觀塘海濱匯 18/8/2024 12:00
香草紅酒汁燴牛面肉配黃薑蕃茄飯 $118
牛面肉都好多件，仲有啲薯仔，紅酒汁非常濃郁，牛肉煮到腍晒，入晒味。黃薑蕃茄飯本身已經有美味嘅香氣，加埋紅酒汁，非常下飯。
卡邦尼薄餅 $168
大大個薄餅焗得啱啱好，上邊嘅芝士微焦，賣相好靚。有別於平時食開嘅蕃茄醬汁，呢個薄餅用上香濃忌廉汁，材料非常豐富，有好多芝士、煙肉，最特別係有幾隻鵪鶉蛋，一咬開就爆汁，蛋香滿滿。
迷你炸魚薯條兒童餐 $78
上次食過今次繼續要encore嘅炸魚薯條，一樣都係香脆可口，魚柳新鮮熱辣。
餐後追加兩份甜品，其中一份係士多啤梨芝士蛋糕，士多啤梨味香甜，芝士味濃郁。另一件係藍莓芝士蛋糕，芝士蛋糕嘅基礎上鋪咗酸酸甜甜嘅藍莓，非常好味。
觀塘海濱匯 4/8/2024 12:00
喺牛頭角行過去海濱匯起碼15分鐘，全程露天冇瓦遮頭熱到死。餐廳就喺商場一樓，其實玻璃窗望到海，環境都幾舒服。位置同Flames正對面，其實咪又係同一個老闆。
Brunch menu
八安士紐西蘭肉眼扒 $188 賣相幾靚，做到要求嘅七成熟，牛膻味幾香，肥瘦適中，口感不錯。配菜揀咗蔬菜。
葡式燒雞扒漢堡 $128 大大個漢堡，雞扒超級大塊。麵包本身幾香，葡式燒雞帶微辣，但呢個味道比較亞洲風味，個人就麻麻哋，幸好雞扒充滿肉汁，加咗蕃茄同埋生菜，平衡不錯。
假日兒童餐免費，每份$78，只需比加一服務費，超抵。迷你炸魚薯條，不過不失。薯條新鮮即炸，粗身好味。夏威夷薄餅呢個份量，一啲都唔迷你，薄餅有驚喜，餅底鬆軟，菠蘿超甜，大大塊火腿，醬汁夠多，不錯。
加$35要咗Tiramisu，大大杯，忌廉夠滑，蛋糕級晒咖啡， 夠濕潤，夠濃味，整體不錯。埋單$440。
位置的確麻麻，估唔到人流都幾旺，似乎都係呢個買一送一好大吸引力。
Flames @觀塘鴻圖道 28/7/2024 12:00
早幾年幫襯過黃埔分店非常鍾意呢間餐廳，剛發現原來觀塘都開咗分店，今日來觀塘行街，就決定喺度午餐。
兒童餐迷你炸魚薯條 $78
估唔到兒童餐嘅迷你炸魚薯條都咁大份，好好奇咁正常size會多成點呢？三大件魚柳炸得香脆，粉漿薄薄的，啖啖魚肉，好實在，配上偏酸味嘅他他醬，好味，小朋友最鍾意。薯條都係非常多，新鮮炸起，脆到不得了。兒童餐仲有一杯蘋果汁，實在太抵食。中
黑松露醬蘑菇牛肉漢堡 $158
非常澎湃嘅一份漢堡，賣相好吸引。漢堡包烘得鬆脆，牛肉漢堡非常厚身，牛味香濃，咬落肉汁流晒出黎。配料仲有番茄、蘑菇、生菜，好清爽，正好解油膩。醬汁係帶微酸嘅黑松露醬，整體嚟講，相當不錯，好飽足。
海鮮香草茄醬薄餅 $188
特別送上一個鐵架放起Pizza，非常吸睛。餅底較厚身好鬆化，上面鋪滿芝士，大大隻蝦，魷魚圈，仲有一大片煙三文魚，實在太豐富。
午餐每份都送餐飲，埋單$460左右。食物選擇唔少，小朋友最鍾意嘅漢堡、Pizza同香口野都有，份量仲相當多，以上三款已經非常豐富，兩大兩小食到捧住個肚走。雖然喺觀塘地鐵站行過嚟有少少距離，但勝在環境舒適，又提供BB椅，全套兒童餐具，非常適合一家大細，會encore！
深圳喜薈城 25/7/2024 16:00
美奈雙人下午茶 54.9元
芒果魚柳米紙卷賣相實在太靚，米子卷包住好多新鮮蔬菜，仲有一件脆魚柳，沾上酸甜汁，非常清爽。香茅雞肉串有四大串，雞肉幾滑，香茅甜甜地，味道好香，好食。跟餐飲品係香檸甘蔗汁，甘蔗汁之上加咗青檸味道，個人嚟講覺得怪怪地。不過下午茶餐平日限定，非常抵食。
