深圳皇庭中心 28/1/2024 17:00
今次抽到大众点评免費試，一個單人套餐。
京都照燒肥牛丼飯、蜂蜜芥末蔬菜沙拉、深海鱈魚扒、日式冰皮大福、味噌湯、蜜桃烏龍冷浸茶 （77元）
單人套餐都相當豐富，賣相不錯，尤其是一個小木盒裝住四款。肥牛都相當多，入口幾腍滑，仲有洋蔥配搭。最欣賞小食吉列鱈魚扒，魚柳啖啖肉，炸粉唔厚，唔油膩。蜜桃烏龍茶，不太甜相當清涼解渴。冰皮大福濃郁嘅朱古力味，凍冰冰幾好味。
另外點評優惠叫咗一份鰻魚飯，只需要29.9元。賣相當不錯，鰻魚鋪滿成個面，醬汁豐富。鰻魚都幾厚身，但略嫌有輕微腥味。鰻魚汁落得足夠撈飯，其實呢個價錢都算交足貨。
小店坐落冇乜人流嘅皇廷中心，清清淨淨優優閒閒食個下午茶都可以。
荃灣海之戀 26/11/2023 13:00
點評抽到兩份試食現金券，價錢$90。
小店坐落荃灣海之戀，舖位相當細少，座位亦比較窄，唔太適當帶娃。
白武士九州風櫻花蝦豚骨湯拉麵 配餃子套餐$64+ $24
賣相都可以，份量適中。湯底薄薄嘅豬骨味，有唔少櫻花蝦，拉麵正常，流心蛋可以接受，最好食反而係大大片又厚身嘅叉燒，肥瘦適中，幾爽口。餃子係菜肉餃，炸得香脆，內餡豐富。反而小食仲好食過拉麵。
侍元濃厚味噌豚骨拉麵 配炸雞套餐$64+$24
湯底淡味噌味，拉麵麵質尚算可以。流心蛋同叉燒反而比較好。炸雞係咁多款之中最突出，大大件，炸皮唔算厚，香脆可口，啖啖肉有肉汁，不錯。
完全是港式口味。
荃灣 26/11/2023 18:00
菜館座落荃灣某大街，要行樓梯上一層樓。菜館係傳統舊式菜館，衛生環境不太理想，每枱椅都貼近，幾乎背靠背，實在唔太適合帶小孩。如果唔係點評抽中$400現金券，都非常確定係唔會選擇呢D餐廳。
滷水鵝 $148﹕大大碟，賣相吸引，滷水鵝配上滷豆腐。滷水鵝啖啖肉，肉質嫰滑，都相當入味，特別要加上酸醋更加惹味。豆腐都好腍滑。
蠔仔肉碎粥 (小) $78﹕估唔到小碗都咁大碗。蠔仔相當多，隻隻都大大粒漲卜卜，非常鮮甜。配料仲有肉碎，方魚等，湯底幾清甜味道不錯。
潮州炒麵線 $118﹕份量大，潮州麵線係扁身麵線，配上蝦、鮮魷、蛋、芽菜等，醬料咸鮮味足。
超大杯檸檬茶 $38﹕的確好大杯，茶底濃郁，檸檬夠晒多，非常解渴。
環境唔討好，但食物質素高，菜色相當地道正宗。價錢合理，成年人聚餐可以考慮。
旺角 19/11/2023 12:00
餐廳就係旺角一座唔顯眼嘅商業大廈，搵地點都用上一些時間。餐廳相當大，但中午人客稀少，真係唔知佢點做生意。
午市特惠商務套餐 (每位$198)
因為我地唔太好海鮮，揀左兩份輕宜嘅套餐。揀左蘋果雪梨湯底，雞湯底配上蘋果雪梨，相當滋潤。出面仲有自選醬料，遇上選擇困難症，款式實在太多。兩份火鍋材料送上實在太吸引，擺盆勁靚，值得打卡。材料都非常多，鮑魚、基圍蝦、青口、鮮魷幾分鐘食得，相當新鮮彈牙。魚俾左白膳更驚喜，非常肥美鮮甜。肉類有安格斯牛肉同豚肉，少少地幾片，但係肉質相當腍滑，肉味香濃。各式潮州丸就相當豐富，首推彈牙多汁手打牛丸真係非常好味。最後仲揀左出前一丁兩個，配上新鮮蔬菜，連小朋友都岩食。隨餐有自家製蘋果雪梨水，姐姐仲送我地每人一杯牛奶雪花冰。
另外加配牛胸爽 ($88)，白色一片片絕對唔似肉類，原來係牛肉筋膜，煙煙韌韌，牛膻味勁香，估唔到咁好食。
營養粟米餃 ($40)、鮮肉野菌餃 ($40)﹕雖然餃子得小小四粒，但係超大隻，皮唔算厚，內餡澎湃到滿漏，味道香甜，小朋友最愛。
我地平常唔太好海鮮，又唔會無啦啦食火鍋，試過呢餐覺得非常驚喜。所有材料都非常新鮮，配搭得宜。餐廳空間夠大坐得舒服，服務亦相當好，有BB椅，值得推介。
