深圳景田婦兒大廈 15/5/2024 11:00
景田婦兒大廈就好似一個小社區咁，裝修得幾得意，下面有唔少餐廳。時間尚早選擇食呢個Pizza。
酷兒兩件套餐 39.9元，包括烤奧爾良雞翼，大大隻，肉汁幾豐富，微辣幾惹味。美式土豆培根披薩6寸細細個，餅皮幾鬆軟，薯仔大大片，煙肉咸香，上面舖滿芝士，非常咸香。
爆汁流心雙腸仔 26.5﹕一款係肉腸，另一款係芝士腸，兩款外皮都脆脆，中間真係爆晒汁，味道香濃。
濃香咖哩雞拼芝士肉醬焗飯 27元﹕熱辣辣香味十足，一半係甜咖哩，仲有好多薯仔雞肉。另一半係香番茄肉醬，上面舖滿芝士，正好撈飯。
草原牛肉串 17元﹕估唔到肉質不錯，調味亦不錯。
食物不錯，環境不錯，適合親子。
深圳中航城君尚購物中心 12/5/2024 11:00
慶祝母親節食好野，即興想食燒鰻魚，就黎到呢間最出名嘅北村韓食。11:00未到，門口已有一大堆人等緊位，我地拎五人枱籌號，估唔到係C01號。夠鐘開門，叫號次序係由大枱開始再叫細枱，所以好幸運係全場第二張入座，仲坐到一個闊落嘅梳化位，三人坐梳化都算可以接受。
外面有自助醬料可以自由選擇，一般燒烤用嘅醬料都齊全，仲有好多泡菜、醬菜任添。最值得試就係南瓜粥無限喝，店家話十幾年來客人一直推薦，的確味道香甜，仲有好多南瓜蓉，真材實料。
活炸鰻魚主打雙人套餐 點卜5198元
套餐都幾豐富，除左有主打鰻魚，仲有幾款燒烤料及飽肚飯等。
小魚戲花生﹕辣花生配魚仔乾。
黑胡椒大片牛排﹕大大片牛排，肥瘦適中，肉質腍滑，口味甜甜帶微辣，連小朋友都好鍾意。
碳烤活鰻魚﹕鰻魚勁厚身，油分好多，肉質幾腍又無骨，加上香甜鰻魚汁及海苔，好鮮美。比之前食過嘅燒鰻更好食。
厚切黑豬五花﹕豬五花非常厚切，肉質比較實，亦無特別加調味，只自行落幾粒鹽，感覺給比下去。
另加散叫幾款，價錢都唔貴。
秘制泡汁薄切牛舌 48元﹕雖然係薄切但係都幾大碟，牛舌香甜醬汁醃過入晒味，口感幾爽口。
秘制牛肋條 58元﹕兩大條牛肋條，筋位比較多，有口感。比較以下牛排更勝。
韓式烤腸 29元﹕肉香味濃比較腍身嘅烤腸。
魚籽蔬菜沙拉﹕蔬菜新鮮，芝麻醬酸甜好開胃。
金槍魚拌飯﹕都幾大碗，有吞拿魚碎仲有好多飯素，甜甜地撈飯幾好味。
入座打卡送可樂。
全程有小哥哥幫燒，但小哥似乎係新手，成日得老細提點。開店初段似乎職員未返齊工，人手較少，一位小哥負責走幾枱，所以有段時間個爐灘左好耐都野燒，所以Hea坐好耐都未有野食。最後食足1.5小時走人，埋單補140元。
離開時見到出面等位更加誇張，坐左唔知幾多層人，人氣實在太勁。
九龍灣Megabox 5/4/2024 12:30
預祝母親節，搵左呢一間非常之Fancy嘅餐廳，餐廳環境非常之靚，餐牌亦非常之吸引。
綠野仙蹤意大利飯 $102﹕綠色底飯似係加左西蘭花，飯黏黏的，甜道香甜，仲有三粒帶子。
漆黑中的海鮮意大利飯 $115﹕黑底飯係墨魚汁飯，咸鮮味，仲有好多海鮮料。
粉紅吞拿魚貓耳朵粉 $128﹕賣相非常靚，意粉質地不錯，告拿魚厚切肉質實淨。
傳統卡邦尼意粉 $108﹕芝士味勁濃，咸香味十足。
甜蜜芋泥獨角獸梳乎厘 $168﹕一上枱實在太吸睛。梳乎厘好鬆軟，空白感十足，蛋味幾香。淋上厚厚嘅芋泥，粉紫色實在大愛，用彩虹棉花糖砌成獨角獸，好夢幻。
Lotus海鹽焦糖法式吐司 $88﹕吐司脆卜卜，勁香甜，加上海鹽焦糖，帶輕微咸香，不錯。
綿綿獨角獸沙冰 $68﹕非常可愛嘅飲品，飲品本身有漸層，係芋泥味沙冰，上面有一層鮮忌廉，再用左棉花糖砌成獨角獸。
