丼丼屋
馬鞍山廣場 6/9/2024 12:00
今日打風多一日假期，帶小朋友嚟丼丼屋。而家兒童餐$75進化咗賣相不錯。有炸蝦、香腸，蛋奄列、烏冬變得細細碗，仲有一個乳酪同埋飲品，整體味道不錯。
咖喱滑蛋同唐揚雞丼$65：炸雞大大件炸得香脆，咖喱本身甜甜的日式口味，撈飯不錯。
南蠻雞溫泉玉子丼 $48 ：呢個竟然有五大件炸雞，炸粉本身有味，炸雞啖啖肉好多肉汁，仲有一隻半熟蛋。加$12套餐包括麵豉湯小食同飲品，非常抵食。
牛響度麵館
紅磡黃埔Aeon 1/9/2024 12:00
AEON美食廣場位置相當多，都幾多嘢食，今日揀呢間牛味非常香濃嘅店舖。
慢煮牛脷熱伴刀削麵 $57 好少地方有得食牛脷，呢度嘅牛脷份量相當多，口感不錯。刀削麵質地厚實，煙煙韌韌，揀咗招牌蔥油，醬汁甜甜，香蔥味濃郁，撈麵不錯。
沙茶鮮牛熱伴刀削麵 $57 鮮牛肉勁多，沙茶醬濃郁，少少辣啱啱好。呢款揀咗胡麻醬，撈埋青瓜同蘿蔔，非常之清爽。
粟米豚肉小雲吞 $48: 一大碗淨雲吞有20粒咁多，味道不錯，小朋友最啱。值得一提揀咗牛骨湯非常清爽，淡淡牛骨香味。
蒜泥白肉 $38 ：賣相不錯，白肉上面鋪咗厚厚一層蒜泥，加上醬汁同埋辣油，非常開胃。
埋單啱啱好$200 ，抵食又飽肚。
渝月精致川菜
外賣@深圳雅寶星河World Coco Park 25/8/2024 18:00
包裝非常不錯，乾淨企理。非常欣賞酸菜魚係密封錫紙包裝，可以保存到溫度，湯又冇倒瀉。
蒜泥白肉 42元：賣相非常不錯，白肉上面鋪滿蒜泥白肉本身香甜，口感爽脆，醬汁調味重口味，蒜味十足，加上辣油，非常刺激，每一片都夾咗青瓜，口感清爽，好算係印象中最好食嘅蒜泥白肉。
酸菜魚 60元：打開就見到魚肉非常多，每片都大大片，好鮮甜。湯底酸味十足，蒜味香濃，辣味唔重，更加啱個人口味。仲有好多金菇，酸菜，粉絲索晒湯汁，非常好味，送飯一流。仲有三色盆菜，香脆花生米、醬油豆腐乾、辣泡菜。
兒童餐 9.9元：有兩隻醬香雞翼，根本就係山姆燒雞嘅味道，非常入味，微辣。脆薯條，椰汁饅頭，另外仲有微甜八寶粥。
除餐奉送兩碗糖水，應該係桃膠雪耳糖水，微甜，杰杰地，非常多料，正好解膩。
估唔到呢個四川菜外賣咁好食，絕對值得encore。
妃予冰糖葫蘆
深圳皇廷廣場 25/8/2024 18:30
點評抽中霸王餐，皇庭廣場近近地，試吓呢間妃予冰糖葫蘆。見到玻璃櫥窗好色彩繽紛，有好多唔同類型嘅水果冰糖葫蘆葫。霸王餐（原16元）包兩串小冰糖葫蘆，用個靚靚紙盒載住，外賣拎返屋企可以慢慢食。色彩繽紛，賣相好靚。士多啤梨配搭兩粒藍莓，冰糖外皮超級脆脆，非常香甜，士多啤梨好新鮮，咬開仲有好多果汁爆出嚟，酸酸甜甜，非常好味。另一串揀咗青提子，大大粒，冰糖脆脆之下，提子果汁更多，非常清爽。
扶酥先生
深圳寶雅星河World Coco Park 25/8/2024 18:00
雅寶Coco world 新開的麵包店，香氣滿滿。 麵包款式相當多，價錢都幾優惠。
麻糬布甸包 （16.8元/4個）：細細個相當可愛，麻糬包味道不錯，但係比較腍身，布甸蛋味香，口感幼滑，不錯。
半熟芝士蛋糕（19元/4件）：有奧利奧口味和原味，口感濕潤，芝士味香濃，味道不錯。奧利奧版本味道都相當突出。
點評打卡送兩粒忌廉泡芙，外皮薄薄，中間忌廉餡非常多，味道微甜，奶味香濃，雪凍咗好似雪糕泡芙咁。
一田屋飯團
外賣@深圳雅寶星河Cocopark 25/8/2024 17:00
特登再嚟雅寶係因為中咗點評0元探店，有一個飯團套餐（原價50元），都幾豐富，外賣晚餐啱小朋友。
流沙雙蛋黃飯團：飯團新鮮即整，熱辣辣，材料非常多，紫米飯底，加上蛋黃之外，仲有好多肉鬆、生菜、青瓜等，醬汁亦夠多，味道不錯。
關東煮五串：自選魚蛋、金菇卷、魚板等，味道都類似，魚味幾香，索咗湯汁不加醬料清清淡淡都幾好味，小朋友好鍾意。
爆汁烤腸：熱辣辣，烤腸外皮脆卜卜，肉汁豐富，味道不錯。
手造米漿：米漿非常濃厚，微甜。
外賣@深圳雅寶星河Cocopark 10/12/2023 16:00
今日買兩個飯團做下午茶。飯團新鮮即製，拎上手時飯熱到辣手。揀咗兩個唔同味道。
黑豬香腸飯團 16元：基本飯團大塊紫菜包住好多飯，仲有好多醬菜、肉鬆等等。呢款加入黑豬香腸，香腸味都幾龍，輕微黑胡椒辣味，幾惹味。
爆漿芝士飯團 17元：呢款中間加左芝士，餡料多，芝士爆晒漿。
飯團非常飽肚，夠乾淨新鮮。