大眾點評抽到香港免費試，價值$600。埋單最後$620，補少少錢絕對值得。
星怡@尖沙咀 19/11/2023 18:00
第二餐食星怡尖沙咀分店。分店坐落Isquare相當方便。
新加坡怡保雞絲河粉湯 $98﹕非常十分極之清淡嘅一味，材料有一隻蝦、魚片、一埋雞絲等，無特別。
新加坡農湯福建炒麵 $118﹕ 賣相麻麻地無乜色水，材麵有大蝦球，魚餅絲，豬肉片等，比較濕潤，但唔算惹味，明顯比上次茄汁炒麵遜色。
美祿煉奶沙糖多士 $48 ﹕份量唔算多，兩大件多士，中間夾左微冷嘅厚牛油，面層灑上美祿朱古力粉同煉奶，入口甜帶微咸，味道不錯有驚喜。
馬來千層糕 $42﹕班蘭椰味香，濕潤有實感嘅蛋糕。
黑糖寒天椰汁冰 $39﹕非常濃郁杰物嘅椰汁，加寒天啫喱條，飲幾啖覺得幾香，但多飲就覺得太甜唔解渴。
玫瑰花蜜茶 $33﹕玫瑰花味香，蜜糖夠多，味道香甜。
今次點評有$400，埋單補$13，價錢可接受，但明顯上次黃大仙食嘅比較好。
星怡@黃大仙現崇山 5/11/2023 18:00
呢間東南亞菜原來都有幾間分店，今次嚟到黃大仙現崇山店，從地鐵站行過去大約5分鐘一個住宅商場地下。店舖外邊有戶外空間，可以睇波，相當有情調今日一家大細揀咗室內嘅卡位。
海鮮釀油條 $88
賣相幾吸引，油條包住蝦膠、雜菜等，炸得非常鬆脆，一啲都唔油膩。加埋酸甜辣醬，多一份酸辣味更加開胃。
櫻花蝦炒飯 $98
賣相非常之吸引，除咗舖滿櫻花蝦之外，仲有大大飯蝦球。真係非常大隻，仲有五六隻咁多，都相當彈牙，但係一如正常蝦味就欠奉。飯炒得乾爽。
乾炒馬來蝦麵 $98
材料非常豐富嘅炒麵，一樣有大大隻蝦球，魚餅絲、蛋、番茄、芽菜等。油麵用蕃茄汁炒過，仲有少少鹹鮮味。旁邊有參巴醬，可以按需要自行添加，加咗之後更加多一陣香味。
鳳梨水果茶 $39
甜甜地微酸嘅菠蘿汁加上好多唔同類型嘅雜果。
美祿恐龍 $33原來
美祿飲品加上朱古力脆脆，飲品仲係暖笠笠，絕對講唔上係凍飲。
樣樣食物都新鮮熱辣，好笑嘅係點杯凍飲都係熱嘅。食物味道尚算可以，服務都係正常，但係衛生環境改善進步空間。
第一次抽到大众点评香港免費抽，有$400現金券。埋單連加一總數大約$390 ，唔需要補錢。
深圳萬象天地 12/11/2023 10:30
成功抽到大眾點評免費試食二人餐。今日重臨萬象天地，一樓半戶外嘅平台就見到陶陶居。
咁早嚟到人流都已經唔少，好彩唔需要等位。興幸坐係一張靠邊卡位非常之闊落，見中間圓枱比較貼近較為迫。坐低先飲啖普洱茶，清香錯。
點評送既二人餐已經非常豐富，但係熱菜需要11點後才供應，只好先叫幾個點心填下肚。
黑魚子香菇燒賣 36元：燒賣啖啖肉，好實在，菇味香濃。
流沙奶黃豬豬包 29元：賣相非常可愛，新鮮熱辣，流沙奶黃爆曬出嚟，唔太甜，味道不錯。
回味荔灣艇仔粥 33元：餸都非常多，有魚肉、疑似鮑魚絲、豬皮等。粥底本身好綿好夠味。
陶陶居大蝦餃﹕係點心四大天王之一。蝦餃超級大粒，起碼比平時酒樓食大1.5倍，非常飽滿。餃皮都算薄，蝦非常之多而且爽口。
明爐香滑靚葡撻﹕新鮮熱辣，皮非常酥脆，蛋非常幼滑，入口即溶，不太甜。
紅燒乳鴿﹕外皮脆卜卜，內有肉汁，啖啖肉。
惹味秋葵煎牛肉粒﹕賣相一流，材料非常多，牛肉超級腍，蒜味十足，好香口。
啫啫生菜煲﹕連煲上菜相當澎湃，熱辣辣，有蝦乾帶點鹹鮮味。
乾粉牛河﹕非常大碟，賣相一流，入口有鑊氣，餸料牛肉都非常多。
食物水準十分高，新鮮熱辣味道好。服務亦一流，服務員非常多，自動自覺。其實點心價錢非常可觀，一籠燒賣都近40元，但係就免加一，價錢同香港比較差不多，但深圳食一定質素更佳。
