以拎番BB車。因為台灣禁止豬肉入口，臨到入境大堂前，檢查多一次手提行李過X光。還好流程好快，直行直過。去到入境大廳好快就被招待行禮遇通道，唔洗排隊實在太好。成個流程都好快，去到等行李用左少少時間。
出咗閘之後第一件事就係「遊台灣金福氣」抽獎，可惜登記左六個名額都唔中，冇得升級做豪華團。
大約2PM正式離開，拎咗行李就聯絡「小傑車隊」司機，出去大樓外候車區，好快就等到司機，估唔到係年輕司機，仲幫手搬行李，非常有禮。車型係T6九座商務車，座位唔算太闊，但係我哋六個人足夠有餘。行車相當安全順暢，四十五分鐘已到達酒店。司機非常好，原收費NT$1,350，都俾齊頭NT$1,400。計返港幣大約三百幾蚊，一家大細坐一架車舒適又方便。
14:45
唔洗一個鐘頭車程就已經嚟到台北之旅嘅落腳點「JR東日本大飯店台北」。落車一刻即刻感受到五星級貴賓招待，最初兩位服務員幫我哋拎行李，不知不覺再來多三四位，招待我哋一家大細落車，行李完全唔洗自己取。酒
酒店算大，大堂有氣派，中庭向上望見到酒店全高，空間感十足，裝修好有日式風味。酒店係2021年夏季開幕，知道都係由前身舊酒店重裝加建，但整體感覺非常新，真係同住新酒店無誤。
Check In時服務員說明好清楚詳盡。由於時間尚早，其中一間房已完成可用，另一間在旁邊的房尚待最後檢查。最後決定先取一間房卡，轉頭再攞另一間。
房間位於六樓，房間比想像中大，裝修清雅，整齊清潔，係好典型日系酒店風格。落地玻璃無風景，見到出邊商業大廈。兩張單人床都算幾大，可以兩床合拼，變成一張超大床。原本遲左預留嘅床圍都順利得到，亦已經安裝好。旁邊仲有小椅，書枱等，仲有足夠空間可以撻開兩大件行李。周邊USB插蘇，牆身插蘇非常多，小酒吧每天送上六枝水，茶包、咖啡等。廁所更加大，智能日本座廁，除左企缸仲有大浴缸，洗面空間都係非常大。備品有沐浴露、洗頭水等都齊備。好細心地準備兩套小朋友牙刷同拖鞋，電視亦有兒童台。真係一間設備齊全，非常適合家庭旅客嘅酒店。
說時遲那時快，前台來電話已準備好另一房，服務員將特意上來送房卡。另一房佈置大致相同，面積略為細少少，但空間已算不錯。
酒店坐落捷運南京復興站旁，最近兩個出口都有升降機，大約步行一分鐘直達，附近有幾間便利店，再行五分鐘就有一間三層高嘅生活用品百貨，寶雅，除咗一般生活用品，仲有好多藥妝，零食飲品等等，非常適合補給。
11/8/2023 12:00
自助餐有新鮮生蠔，雖然唔係好大隻，但勝在非常鮮甜。刺身選擇多，非常之新鮮。仲有日式冷麵可以自加醬汁。
每位客人都送上一隻忌廉芝士焗帶子。芝士味幾香，但只真係好大隻，都幾鮮甜。
熱盆選擇都好多，最角落頭嘅燒烤最吸引，烤肉同埋腸仔味道不錯。仲有即煮沙田雞粥同埋意粉。
甜品款式多，有豆腐花、各色奶凍、各色西餅蛋糕
麵包布甸、雞蛋仔夾餅等，好多都係香港傳統小食。當中最好味就係豆腐花，亂粒粒，非常滑，自行加上薑糖水同埋黃糖，連續食咗幾碗。
雪糕當年係Haagen daze 已經upgrade左做Movenpick。
生日仲送上小蛋糕，開心。
餐廳唔算好大，但係座位都算闊落。
Alva House＠沙田帝逸酒店
23/7/2023 11:30
官方做七折優惠，平到震，成人$400多，小童$270，即試！
款式選擇多，質素高，而且人唔多，可以唔洗排隊拎野食，慢慢歎。生蠔新鮮大隻好鮮甜，刺身都好新鮮。熱盤最好味係日式串燒，天婦羅。甜品雪糕勁多口味，又靚又好味。
22/6/2022 12:00
感謝老細周年聚餐，請全世界去帝逸食自助餐。聽聞都幾難Book，而且價錢唔平，真開心。
先拎幾款刺身、凍盆，樣樣都幾新鮮。三文魚相當鮮甜。
生蠔都要排一陣隊，即開生蠔都幾大隻，相當甜，食左幾轉。
熱盆選擇都好多，特別推介燒牛肉，都幾腍，幾夠牛味。仲有日式串燒。
一向食自助餐都主攻甜品部，選擇實在好多，小杯奶凍類特別好食，抹茶蛋糕都印象深刻。最後仲有迷你杯Haagen Dazs。
整體算相當唔錯，如果有優惠會想再試。