環境靚到不得了，食物賣相靚，值得打卡，味道都算不錯。可惜就係其實餐廳一啲都唔Baby Friendly，話有BB high hair原來全店只有一張，其他係縛椅式比較適合大B的。兒童餐具欠奉，請自行準備。雖然驚喜係即日都可以訂位，但最後明明一行5大4小，居然只俾一張四人檯。眼見同場仲未坐滿，普遍都係3人坐四人檯闊落，當然唔期望可以坐8-10人枱，但我地就迫埋一張四人枱，舒適度係大大扣分，相當失望。
深圳領展中心城 28/4/2024 11:30
今次大众点评抽中一個非常正嘅二人餐，近近地就喺領展中心城嘅吳莊。中式門面，入邊裝修到好有風味，一個個卡位好似小包箱咁。
入座送上熱茶之外，仲有每人一碗雞蛋布丁，非常幼滑，有蛋味。
二人餐看似得幾樣餸，但係其實份量相當多，足夠四個人有餘。
酸梅汁 28元：估唔到一樽裝估計真係比1公升裝，四個人飲都非常足夠。味道夠濃，不錯。
石鍋豆腐19元：店員貼心建議可以做不辣版本，連小朋友都岩食。豆腐真係滑到不得了，醬汁香濃，放喺熱鍋上，熱到不停冒泡。
砂煲扁豆絲 34元：非常之夠鑊氣，扁豆切得好幼，好新鮮而且冇根。醬汁有肉碎等，好味咸鮮味，好惹味。
酸菜魚 78元：終於有機會試國內嘅正宗酸菜魚。非常大嘅一盤酸菜魚，份量澎湃。魚片非常多，每件都好滑，無骨。酸菜湯底，花椒味重帶微辣，伴菜仲有好多金菇，不錯。
麵包誘惑 33元：賣相非常之吸引，高高嘅麵包塔，原來高塔中空用雪糕堆滿，奶味香濃。麵包焗得香脆，好味。
環境，服務甚佳，食物味道非常高質素，係一個好高質素嘅霸王餐。正價都唔算貴，唔怪得咁多人排隊食。
深圳中航城君尚 21/4/2024 17:30
又抽中大眾點評零元探店。今次試呢一餐自己一定唔會俾錢食嘅湖江菜，只係貪佢幾高級，環境幾舒服，姑且試一次。
提子青檸汁：非常之大枝，提子味幾香，酸酸甜甜幾開胃。
蠶豆米拌鮮腐竹：作為一個餐前小食，冷盤，麻油味幾香，腐竹幾好味。
蕃茄絲瓜滑肉：非常多絲瓜，蕃茄，肉片幾滑，湯底係蕃茄湯帶好輕微辣味，撈飯也不錯。
沔陽蒸牛肉：就好似一個打碎咗嘅肉餅，仲有啲澱粉質，夾雜咗一絲絲牛腩，輕微辣味，味道可以，但有啲油。
蠶豆米燒蝦球：大量譚豆煮小龍蝦，醬汁非常辣，小龍蝦都好多，但個人興趣不大。
楚采櫻花糕：賣相非常靚，淺粉紅色嘅花形狀糕點。饅頭包住中間粉紅色醬汁，都食得出花香咪味道，非常特別。
呢一餐自己一定唔會俾錢食，每樣菜式對個人嚟講都非常獨特，試過一次就算。
深圳萬象天地 21/4/2024 12:00
今日落大雨，打斷咗原定嘅計劃，轉場去萬象天地試吓呢一間人氣高嘅西餐廳。位置就係平台半戶外位置，選擇坐喺開機長枱，環境相當闊落，寫意。
精選親子brunch 258元
兒童餐：卡邦尼意粉、炒蛋、薯條、橙汁。卡邦尼意粉奶香味濃味道不錯。
慢煮牛腹肉三文治：份量非常澎湃，三文治鬆軟，中間夾咗好多唔同嘅配料，牛肉、生菜，醬料等等配合得宜。薯條新鮮即炸，粗身啖啖肉。
奶油草莓鬆餅：賣相討好，鬆餅係比較實淨嘅熱香餅，厚度十足，蛋香味牛油味濃。士多啤梨非常多，仲有士多啤梨醬同埋奶油，整體配合得好好，非常飽肚。
海鹽奧利奧蛋糕：估唔到呢件蛋糕咁大件，鬆軟嘅朱古力蛋糕，中間加咗鹽味奧利奧醬，再灑上餅碎。
卡布奇諾：咖啡味道不錯。
冰搖桂花烏龍茶：冰涼，味道比較清淡。
環境舒服，套餐非常豐富，賣相又靚，味道不錯，估唔到咁飽肚，非常滿足。