另外加咗一碗兒童餐牛肉湯河，只需9.9元。雖然細細碗，但係仲可以免費續麵。河粉非常誘惑，湯底清甜，牛肉都幾甜，呢個價錢實在太抵。
感覺幾正宗，價錢唔貴。
深圳喜薈城 25/7/2024 11:30
今日係家姐正日生日，特登趁平日時間去喜薈城玩波波池。中午已經鎖定左呢間摩打食堂為小妹妹慶祝生日。
入咗後先來選茶包，揀咗香印提子味，真係有好香甜嘅提子味。
超級彩虹鋪天蓋地雪花火牛壽司 上頭蒜香味 39.9元： 係店內必食No.1。服務員推出一個鐵架，即場加上自選嘅上頭蒜香味鹽樽，再用火槍即場燒烤。最後放上壽司飯以及調味料，仲有一隻生雞蛋，就完成呢一件非常之浮誇嘅壽司。
獨家爆汁120天走地鮮炸雞 49.9元：店內必食No.2，擺盤都係非常浮誇，一個大盒插住走地雞嘅相片，裝住四大件炸雞，仲有三款沾醬。炸雞外皮脆脆的，雞肉非常淋滑，肉汁豐富。沾醬除咗有酸酸辣之外，蜜糖味都非常好味，另外一款就係微酸蛋黃醬，非常好味。
明太子烤土豆 39.9元：已鐵盤承載一大件土豆，上邊有厚厚嘅一層明太子，土豆非常之綿密，明太子味道香濃。
摩寶奇趣盒 39.9元：非常之豐富嘅一個兒童餐，主菜有兩大隻蜜燒雞翼，玉子小卷、青瓜小卷，仲有大大件吞拿魚壽司同海草壽司。仲有粟米沙律同燉蛋。最後仲有新鮮水果同埋飲品。兒童餐送上一套顏色筆畫具，小朋友最開心。
赤焰帝王蟹腳鞭炮拼盤 49.9元：一碟放上六件蟹腳壽司，即場用火槍火炙，令到蛋黃醬焦化。壽司大大件，蟹柳香甜，非常不錯。仲有一件厚燒玉子，甜甜的。
雙重炭燒鰻魚小卷 29.9元：超級迷你鰻魚小卷，又揼入口都食唔出有鰻魚。
蟹子爆炸頭軍艦 9.9元x2: 份量非常旁白，質量非常高的蟹籽軍艦。
餐後仲可以去自助打雪糕，牛奶味雪糕非常香濃，口感幼滑，出品不錯。
知道小妹妹生日，姐姐哥哥特登送上生日壽桃，仲載歌載舞唱生日歌。之後仲送多一首「愛你」炒熱氣氛，的確令人好開心。最後仲可以抽一個扭蛋禮物。
食物味道相當好，餐廳環境闊落，哥哥姐姐服務超級殷勤，都非常照顧小朋友，不時送小禮物，臨走仲送上金幣俾小朋友出去扭蛋。今日一餐好味又好玩，滿載而歸。
深圳下沙泰然 21/7/2024 11:20
今日特登嚟到呢度食又韓國人主理嘅正宗韓國燒烤，全因為價錢實在太吸引，點評優惠價 298元，VIP只需138元。
餐廳非常大，地道韓式佈置，坐喺梳化卡位都非常闊落。入座後職員送上前菜10小碟，仲一米長有機蔬菜拼盤，非常澎湃，影相一流。泡菜酸酸辣辣好新鮮，雞蛋非常厚實仲加咗雜菜，薯蓉打得綿密，小朋友都好鍾意。海帶湯非常冰涼， 入口帶酸，估唔到咁開胃。
熱菜有一款韓式拌飯，非常有鑊氣，材料好豐富。泡菜煎餅材料非常多，泡菜微辣，夠晒刺激。
燒烤肉有三款，先來首爾1993牛五花，薄薄一片，油花非常靚，口感嫰滑，調味甜甜的，非常好味。牛排肥瘦適中，牛味香濃。五花肉就較為平實，給比下去了。配燒肉跟三款沾汁，韓式辣醬，不辣的豆醬及椒鹽口味。另外仲有一碗石鍋海鮮包肉醬，熱辣辣，只係加咗肉碎，蝦仁嘅咸香豆醬，點肉非常之惹味，用新鮮蔬菜包起，多一份清爽。最後以兩個圈烤菠蘿作結，菠蘿非常香甜多汁， 正好解膩。
臨走仲有自助雪糕，簡單三款，雲呢拿，士多啤梨及抹茶，仲有鬆脆雪糕筒，鍾意食乜嘢味道都可以。打卡仲送飲品一罐。
餐廳環境好，BB椅及兒童餐具齊全，仲有圍裙送贈。服務一流，全程有服務員幫烤，仲不留意你嘅需要。食物賣相一流，味道都十分好，分量充足，呢個套餐足夠一家四口食飽飽，呢個價錢絕對超值。據聞仲有韓服體驗，可惜當日關閉冇得試。絕對有興趣再來。
